Garraywunydja Walu galkina dhuwala
2:1-11 (Warning that the Day of the Lord is near)
1Yo, ḻoḻthurrana yiḏakinydja dhiyalinydja nhuma Godkalanydja wäŋaŋura, Djäyandja yäkuŋura. Marŋgikuŋana gawaw'yurrana, gaya'-gayaw biyakana; marŋgikuŋa yolŋu'-yulŋunhanydja dhipuŋuru dharrpalŋurunydja bukuŋuru wäŋaŋuru. Yo, nhumanydja dhuwali yolŋu'-yulŋu Djudawuynydja marrmarryunmiyana barrariyana, liŋgu Garraywunydja walu dhuwala galkina gal'ŋu, galkina ŋayi yurru marrtjina baḏuwaḏuyunarawu warrpam'thunarawuna-wala yanana yätjkunydja. 2Yo, ŋuriŋi dhä-yawar'yunarayunydja waluyu dhuwalanydja wäŋa yurru buku-munha'yirrina; warrpam' yurru ŋunha gäraktja gungamana ŋuriŋiyinayi buku-munha'yuna yukurra ŋäkirrmarama. Yo, miriŋunydja yurru marrtjina biyapul'nha wal'ŋu ŋula nhämunha'na miṯtji, bala walala yurru baḻaka'yundja warrpam'thunna monyguma wäŋanhanydja buku-ḻiw'maramana yana nyäṉ'thun. Yaka balanyarayi miriŋu dhiyalaŋuminydja wäŋaŋura ŋäthilinydja, ga yaka yurru biyapul dhiyalayi balanyarayi, ŋula nhämunha' miṯtji miriŋu.
3Yo, dhuwalanydja gay wäŋa mirithirri dhika wal'ŋu, dhapirrk dhika ḻatju', yurru ŋunhiyi miriŋunydja yurru nyäṉ'thunna, bitjanna bitjan gurtha ŋunhi worrk yurru nhära. Yo, marrtjinydja walala yurru djarrany bitjanna yana-wala, baḏuwaḏuyun yurru warrpam'thunna yana, ŋunha bala dhuḏithu ga gumurrŋura. Ga ŋunhi yurru miriŋu djuḻkthunna, ga dhuwalanydja yurru wäŋanydja räwaknha wiraŋnha. 4Yo, ŋunhiyi miriŋunydja yurru ŋurruthirrina-wala yanana, waṉḏirrina-wala yukurra yana yurru, waḏutjana dhikana, bitjanna bitjan yarraman'thu ŋuli gäma miriŋunha marilili nyäṉ'thunarawu. 5Yo, wapthu'-wapthundja walala yukurra yurru buku'-wukukurruna bala, ga rirrakaynydja ŋunhinydja biyapul'nha wal'ŋu yana, balanyarana bitjan ŋula nhämunha' miriŋu miṯtji, ŋunhi walala yurru marrtjinydja gaya'-gayaw bitjanna, girri'-ŋamathirri yukurra marililina nyäṉ'thunarawuna. 6Ga walala yurru yolŋu'-yulŋuyunydja nhäma buku-beyaṉumirriyuna walalay ŋunhi miriŋunhanydja marrtjinyaranydja galkithinyaranydja, ga bukmaknha yurru ŋunhi marrtji marrmarryundja barrariyuna ŋuriŋina. 7-8Yo, ŋunhiyinydja miriŋu biyapulnha gumurr-ḏälnha wal'ŋu, yana walala yurru ŋurruthirrina waṉḏirrinydja-wala, bala ŋal'yun yurru ŋunhiwala ḻoḻulili, ga yanayi-wala djuḏu-yuḏupthun bena-wala wäŋalilina. Dhunupana-yana walala yurru yukurra waṉḏirrinydja ŋunhiyi ganydjarryuna, bil'-bilyunamiriwnha nhämiriwnha, yakana yurru ŋanydjaḻa'yun gali'lili ga gali'lili, ga yakana walala yurru ḏur'-ḏuryunmirri yukurra; dhunupana yana walala yurru yukurra waṉḏirrinydja bena-wala, ga yakana yurru ŋula nhäyu ḏaḏawmaramanydja gulmaramanydja walalanha. 9Yo, bitjanna walala yurru ŋunhi yulŋunydja gumurrmirrina wapthundja yukurra ŋunhiwalayinydja wäŋalilinydja; waṉḏirri walala yurru ŋunhi ḻiw'marama ŋuliwitjan ḻoḻukurru wal'ŋu, bala ŋal'-ŋalyunna ŋunhiwala buṉbulilinydja malaŋulili, ga dhalakarrkurru djuḏupthunna-wala yurru yana walala, ga dhurrwarakurru. 10Yo, munathany'tja ŋunhi wäŋanydja yurru gurr'kurryunna, ŋunhi walala yurru galkithirrinydja miriŋunydja ŋunhi, gumurr-walkithirrinydja, ga bitjandhi liŋgu ŋunha gäraktja yurru marrmarryundhi, liŋgu walu ga ŋaḻindi yurru buku-munha'yirrina, ga bitjandhi liŋgu ganyu'yu yurru yakana djarraṯawun'kuma yukurra wäŋa.
