Yitjuralpuyŋu buḏapthurrunana mayaŋ'ku Djodanbuyŋu
3:1-17 (The Israelites crossed over the Jordan River)
1Goḏarr'nha munhakumirrina wiripuŋuyuna waluyu, Djatjuwa ga nhanŋu mala ḏurryurruna, bala djoṉguŋalana marrtjina walalaŋguway girri'na malanha, bala yana marrtjinana-wala. Marrtjinanydja walala yukurrana yana liŋgu-u-u, baṯ-gay mulkana mayaŋ' wäŋa Djodanbuy, ga ŋunhalana walala wäŋaraŋala galki mayaŋŋurana, galkurrunana yukurrana buḏapthunarawuna ŋurukuna bala wiripuŋuwuna makarrwu wäŋawu.
2Nhinananydja walala yukurrana ŋunhiliyinydja ḻurrkun' walu-ŋupara, ga ŋuliŋuruyinydja dhäŋuru ŋurru'-ŋurruŋu ŋunhi yolŋu walala marrtjina yukurrana ḻiw'maraŋala wäŋakurru, 3waŋana marrtjina walalaŋgala yolŋu'-yulŋuwala bitjarra, Ŋunhi nhuma yurru nhäma ḏalkarra'mirrinhanydja walalanha, walala yurru marrtji gäma bala ŋunhiyi Dhawu'-nherraṉminyaramirri Bathi, ŋunhiyinydja ḻakarama yukurra ŋilimurruŋgu Godtja dhiyalami bäyma ŋilimurruŋgala; ŋunhi yurru walala ḏalkarra'mirri walala marrtji-wala ŋurru-warryundja, ga ŋilimurrunydja yurru munguyunna, malthundhi-wala walalaŋgu yurru. 4Dhuwalayinydja yuṯana dhukarr, yaka ŋilimurru ŋula marrtjinya ŋuli ŋäthili balakurruyi dhukarrkurru. Nhuma yurru malthurranydja nhanŋuway yana Dhawu'-nherraṉminyarawuywu Bathiwu, yurru marrtjiyanydja walala yukirriya märr-barrku, märr-barrkukurru biyaka bala ya', yaka galkikurrunydja walŋu.”
5Bala yana Djatjuwayu waŋana ŋunhi yolŋunhanydja walalanha bitjarrana gam', “Ma', ḏarrtjalkkunhamiyana walala ganaŋ'maranhamiyana walŋu nhunapinyay nhe; nhuma yurru nhanŋuwaynha walŋu yolŋu Garraywuna yana, liŋgu goḏarrny'tja Garrayyu boŋguŋu djäma ganydjarr ḏumurruna walŋu ŋilimurruŋgala.”
6Ga dhäŋuru ŋuliŋurunydja ŋayi Djatjuwayu waŋana ḏalkarra'mirrinha walalanha bitjarra, “Ma', ḻaw'maraŋana walala dhuwaliyi Dhawu'-nherranminyarawuynhanydja Bathinha, bala marrtjiyana-wala. Nhumanydja marrtjiya ŋurruŋu dhiyaku yolŋu'-yulŋuwu, ga walalanydja yurru marrtji ŋapa-munguyun nhumalanha.”
Bala yuwalkthi walalanydja märraŋalana ḻaw'maraŋalana ŋunhiyi Dhawu'-nherraŋminyarawuynhanydja Bathinha, bala yana marrtjinana, ga walalanydja ŋunhi bukmaktja yolŋu walala ŋapawana malthurruna marrtjina walalambala bala.
