Godthunydja yurru baḏuwaḏuyunna Bapilundja wäŋanha
50:1-20 (God will destroy Babylon)
1-2Yo, dhuwalanydja gay dhäruk Garrayyu wekaŋala Djiramayawala, ḻakarama yukurra wäŋawuy ŋurukuy Bapilunbuy, bitjarra ŋayi waŋana gam', “ḻakaraŋa ŋuripa yolŋu'-yulŋuwanydja miṯtjiwanydja, ŋunhi Bapilundja yurru wäŋa yalalaŋumirriyunydja baḏuwaḏuyunna warrpam'nha; warrpam', yurru ŋunhi waŋarr malanha ŋurikiyi Bapilunbuyŋuwunydja yolŋu'-yulŋuwu buḻwaŋ'thunna, muṉguythirrina marrtji warrpam'nha yana yurru. 3Liŋgu miṯtji yurru yolŋu walala marrtji beŋuru ḻuŋgurrmaŋuru, bala baḏuwaḏuyunna yurru ŋunhiyi wäŋanydja, yakana yurru ŋula waŋgany yolŋu wo wäyin ŋula nhä walŋanydja yukurra nhina.”
4Ga biyapul ŋayi Garray waŋana bitjarra, “Ŋulinyaramirriyunydjayi yolŋu'-yulŋu yurru Yitjuralpuy ga Djudawuy marrtji ḻarrumana ŋarraku, rrambaŋina yurru; walala yurru marrtjinydja mel-ganuru'mirrina walala, nhäma marrtji warrya'yun walalaŋgalayŋuwu Waŋarrwu Garraywuna. 5Walala yurru waŋa bitjanna, ‘Milkuŋa ŋanapurruŋgu dhukarr, ŋanapurru yurru marrtji balayi roŋiyirri ŋunha Garraywala bukulili yäkulili Djäyanlili.’ Yo, walala yurru bitjandhinydja roŋiyirrina ŋarrakala, bala walala yurru djäma dhawuny'tja nherraṉ yuwalkkuma yana ŋarrakala, ŋunhi yurru yukurra dhärra bitjanna liŋguna gupaḏalnha. Yakana yurru walala biyapul bakmarama ŋunhiyi, ga bilyun ŋula wiripuŋuwalanydja waŋarrwala, bäyŋuna yana.
6“Yo, ŋarrakunydja ŋunhi yolŋu walala balanyara bitjan bembi mala, yurru ŋuriŋi djäkamirriyunydja walalay gatjpaḻ'maraŋala warray walalanha, bala walala gundupuŋalanydja winya'-winyayurrunana yana buku'-wukulilina, meṉguŋalana yana walala ŋunhi walalaŋguwaynydja wäŋa nhinanharawu. 7Bala ŋuriŋi miriŋuyunydja bumarana yana walalanha, waŋana bitjarrana, ‘Manymaknha dhuwalayinydjayi ŋanapurru yurru buma walalanha bitjandhinydja, liŋgu walala dhuwurr-yätjthina. Yaka walala yukurrana marrtjina galki walŋu malthurruna Garraywala,’ bitjarra.
8-9“Way, nhuma Yitjuralpuy yolŋu walala, gundupuŋana walala, gonha'yurrana dhuwaliyi Bapilundja wäŋa, liŋgu galki walalaŋgu yurru miriŋunydja marrtjina lili ŋurruthirrina, yurru djambatj-ḏilkurruna, yanana. 10Walala yurru djaw'-djawyunna bukmaknha nhä malanha dhipuŋuruyinydja wäŋaŋuru, bala roŋiyirrinydja yurru goŋ-dhawurrŋamirrina mirithirrina guḻku'mirri girri'mirrinydja.”