11Liŋgu dhuwalayinydjayi miṯtji miriŋu biyapulnha wal'ŋu dhaŋaŋnha, ga biyapulnha gumurr-ḏälmirrina. Ŋayi yurru Garraynydja yatjunna wal'ŋu, waŋa wirrkina dhikana, waŋa yurru gawaw'yunna nhanukalayŋuwu ŋayi miriŋuwunydja bitjanna, “Gul', ŋilimurru marrtjina!” bitjanna yurru, ga dhunupana yana ŋuriŋi miṯtjiyunydja nhanukala yurru dhäruktja ŋanya märramana, ga djämana yana-wala nhanŋu dhäruktja.
Yo, ŋunhiyinydjayi Walu Dhä-ḏir'yunaramirrinydja biyapulnha wal'ŋu barrarimirrina ḏaykun', liŋgu ŋuriŋiyinydjayi waluyu ŋayi yurru Garrayyunydja bumana yätjmirrinhanydja ŋunhi, buma baḏuwaḏuyunna yana warrpam'thunna, gupaḏalkumana yurru, ga yakana yurru ŋula waŋgany dhuwurr-yätj yolŋu yukurra nhina walŋanydja.
Ḻakarama yukurra yolŋu'-yulŋuwu, walala yurru bilyunna walalaŋgalay yätjŋurunydja
2:12-17 (Call to repentance)
12Yo, ŋunhiyinydjayi walu dhä-ḏir'yunaramirrinydja galkina dhuwala, ga dhiyakuyinayi märrwu ŋayi yukurra Garray waŋanydja bitjan, “Bilyurrana walala dhipuŋuruyinydja, gonha'yurrana dhuwali yätjtja rom. Go marrtjiya roŋiyiyana lili ŋarrakala, ga bukumirriyaŋana ŋoy-ŋathamiriwyuna. Ŋäthiyana biyakana wuyurrana ŋurikiyi nhokalaŋuwu ŋunhi yätjkuna dhuwurrwu; nyamir'yurrana ŋunhiyi, nyinyaŋdhurrana wal'ŋu, ga gonha'yurrana gupaḏalkuŋana. 13Biyaka wirrki wal'ŋu ŋayaŋunydja wuyurrana, warwumirriyiyana nhokalayŋu nhe ŋunhi ŋuriki yätjkuna. Yaka be biyaka girrinydja nhuŋuway barr'-barrmaraŋa, yana biyaka milkunhamiya warraŋulnydja nhunapinyay nhe warwu; ŋunha bala ŋayaŋu nhuŋu yulŋunydja bitjandhiyinydjayi yurru barr'yun wal'ŋu ga yuṯayirri. Go marrtjiya, roŋiyiyana lili Garraywalana. Ŋayi warray ŋunhi yuwalkŋunydja God nhuŋu, ga yuwalk ŋayi märryu-ḏapmaranharamirri yana, märr-ŋamathinyaramirrinydja ŋayi ga mel-wuyunaramirrinydja ŋayi. Yaka ŋayi ŋuli waḏutjanydja maḏakarritjthirri, bala dhä-ḏir'yunna ŋilimurrunha, liŋgu nhanŋunydja märryu-ḏapmaranhamirrinydja biyapul warray, bathala warray gal'ŋu, yaka ŋayi ḏukṯuk ŋilimurruŋgu baḏuwaḏuyunarawunydja. Yurru yuwalk ŋayi yurru dhä-ḏir'yundja ŋilimurrunha, ŋunhi ŋilimurru yurru mukthundja yukurra djämanydja-wala djarrpi' rom malanha. 