Märr-ŋamathiya Godkunydja, ga dhäruk-märraŋa warrpam'thurra
6:1-25 (Love God and obey him completely)
1“Yo, Godthu yana ŋayipi Waŋarryu wekaŋalanydja dhuwalayi romnhanydja, märr yurru nhuma dhäruk-märrama ŋanya, ga nhina ŋunhiliyi liŋgu romŋura. 2Bitjan liŋgu nhuma yurru borrk-beyaṉiyirri Garraywunydja, ga ŋayathama yana romdja nhanŋu baṯbitjan, nhuma ga gäthu'mirriŋuyu walalay nhumalaŋgala ga gutharra'mirriŋuyu walalay. Gupaḏalnha-yana nhuma yurru-wala nhinanydja yukurra ŋunhili liŋgu nhanukalay romŋuranydja, märr yurru nhuma bitjan liŋgu nhina yukurra walŋa. 3ŋuli nhuma yurru ŋäma Godnha dhäruk, ga djäma yukurra nhanŋu ŋunhiyi rom, nhumanydja yurru nhina ŋamathamana dhikana walŋu, ga miṯtjinydja yurru ŋunhiyi ŋuthandja biyapul'nha walŋu miṯtji, ga nhinanydja nhuma yukurra yurru ŋunhilinayi ŋatha-guḻku'mirriŋura wäŋaŋura ŋunhi ŋayi Garrayyu nhumalaŋgala Godthu dhawu'-nherrara nhumalaŋgalaŋuwala märi'muwala.
4“Ŋäka walala ŋi' yolŋu walala ŋarraku. Godtja dhuwala waŋgany yana, Garray ŋayi walŋu. 5Nhuma yurru warrpam'thun yana märr-ŋamathirrinydja märryu-ḏapmarama Garraynha, ŋayaŋuyu nhokalay ga ḻiyayu nhokalay ga ganydjarryu. 6-7Märraŋa dhuwalayi romdja malanha ga ŋayathaŋanydja baṯbiyaka ŋuruŋu ŋayaŋuyu nhokalay nhe, ga marŋgikuŋa biyaka marrtjiya nhumalaŋguway djamarrkuḻi'nhanydja. Waŋanhamiya biyaka yukirriya ŋunhi nhuma yukurra yurru nhina wäŋaŋuranydja nhumalaŋgalay, ga biyakayi liŋgu ŋulinyaramirriyunydja ŋunhi nhuma yurru yukurra marrtji dhukarr ŋupan. Guyaŋiyanydja yana ṉiṉ'thurra yukirriya dhuwalayi dhäruktja ŋarranha ŋunhi nhe yurru ḻäy-ŋorranydja, ga biyakayi yana liŋgu ŋunhi nhe yurru gaŋgathirri beŋuru. 8-9Ŋayathaŋa baṯbiyaka yana ŋarraku dhäruktja warrpam'thurra yana, ga wukirri biyaka dhurrwaralili nhokalay nhe wäŋalilinydja, märr yurru nhe yaka meṉguma ŋula waŋganydja.
10-11“Yo, ŋayi yurru Garrayyunydja gämana marrtji nhumalanha ŋunhimalayinayi wäŋalili ŋunhi ŋayi wäŋanydja ŋunhiyi dhawu'mirriyaŋala nhumalaŋgalaŋuwala märi'muwala, Yipurayimgala ga Yitjakkala ga Djaykupkala. Ŋunhayinydja manymaknha dhikana walŋu wäŋa, buṉbu mäypamirri dhika, ga guḻku'na mirithirrina yurru ŋathanydja ŋunhiliyi wäŋaŋura nhumalaŋgu ḻukanharawunydja, nhuma yurru yana märr-ḏaw'yun ŋuriŋiyi maranhuyunydja. 12Yurru yaka yana meṉguŋanydja Garraynha, liŋgu ŋayipi nhumalanha beŋurunydja märraŋala miriŋuwalanydja goŋŋuru, ŋunhi nhuma yukurrana ŋäthili nhinana ŋunhili garrpiṉminyarawuyŋura romŋura. 13Biyaka borrk-beyaṉiyiya yulŋunydja nhokalaŋuwu ŋunhi Godkunydja, ga mukthurra-wala yana djäma yukirriya nhanŋu Garraywu; nhanukala yana waŋganygala yäkuyu nhuma yurru dhawu'-nherraṉmirrinydja. 14-15Ŋunha wiripu-guḻkuny'tja yolŋu walala ŋuli buku-ŋal'yun yukurra wiripuŋuwu warray waŋarrwu, yurru nhumanydja dhuwala dhulŋuŋu warray, nhanŋuway warray galŋu. Ŋuli nhe yurru märr-nherraṉmirri wiripuŋuwalanydja waŋarrwala, ŋayinydja nhuŋu yurru Garraynydja ŋaramurryirrina, bitjanna ŋayi yurru bitjan ŋuli dhuway'mirriŋuyu mel-ḏi'yun ŋunhi ŋayi yurru dhäykayu nhanukala märrama wiripuŋunha ḏarramunha, bitjandhina ŋayi yurru yulŋunydja. Yo, Garray Godtja dhuwala ṉapuŋga bäyma. ŋuli nhuma yurru buku-ŋal'yun ŋula wiripuŋuwu waŋarrwu, ŋayi yurru nhumalanha baḏuwaḏuyunna bitjanna, yakana biyapulnydja nhuma yurru yukurra nhina dhiyala munathaŋuranydja weyin.
