Yolŋu walala yätjnha gal'ŋu yukurrana nhinana
6:1-8 (People became very bad)
1-4Yo. Yolŋunydja walala marrtjina malanydja dhaŋaŋdhinana, bala marrtjina barrkuwatjthinana dhikana buḻwaŋ'thurrunana wäŋalili ga wäŋalili, wiripuna ga wiripuna wäŋa mulkana, ga yumurrkuny'tja maḻŋ'thurruna marrtjina guḻku'thinana dhika, ḏarramu ga miyalk, ga dhäykawurrunydja ŋunhi maḻŋ'thurruna ŋanya dhika ḻatju'mirrina. Ga ŋuriŋi waŋarryu walalay nhäŋala yolŋu'-yulŋunha walŋu dhäykawurrunha, djana'mirri ḻakaraŋalana, mel-ŋamathinana, bala walala marrtjina djarr'yurruna märra'-marraŋalanydja walalaŋguway walala miyalknhana walalanha. Bala ŋuriŋi miyalkthunydja walalay gurrukaŋala yumurrku'nhana ŋuripa waŋarrwana walalambala, bala yana ŋunhi yumurrkuny'tja dhawal-wuyaŋinana maḻŋ'thurruna marrtjina ŋutu'mirrina dhika ŋanya, ganydjarr motjmirrina. Yo, dhuwala walala ŋunhi waŋarrnydja walala ŋunhi walala yukurranha ŋuli nhinanha ŋunhala bala be walŋu baman' birr', ga mukthun yana ŋilimurru ŋäma walalanha yukurra dhiyaŋunydja-wala. Ga Godthunydja nhäŋala ŋunhi yolŋunha walalanha, yurru walala wirrkina yätjthinanydja, yakana ŋamathina nhanukala maŋutjiŋura, bala yana ŋayi waŋanharaminana bitjarrana, “Yakana yana yurru yolŋunydja weyin nhina walŋa dhiyala munathaŋuranydja gay'; walala yurru nhinanydja märr-gurririna, 120-na dhuŋgarra, bala yurru dhawar'yunna, rakunydhirrina yurru.”
5Yo, Garrayyunydja nhäŋalana yukurrana yolŋunhanydja walalanha dhipalanydja munatha'lilinydja wäŋalili, yurru bukmaknha yolŋunydja romdja yätjthinana wirrkina; walalaŋguŋu guyaŋinyara djarrpi'na mirithirrina, ga bitjarrana liŋguna walala yukurrana djäma walalaŋgalaynha djälkurru, yätjnha dhika walŋu ŋunhina ya'. 6Garrayyunydja nhäŋala, bala yana wirrkina ŋoy-yätjthinanydja, bala ŋayi waŋanana bitjarra, “Ŋarra bini ŋunhi yaka muka yolŋunhanydja djäma munatha'lilinydja. 7Ŋarranydja yurru dhuwala rumbal-winya'yunmaramana dhuwala yolŋunhanydja walalanha, warrpam' dhawar'maramana yurru yolŋunha ga wäyinnhana manapan ga ŋula nhä wiripu malanha; warrpam' yurru dhawar'marama buwayakkumana.”
8Yo, warrpam'nha yolŋunydja rom yätjthina, bukmaknha yana dhika, yurru waŋganynha yolŋu yukurrana nhinana rom-dhunupanydja ŋamathinanydja maŋutjiŋura Garraywalanydja, waŋganynha yolŋu yäku Nowana.
Godthu waŋana Nowanha dhuḻ'yunarawuna mitjiyawuna
6:9-22 (God told Noah to build a big boat)
9-10Yo, Nowanydja ŋunhi yolŋu rom-ŋamakurru' yana, nhinananydja ŋayi yukurrana waŋganyŋura yana Godkala, ga yumurrkuny'tja nhanŋu Nowawu ḻurrkun', yäkunydja walala Djim ga Wäm ga Djaypip. 11Ga wiripu-guḻkuny'tja yolŋu walala gatjpaḻ'yurruna ŋapana-wekanharamina Garraywala, yätjnha rom djäma goḏuy-wunharaminana marrtjina, walalaŋgu romdja waŋganynha yana ŋunhina bili yätjnha walŋu bitjanna liŋgu, bunharaminyana murrkay'kunhaminyana yanana.
12Yo, Garrayyu Godthu nhäŋalana yolŋunhanydja walalanha dhipala munatha'lilinydja, 13bala yana ŋayi ḻakaraŋala Nowawu, waŋana ŋanya bitjarra, “Ŋarranydja yurru dhuwala rumbal-winya'yunmarama buwayakkumana dhuwali ya' yolŋunhanydja walalanha, liŋgu walala yukurra goḏuy-wunhamirri warray, ga marinydja buḻwaŋ'thurrunana bawala'mirrikurru wäŋakurru buku-ḻiw'marama. 14-17Bukmaknha yurru murrmurryundja yolŋunydja miṯtji, yurru nhepina ga nhuŋu miyalknha ga yumurrku' nhuŋu ga nhokalaŋuwu yumurrku'wu dhäykawurru, nhumana yurru walŋathirrinydja. Gatjuy nhe yurru mitjiyana dhuḻ'yurranydja nhumalaŋguway; dhuḻ'yurranydja marrtjiya nhe yurru yindikuŋa walŋu yana, ga wirrki wuṉḏaŋarrkuŋanydja, ga gulkthu'-gulkthunmaraŋa dhaḻakarrnydja malanha bala. Gungaŋanydja gapuŋuru gärrinyaŋuru nhäwithu gonydjuy'yu, liŋgu ŋarra yurru djuy'yun waltjaṉ, ŋutu'na waltjaṉ dhipali-wala munatha'lili; warrpam' yurru nhä malanha dhä-monygumana, bala yurru murrmurryunna marrtji ŋunhala djinawa' gapuŋurana. 18Nhumapina yumurrku'na yana nhuŋu yurru walŋanydja. 19-20Ga wäyinnhanydja nhe yurru märra'-marraŋayi dhipaliyi wapmaraŋa marthaŋalili, miyalknha ga ḏarramunha, wiripunha ga wiripunha wäyinnha malaŋunha, märr walalanydja yurru walŋathirriyi. 21Ga ŋathanydja walalaŋgu märraŋayi dhipali marthaŋalili.” Bitjarra Godthu ḻakaraŋala Nowawalanydja. 22Bala yana Nowayunydja djämana-wala yana dhunupana, bitjarra yana liŋgu ŋunhi God waŋana nhanukala.