Ŋoy-wurrpu'mirrinhanydja yurru yolŋu'-yulŋunha baḏuwaḏuyunna yana
65:1-16 (The rebellious people will be destroyed)
1Ga ŋayi Garraynydja buku-wakmaraŋala waŋana bitjarra, “Ŋarranydja dhuwala dhärrana ŋarra yukurrana galkurruna nhumalaŋgu bukumirriyanharawuywuna, ga nhenydja yaka warray marrtjina ga bukumirriyaŋalanydja ŋarrakala. Ŋarranydja dhuwala gay, dhärra ŋarra yukurra baṉarraŋura, ga nhenydja yaka warray marrtjina ga ḻarruŋalanydja ŋarraku. Ŋarra waŋana ŋunha miṯtjinha bäpurru'nha yolŋunha walalanha ‘Dhuwala ŋarra,’ bitjarra, yurru walalanydja yaka warray ŋula bukumirriyaŋala guŋga'yunarawunydja ŋarrakala. 2Bitjan liŋgu ŋarranydja yukurra dhärra baṉdja-ḻakarama dhuwala, ŋaḏupthun nhumalaŋgu ŋurikinydja walalaŋgu ŋunhi nhuma ŋayaŋu-nhumalaŋgalayŋumirri nhuma, galkun ŋarra yukurra yulŋunydja nhumalaŋgu ŋunhi ŋänharamiriwwunydja yolŋu'-yulŋuwu. Ŋarranydja bini ŋunhi gumurr-ŋamathinya nhumalanha märranhanydja, yurru nhuma yukurra djäma nhumalaŋgiyingala nhuma djälyu walŋu bitjan liŋgu. 3Bala ŋarranydja nhumalaŋgu ŋaramurryinana wirrkina, liŋgu bitjan warray liŋgu nhumanydja yukurra djäma ŋula nhä warray yätj warray rom malanha; bitjan liŋgu nhuma yukurra buku-ŋal'yundja wiripuŋuwunydja waŋarrwu maḏayin'ku ga ŋula nhäku, ga dhuŋgur'yun marrtji ŋula nhä buŋgan bäw' malanha ŋuriki be nhäku waŋarrwu. 4Munhakunydja nhuma ŋuli marrtji molulili ŋunha be nhälili dhuyulili wäŋalili, bala nhuma ŋuli djäma manikaynha mokuywuna ŋurikina buku-ŋal'yun, ga wiripunydja nhuma ŋuli ḻuka bikipiki ga ŋula nhä malanha wäyin ŋunhi nhuma ŋuli ŋäthilinydja mundhurr wekama ŋuriki be nhäku waŋarrwu. 5Nhe ŋuli ḻakaranhamirri nhunapinyay nhe bitjanmirri, ‘Ŋarranydja dhuwala ḏarrtjalk. Yaka marrtjiya galkithiya ŋarrakalanydja lili; nhe ŋuli bäynha ŋarranha moy'mirriyaŋu.’ Wirrki ŋarra yukurra ŋapa-milnyaŋ'thundja balanyarawunydja romgu, ga ŋaramurrnydja dhuwala ŋarraku balanyarana bitjan gurtha ŋunhi ŋuli yukurra nhära bitjan liŋgu.
6-7“Yakana ŋarra yurru dhäruk mukthun gupaḏalkuma, ŋarranydja yurru yana buku-ruŋiyinmaramayi ŋurikinydja walalaŋgu yolŋu'-yulŋuwu dhuwurr-yätjmirriwunydja, ŋupanayŋuyi yana ŋunhi walala ŋuli yukurra djäma bitjandhiyi dhuwurr-yätj. Yo, ŋarranydja yurru dhä-ḏir'yunna ŋuriki walalaŋgalaŋuwuy yätjpuynydja djämawuy ga bitjandhi liŋgu walalaŋgalaŋuwu märi'muwunydja yätjpuy, ŋunhi walala yukurrana mundhurr wekaŋala bathara buŋgan bäw' bitjarrayi, buku-ŋal'yurruna wiripuŋuwu waŋarrwu. Yuwalkkuma yana ŋarra yurru nhumalanha buku-ruŋinyamarama dhä-ḏir'yundja ŋuriki ŋunhi nhuma yukurra djäma dhuwurr, ŋayaŋu-yätjkuma ŋarranha.” Bitjarra ŋayi Garray waŋananydja.