14Yo, ŋuli ŋali yurru bilyun, ga gonha'yundja ŋunhiyi yätj-dhuwurr, ga ŋayinydja yurru Garraynydja bitjandhi liŋgu bilyundhi, ga yakana yurru ŋayi dhä-ḏir'yundja nhuna, yana ŋayi yurru goŋmirriyamana bitjanna wal'ŋu. Biyapulnha yurru ŋunhiliyi ŋathanydja dhika nhänydja malanha marrtji ŋuthandhi dhaŋaŋdhirriyi, ga biyapul yurru nhuma yukurra gäma ŋatha ga gapu weyika' borum, mundhurrnha nhanŋu Garraywuna nhumalaŋgalaŋuwu Godkuna.”
15Yo, ḻoḻthurrana yiḏakinydja ŋunha bukuŋura Djäyandja. Waŋgany-mana'manaparrana marrtjiya biyakana yolŋu'-yulŋunhanydja walalanha Garraywalana. ḻakaraŋa walalambala yolŋu'-yulŋuwanydja, walala yurru bukumirriyama yukurra ŋoy-ŋathamiriwyuna walalay. 16ḻuŋ'maraŋa marrtjiya biyaka waŋganygunhamiya nhumalanhay nhuma, biyaka ḏarrtjalkkunhamiyana; bukmakthirrina nhuma yurru gumurr-ŋamathirrinydja gumurr-wunanharawu Garraywuna. Gäŋa bukmaknha, ŋurru'-ŋurruŋunha yolŋu'-yulŋunha ga djamarrkuḻi'nha ga yo-yuthu'nha biyakayi liŋgu, ga yuḏatjpalnha yolŋu'-yulŋunha, walala yurru bukmak ganan wäŋa malanha walalaŋguway ga ŋula nhä malanha wiripu, ga marrtji gumurr-guwatjmanna ŋanya Garraynhana.
17Ga biyakayi nhumanydja ḏalkarra'mirriyunydja walalay djämayi marrtjiya Garraywu, gäŋa mundhurrnha nhanŋu Godku. Dhärriyanydja galki barŋlili, ṉapuŋga'lili gal'ŋu yana ga yolŋu'-yulŋuwala. Ŋäthiyana biyakana wal'ŋu, liŋgu ŋurikalayi walalaŋgala yolŋu'-yulŋuwala dhuwurryu yätjthu, ga bukumirriyaŋanydja walalaŋgu yolŋu'-yulŋuwunydja biyaka, “Garray wuyurrana, mel-wuyurrana dhiyakunydja nhokalaŋuwunydja ŋunhi yolŋu'-yulŋuwu. Walŋakuŋana ŋanapurrunha Garray, märr yurru ŋuruŋunydja wiripuŋuyunydja yolŋuyu bäpurru'yu nhäma ŋanapurrunha, ga yakana goŋmiriw ḻakaramanydja, warku'yundja waŋa bitjandja, ‘Wanhaka dhika be nhumalaŋgu Godtja?... Nhä dhika ŋayi?... Yalŋgi yulŋunydja guŋga'yunarawunydja nhumalaŋgu?’ bitjanna yurru. Garray, bäy-ḻakaraŋa ŋanapurruŋgu yätjpuynydja dhuwurrwuy.” Bitjandhina nhuma yurru bukumirriyamanydja, nhumanydja ḏalkarra'mirriyunydja walalay.
