Godthu ḻakarama ŋuli yukurra nhanŋuwaynydja yolŋu'-yulŋunha yätjnha
1:1-31 (God spoke about the sin of his people)
1Yo, Godthu wekaŋala dhäwu' yolŋu'-yulŋuwu wäŋalili Djudalili yirralkalili ga Djurutjalamlili ŋulinyaramirriyu ḏaykun'thunydja ŋunhi ŋayi Yutjaya yäku buŋgawa yukurrana nhinana, yurru ŋayi ŋunhi warraŋulkuŋalanydja maḻŋ'maraŋalanydja dhäwu'nha ŋunhiyi ŋurikalana djawarrkmirriwala yäkuwala Yitjayawalana, gäthu'mirriŋunydja ŋayi Yämutjku. Yo, ŋayi ŋuli Yitjayayu yukurranha ḻakaranha Godku dhäwu' ŋuliŋuru liŋgu ŋunhi giŋ yukurrana nhinana Yutjaya yäku, yana liŋgu-u-u ga Yitjakayawala wapthurruna.
2Bitjarra ŋayi Garray waŋananydja gam': Mäkiri'-witjurra walala munatha' ga djiwarr' wäŋa. Ŋarranydja yukurrana djäka ḻatju'kuŋala warray ŋarrakalaŋuwu yumurrku'wu, ŋuthanmaraŋala warray walalanha yukurrana ŋamathaŋala, yurru walalanydja ŋunhi ŋapa-wekaŋala warray ŋarrakunydja. 3Yo, yolŋu-waṯaŋuwunydja walalanydja marŋgi bulikiny'tja ga yarraman'tja, yurru Yitjuralnydja miṯtji dhuŋamirrina walala, yakana walala marŋgi, ŋunhi walalanydja yolŋu ŋarrakuway walala yana. Yaka walala djäl ŋarraku. 4Ŋunhiyinydjayi miṯtji yolŋu walala yätjnha yana mirithirrina, ga walalaŋgu bäpa'mirriŋu walala balanyara yana liŋgu mirithirri yätjmirri; walala ḏiltjina-wekaŋala walalaŋgalaŋuwu Godkunydja, ŋunhi ŋayinydja gäna walŋu ḏarrtjalk God. 5-6Nhäku warray nhuma yukurra mukthundja yana ŋapa-nherraṉmirrinydja? Nhuma ḏukṯuk nhuma yurru dhaŋgaḏirr' märrama gupaḏalkunhara yana? Yitjural, nhumanydja dhuwala miṯtji yolŋu'-yulŋu balanyara biyaku ŋuli yolŋu rerrimirri; rirrikthundja nhe yukurra ŋulaŋuru liŋgu muḻkurrŋuru ga yana liŋgu ga ŋunhana-wala djalkirilili wapthun. Rumbalnydja nhuŋu warrpam'nha ŋäkirrmaranhara djetjiwuŋuna ḏulkuwuŋuna, ga ŋunhiyi ḏulku malanha yätjnha yanana gawarala'mirrina, yakana ŋula yolthu yolŋuyu ŋunhiyi ḏarrtjalkkuŋalanydja rurrwuyurrunanydja ḏulku'nha, wo garrpira nhuna maryakalyu ḏarrtjalkthu, maŋutji-ŋäkirrmaraŋala ŋunhiyi djetji. Yakana ŋula yolthu ŋämira nhuna ŋunhiyi ḏulku'nha ŋäkirrmaraŋala gungaŋala.
7Yo, wäŋanydja nhumalaŋgu yätjnha baḏuwaḏuyunarana, ga buṉbu malanha wäŋa warrpam'nha ḏaw'-ḏawyunarana, dhuŋgur'yunara gurthawuŋuna, ga mulkuruyuna yolŋuyu djaw'yurrunanydja nhumalaŋgu ŋunhi wäŋanhanydja, bala walala nhinanana yukurrana ŋunhiliyi. 8Waŋganynha Djurutjalamnha dhärra yukurra mukthundja, yurru gänana ŋayi yukurra dhärranydja, liŋgu yakana ŋula yol ŋurikiyi gunganhamaranharawunydja. 9Yo, ŋayi Godthunydja bini ŋunhiyi baḏuwaḏuyuna warrpam'thuna wäŋa ŋunhiyi, bitjana bitjarra ŋunhi ŋayi baḏuwaḏuyurruna Djudum ga Gumura yäku wäŋa, yurru ŋayi walŋakuŋalanydja märr ḻurrkun'nhana ŋunhi, märr-ḻurrkun'nha yana walŋamirrinydja.