16“Yaka biyakayi biyapulnydja gatjarr'yurra Garraynha, bitjarra nhuma yukurrana gatjarr'yurruna ŋanya ŋunhala Matja wäŋaŋura. 17-18Yana biyaka ŋayathaŋa baṯbiyakana nhanŋu romdja, ga dhäruk märraŋa ŋanya. Djäma biyaka ḻatju'kuŋa dhunupa walŋu ŋunhiyi yana liŋgu rom malanha ŋunhi ŋayi yukurra Garrayyu ḻatju'-ḻakarama dhika walŋu, bala yurru nhuma ŋunhi gulŋiyirrinydja ŋunhiwala wäŋalilinydja, ŋunhiwalayi ŋunhi ŋayi Garrayyu dhawu'mirriyaŋala ŋäthili nhumalaŋgu. 19Yanana nhuma yurru gukumana ŋunhiyi miriŋunhanydja walalanha ŋunhi walala yukurra wäŋaŋura ŋuli nhina ŋunhiliyi, ŋurrkamana nhuma yurru walalanha warrpam'thunna, bitjanna bitjan ŋunhi ŋayi Garrayyu waŋana ḻakaraŋala.
20“Yalalaŋumirrinydja nhumalaŋgala yurru djamarrkuḻi'yu dhä-wirrka'yun nhumalanha bitjan, ‘Nhäku warray ŋayi ŋunhi Garrayyu ŋilimurruŋgala waŋarryu nherrara dhuwalayinydja rom?’ 21Ga nhumanydja yurru waŋa ḻakarama bitjan walalambala, ‘Ŋäthilinydja ŋunhinydja ŋilimurrunydja ŋuli yukurranha nhinanha garrpiṉara muka ŋunhala Yetjiptja, garrpiṉara ŋilimurru yukurrana nhinana ŋurukala buŋgawawala ganydjarryu, ga ŋayinydja Godthunydja ŋilimurrunha bitjarra dhawaṯmaraŋalana ŋuriŋi nhanukalanydja ŋayi bathalayunydja ganydjarryu. 22Ŋilimurru nhäŋala ŋunhi ŋayi Garrayyu mirithirri walŋu ganydjarr-ḏumurru djäma, ŋayi warrpam'thurruna baḏuwaḏuyurruna ŋunhiyi miriŋunhanydja ŋilimurruŋgala maŋutjimara yana. 23Dhawaṯmaraŋala ŋayi ŋilimurrunha ŋuliŋuruyi miriŋuwalanydja goŋŋuru, märr yurru ŋayi wekama ŋilimurruŋgu ŋunhiyi manymak wäŋa, ŋunhi ŋayi dhawu'-nherrara ŋilimurruŋgalaŋuwala märi'muwala. 24Garrayyunydja ŋilimurruŋgala ḻakaraŋala ŋilimurru yurru ŋayathama baṯbitjan yana romdja malanha nhanŋu. Yo, ŋali yurru rom-wiyaṉiyirri Godkunydja, ga yaka nhanŋu ŋapanydja-wekama, märr ŋayinydja yurru ŋitjalanha Godthunydja bitjan goŋmirriyama walŋu, ga nhinanydja ŋali yurru yukurra walŋana dhikana galŋa-djulŋithirrina nhanukala ŋarambiyaŋura. 25Ŋunhi ŋali yurru dhäruk-märramanydja nhanŋu dhäruk warrpam'tja galŋu, ga yakanydja meṉguma ŋula waŋgany, ga ŋayipinydja yurru ŋitjalanha Godthunydja ḻakarama ŋayaŋu-dhunupana, bala ŋayi yurru goŋmirriyamana ŋitjalanha walŋu.’ Bitjandhina nhuma yurru yukurra ḻakarama nhumalaŋgalaŋuwa yumurrku'wanydja.”