Yitjuralnydja yurru yolŋu walala wäŋa-roŋiyirrina yukurra
31:1-14 (Israel will return home)
1Yo, Garray waŋana bitjarra, “Yalalaŋumirriyunydja ŋunhinydja ŋunhi ŋarrapi walu-nherrara, ŋuriŋinydjayi waluyu walala yurru bukmak miṯtji Yitjuralpuyŋunydja ŋarrakuwaynha yolŋu walala, ga ŋarranydja yurru walalaŋgu Godnha. 2Ŋunhalanydja ŋunhi ŋanhdharkŋuranydja wäŋaŋura, ŋarra mel-wuyurruna walalaŋgu ŋuriki Yitjuralpuyŋuwu, ŋunhi walala winya'-winyayurruna ŋuliŋuru rakunyŋuru, wirrki yana walala ḏukṯukthina ŋayaŋuwunydja walŋu nhinanharawu, bala ŋarranydja gäŋalana yukurrana walalanha mel-wuyunaramirriyuna.” 3Ŋäthilinydja ŋunhinydja baman'tja Garray waŋana Yitjuralwala bitjarra, “Ŋarra yukurra märr-ŋamathirrina mirithirri yana märryu-ḏapmaranhamirriyu nhumalanha, ga märr-ŋamathinyaranydja ŋunhi ŋarrakunydja yurru dhärrana yana yukurra, yakana yurru ḏaḏawyun. Ga dhiyakuyinayi märrwu ŋarra nhumalanha gäŋala giṯmaraŋalanydja lili ŋarrakalanydja ŋarra wapmaraŋala. 4Yitjural, ŋarra yurru nhumalanha biyapul yuṯakumayi. Nhumanydja yurru dhuwala bitjanna bitjan yuṯa miyalk; biyapul nhe yurru galŋa-djulŋithirri, ga giritjirri nhe yurru yukurra ŋayaŋu-yiŋgathirrina. 5Ga biyapul nhuma yurru ŋathana ḻämu-nherraṉ, bala ḻukana nhuma yurru yukurra ŋuliŋuruyi nhumapina.
6“Ga ŋunhi yurru walunydja ŋunhiyi buna, ga ŋayinydja yurru ŋunhi dhukarr-nhänharamirrinydja yolŋu dhärra bukuŋurana yukurra, ga waŋana yurru yukurra dhä-warrwarnha bitjanna, ‘ḏurryurrana walala, ŋilimurru marrtjina djunuma Djurutjalamlilina. Ŋilimurru yurru märr-roŋiyirrina ŋilimurruŋgalaŋuwala Waŋarrwalana, Garraywalana nhanukalaynha.’ ”
7Yo, miyamalanydja wirrki yana djulŋithiya walŋu ŋurukuyi Yitjuralwunydja, märr-yiŋgathiya wirrki yatjunmiya, wokthurrana biyakana Garraywala. Waŋiya marrtjiya biyakana, “Garrayyunydja liŋguna walŋakuŋala nhanŋuwaynydja ŋayi yolŋu'-yulŋunha Yitjuralnhanydja, bukmaknha yana dhuwala ŋunhi nhina yukurra dhiyaŋu-wala walŋamirri.” 8Yo, ŋayi Garray waŋananydja bitjarra, “Ŋarranydja yurru gämana ŋarrakuwaynydja yolŋu'-yulŋunha ŋulaŋuru ḻuŋgurrmaŋuru, ga bitjandhi liŋgu ŋarra yurru ḻuŋ'maramayi gämayi waŋgany-manapan marrtji beŋurunydja bala barrkuŋurunydja wäŋaŋuru malaŋuŋuru, walala yurru bukmakthirrina lili marrtjinydja wäŋa-roŋiyirrinydja, bambay ga bunhdhurr ga yothu'mirri yolŋu, bukmaknha yurru wäŋa-roŋiyirrina wäŋalili Djurutjalamlilina, bala walala yurru nhinanydja yukurra biyapulnha walŋu miṯtjinydja. 9Walala yurru marrtjinydja lili maŋutji-milkarrimirrina walala, bukumirriyamanydja marrtji yurru, ŋunhi ŋarra yurru walalanha gäma lili roŋinyamarama wäŋalilinydja. Ŋarra yurru gurrum'thun gämanydja yana walalanha dhika walŋu, ga marttjinydja walala yurru yukurra galki maya'-mayaŋgurru lili; walala yurru martj-martjtjundja ḻatju'kurruna dhikana dhunupakurruna dhukarrkurrunydja, buyuwuyukurruna, yakana walala yurru galkirri ŋula nhaltjan. Liŋgu ŋarranydja dhuwala, bitjan ŋarra bäpa'mirriŋuna Yitjuralwu, ga ŋayinydja bitjan ŋarraku maḻamarrnha walŋu gäthu'mirriŋu.”