10Ŋäka walala ŋamathaŋa, mäkiri'-witjurra ŋarraku nhuma yolŋu walala ŋunhi nhuma ŋurru'-ŋurruŋu walŋu Djurutjalamgu wäŋawu. Nhumanydja dhuwala yätjmirrina yanana walŋu, balanyarana bitjan ŋunhiyi wäŋa märrma' Djudum ga Gumura, balanyarayina. Garraynydja yukurra waŋa nhumalaŋgu bitjan, 11“Bitjanna liŋgu nhuma ŋuli bathanna wäyindja, mundhurr-wekamanydja ŋarraku. Nhäku ŋuli ŋunhiyinydja? Yaka warray ŋarranydja djäl ŋurikiyi yaḻmanga'wunydja wäyingu. Yakana ŋarra ŋuli ŋayaŋu-djulŋithirri ŋuriŋiyinydjayi ŋunhi ŋayi ŋuli gulaŋ-waṉḏirri wäyin. Liŋguna märr-yawaryunna ŋarra yukurra ŋuriŋiyinydjayi romdhu, ŋunhi nhuma mundhurr-wekama ŋuli bitjandhiyi, yana djäma yukurra romdja. 12Yo, ŋarrakalaŋga nhuma ŋuli marrtjinydja buku-ŋal'yunarawunydja, ga nhäkuna nhuma yukurra gäma ŋunhiyinydjayi malanha?... ŋunhi nhuma ŋuli yaka yukurra guyaŋirri ŋamathama ŋarranha? Nhäku nhuma yukurra wakalkuma dhuwala ŋarrakunydja Buṉbunha? 13Nhuma ŋuli bathana mundhurr ŋarraku ŋunhi wäyinnha, yurru yakana ŋarranydja djäl ŋurikiyi ŋawulul'wu, ga ŋunhi yurru ŋayi ŋunhiyi buŋgan bäwny'tja gaŋgathirri ŋarraku, ŋarranydja yurru ŋurikiyi nyinyaŋdhunna ŋuyulkthirrina yana, liŋgu ŋayaŋu nhumalaŋgu dhuwali djarrpi'na yanana walŋu, yakana dhunupa. Nhuma ŋuli waŋgany-manapanmirri guyaŋinyaramirriwu waluwu, ga djäma nhuma ŋuli mirithirri dharrpal rom malanha, yurru yaka ŋarranydja ŋuli ŋunhiliyi nhumalaŋgala, liŋgu nhuma dhuwurr-yätjmirrina, yätjnha yanana. 14Ŋarranydja yukurra dhuwala märr-yawaryunna ŋuriki Malaŋuwu maḏayin'kunydja romgu, mirithirrina ŋonuŋnha dhuwalayinydja gänharawu. 15Nhuma ŋuli goŋ-garrwarthirrinydja yanapi nhuma ŋuli yuwalkkuŋu buku-ŋal'yurru ŋarrakunydja, yurru ŋarranydja ŋuli maŋutji-yaw'yunmirri ŋarranhay ŋarra, ga yakana ŋarra yurru nhämanydja; bukumirriyama nhuma ŋuli be weyin-marrama, ga ŋarranydja yurru yakana ŋurikiyi mäkiri'-witjun, liŋgu ŋunhiyi ŋarambiya' ŋunhi nhumalaŋgu gunganhara warrpam'nha ŋuriŋi maŋgu'yuna yolŋu'-yulŋuwalana bunhara. 16Yo, rurrwuyunmiyana nhunapinyay nhe, djalkthurrana dhuwali yätjtja malanha nhäŋiniŋ'tja rom; yakana biyapulnydja dhuwali djäma romnha yätjtja. 17Marŋgithiya romgu Godkalaŋuna ḻatju'wuna walŋu dhikana, ga djäma nhäyinyara dhunupa ga ŋamakurru'. Guŋga'yurrana ŋunhinha yolŋunha ŋunhi ŋanya yukurra muŋdhun ŋula nhäyu romdhu, ga djäkana biyakana marrtjiya ŋuriki goŋmiriwŋuranydja yolŋuwu ga buku-wurthapuywunydja.”
18Bitjan ŋayi yukurra Garraynydja waŋa, “Go ŋilimurru waŋanharamirrina. Yätjnha nhumanydja dhuwala mirithirrina walŋu, liŋgu ŋurikiŋinayi yätjkuŋuna ŋäkirrmaranhara, yurru ŋarranydja yurru nhumalanha rurrwuyunna, bitjan ḏarrtjalkkumana ŋarra yurru. 19Ŋunhi nhuma yurru dhäruk-märramanydja ŋarranha, nhumanydja yurru maranhuyirrina ŋamakurru'yu ŋuriŋina malaŋuyu. 20Ŋuli nhuma yurru yakanydja märrama dhäruk ŋarranha, ŋuyulkthirrinydja, nhumanydja yurru rakunydhirrina yana.” Dhuwalanydja dhäruk God yana ŋayipi waŋa yukurra.