7Ga ŋunhalanydja Garray waŋana Djatjuwawala bitjarra, “Gäthuranydja ŋarra yurru djäma ŋula nhäna wiripuna yana, ganydjarr ŋutu'na walŋu biyapul'nha, bala yurru bukmakthunydja yolŋuyu nhämana ŋunhiyi, bala dharaŋanna yurru, ŋunhi ŋarranydja dhuwala nhokala galki, gäma ŋarra yukurra nhuna, bitjan yana liŋgu bitjarra ŋarra marrtjina yukurrana galki Mawtjitjkala. 8ḻakaraŋa ŋuripa ḏalkarra'mirriwanydja walalambala biyaka, ‘Ŋunhi nhuma yurru dhunarranydja-wala ŋunhiwala mayaŋ'lili gapulilinydja, yana marrtjiyana-wala mukthurrana yana bala, ga ŋunhi yurru nhuma yarrupthundja ŋunhimala mayaŋ'lilinydja ḻukuyunarra, ga marrtjiyanydja-wala baḻwaḻyunmiyanydja yana mukthurrana, bala djingaryurranydja marrtjiya ŋunhili bili ṉapuŋga' yana mayaŋŋura.’ ”
9Bala Djatjuwanydja wäthurruna waŋanana ŋuriki yolŋu'-yulŋuwunydja bitjarrana, “Go marrtjiyana walala lili, ga ŋäka dhuwala Garraynha dhäruk. 10-11Ŋunha bala wäŋaŋura, ŋunhayi yolŋunydja walala yukurra nhina wiripu ga wiripu bäpurru', yurru ŋayipina Godthuna yurru walalanha gukumanydja ŋuliŋuruyi wäŋaŋuru, bala nhuma yurru marŋgithirrina ŋunhi ŋayipina ŋilimurrumbala walŋa-ḏikṯiktja waŋarr dhuwala, galki galiŋura, guŋga'yun marrtji ŋilimurrunha ŋayi, liŋgu ŋunha ya' Godku Dbawuŋ-nherranminyarawuynydja Bathi yukurra marrtji ŋurru-warryun ŋilimurrunha, ŋunhayinydja ŋunhi ŋayinydja Garray bukmakkuna dhiyaku wäŋawu buku-ḻiw'maramana. 12-13Yo, walala yurru ḏalkarra'mirriyunydja walalay ŋuriŋinydja gäma marrtji ŋunhiyi Dhawuŋ-nherraiiminyarawuynhanydja Bathinha nhanŋu Garraywuna, ga ŋunhi yurru walala ḻukunydja ḻupthun gapulilinydja, bala ŋayinydja yurru Garrayyunydja marrtji gapunydja gulkthunmaramana, baṉḏany'kumana ŋayi yurru dhukarrnha ḻapmarama yolŋu'-yulŋuwuna buḏapthunarawuna yukurranharawu.”
14-15Yo, mayaŋ'tja ŋunhi Djodanbuynydja bathalana ŋanyana gapunydja, ga djaŋ'-djaŋnha walŋu, wirrkina yukurrana waṉḏina ganydjarryuna, liŋgu ŋunhiyinydja walu waltjaṉmirrina. Ga yolŋu'-yulŋunydja ŋunhiyi bukmak djingaryurrunana yukurrana goŋ-girri'mirrina walala, marrtjinyarawuna-wala buḏapthunarawu mayaŋ'kuna. Bala walala ŋunhi ḏalkarra'mirrinydja walala yarrupthurruna, gäŋala marrtjina ŋunhiyi Dhawu'-nherraiiminyarawuynydja Bathi, ga ŋayathaŋala walala ŋunhiyi mayaŋ'tja gapunydja. 16Marrtjinana walala yukurrana yarrupthurrunana walŋu ḻuku-ḻupthurrunana gapulilinydja, bala ŋayinydja marrtjina dhunupa gapunydja gulkthurrunana, gulk bitjarrayi, ḻapthurruna baṉḏany'thinana ṉapuŋga'kurru yana. Bala yana ŋunhi yolŋu'-yulŋunydja buḏapthurrunana yukurrana baṉḏany'kurruna dhukarrkurru. 17Ga mukthurruna yana walalanydja ŋunhiyi ḏalkarra'mirrinydja walala dhärrana yukurrana ŋunhili bäyma yana dhunupaŋuŋura mayaŋŋura, yana liŋgu ga bukmak walala buḏapthurrunana yukurrana, bukmak yana ŋunhi miṯtji.