Godthu yurru balayi gaŋgathinyamirriyama ŋuthanmaramayi wäŋanhanydja
2:18-27 (God will restore the land)
18Bala ŋayi Garray waŋana bitjarra, “Dhuwalanydja wäŋa ŋarrakuway yana, yakana ŋula yolku.” Yo, ŋayi nhäŋalanydja yolŋu'-yulŋunhanydja maŋutji-wuyunaramirriyu warray, 19bala ŋayi yolŋu'-yulŋuwalanydja waŋana bitjarrana, “Ŋäka walala! Dhiyaŋunydja-wala ŋarra yurru wekama ŋatha ga borumnha weyika'na nhumalaŋgu, ga dhiyaŋinydjayi nhuma yurru nhina yukurra märr-bakthunna. Bäyŋuna yurru nhumalanha ŋuruŋu wiripuŋuyunydja bäpurru'yu warku'yun wakalkuma, ga ḻakarama nhumalanha nhäŋiniŋ'-ḻakaramanydja yurru. 20Ga ŋarra yurru gukumana ŋunhiyi nhumalaŋgu miriŋunhanydja bena-wala yana wal'ŋu barrkumalana baṉḏanylilina, räwaklilina wäŋalili. Yo, waṉḏirrinydja walala yurru yukurra birrka'mirrikurruna gatjaḻkurrunydja, ŋurru-ḻupthundja yurru gapulilina, ga wiripu-guḻkuny'tja yurru murrmurryun wiripuŋuŋurana gali'ŋura gapuŋura; bukmakthirrina walala yurru murrmurryundja, ga rumbalnydja walalaŋgu yurru barrpa'yirrina, bala ŋuriŋinydjayi yurru buŋgandhunydja monygumana, wekamana warrpam'nha wäŋanhanydja buku-ḻiw'maramana. Yo, ŋarra yurru baḏuwaḏuyundja walalanha warrpam'thunna yanana, liŋgu ŋuriŋi miriŋuyu djäma yukurrana mirithirrina yana yätjnha wal'ŋu.
21“Nhuma Yitjural wäŋa, yaka nhuma barrariya yukirriya, yana biyakana walala ŋayaŋu-djulŋithiyana wal'ŋu goŋmirriyiyana, liŋgu Garrayyunydja djäma mirithirri wal'ŋu bathala ga ŋamakurru, rom malanha nhumalaŋgunydja. 22Ga nhuma wäyin walala, yaka nhumanydja wilwilyunmiya barrariya, liŋgu dhuwalanydja gay wäŋa liŋguna ḻatju'yinana dhikana wal'ŋu, ga biyapul dhuwala mulmu ŋuthan marrtji dhika dhapirrkthirri ḻatju'thirri, ga ŋunha borumdja dharpa borummirriyinayi dhika wal'ŋu.
23“Nhuma yolŋu walala Djäyanbuynydja galŋa-djulŋithiya wal'ŋu. Goŋmirriyiya nhumalaŋgalaŋuwala Waŋarrwalanydja Garraywalanydja, liŋgu ŋäthilinydja ŋunhinydja Garrayyu yänguŋala djuy'yurruna waltjaṉ; ŋayi yukurrana dharyurruna märr-gaŋga wal'ŋu ŋunhinydja, ga biyapulnydja ŋayi yurru ŋunhinydja rarryunna-wala yanana nhumalaŋgu, dharyundja yurru ŋayi biyapulnha dhurrmukthunna wal'ŋu mirithirrina. 24Ga ŋathanydja yurru ŋuthan mirithirrina wal'ŋu guḻku'yirrina miṯtji-mäypayirrina, ga borum ga weyika' dhika nhä malanha biyapulnha yurru ŋanba'-ŋanbawyunna marrtji dhaŋaŋdhirrina. 25Yo, ŋäthilinydja ŋunhinydja ŋuriŋi ḏetjthu walalay ḻukana marrtjina mirithirri guḻku' ŋatha malanha dhawar'maraŋala, ga ŋulinyaramirriyunydjayi waluyu nhuma yukurrana nhinana dhäparkmirrina dhikana. Bala dhiyaŋunydja-wala ŋarra yurru wekama roŋinyamaramayi balayi nhumalaŋgu bukmaknha yana nhä malanha ŋunhi yukurrana winya'yurruna ŋulinyaramirriyu, liŋgu ŋunhiyinydjayi ḏetjtja malanha ŋarrakuŋu djuy'yunara, märr yurru nhuma marŋgiyirri, bala roŋiyirrina lili bilyun ŋarrakalana. 26Yo, ŋatha-guḻku'mirriyirrina nhuma yurru yulŋunydja; ḻukana nhuma yurru yukurra, yana liŋgu ga märr-ḏaw'yun yurru, bala nhuma yurru wokthunna wal'ŋu Garraywalaŋuwu yäkuwunydja, liŋgu ŋayinydja ŋunhi djäma mirithirrina dhikana dhapirrknha wal'ŋu nhumalaŋgunydja. Ga yakana biyapulnydja yurru ŋarrakunydja yolŋu walala goramirriyirri.
