Djiramayayu dhä-wirrka'yurruna Garraynha
12:1-13 (Jeremiah questioned the Lord)
1Bala ŋarra waŋana Garraywala bitjarra, “Garray, nhenydja ŋunhi dhuwala ŋayaŋu-dhunupa warray. Buku-djulŋi, yaka ŋarrakala nhe ŋaramurrthiyanydja; ŋarra ḏukṯuk ŋarra yurru dhä-wirrka'yun nhuna. Nhäku ŋuli ŋunhi dhuwurr-yätjmirrinydja yolŋu walala ḻukunydjayirri? Ga nhäku ŋuli ŋunhi dhuwurr-yätjmirrinydja walŋu nhina galŋa-ŋamathirrinydja? 2Nhe walalanha ŋunhi dholkuŋalanydja ḻämu-nherraranydja, ga ŋutharanydja walala marrtjina ŋuriŋiyi, bala mirithinana guḻku'yina yulŋunydja. Bala walala waŋanydja marrtji bitjanna, ‘Godthu guŋga'yurruna ŋarranhanydja goŋmirriyaŋala warray, ŋayina ŋarraku wekaŋala dhuwalanydja malanha,’ bitjan, yurru yuwalktja walala ŋunhi marrtji yukurra walalaŋgalay warray walala djälkurru, yaka warray walala djäl nhuŋu yuwalk. 3Garray, nhenydja ŋarraku marŋgi, ŋunhi ŋarranydja yukurra yuwalk märryu-ḏapmarama nhuna, ga dhuwalana ŋarra gay yulŋunydja ŋurruwuyknha. Nhäthana dhika nhe yurru dhä-ḏir'yundja ŋunhayi dhuwurr-yätjmirrinhanydja yolŋunha walalanha? 4Nhämunha'mirri ŋayi yurru yukurra wäŋa dhuwala dhärra baḏuwaḏuyunaranydja baṉḏanydja, liŋgu ŋurikalayi walalaŋgala yolŋu'-yulŋuwala dhuwurryu yätjthu? Liŋgu yolŋunydja walala yukurra waŋa bitjan, ‘Godthunydja yaka yukurra nhäma nhäyinyara ŋilimurru yukurra djäma, nhä ŋamakurru' ga yätj.’ ”
5Ga ŋayi Garraynydja waŋana ŋarrakala bitjarra, Djiramaya, ŋuli nhe yurru yukurra djawaryundja walŋu, ŋunhi nhuna yukurra yurru yolŋu'-yulŋuyu gur'-guryun, nhaltjanna dhika nhe yurru djingaryundja yukurra, ŋunhi yurru nhuna ŋula nhäyu wuṉḏaŋarryunydja gur'-guryun galkinyarawunydja? Ŋuli nhe yurru dhumbaḻ'yundja ga galkirrinydja dhukarrŋura baṉarraŋuranydja, yakana nhe yurru marrtji manymakkumanydja bitjandhi ŋuliwitjan retjakurrunydja. 6Yo, nhokala gurruṯu'mirriyunydja yurru galkiwuyyunydja djäma mari nhuŋu, ga nhenydja yurru yakana ŋayaŋu-ṉiṉ'thundja märr-nherraṉmirri walalaŋgala, bäyyi ŋunhi walala yurru yukurra waŋa guyulŋu'yunydja dhärukthu.”
7Ga biyapul ŋayi Garray waŋana bitjarra, “Liŋguna ŋarra gonha'yurrunana ŋapana-wekaŋala Yitjuralwunydja, ŋurikinydja miṯtjiwu ŋunhi ŋarrapi djarr'yurruna ŋarrakuwayliliyaŋala ŋarra. Ŋarra märr-ŋamathirri yukurra walalaŋgu yulŋunydja, yurru ŋarra wekaŋalana walalanha ŋunhana miriŋuwalana goŋlili dhä-ḏir'yunarawuna. 8Ŋarrakunydja yolŋu'-yulŋu balanyara bitjan wakinŋu ŋunhi maḏakarritj wuŋgan, bitjanna walala ŋuli yukurra murryunna ŋarrakunydja, ga ŋarranydja yukurra ŋurikiyi romgu nyinyaŋdhunna. 9-12Bala ŋarra gäŋala miriŋunhanydja ŋunhi, bala walalanydja muŋdhu'-muŋdhurrunana yukurrana ŋunhiyi mirithirrinydja ŋamakurru' wäŋa, bala wäŋanydja ŋunhiyi räwakthinana, baḏuwaḏuyunarawuynha. Yo, ŋunhiyi miriŋunydja marrtji yukurra balakurru wäŋakurrunydja ḻiw'marama, muŋdhu'-muŋdhunna yukurra baḏuwaḏuyunna ŋunhiyina wäŋana, ga yakana ŋula waŋgany yolŋu yukurra nhina ŋayaŋu-yal'yundja. 13Yo, ŋarrakalanydja yolŋuyu walalay ŋuli yukurranha djäma mirithinya walŋu yana, dholkunha marrtjinya ŋatha maŋutji, yurru ŋula nhä warray ŋayi ŋunhi nhäŋiniŋ' warray dhawaṯthurrunanydja, ŋutharanydja ŋunhiliyi. Djämanydja walala yukurrana gulkuruna, liŋgu dhäparknha walalaŋgu ŋunhi goŋdja; ŋathanydja ŋunhiliyi ŋuthara bäyŋuna, liŋgu ŋarrapinydja walalaŋgu ŋaramurryina wirrki walŋu yana.” Ga bitjarra ŋayi Garray waŋananydja.