11Yo, Garraynydja waŋa yukurra bitjan, “Nhuma yolŋu'-yulŋu Bapilunbuy wäŋawuy, nhuma djaw'-djawyurruna ŋarrakunydja yolŋu'-yulŋunha, bala roŋiyinanydja nhuma galŋa-djulŋithinana ŋuriŋiyi. 12Yurru nhumanydja yurru goramirriyirrina yalalanydja, liŋgu dhuwalanydja wäŋa nhumalaŋgu yurru baṉḏanydhirrina räwakthirrina yolŋumiriwyirrina. 13Ŋarranydja nhumalaŋgala ŋaramurryina mirithinana, nhuma Bapilunbuyŋu, bala ŋarra nhumalanha yurru warrpam'nha yana baḏuwaḏuyundja dhawar'maramana. Bukmakthuna yurru birrka'mirriyuna nhämanydja, bala warku'yunna nhumalanha yurru.
14“Yo, girri'-ŋamathiyana nhumanydja gumurr-ŋamathiyana biyakana Bapilunbuyŋuwunydja wäŋawu bunharawu. Buŋanydja marrtjiya mirithirri yana guḻku'yu walŋu garayunydja bonarra'yunydja ŋula nhäthunydja, liŋgu wirrki yana walala yätjkuŋalanydja Garraynha. 15ḻiw'maraŋa yana warrpam' ŋunhi ḻoḻunydja, ga rirrakaynydja ŋurrkaŋa wirrki yana. Nhäŋa ya', ŋunha ḻoḻunydja marrtji burruḻ'yunna buku-yupthunna, liŋgu ŋayipinydja yukurra Garrayyunydja buku-ruŋinyamarama ŋupanayŋuyi yana Bapilunbuyŋunhanydja, ŋuriŋi yätjthu ŋunhi walala djäma wiripu-guḻku'wu yätjkuŋala bitjarrayi. 16Yakana yurru biyapulnydja ŋunhiliyi dhoḻkuma ŋuthanmarama ŋatha, ga gulkthun marrtji, yana walala yurru mulku'-mulkuruyunydja gananna ŋunhiyi wäŋanha, bala roŋiyirri balayi walalaŋgalaynha wäŋalili.”
17Yo, ŋayi Garray waŋana bitjarra, “Nhumanydja Yitjural balanyara dhuwala bitjan wäyin bembi malanha barrkuwatjkunhara maḏakarritjkuŋu wäyinguŋu. Ŋunhi ŋurruthaŋalanydja buŋgawayu Yatjiriyawuyyu bumara nhumalanha Yitjuralnhanydja, ga dhäŋuru ŋuliŋuruyinydjayi bitjarra buŋgawayu ŋuriŋi Bapilunbuyŋuyunydja ḻukana ŋarakana nhumalanha. 18Bala ŋarranydja yurru ŋuriŋi Yitjuralwalanydja Waŋarryu dhä-ḏir'yunna wirrkina yana ŋunhi märrma'nhanydja buŋgawanha maṉḏanha ga maṉḏaku wäŋa. 19Bala ŋarra yurru roŋinyamaramana gäma Yitjuralnhanydja yolŋu'-yulŋunha balayi walalaŋgalayi walala wäŋalili, ga ŋunhalayi walala yurru nhinanydja yukurra biyapul ŋayaŋu-djulŋithirriyi, ŋatha-guḻku'mirriŋurana wäŋaŋura. 20Ga ŋulinyaramirriyunydjayi Yitjuralyunydja yurru yakana biyapulnydja djäma ŋula nhä yätjkuma, yakana yurru ŋula yolthu maḻŋ'marama ŋarrakalaŋumirriwalanydja yolŋu'-yulŋuwala ŋula nhä yätj, liŋgu ŋarranydja yurru ŋunhi warrpam'thunna biḏiwiḏitjkuma yana yätjtja malanha ŋurikiyi märr-ḻurrkun'kunydja ŋunhi ŋarra yurru walŋakuma walalanha.” Ga bitjarra ŋayi Garray waŋananydja.
