Godthu ḻakaraŋala giṯthunarawuna marrtjinyarawu
33:1-6 (Orders to move on)
1Ŋuliŋurunydja dhurrwaraŋuru ŋayi Garrayyu waŋana Mawtjitjnha, “ḏurryurrana walala, bala marrtjiyana, nhe Mawtjitj ga bukmak dhuwali yolŋu walala ŋunhi nhe gäŋala walalanha ŋulaŋuru Yetjipŋuru. Ŋäthilinydja baman'tja galŋu ŋarra ḻakaraŋa Yipurayimgala ga Yitjakkala ga Djaykupkala, dhawu'-nherraranydja ŋarra bitjarra gam', ‘Ŋarra yurru wekama dhuwala wäŋa Gaynandja ŋuriki nhokalaŋuwuna mala-wunharawuywu walalaŋgu,’ bitjarra ŋarra dhawu'-nherraranydja ŋäthilinydja. 2-3Ga dhiyaŋunydja-wala nhuma yurru marrtjina ŋunhimalayi wäŋalili, ŋunhi marrtji ŋorra guḻku' ŋatha ḻatju'mirri dhika ŋanya, gapu ga borum ŋula nhä malanha ŋunhilimi wäŋaŋura. Djuy'yundja ŋarra yurru djiwarr'wuynha djämamirrinha, ŋayi Yurru nhumalanha mel-warryundja, ga dhawaṯmaramana ŋarra yurru ŋunhi miriŋunhanydja walalanha bäpurru'nha ga bäpurru'nha, ŋupanna yurru ŋuliŋuruyi wäŋaŋuru. Yurru ŋarranydja yakana yurru ŋarrapinydja malthun marrtji nhumalaŋgu; ŋarra ŋuli gonhana baymatthurru rakunyguŋu nhumalanha, liŋgu nhuma dhuwala rom-ḏälmirri yolŋu'-yulŋu.”
4Walala yolŋu'-yulŋuyunydja Yitjuralpuyŋuyunydja ŋäkula dhäwuny'tja ŋunhiyi, bala walala warwuyunminana ga nyä'yunminana, yakana biyapul galŋa-ŋamathina, 5liŋgu ŋayi Garrayyunydja ḻakaraŋala Mawtjitjkala bitjarra, “Nhumanydja dhuwala yolŋu'-yulŋu gupa-wuṉḏaŋarrmirrina. Ŋunhi ŋarra bini marrtjinya galkithinya nhumalaŋgala, nhumanydja bini ŋunhi murrmurryunana ŋuriŋi ŋarrakala ḏarrtjalkthuna djarraṯawun'thu. Burrul'maraŋana djalkthurrana nhokalay nhe dhuwali mel-wiḏi'mirrinydja girri' malanha. Bilyurrana biyakana ŋayaŋunydja, wuyurrana nhokalayŋuwu nhe yätjkunydja, bala ŋarranydja yurru ḻiya-ŋamaŋamayunmirrina nhaltjan ŋarra Yurru nhumalanha.”
6Bala walala ŋunhi yolŋu'-yulŋunydja galŋa-yätjthinyaminana, bala burrul'maraŋalana gulk-gulkthurruna yana ŋunhiyi girriny'tja malanha, ŋunhi walalanha ŋuli ŋuriŋiyinydja girri'yu biyapulnha garrwarkunha. Ga dhurrwaraŋuru ŋuliŋurunydja, bala walala Yitjuralpuyŋuyunydja gonha'yurruna ŋunhi wäŋa Djäniyanydja buku, bala marrtjinana.
Mawtjitjthu bukumirriyaŋala yukurrana Godnha yolŋu'-yulŋuwu
33:7—34:9 (Moses met with God and prayed for the people)
7Ga ŋunhi walala ŋuli Yitjuralpuyŋu gulyu'-gulyunna gandarrŋuranydja wäŋaŋura, ŋayinydja ŋuli Mawtjitjthunydja botjanha ḏalwaḏalwa' märr-barrkumala ŋurikala walalaŋgala yarrkthuna wiripu-guḻku'walanydja, ga ḻakaraŋalanydja ŋayi ŋunhiyi buṉbunydja yäku Withiyanminyarawuynha, liŋgu ŋunhiliyina maṉḏa ŋuli Mawtjitj ga ŋayipi Garray gumurr-wunanhaminyanydja. Ga ŋunhi ŋuli ŋula yol yolŋu ḏukṯukthinya Garraywunydja bukumirriyanharawu, bala marrtjinya ŋayi ŋuli ŋunhimalayina buṉbulili.
8Yo, ŋunhi ŋuli Mawtjitj gaŋgathinya bala marrtjinya djunama ŋunhimalayi buṉbulili, bukmaktja yolŋu'-yulŋu ŋuli ḏurryunana, bala nhänha ŋanya yukurranha marrtjinyara nhinanhara bala, yana liŋgu ga gärrinya ŋayi ŋuli ŋunhimala buṉbulili. 9Ŋunhi ŋayi ŋuli liŋguna gärrinyana buṉbulilina Mawtjitj, bala ŋayi ŋuli maŋandja marrtjinya lili yarrupthunana, bala djingaryuna ŋunhimalana bäymana dhurrwaralilina buṉbulili, bala Garraynydja ŋuli yukurranha waŋanhana Mawtjitjkala ŋuliŋuru maŋanŋurunydja. 10Ga ŋunhi ŋuli walalanydja yolŋu'-yulŋuyunydja nhänha maŋandja djingaryunara, bala walalanydja ŋuli marrtjinya buku-nyilŋ'thunana gay' munatha'lilina buku-ŋal'yunana.
