Ḻakarama yukurra nhäyinyara yolŋunydja yurru gulŋiyirri Godkalanydja Buṉbulili
44:4-9 (Who may enter God's Temple?)
4Yo, mukthurruna yana ŋarra yukurrana nhäŋala ŋunhiyi yulŋunydja mel-yurthina, ga ŋuriŋi ḏarramuyu gäŋala ŋarranha marrtjina, bala nherraranydja ŋayi ŋarranha galki dhurrwaralilina ŋunhiwala Buṉbulili. Dhärrananydja ŋarra yukurrana, bala ŋarra nhäŋalana ŋunhiyi Godku Buṉbunydja biyapul warray dhika walŋu nhanŋu djeŋarrany'tja, warrpam' warray dhaŋaŋ dhika monyguŋala, liŋgu Godnha yana ŋayipina yukurrana nhinana djinawany'tja ŋunhili Buṉbuŋura. Ŋarra galkina bukunydja ŋunha munatha'lili, 5bala Garray waŋana ŋarrakala bitjarra, “Yolŋu, nhäŋanydja marrtjiya gurrum'thurra, ga mäkiri'-witjurra nhaltjan ŋarra yurru waŋa marrtji nhokala. Yo, ḻakarama ŋarra yurru rom-ḻakarama nhuŋu yulŋunydja dhiyakuyyi Buṉbuwuy, märr yurru nhepinydja marŋgiyirri yol yurru yolŋu gulŋiyirri dhipalayi dharapullili, gumurr-walkithirri Godkala, ga nhäyinyara yolŋu yurru yaka gumurr-walkithirri Godkala.
6“Yo, ḻakaraŋa ŋuripa yolŋu'-yulŋuwa Yitjuralpuyŋuwanydja, raypirri'-waḏatjmirriwanydja ŋuripa biyakana, ‘Nhuma yukurrana djäma be nhäna yana yätjnha walŋu romdja, ga yakana biyapulnydja ŋarra yurru waŋa bitjan, “Bäythi,” bitjan. 7Nhumanydja gäŋala lili ŋarrakala dhipalayina Buṉbulili ŋunhiyinha walalanha dhuwurr-yätjmirrinha warray, ŋunhi walala yaka ḏukṯukthirri yukurra malthunarawu ŋarraku. Yo, ŋunhiyi dhäruk-märranhamiriwnydja walala ŋunhiliyi ŋarrakala buṉbuŋura ŋulinyaramirriyunydja ŋunhi nhuma ŋuli mundhurr-wekanha yukurranha ŋarraku ŋatha malanha, ga gulaŋ-wanḏinyamaranha nhuma ŋuli wäyinnha gulaŋ, ga ŋuriŋiyinydja nhuma bitjarra bakmaraŋala dhawu'-nherraṉminyarawuy ŋunhi ŋarraku. 8Yo, ŋarranydja nhumalaŋgala wekaŋala goŋlili ŋarrakuwaynydja ŋarra ŋunhi ḏarrtjalktja rom malanha, dharrpalnydja ŋarrakuwaynydja, yurru nhumanydja yaka warray djäka ŋamathaŋala ŋarrakalaŋuwu, yana warray nhumanydja wekaŋala ŋunha mulkuruwala warray yolŋu'-yulŋuwala, ŋunhi walala yaka marŋgi ŋarraku, ŋurikalayi warray nhumanydja dhayuŋara. 9Yo, yakana yana yurru ŋunhinydja yolŋu walala dhäruk-märranhamiriwnydja walala galkithirri marrtji ŋarrakalanydja, ŋunhina liŋgu ŋarrakuwaynha walŋu yolŋu walala yurru gulŋiyirri ŋunhiwala ŋarrakalanydja walŋu Buṉbulili.’ ” Ga bitjarra ŋayi Garray waŋananydja.