10Nhumanydja mulku'-mulkuruyunydja bäpurru'yu ga miṯtjiyu, ŋäkana dhuwala Garraynha dhäruktja, ḻakaraŋa biyakana birrŋ'maraŋana birrka'mirriwalana bäpurru'wala. “Ŋäthilinydja ŋunhinydja Garrayyu barrku'-barrkuwatjkuŋala nhanŋuwaynydja ŋayi yolŋu'-yulŋunha, walala marrtjina bena-wala yarrk-yarrkthurruna barrkumalana wäŋalili. Yurru dhiyaŋunydja-wala Garrayyu marrtji ḻuŋ'maramana liliyi gäma wäŋaliliyi; ŋayi yurru gunganhamirriyamanydja walalanha bitjanna bitjan ŋuli wäyin-djäkamirriyu gunganhamirriyama nhanŋuway ŋayi wäyinnha. 11Yitjuralwunydja miriŋu ḏälmirri warray dhika walŋu, djuḻkmarama yukurra Yitjuralpuyŋunha, yurru ŋayinydja Garrayyunydja walalanha djaw'yurruna warray beŋuruyi miriŋuwalanydja goŋŋuru. 12Bala walala yurru roŋiyirrina liliyi ŋunhiwalayi bukulili Djäyanlilina, ga miyamandja walala yurru yukurra galŋa-djulŋithirrina dhikana walŋu, ŋuriŋina nhäyu malaŋuyu ŋunhi ŋarra wekaŋala walalaŋgu ŋamakurru'. Walala yurru ḻuka yukurra ŋathanydja ḻatju'na dhikana walŋu yana, ga wäyin Walalaŋgu yurru ŋuthanna gurarrthirrina djana'mirriyirrina, bala walalaŋgu yurru ŋayaŋunydja ŋunhanydja märr-ḏaw'yunna ŋuriŋina bili nhanukalaynha Garraywalana yana. Yakana biyapulnydja walala yurru galŋa-yätjthirri ga warwumirriyirri. 13Walala yurru dhäykawurru yuḏatjpalnydja giritjirrina yukurra goŋmirriyirrina dhikana, ga bitjandhi yana liŋgu ḏarramuwurru yurru ŋayaŋu-djulŋithirrina, worruŋu ḏarramu ga yuḏatjpal rrambaŋiyirrina yana. Liŋgu ŋarranydja yurru ŋunhi dhawaṯmaramana walalanha galŋa-yätjthinyaramirriŋuruna romŋuru, bala walala yurru nhinanydja yukurra galŋa-djulŋithirrina, goŋmirriyirrina walŋu. Ŋarra yurru marrparaŋ'kuma walalanha, ga walalanydja yurru ŋayaŋu-djulŋithirrina, liŋgu walalaŋgu ŋunhi walu galŋa-yätjthinyaramirrinydja liŋguna dhä-yawar'yurrunana winya'yurrunana. 14Ga ŋunhinydja walala ŋarraku ḏalkarra'mirrinydja walala yurru maranhumirrina yanana, liŋgu guḻku'yuna yurru mirithirrina yolŋuyu walalay gäma mundhurr-wekamanydja ŋarraku, ga bukmak ŋarrakunydja yurru yolŋu walala ŋunhi märr-ḏaw'yunna ŋuriŋina ŋunhi ŋarra yurru wekama walalaŋgu yäna-wala.” Ga bitjarra ŋayi Garray waŋananydja.
Godku yuṯanydja dhawu'-nherraṉarawuy rom yurru dhärra yukurra yolŋuwalana ŋayaŋuŋura
31:15-40 (God's new covenant will be written in people's hearts)
15Yo, Garraynydja yukurra dhuwala waŋana,
“Ŋunhayi wäŋa Rämanydja rirrakaymirriyirrina yukurra,
liŋgu yolŋu walala yukurra nyä'yunmirrina wirrkina dhikana walŋu;
Ŋunhayi dhäyka Raytjulnydja yukurra ŋäthi nhanukalayŋuwu ŋayi yumurrku'wuna.
Yakana ŋanya yurru ŋula yolthu marrparaŋ'kumanydja,
liŋgu bukmakthinana nhanŋu yumurrkuny'tja bäyŋuthina.”
16-17Yurru Godtja waŋana Garraynydja bitjarra, “Yakana ŋäthiya biyapulnydja,
baṉḏanyguŋana nhuŋuway ganurunydja.
Ŋunha yumurrkuny'tja nhuŋu yurru roŋiyirriyi
liliyi gumurr-roŋiyirri beŋurunydja miriŋuwalanydja wäŋaŋuru.