Godthu yurru dhä-ḏir'yunna Bapilundja
50:21-46 (God's judgement on Babylon)
21Yo, Garray waŋana bitjarra, “Ma' buŋana marrtjiya Bapilunnhanydja, buŋa warrpam'thurrana dhawar'maraŋana yolŋu'-yulŋunhanydja. 22Gaya'-gayaw biyakana yulŋunydja, liŋgu Garrayyunydja yurru baḏuwaḏuyunna warrpam'nha ŋunhiyinydja wäŋa. 23Ŋunhiyi Bapilundja wäŋa balanyarana biyaku ŋuli wutthunaramirri djimuku' ŋunhi yukurrana bumara bukmak wäŋa dhuwala munatha' djuḏul'yurruna buḻwaŋ'maraŋala, yurru ŋunhiyinydjayi djimuku' bunharamirrinydja, ŋunhinydja liŋguna bakthunarana buḻwaŋ'thunarana, ga bukmakthu wäŋayu miṯtjiyunydja nhäŋala ŋunhiyi wilwilyunminana yanana. 24Bapilun, nhenydja dhuwala gaṯmaranharawuy ŋurikiŋi garrpiṉara ŋunhi ŋarra nherrara. Nhenydja ŋunhi guyaŋina yanapi nhe yurru baḏuwaḏuyun ŋarranha, yurru nhenydja yaka marŋgi ŋunhi ŋarra nhuna gäŋala lili dhipala dhiyakuyi gaṯmaranharawunydja.” Ga bitjarra ŋayi Garray waŋananydja.
25Yo, Garraynydja ŋunhi gara-guḻku'mirri, märr. yurru ŋayi ŋuriŋiyinydjayi buma miriŋunha dhawar'marama, ga liŋguna ŋayi ḻapmaraŋalana ŋunhiyinydja wäŋa gara-guḻku'mirrinydja, ga girri'-ŋamathirrina yukurra marrtjinyarawu marililina, liŋgu ŋayi mirithinana ŋaramurryina ŋurikinydja miriŋuwunydja walalaŋgu. Ŋayipi Waŋarryu Garrayyu yurru djämanydja yukurra wirrki yana ŋunhiliyinydjayi wäŋaŋura Bapilundja. 26-27Gatjuy, buŋana marrtjiya ŋunhiyi wäŋanydja, biyakana marrtjiya galiŋuru ga galiŋuru. ḏaw'-ḏaw'yurrana buḻwaŋ'maraŋana marrtjiya ŋunhiyinydja wäŋa ŋunhi ŋathamirrinydja, ŋunhi ruwaŋmuyanhara ŋatha ŋunhilimi, bala djaw'-djawyurrana yanana ŋunhi nhä ŋayi yukurra ŋayathama. Bak-bakmaraŋana marrtjiya wäŋanydja malanha buṉbunydja, ga yaka meṉguŋa ŋula waŋganydja. Buŋana marrtjiya ŋunhi miriŋunhanydja walalanha warrpam'thurrana, liŋgu dhuwalana walu walalaŋgunydja dhä-ḏir'yunarawu, bukmakku yana Bapilunbuyŋunydja wäŋawuywu miṯtjiwu. 28Yurru Garraywunydja yolŋu walala yurru gundupumana-wala yanana, gananna ŋunhiyinydja wäŋa, bala gundupuma yurru balayi roŋiyirrina walalaŋgalanha walala wäŋalili Djurutjalamlilina. Ga walala yurru ḻakaramanydja ŋunhi nhaltjarra ŋayi Garrayyu bumara ŋunhiyi Bapilundja wäŋanha, buku-ruŋinyamaraŋalana ŋurikiyi ŋunhi ŋayi Bapilundhu baḏuwaḏuyurruna Godku Buṉbunha.