8-10“Yo, ŋarra yurru baḏuwaḏuyunna yulŋunydja dhuwurr-yätjmirrinhanydja yolŋu'-yulŋunha, yurru yaka ŋarra yurru dhuwala baḏuwaḏuyun warrpam'thundja yolŋu'-yulŋunha, yana ŋarra yurru walŋakumanydja märrama ŋunhinha walalanha ḻurrkun'nha, ŋunhi walala yukurra yuwalkkuma dhäruk märrama ŋarranha; ŋarranydja yurru ŋunhiyinydja walalanha bitjan goŋmirriyamana walŋu, bala walala yurru buku-ŋal'yunna yukurra ŋarraku, ga nhinanydja walala yurru yukurra manymakkumana dhikana walŋu yana ḻatjuŋurana ŋoy-ŋamathirrina. 11-12Yurru nhumalaŋgunydja ŋurikinydja ŋunhi nhuma gonha'yurruna ŋarranha, ŋapa-wekaŋala ŋarraku, ga buku-ŋal'yun yukurra wiripuŋuwu waŋarrwu, nhenydja yurru yakana nhina walŋathirri, liŋgu nhumanydja yaka warray mäkiri'-witjurruna ga ŋäkula ŋunhi ŋarra wäthurrunanydja nhumalaŋgu; yaka warray nhumanydja ḏukṯukthina ga dhäruk märraŋala ŋarranha, yana nhuma mäkiri'-yaryurruna warray ŋarrakunydja, ga djäma djarrpi' warray rom. 13-14Yo, yuwalk ŋarra nhumalaŋgu ḻakaramanydja yukurra dhuwala. Ŋunhinydja walala ŋunhi walala yurru buku-ŋal'yun ŋarraku ga dhäruk märrama ŋarranha, ŋunhiyinydja walala yurru mirithirrina walŋu maranhuyirri, ga nhumanydja yurru marrya'yirrina ga ŋanhdharkthirrina; walalanydja yurru ŋunhiyinydja walala djulŋithirrina goŋmirriyirrina nhina, yurru yukurra miyaman märr-yiŋgathirrina walŋu. Ga nhumanydja ŋunhinydja ŋunhi nhuma dhäruk-märranharamiriw walala, nhumanydja yukurra yurru galŋa-yätjthirrina, ŋäthina nhenydja yurru warwumirriyirrina. 15-16Nhumanydja yurru raku'-rakunydhirrina, ga ŋunhina walala dhäruk-märranhamirrina yurru walŋanydja nhina yukurra, ga ŋarrapi yurru walalanha wekama yuṯanydja yäku yana. Ga walalanydja yurru goŋmirriyanharana ŋarrakuŋu, ŋunhi ŋarrapi yuwalktja Waŋarr God. Yanana yurru walala meṉgumana marinydja, liŋguna ŋunhi djuḻkthurruna, winya'yurrunana.”
Yolŋu walala yurru djulŋithirrina dhikana nhina yukurra yuṯaŋuranydja wäŋaŋura
65:17—66:2 (The joy of the new age)
17Garraynydja waŋa yukurra bitjan, “Märr-yuwalk yana ŋarra yukurra djämanydja yuṯa ŋunha djiwarr' ga yuṯa dhuwala munatha'. Yolŋu'-yulŋuyu yurru meṉgumana ŋunhi ŋäthiliŋunydja, ga yakana biyapulnydja walala yurru yukurra guyaŋirri bala dhuḏithuny'tja roŋiyirri ŋäthiliŋunydja dhukarr. 18Nhäŋa dhuwala yuṯana ŋunhi ŋarra yukurra djäma, ga biyaka galŋa-djulŋithiyana. Ŋarra yurru Djurutjalamdja wäŋa biyapul dhuḻ'yundhi, yuṯakumayi djäma, ga yolŋunydja walala yurru nhina yukurra ŋayaŋu-ŋamathirrina dhikana walŋu ŋunhiliyi ḻatjuŋuranydja dhikanydja wäŋaŋura. 19Ga ŋarrapinydja yurru bitjan yana liŋgu galŋa-djulŋithirriyi ŋurikiyi wäŋawu, mirithirrina galŋu yurru märr-yiŋgathirrina ŋarrakalaŋuwala yolŋu'-yulŋuwalana. Yakana yurru ŋula yol yolŋu galŋa-yätjthirri ŋunhiliyinydjayi wäŋaŋura, ga yakana yurru ŋula yol ŋäthi yukurra. 20Yothuny'tja yurru ŋunhinydja yakana rakunydhirri, ga ŋunhi yurru yolŋu balanyara bitjan 100-mirrina dhuŋgarramirri, ŋayinydja yurru mukthunna-wala yana nhina yukurra bitjanna bitjan yuṯana ŋayi yolŋu; ŋunhina liŋgu yurru rakunydhirri yuṯanydja ŋunhi ŋayi dhuwurr-yätjnha yolŋu. 21-22Yolŋu'-yulŋuyu yurru marrtji dhuḻ'yun wäŋa, bala nhinana yurru yukurra wäŋaramana ŋunhiliyi, ga yakana yurru miriŋuyu djaw'yun yukurra ŋuliŋuruyinydja borum ga ŋatha ŋunhi walala yukurra yurru ŋuthanmarama; ŋayipina yurru yana ŋunhinydja wäŋa-waṯaŋuyuna ḻuka yukurra. 23Yakana yurru ŋula yolthu yolŋuyu djäma yukurra dhäparktja, ga djamarrkuḻiny'tja walalaŋgu yurru yakana ŋula burakirri ŋula nhäyunydja, liŋgu ŋunhiyinydja walala yumurrku' ŋurikina walalaŋgu ŋunhi ŋayi Godthu ŋayipi goŋmirriyaŋala walalanha. 24Ga ŋulinyaramirriyunydjayi ŋarra yurru wekama nhä malanha ŋamakurru'na ŋäthili yana, yurruna walala yurru ŋäŋ'thun; walala yurru ŋäŋ'thundja, ga ŋarranydja yurru wekama ŋulinyaramirriyu liŋgu ŋunhi walala yukurra baḏak waŋa bukumirriyama ŋarrakala. 25Yakana yurru wäyindhu ŋula waŋganydhu buma wiripuŋunhanydja; ŋuriŋi wakinŋuyunydja wuŋgandhu ga boḏinydhu bembiyu yurru yukurra ḻuka rrambaŋina mulmunydja waŋganyŋurana, ga maḏakarritjthu ŋuriŋi läyindhu yurru ḻuka mulmuna, bitjanna bitjan buliki'yu, ga yakana yurru biyapul moḻŋuyunydja ḻäwuma yolŋunha. Yakana yurru yolŋu burakirri yukurra ŋula nhäyunydja; bukmaknha yukurra yurru nhina walŋamirrina warrpam'nha ŋunhalayinydja ŋunhi ŋarrakalay dhuyuŋuranydja walŋu bukuŋuranydja wäŋaŋura.” Bitjarra ŋayi Garray waŋananydja.