27“Ga nhumanydja Yitjural yurru marŋgiyirrina ŋarraku, ŋunhi ŋarranydja ŋarrapi yana Garray nhumalaŋgunydja waŋgany yana, ga dhuwala ŋarra yulŋunydja nhumalaŋgala ṉapuŋga'. Yakana biyapulnydja yurru ŋarrakunydja yolŋu walala goramirriyirri.” Ga bitjarra ŋayi Garray waŋananydja.
Ḻakarama yukurra Garraywunydja ḏaykun' bunanharawuna
2:28-32 (The Day of the Lord)
28Garraynydja waŋa yukurra bitjan gam',
“Yalalaŋumirriyunydja ŋarra yurru rarryunna. wal'ŋu djululu'yunna ŋarrakuwaynydja ŋarra walŋa birrka'mirriwalana yana yolŋu'-yulŋuwalanydja.
Nhokala gäthu'mirriŋuyu ḏarramuyu ga dhäykayu yurru ḻakaramana yukurra ŋarrakuŋu dhäruk dhunupana yana;
ŋuriŋi yawirriny'thunydja yolŋu'-yulŋuyu yurru nhäma mali mel-yurthinyara,
ga worruŋuyunydja yurru bukaway'kurruna maḻŋ'marama ŋarranha.
29Yo, ŋulinyaramirriyunydjayi ŋarra yurru yukurra rarryunna yana wal'ŋu ŋarrakuway Walŋanydja, ŋurikalayina walalaŋgala ŋarrakalaŋuwala djämamirriwalana, ḏarramuwala ga dhäykawala.
30Ŋarranydja yurru djäma biyapulnha yukurra ganydjarr bathalana wal'ŋu;
nhuma yurru yukurra nhäma ŋunha djiwarr'lilinydja ga dhipala bäymalili munatha'lilinydja biyapulnha ganydjarr,
ṉirryunaramirrina yurru maḻŋ'thun yukurra, balanyarana bitjan gulaŋnha ga gurthana ga ŋawulul' ṉoluŋdhirri yurru marrtji gaŋgathirri.”
31Ga walunydja yurru warumukthirrina ŋunha gärakŋuranydja,
ga ŋaḻindi yurru miku'yirrina gulaŋdhirrina.
Yo, dhuwala wäŋanydja munatha' ga djiwarr' yurru wiripuŋuyirrina,
yurruna ŋayi yurru Garraywunydja ŋunhi dharrpalnydja walu buna,
ŋunhiyinydja ŋunhi ŋayipina yurru Garraynha maḻŋ'thun rumbalnha.
32Bala ŋulinyaramirriyunydjayi yurru Garrayyu Godthunydja walŋakuma birrka'mirrinhana,
ŋunhinhanydja ŋunhi ŋayi yurru gawaw'yun nhanukala,
märrliliyama ŋäŋ'thun yurru guŋga'yunarawu nhanŋuway.
Liŋgu Garraynydja waŋa yukurra bitjan, “Yolŋu walala yurru ŋunhalanydja walŋathirrina yukurra bukuŋura Djurutjalamdja yäkuŋura,
yakana yurru bukmaktja yolŋu walala murrmurryun bukmakthirrinydja,
liŋgu ŋunhinydja walala ŋarrakuŋuwaynydja djarr'yunara yurru nhinana yukurra walŋamirrina.” Ga bitjarra ŋayi yukurrana Garray waŋananydja.