Ḻakarama yukurra rom nhaltjan ŋilimurru yurru wekama nhanŋu Godku
26:1-15 (The law about giving the first part to God)
1Yo, galkina nhuma yurru marrtjina yulŋunydja giṯthunna, bala gulŋiyirrina ŋunhiwalayi wäŋalilinydja, bala nhinana yurru wäŋaramana, 2bala ŋathanydja yurru ŋuthan muḻkurrmirriyirrina dhika. Ga ŋunhi nhe yurru gulkthundja marrtji ŋathanha, bala nhe yurru bathililiyamana ŋurruŋunydja walŋu ŋunhi gulkthunara ŋatha, bala gäma yurru ŋunhiwalayina buku-ŋal'yunarawuylilina buṉbulili. 3Marrtjiya ŋurikala ḏalkarra'mirriwalanydja yolŋuwala, ga waŋiyanydja biyaka nhanukala, ‘Dhuwalanydja ŋarra yukurra waŋanydja nhanukalaynha galŋu yana Garraywalana buku-wekamanydja yukurra ŋanyana, ŋunhi ŋarranydja liŋguna gulŋiyinana dhipalayi wäŋalili ŋunhi ŋayi dhawu'mirriyaŋala ŋanapurruŋgalaŋuwala märi'muwala be ŋäthili.’
4“Bala ŋayi yurru ŋuriŋiyinydja ḏalkarra'mirriyunydja yolŋuyu märrama bathinydja ŋunhiyi ŋathamirri nhokala goŋŋurunydja, bala gämana, ga gurrunhan gumurrlili dhaliyarra'lilina Garraywala. 5Ga ŋunhalayinydjayi gumurrŋura nhanukalaynydja nhe yurru waŋa bitjanna, ‘Ŋarraku märi'munydja nhinana yukurrana dhiyalanydja wäŋaŋura mulkuru ŋayi, yaka ŋayi yukurrana ŋayathaŋala wäŋa, bala ŋayi märraŋalana nhanŋuway djamarrkuḻi'nhanydja bala Yetjiplilina. Walalanydja ŋunhi ḻurrkun' walŋu yana miṯtjinydja, ga ŋunhalayinydja Yetjiptja wäŋaŋura bitjarra ŋayi ŋunhi miṯtjinydja birrŋ'thurrunana yindithinana ŋuthara. 6-7Ŋuriŋi Yetjippuyŋuyu yolŋu'-yulŋuyu walalay yukurrana gur'kuryurruna ŋanapurrunha mirithinana yana djämawunydja, yana walala ŋuli ŋayaŋu-yätjkunha ŋanapurrunha wiripunydja, yana liŋgu ga bitjarra gawaw'yurruna ŋanapurru märrliliyaŋala Garraywala guŋga'yunarawuna. Bala ŋayi ŋäkulana ŋanapurrunha gawaw'yunaranydja rirrakaynydja; ŋayi nhäŋala ŋanapurrunha ŋunhi ŋanapurru yukurrana nhinana buku-yätjthina, galŋa-yätjthina manapara, monygunhara ŋuriŋina ŋonuŋdhuna romdhu, 8bala ŋayi dhawaṯmaraŋalana ŋanapurrunha walŋakuŋalanydja märraŋala ŋuliŋuruyi nhanukalaynha ŋayi ganydjarryu galŋu. Ŋayi märraŋalanydja ŋanapurrunha dhawaṯmaraŋalana Yetjipŋurunydja yana. Djämanydja ŋayi mirithirri walŋu yana yindi romdja, barrarimirri yana rom, 9bala ŋayi gäŋala lili ŋanapurrunha, bala wekaŋalana ŋayi dhuwalayinydja ŋatha-guḻku'mirrinydja wäŋa ŋanapurruŋguna. 10Ga dhuwalana gay ŋarra yukurra gämana yulŋunydja roŋiyinyamarama Godkuna nhanŋuwaynha ŋunhiyi ŋurruŋunydja galŋu ŋuliŋuruyi ŋathaŋuru, ŋunhi ŋayi ŋayipi Garrayyu wekaŋala ŋarraku.’ Waŋiyanydja biyakayina, bala gurrunharranydja marrtjiya ŋunhiyi ŋathanydja gumurrlilina nhanukala, bala buku-ŋal'yurrana nhanŋu. 11Biyaka goŋmirriyaŋa buku-wurrpalanydja ŋanya, ŋunhi ŋayi mirithirri manymak nhä malanha wekaŋala nhuŋu ga nhumalaŋgalaŋuwu djamarrkuḻi'wu. Ga ŋunhiyi wiripu-guḻku' ḏalkarra'mirri walala yolŋu'-yulŋu ga wiripu mala, walalanydja yurru bitjandhi liŋgu goŋmirriyirri dhika walŋu rrambaŋi nhumalaŋgala manapan; rrambaŋi yana waŋgany-manapanmirri nhuma yukurra yurru ḻuka ŋathanydja ŋunhiyi Garraywalanydja ŋunhiliyi walŋu gumurrŋura.