29“Yo, ḻakaraŋa yolŋu'-yulŋuwanydja garamirriwanydja walalambala, bala walala yurru marrtji bumana Bapilunbuynhanydja yolŋu'-yulŋunha. Djuy'yurranydja ŋunhiyi marŋgiŋumirrinha gara-ḏupthunaramirrinha walalanha. ḻiw'maraŋa yana wäŋanydja ŋunhiyi, märr yurru yaka ŋula waŋgany winya'yundja. Baḏuwaḏuyurra yana warrpam'thurruna walŋu, biyaka liŋgu yana bitjarra wiripunha malanha wäŋa ŋayi bumara dhawar'maraŋala. Liŋgu ŋayinydja ŋunhi ḻanydjatnha, ŋayinydja guyaŋirri yukurra yanapi ŋayi ŋarrakalanydja garrwar walŋu, ŋunhi ŋarranydja Yitjuralwu ḏarrtjalk warray walŋu Waŋarr. 30Bukmak yolŋu walala yurru Bapilunbuynydja murrmurryun warrpam'thunna, yuḏayuḏana ḏarramuwurru ga ḏälmirri walŋu ŋunhi mariwu, walala yurru yukurra burakirrina warrpam'nha yana ŋuriŋi mandjawakthuna ŋulinyaramirriyunydjayi waluyu.” Ga bitjarra ŋayi Garray waŋananydja.
31“Yo Bapilun, nhenydja dhuwala ḻanydjat-ḏumurru wäŋa, yurru ŋarranydja nhuŋu yukurra nyinyaŋdhun walŋu yana,” bitjarra ŋayi Garray God waŋananydja. “Walunydja dhuwala liŋguna bunana, ŋunhi ŋarranydja yurru nhuna dhä-ḏir'yunna. 32Nhe ŋuli ŋurr'yun ga märr-winya'yun nhokalay nhe be bathalayinyarayu walŋu, yurru yuwalk yana nhe yurru galkirrinydja, ga yakana nhuna yurru yolŋuyu ŋula yolthu guŋga'yundja dhärranhamaramanydja. Liŋgu Garrayyunydja ŋayipinydja yurru ḏul'yunna ŋunhi wäŋanhanydja gurthayuna, bukmakkumana yurru ŋunhi ḻiw'marama baḏuwaḏuyundja warrpam'thunna yanana,”
33Yo, Garray Godtja waŋa yukurra bitjan, “Ŋarrakunydja yolŋu walala Yitjuralpuyŋunydja monygunharana bitjan muŋdhu'-muŋdhunarana ŋuriŋina ŋonuŋdhuna romdhu, liŋgu ŋuriŋina walalanha miriŋuyuna ḏapṯapmaraŋala raki'yuna, yakana ŋarra walalanha dhayuŋara djuy'yurrunanydja. 34Yurru Garraynydja walalaŋgunydja ḏäl warray Walŋakunharamirri walŋu, wuṉḏaŋarr warray; ŋayipi yurru walalanha dhawaṯmaramanydja dhayaḻakumanydja miriŋuwalanydja ŋuliŋuru goŋŋuru, märr yurru bukmak buku-ḻiw'marama yolŋunydja walala nhina yukurra walŋana, ŋula nhämiriwnha marimiriwnha. Ga yolŋu'-yulŋu Bapilunbuynydja yurru bäyŋuthirrina, yana walala yurru nhina yukurra mariŋurana.”