11Ŋe. Garraynydja ŋuli waŋanha yukurranha Mawtjitjkala bitjanana liŋgu galŋa'-galŋana, bitjana yana liŋgu bitjan ŋuli yolŋu maṉḏa ḻundu'manydji waŋanhamirri. Ga ŋuliŋurunydja dhurrwaraŋuru ŋayi ŋuli Mawtjitjtja marrtjinya roŋiyinya wäŋalilina, yurru balpara'mirrinydja Djatjuwanydja nhanŋu ŋunhalana bäymana ŋuli yukurranha nhinanha buṉbuŋurana.
12Yo, ŋayi Mawtjitjtja waŋanana Garraynha bitjarrana, “Nhenydja yawungu ŋarrakala waŋanha marrtjinyarawu muka, gänharawu dhiyaku yolŋu'-yulŋuwunydja, yurru nhe yaka ḻakaraŋala ŋarrakala ŋula yolnha yolŋunhanydja nhe yurru djuy'yun bämarany'tja ŋarraku, guŋga'yunaramirrinhanydja. Nhenydja ḻakaraŋala, nhenydja ŋarraku marŋgi muka be, ga ŋarrakala nhe ŋayaŋu-ŋamathirri muka yukurra be. 13Ŋuli nhe yukurra yuwalktja ŋayaŋu-ŋamathirri ŋarraku, ga milkuŋana ŋarrakala nhuŋuway dhukarrnha, märr ŋarra yurru marŋgithirrina nhuŋu, ga ŋayaŋu-ŋamadiinyamirriyainana nhuna. Ga guyaŋiya muka biyaka, liŋgu nhuŋuway ŋunhayinydja walala yolŋu'-yulŋu.”
14Bala Garraynydja waŋana nhanukala Mawtjitjkala bitjarra, “Yo, malthunga ŋarra yurru nhuŋu yulŋunydja, bala nhe yurru nhinana ŋayaŋuna ŋarrakala,” bitjarra. 15Ga ŋayi Mawtjitjtja waŋana Garraywala buku-ruŋiyinmaraŋala bitjarra, “Ŋuli bini nhe yakanydja marrtjinya malthuna ŋanapurruŋgu, yaka ŋanapurrunha djaw'yurra dhipuŋurunydja wäŋaŋuru. 16Ŋuli nhe bini yakanydja marrtjinya ŋanapurruŋgu malthuna, nhaltjan yurru yolŋunydja walala marŋgithirri, ŋunhi nhe yukurra ŋayaŋu-ŋamathirri ŋanapurruŋgunydja?... ŋarraku ga dhiyaku nhokalaŋuwu miṯtjiwu? Ŋanapurrunydja dhuwala liŋguna gänana ŋulaŋuru wiripu-guḻku'walanydja miṯtjiwala birrka'mirriwala bäpurru'wala, ganaŋ'thunna yukurra ŋuriŋina ŋunhi nhe galki ŋanapurruŋgala, gäma yukurra ŋanapurrunha.”
17Bala Garraynydja waŋana Mawtjitjkala bitjarra, Ŋarra yurru djämana-wala yana ŋunhi nhe nhäku ŋäŋ'thurruna, liŋgu ŋarra yukurra ŋayaŋu-ŋamathamanydja nhuna, ga marŋgina ŋarra nhuŋu yäkuwu.”
18Bala Mawtjitjthunydja bukukurru waŋanana, “Garray, ŋarra ḏukṯuk nhe yurru ŋarrakala milkunharamiya nhunapinyay nhe ŋunhi nhenydja djeŋarra'na galŋu; ŋarra yurru nhuna nhämana.” 19Ga ŋayi Garraynydja waŋana Mawtjitjkala bitjarra, “Ŋarra yurru marrtji djuḻkthunmarama nhunanydja ḻatju'yuna, ga ḻakaranharamirrinydja ŋarra yurru ŋarranhawuy ŋarra yäkunydja nhokala, 20yurru yakana nhe yurru ŋarranha nhäma bukunydja. Ŋula yolthu yurru ŋuli nhäma ŋarranhanydja buku, mel-ŋal'yun ŋarrakalanydja, ŋayinydja yurru ŋunhiyinydja yolŋu rakunydhirrina. 21Nhe yurru djingaryundja dhiyala guṉḏaŋura ŋarrakala galki, 22bala ŋarranydja yurru nhuna ŋurrwu'yunmarama ŋunhimala ḏaw'yunarawuylili guṉḏalili, gungamanydja nhuna yurru ŋarrakalay ŋarra goŋdhu, ga bäy ŋarra yurru djuḻkmarama nhuna. 23Bala ŋarra yurru djaw'yunmirrina goŋdja, bala nhe yurru ŋarranha nhämanydja ḏiltjina, yurru yakana nhe yurru nhäma bukunydja ŋarranha.” Ga bitjarra ŋayi Garrayyu Godthu waŋananydja Mawtjitjnha.