Biyapul walala dhuḻ'yurrunayi Godkunydja Buṉbunha
3:7—6:18 (They rebuilt the Temple)
7-13Yo, ŋunhi walala mulkana Djurutjalamdja wäŋa, bala dhunupana walala ŋurru-yirr'yurruna dhuḻ'yurrunana djäma ŋunhiyi Buṉbu buku-ŋal'yunaramirrina; biyapul walala ŋunhi djäma ḏaw'-ḏawyunara miriŋuwuŋu. Yo, djämanydja walala yukurrana bukmakthuna, märr-ŋamathina yana dhika wal'ŋu; yana walala yukurrana wirrkina dhikana wokthurruna Garraywunydja dhiyaŋuna manikayyu gam', “Garraynydja ŋunhi ŋamakurru' wal'ŋu dhika. wirrki ŋayi yukurra märr-ŋamathirri Yitjuralwunydja, ga bitjan liŋgu ŋayi yurru.” Yo, bukmakthinana walala ŋunhi yiŋgathinanydja yukurrana bena dhika rirrakay, wokthurrunana manapara Godkuna, liŋgu ŋunhiyi djalkirinydja ŋurikiy Buṉbuwuynydja liŋguna gurrunhanarana. Ga waŋgayŋuny'tja ŋunhi ŋäthiliŋunydja malanha ḏalkarra'mirri walala ŋäthinana yukurrana, ŋunhi walala nhäŋalanydja ŋunhiyi djalkiri biyapulŋuwuy nherraṉara, liŋgu walalanha guyaŋinyamirriyaŋala ŋuriŋiyi Buṉbuyu, ŋunhi nhaltjarra yukurrana dhärrana ŋäthili wal'ŋu dhapirrk dhika ŋanya. Ga waŋgayŋu'-guḻku' yolŋu walala yukurrana nyä'yunminayi yana, ŋuruŋu ŋayaŋuyu djulŋithinyarayu, milkarriyu walala yukurrana ŋäthinanydja ŋunhi. Ga wiripu-guḻku' bitjarrana liŋgu yatjunmina yukurrana yiŋgathina, galŋa-djulŋithina goŋmirriyina, liŋgu ŋunhiyi wäŋa gungaŋala warrpam' rirrakayyu ŋuriŋi ganuruyu ga dhika nhäyu manikayyu miyamanarayu.