35Ga bitjarra ŋayi Garray waŋananydja, “Buŋana marrtjiya wäŋanha Bapilunbuynydja, baḏuwaḏuyurrana marrtjiya warrpam'thurrana yolŋu'-yulŋunha ŋurikiynydja wäŋawuy, buŋgawamirrinhanydja walŋu ŋunhi ga ḻiya-djambatjmirrinha ŋunhi. 36Ga buŋa ŋunhinydja yana bothinyaramirrinhanydja dhäwu'-ḻakaranhamirrinha, liŋgu walalanydja ŋunhi ŋula nhäna dhäruk nhäŋiniŋ'nha yukurra ḻakarama. Ga buŋa yana ŋunhinydja yolŋu'-yulŋunha ŋunhi walala ŋuli be ḏäl-ḻakaranhamirri, walala yurru gundupumanydja barrariŋuna yanana-wala. 37Buŋana marrtjiya walalambala yarraman'nhanydja walalanha, ga buŋa ŋunhinydja mulku'-mulkurunhanydja bäyimbuynhanydja walalaŋguŋu; walalanydja ŋunhi yalŋgi'mirrina ga barrarirrina yukurra. Yo, baḏuwaḏuyurrana biyakana walalambala mel-wiḏi'mirrinydja walŋu girri', ga djaw'-djawyurrana bukmak walalambala ŋunhi nhänydja malanha ŋunhi walala yukurra ŋayathama. 38Wäŋa walalambala ŋunhi yurru baṉḏanydhirrina gapumiriwyirrina, ga bukmak yurru ŋunhi binydjitjthirrina räwakthirrina, rakunydhirrina yurru, liŋgu ŋunhiyinydja wäŋa dhaŋaŋnha be nhä waŋarr malanha goŋbuynydja djämawuy, ga yolŋunydja walala liŋguna muḻkurr-bawa'mirriyina walala, liŋgu ŋuriŋina malaŋuyu, ŋunhi walala ŋuli waŋarr-ḻakarama. 39Ga dhiyakuyina märrwu ŋunhi yurru wäŋanydja ŋunhiyi wiraŋdhirrina yolŋumiriwyirrina, yakana biyapulnydja yurru yukurra yolŋu walala nhina ŋunhiliyi, ŋunhina bili wäyin wakinŋuna yurru nhinanydja yukurra yana. 40Ŋäthilinydja ŋunhinydja ŋarra liŋguna baḏuwaḏuyurruna ŋunhi yätjtja maṉḏanha wäŋa Djudumnhanydja ga Gumuranhanydja, ga bitjandhi ŋarra yurru liŋgu ŋunhiyi yätjnhanydja walŋu wäŋanha Bapilunnhanydja baḏuwaḏuyunna.” Ga bitjarra ŋayi Garray waŋananydja.
41-42“Nhäŋa ya', miriŋunydja miṯtji marrtjina yukurra lili beŋuru ḻuŋgurrmaŋuru, ŋula nhämunha'na miṯtjinydja yukurra dhuwali marrtji lili garamirri ga mandjawakmirri, marrtji yukurra yarraman'thu lili, be marrtji yana yatjunmirrinydja bathalayu walŋu yana rirrakayyunydja, marrtjinydja walala yukurra baḏuwaḏuyunarawu Bapilunbuyŋuna wäŋawu. 43Yo, buŋgawayu Bapilunbuyŋuyunydja ŋuriŋi ŋäkulana ŋunhi miriŋunhanydja marrtjinyara lili withiyanaranydja, bala ŋayi marrmarrmirriyinana, yalŋgi'thinanydja ŋayi, ganydjarr winya'yurrunana barrariyuna.”
44Yo, Garraynydja marrtjina yukurra lili, ŋayi yukurra marrtjinydja balanyarana biyaku ŋuli maḏakarritj wäyin dhawaṯthurru beŋuru mayaŋŋuru Djodanŋuru; ŋayi yurru wapthundja ŋunhana Bapilunbuyŋuwalana, ga walalanydja yurru ŋunhi Bapilunbuyŋunydja gundupumana-wala yana barrarirrina. “Ga ŋuliŋurunydja dhäŋuru ŋarranydja yurru nherraṉ ŋunhiyinayi ŋunhi ŋarrakuŋuna djarr'yunara, ŋayina ŋurru-warryunarayŋunydja walŋu nhina yukurra yurru, yurru ŋayinydja ŋunhi gäna walŋu ŋayipi, ganaŋ'thun yukurra yana ŋulaŋuru wiripu-guḻku'walanydja; yakana ŋula waŋgany rrambaŋiyirrinydja yukurra nhanukalanydja. 45-46Yuwalk yana yurru ŋunhi Bapilundja wäŋa galkirri buḻwaŋ'thun ŋuriŋi rirrakayyu bathalayunydja walŋu, ga bukmak yurru wäŋanydja marrmarryunna dhuwala munathany'tja. Bukmakthuna yurru bäpurru'yu ŋämanydja, ŋunhi ŋayi yurru Bapilundja burakirri, bala yatjunna yukurra yurru galŋa-garamirrina, bena dhika rirrakaynydja.” Ga bitjarra ŋayi Garray waŋananydja.