21Ŋäthilinydja ŋunhinydja nhuma yolŋu walala ŋarrakuway muka yana, yurru nhumanydja ŋapana-wekaŋala ŋarraku, gonha'yurrunana ŋarranha ga wekanhamina dhayuŋanmina ŋuriki wiripuŋuwuna waŋarrwu. Ŋäthilinydja ŋunhinydja nhuma ŋuli yukurranha djäma ŋamakurru' yana walŋu, yurru dhiyaŋunydja-wala nhuma yukurra buma ŋayaŋu-yätjkumana yolŋunha murrkay'kumana, ga djäma ŋula nhäna mirithirrina yana yätjnha walŋu. 22Ŋäthilinydja ŋunhinydja nhuma dhika walŋu ḻatju', balanyara bitjan mel-wiḏi' guṉḏa, yurru dhiyaŋunydja-wala nhuma nhäŋiniŋ'nha. 23Nhumalaŋgu ŋurru'-ŋurruŋunydja yolŋunydja walala balanyarana biyaku ŋuli ŋurru-nyinyaŋdhunaramirrina walala, yakana walala ḏukṯuk Godkalaŋuwu romgu. Balanyarayinydja yolŋu'-yulŋu ḻundu'mirriŋu ŋurikina manaŋinyaramirriwuna yolŋuwu; walala djäl-ḏumurruyirri yukurra bukmakkuna nhäkuna malaŋuwu, yakana walala yukurra guŋga'yun ga djäka ŋunhi yolŋunha ŋurruwuyknhanydja ga goŋmiriwŋuranydja.
24-25Dhiyakunydja mäkiri'-witjurra, ŋäka ŋamathaŋa ŋunhi Garray, Yitjuralwunydja God Waŋarr Ganydjarr-ḏumurrunydja yukurra waŋa bitjan. “Nhumanydja ŋarranha buku-nherrara warray, ga ŋarranydja yurru bitjan yana liŋgu buku-nherraṉdhi nhumalanhanydja ga bitjandhiyi ŋarra yurru ḏarrtjalkkumanydja nhumalanha, bitjan djalkthun yurru nhä malanha dhukun' yätjtja ŋayaŋuŋuruna nhumalaŋgala. 26Bala ŋarra yurru nherraṉ wiripuŋunhana yuṯanhana walŋu ŋurruŋunha walalanha nhumalaŋgu, ŋamakurru'nhana yana, balanyarayina bitjan ŋunhi buŋgawa ŋäthili walŋu, bala nhumalanha yurru yolŋu'-yulŋuyunydja ḻakarama rom-dhunupamirrina nhuma yolŋu walala.” 27Liŋgu Garraynydja dhuwala ḻatju' yana ŋayi dhunupa walŋu, ga djäma ŋayi yukurra bitjan liŋgu ŋunhi nhä ŋamakurru' ga dhunupa. Ŋayi yurru walŋakumana wäŋa Djurutjalamdja, ga bitjandhi liŋgu ŋayi yurru walŋakumayi ŋunhinydja yolŋu'-yulŋunha ŋunhi walala yurru ŋanydjaḻa'yun ḏiltji-wekama walalaŋgalaŋuwu yätjku. 28Ga ŋayinydja yurru yanana muŋdhunna ŋunhinydja dhuwurr-yätjmirrinhanydja yolŋu'-yulŋunha, ŋunhinhanydja walalanha ŋunhi walala buku-nherrara ŋanya. Yo, ŋunhinydja walala ŋunhi walala buku-nherrara gonha'yurruna ŋanya yurru murrmurryunna. 29Nhumanydja yurru gorana yana walŋu ŋurikiyi ŋunhi nhuma yukurra buku-ŋal'yun dharpawunydja waŋarrwu ga djäma wäŋa dhuyunydja. 30Liŋgu nhepinydja yurru ŋunhi räwakthirrina binydjitjthirrina, bitjanna bitjan dharpa ŋuli walŋamiriwyirri, ŋunhi ŋayi yukurra yurru dhärra baṉḏanyŋura gapumiriwŋura dharpa. 31Yo, ŋunhiyi räwaktja mulmu ŋuli warrpam'thuna yana nhärana-wala ŋuriŋi dhäŋa'mirriyu yutjuwaḻa'yunydja, ga bitjandhi liŋgu yolŋunha walalanha yurru be ganydjarr-ḏilkurrumirrinhanydja baḏuwaḏuyunna warrpam'nha yana ŋuriŋi walalaŋgalay yätjthunydja malaŋuyu dhuwurryu, yakana walalanha yurru ŋula yolthu walŋakumanydja.