Djatjuwayu goŋdhu märraŋalana wäŋanydja, bala barrku'-barrkuwatjkuŋalana malawu ga malawu
11:1—14:5 (Joshua took the whole land and divided it among the tribes)
1-5Ga walalanydja wiripu-guḻku'yunydja giŋdhu walalay ŋäkulana ŋurukuynha Yitjuralpuyŋunhanydja, ŋunhi nhaltjarra walala miriŋunha djuḻkthunmaraŋala, bala walalanydja yukurrana miṯtji bukmak yana marrtjina waŋgany-manapanminana, märr walala yurru waŋganynha mala nyäṉ'thun bala Yitjuralpuyŋuwanydja.
6-9Bala Garraynydja waŋana Djatjuwawala bitjarra, “Yaka beyaṉiyiyanydja walalambala. Ŋarranydja yurru wekama bukmaknhana yana ŋunhayinydja walalanha nhokalaynha goŋlili, ga goḏarr'nha nhe boŋguŋu nhäŋu walalanha murrmurryunaranydja.” Bala Djatjuwayunydja yurrum'maraŋalana nhanŋuwaynydja ŋunhi miriŋunha, bala yana marrtjinana, withiyarana ŋunhiyi miriŋunhana bena dhikana malamirriŋunhana. Yurru walala gay ŋuriŋi Yitjuralpuyŋuyu yolŋu'-yulŋu walalanha ŋuparana yukurrana, bumarana marrtjina yana walalanha, yana liŋgu ga warrpam'thurruna walŋu dhawar'maraŋala raku'-rakunyguŋala.
10-15Ga ŋuliŋurunydja Djatjuwawu miriŋunydja walala marrtjina nhäyikayuna Yatjulilina wäŋalili, ga ŋunhalanydja walala bumara yukurrana giŋnhana ŋurukuyyi wäŋawuy, ga ḏaw'-ḏawyurruna buku-yapmaraŋalana wäŋanydja, ga yolŋu'-yulŋunha bumara dhawar'maraŋalana. Ga dhurrwaraŋuru ŋuliŋurunydja walala wiripulilina giṯthurruna, ga ŋunhalanydja bala wiripuŋuranydja bumara bitjarra yana liŋgu. Ga wiripuŋulili giṯthurruna, wakinmirrilili yana wäŋalilinydja marrtjina, bala djutjnha bumara marrtjina, bitjarrana liŋguna wäŋanydja ḏaw'-ḏawyurruna marrtjina, ga warrpam'nha bumara marrtjina rakunyguŋalana ŋunhi rom-yätjmirrinhanydja yolŋu'-yulŋunha.
16-23Yo, Djatjuwayu märraŋala wäŋanydja ŋunhi bukmaknha yanana, ŋulaŋuru liŋgu ŋanhdharkŋuru wäŋaŋuru ga yanana liŋguna ga ŋunha bala buku mulkana Yämanbuy. Walala marrtjina bumaranydja buŋgawanhanydja walalanha ga yolŋu'-yulŋunha, bumarana yanana dhawar'maraŋalana wäŋanydja malanha ŋunhiyi warrpam'thurruna, yakana ŋula walala waŋganynha walŋakuŋala, ŋunhina liŋguna waŋganynha wäŋanydja ŋunhi Gipiyan yukurrana nhinana. Yo, Djatjuwayu märraŋala wäŋanydja ŋunhiyi bukmaknha yana Gaynandja, bitjarrayi liŋgu bitjarra ŋunhi ŋayipi Garrayyu ḻakaraŋala nhanŋu Mawtjitjku ŋäthili be, bala ŋayi wekaŋalana bukmak ŋunhiyi wäŋanydja ŋuriki Yitjuralpuyŋuwana yolŋu'-yulŋuwa, märr walalambalaynha ŋunhi wäŋanydja gupaḏalnha yurru yukurra djingaryun. Bala yana Yitjuralpuyŋunydja yukurrana nhinana ŋamathaŋalana yana-wala ŋunhalayi wäŋaŋura, ganaŋ'thurrunana mariŋurunydja ŋula nhäŋurunydja yänana yukurrana nhinananydja walala.