18Liŋguna ŋarra ŋäkula ŋunha yolŋu'-yulŋunha Yitjuralpuynhanydja,
walala yukurra wuyunmirrina walalaŋgalayŋuwu yätjkuna, waŋa yukurra bitjanna,
‘Garray, dhunupa nhuŋu ŋunhi nhe dhä-ḏir'yurruna ŋarranha bitjarrayinydjayi,
liŋgu ŋarra yukurrana marrtjina ŋarrakalay djälkurru,
bitjarrana bitjan wakinŋu ŋunhi wäyin.
Garray, bilmaraŋana ŋanapurrunha ŋayaŋunydja biyakana, märr yurru ŋanapurru roŋiyirrina nhokala,
liŋgu nhepi ŋanapurruŋgu Waŋarrnydja Garray.
19Ŋanapurru bilyurruna ga ḏiltjina-wekaŋala nhuŋunydja,
ga ŋuliŋurunydja ŋanapurru ŋunhi mirithina yana wuyurruna ŋuriki yätjkunydja ŋanapurruŋgalayŋuwu.
Nhe ŋanapurrunha marŋgikuŋala dhiyaŋina nhokala dhä-ḏir'yunarayuna,
ga buku-wurana ŋanapurru yukurra yulŋunydja ŋuriŋi ŋanapurruŋgalay yätjthuna romdhu.
Yuwalk yana ŋanapurru djäma yätjtja rom, ŋunhi ŋurruthaŋalanydja walŋu ga yana liŋgu ga dhiyaŋu-wala dhuwala.’ ”
20Ga ŋayinydja waŋana Garraynydja buku-ruŋinyamaraŋala bitjarra,
“Yitjural, nhenydja dhuwala bitjan ŋarraku marrkapthunaramirrina gäthu'mirriŋu.
Yuwalk ŋarra nhumalanha ŋunhi dhä-ḏir'yurrunanydja,
yurru ŋarra mukthun yana märr-ŋamathirrinydja yukurra nhumalaŋgu märryu-ḏapmaranharamirriyu.
Ŋarranydja nhumalaŋgu ḏukṯuk nhuma yurru roŋiyirrina yana lili ŋarrakala,
ga ŋarranydja yurru nhumalaŋgu mel-wuyunna, ga märramana nhumalanha ŋarrakalaynha.
21Go, Yitjuralpuyŋu nhuma yolŋu'-yulŋu, marrtjiya lili roŋiyiyana,
gumurr-roŋiyiyana wäŋalilina nhumalaŋgalay.
22Nhämunha'mirri yurru nhuma yukurra galkundja?...
Nhätha yurru nhuma märr-nherraṉmirrinydja ŋarrakala?
Liŋguna ŋarranydja djäma yuṯana walŋu rom,
wiripuna galŋu romdja liŋguna maḻŋ'thurrunana dhiyalanydja munathaŋuranydja.”
23Yo, Yitjuralwunydja God Waŋarrnydja walŋu waŋa yukurra bitjanna, “Yuwalk yana ŋarra yurru roŋiyinmarama ŋarrakuwaynydja yolŋu'-yulŋunha dhipala wäŋalili, ga dhiyalayi wäŋaŋura walala yurru waŋanydja yukurra balakurruna liŋgu dhärukkurrunydja, bitjanna yurru waŋa yukurra, ‘Godthu yurru goŋmirriyama dhuwalanydja walŋu wäŋa buku, liŋgu wäŋanydja dhuwalanydja dharrpalnha walŋu, Garraywuna nhanŋuwaynha wäŋa nhinanharawu.’ 24Ga dhiyalayinydjayi walala yukurra yurru yolŋu'-yulŋunydja nhina wäŋaramana, ga ŋunhiliyi djäkamirrinydja walala yukurra yurru djäka walalaŋgalayŋuwu wäyinguŋa ḻiw'marama yana wäŋakurrunydja. 25Liŋgu ŋunhi ŋayaŋu-djawaryunamirrinydja walala yolŋu'-yulŋu yurru nhina yukurra ŋayaŋuna ŋarrakala, ga ŋunhinydja ŋayaŋu-warwumirrinydja walala yurru yukurra nhina ŋayaŋu-djulŋithirrina dhikana walŋu. 26Yo, yolŋunydja walala yurru waŋa yukurra bitjanna, ‘Ŋorrananydja ŋarra yukurrana ŋamathaŋala yana, ga gaŋgathina ŋarra yakurrŋuru ḻatju' dhika walŋu galŋa.’