12“Yo, ḻukiyanydja yukirriya ŋathanydja ŋunhiyinydjayi nhumapi yana märrma' dhuŋgarranydja ŋupan yurru, ga ŋuriŋi wiripuŋuyunydja dhuŋgarrayu nhuma yurru yakana ḻuka ŋunhiyi ŋatha, yana nhuma yurru marrtji guḻk-guḻkthurranydja biyakana 10-lilina, nhanŋu ŋunhiyinydja ŋatha gulk-gulkthurra, bala wekaŋa ŋurikina yolŋuwu Godkalaŋuna djämamirriwu ga ŋurruwuykku yolŋuwu ga buku-wurthapuywu ga dhä-ŋäṉḏi'miriwwu, märr yurru walala yukurra gana' yana ḻukanydja ŋuriŋi Malaŋuyu. 13Ga dhurrwaraŋuru ŋuliŋurunydja ŋunhi nhe wekaŋala liŋguna Godku ŋäthili, nhenydja yurru waŋa Garraywalanydja bitjanna, ‘Garray, yaka ŋarra dhuḏi'yunmaraŋala ŋunhiyi nhuŋuwaynydja dhulŋuŋunydja ŋarrakuwaynydja ŋarra, wekaŋalanydja ŋarra ŋunhiyi nhokalaŋuwu djämamirriwuna ga ŋurikina ŋurruwuykkuna. Yakana ŋarra yana meṉguŋala ŋunhiyinydjayi rom, ŋunhi nhe ḻakaraŋala ŋarrakala 10-buynydja mala-wuḻkthunara. 14Yaka ŋarra ḻukana nhuŋunydja ŋunhi dhulŋuŋunydja ŋuriŋi bäpurru'mirriyunydja waluyu, ga yaka ŋarra wekaŋala buku-ŋal'yunarawu rakunygu ŋuriki. Ŋarranydja marrtjina dhäruk märraŋala nhuna, bukmakŋura yana ŋunhi nhe yukurra waŋa ḻakarama dhiyakuyi, ŋunhi ŋurruŋunydja dhulŋuŋunydja nhuŋuway yana Garray. 15Nhäŋa ŋanapurrunhanydja nhuŋuwaynydja yolŋunha walalanha, bala goŋmirriyaŋana biyakana ŋanapurrunha, märr yurru waŋanydja dhuwala ŋunhi nhe wekaŋala ŋanapurrunha bitjan ŋatha guḻku'mirriyirrina yurru dhikana walŋu, bitjan yana liŋgu ŋunhi nhe dhawu'mirriyaŋala ŋanapurruŋgalaŋuwala märi'muwala.’”
Godku nhanŋuway yolŋu walala
26:16-19 (God's own people)
16Bala ŋayi Mawtjitj dhawar'yurrunanydja waŋana bitjarrana gam', “Gäthuranydja dhuwalanydja nhokala Godthu waŋarryunydja waŋa yukurra nhumalanha bitjan, ‘Romgunydja ŋarrakalaŋuwu malthurra galŋu yuwalkkuŋa yana' bitjan, märr yurru nhuma yuwalkkuma walŋu yana malthundja ŋurikiyi romgunydja. 17Gäthuranydja nhuma yukurra waŋa bitjan, ‘Garraynydja dhuwala ŋilimurruŋgu Waŋarr.’ Nhumanydja ŋunhi dhawu'-nherrara ŋunhi nhuma yurru dhäruk märrama ga malthun, ga ŋayathama baṯbitjan yurru nhanŋu romdja malanha. Waŋananydja nhuma bitjarra, ‘Ŋanapurru yurru djämanydja bitjan yana liŋgu ŋunhi nhaltjarra ŋayi Garrayyu nherrara ŋunhiyi rom malanha ŋanapurruŋgu,’ bitjarra nhuma waŋananydja. 18Ga gäthuranydja ŋayi Garrayyu waŋana ḻakaraŋala nhumalanha bitjarra, ‘Nhumanydja dhuwala ŋarrakuway galŋu dhulŋuŋu yolŋu'-yulŋu. Nhuma yurru dhäruk märrama ga rom ŋunhi ŋarraku, bukmak ŋunhi malanha rom ŋunhi ŋarra gurrunhara nhumalaŋgu.’ 19Yo, bitjan ŋayi yurru goŋmirriyama yulŋunydja nhumalanha, ga nhumanydja yurru miṯtjinydja biyapulnha walŋu bena dhikana miṯtji, djuḻkmaramana yurru nhuma wiripu-guḻku'nhanydja miṯtjinha, märr yurru ŋuruŋu wiripu-guḻku'yunydja nhämana nhumalanha, bala wokthunna yukurra Godkunydja yurru, waŋarr ḻakarama ŋanya waŋarrkuma yäkuna. Ga nhumanydja yurru yolŋu'-yulŋunydja nhanŋuway galŋu yana dhulŋuŋu, bitjan yana liŋgu ŋunhi ŋayi dhawu'mirriyaŋala ŋäthili.”