27“Yo, Yitjural wäŋa, nhenydja yurru dhuwala biyapulnha dhaŋaŋdhirri miṯtjiyu yolŋu'-yulŋuwala ga wäyingala malaŋuwala. 28Ŋäthilinydja ŋunhinydja ŋarra ḏulŋurr'yurruna, bala ḏaw'-ḏawyurrunana dhuwalanydja wäŋanha, ga dhiyaŋunydja-wala ŋarra yurru biyapul dholkuma marrtji ḻämu-nherraṉ yuṯana galŋu, djäma yurru bitjanna ḻatju'kumana walŋu, yuṯakumana yanana warrpam'nha. 29-30Ŋulinyaramirriyunydjayi yolŋu walala yurru yakana biyapulnydja waŋa bitjan, ‘Bäpa'mirriŋuyunydja ḻukana djambaŋ, bala ŋayinydja yothuny'tja nhanŋu ḻirra-waryurrunana ŋuriŋiyi.’ Yakana biyapulnydja yurru yothu' galŋa-yätjthirri bitjandhiyi liŋgu ŋuriŋi nhanukala bäpa'mirriŋuwala yätjthu djämayu, yana ŋayipina yurru galŋa-yätjthirrinydja, bala rakunydhirrina-wala ŋayi yurru yana nhanukalay yätjŋura.
31“Ŋäka walala! Yalalaŋumirriyunydja ŋunhinydja ŋunhi yurru ŋayi walu buna, ŋarranydja yurru nherraṉ yuṯana walŋu dhawu'-nherraṉminyara ŋarrakalaŋuwala yolŋu'-yulŋuwalanydja. 32Ŋunhiyinydjayi yurru yuṯanydja dhawu'-nherraṉara ganaŋ'thunna yukurra yana ŋurikalanydja ŋunhi ŋarra nherrara nhumalaŋgalaŋuwala märi'muwala ŋäthili, ŋulinyaramirriyunydja waluyu ŋunhi ŋarra walalanha goŋ-gulaŋala yukurrana märraŋala ŋuliŋuru Yetjipŋuru. Gäŋalanydja ŋarra yukurrana walalanha dhika manymakkuŋala, ḻatju'kuŋala walŋu yana, gurrum'thurruna bitjarra bitjan ŋuli dhuway'mirriŋu djäka nhanukalaŋuwu ŋayi miyalkku. Yurru walalanydja gundupuŋala warray ŋarrakala, yaka warray ḏukṯukthina walala nhinanharawu waŋganygunharawunydja ŋarrakalanydja. 33Ga dhuwalana yuṯanydja dhawu' ŋarra yurru nherraṉ gam': Ŋarra yurru nherraṉ ŋarrakuwaynydja ŋarra rom ŋunhana galŋu ŋayaŋulilina walalaŋgala djinawa'lilina, märr yurru walala djälthirri wirrkina walŋu marŋgithinyarawu ŋarrakunydja ga märr-ŋal'yunarawu. Ŋarranydja yurru walalaŋgu Godnha, ga walalanydja yurru ŋarrakuwaynha yolŋu'-yulŋu. 34Yakana yurru ŋula yol yolŋu waŋa bitjandja, ‘Marŋgithiya Garraywalaŋuwu,’ liŋgu bukmaknha yurru ŋarraku marŋginydja, ŋunha ŋunhi gali'wuy yolŋu, ga yanana liŋgu-u-u ga ŋurruŋumirriwala wapthun, bukmaknha yurru nhina yukurra ŋarrakalaynha yana romŋura. Ŋarra yurru walalaŋgu bäy-ḻakaramana yätjpuynydja, baḏuwaḏuyunna warrpam'thunna yurru meṉguma.” Ga bitjarra ŋayi Garray waŋananydja.
35Yo, Godthunydja djäma walunha, märr yurru ŋayi djarraṯawun'kuma dhuwala wäŋa munatha' walupuy, ga bitjarrayi liŋgu ŋayi djämayi ŋaḻindi ga ganyu' malanha, märr yurru yukurra ŋuriŋi djarraṯawun'kuma munha, ga yäkunydja ŋayi Waŋarr Ganydjarr-ḏumurru galŋu, Garray ŋuruku djiwarr'wuywu yolŋu'-yulŋuwu. 36“Yo, ŋurikiyinydjayi waluwunydja rom ga ŋaḻindiwunydja yurru yukurra dhärra bitjanna liŋguna gupaḏalnha-wala, ga bitjandhi liŋgu yurru Yitjuralnydja miṯtji bäpurru' dhärra yukurra gupaḏalnha yana walŋu yurru-wala. 37Yaka walalanha ŋarra gukuŋalanydja gupaḏalkuŋalanydja, bäyyi ŋunhi walala yukurrana djäma yätjtja galŋu mirithirrinydja. 38-40Yuwalk yana yurru dhuwala wäŋa Djurutjalamdja dhuḻ'yunara biyapul yuṯayirri, ga dhäŋuru ŋuliŋurunydja yurru yukurra dhärrana yanana yurru, nhanŋuwaynha Garraywuna wäŋa, ga yakana yurru biyapulnydja baḏuwaḏuyun ga dhawar'yun.” Bitjarra ŋayi Garraynydja waŋana.