1Yo, dhuwalanydja djorra' wukirriwuy ŋarrakuŋu Djawuḻpa'wuŋu, ga wukirrinydja ŋarra yukurra dhuwala nhuŋu Gäyatj, ŋunhi ŋarra nhuŋu yuwalkkuma yukurra märr-ŋamathirri.
2Marrkapmirri ḻundu, ŋarra bukumirriyamanydja yukurra nhuŋu, märr yurru ŋayi Godthu nhuna gäma ḻatju'kuma dhika wal'ŋu. Ŋarranydja ḏukṯuk nhuŋu, nhe yurru nhina yukurra ḏäwala' yana rumbal nhuŋu, bitjan liŋgu bitjan ŋunha ŋayaŋu nhuŋu ḏäwala' ga walŋa ŋuli yukurra nhina. 3Wirrki ŋarra ŋayaŋu-djulŋithinanydja yana ŋunhi Garraywalaŋumirri yolŋu walala bunana, ga ḻakaraŋala walala nhuna, nhaltjan nhe ŋuli bitjan liŋgu nhina yukurra Godkala yuwalkŋura romŋura, galki yana Djesu-Christkala. 4Ŋunhi ŋarra ŋuli ŋäma ŋarrakuway yumurrku'nha ŋunhi walala yukurra marrtji yuwalkkurru dhukarrkurru, ŋuriŋiyinydja ŋarranha ŋuli wirrkina märr-ŋamathinyamarama; yakana ŋula nhäyu wiripuŋuyunydja ŋarranha ŋayaŋu-djulŋikuma ŋuli bitjandhiyi.
5Marrkapmirri ḻundu, nhenydja dhuwala ŋamakurru' mirithirri Godku djämamirrinydja. Bitjanna liŋguna nhe yukurra guŋga'yunna ŋuli wiripu-guḻku'nhanydja Garraywalaŋumirrinha walalanha, bäyyi ŋayi mulkurunydja ŋunhi yolŋu, yakanydja ŋula gurruṯu'mirri nhuŋu. 6Yo, walala ḻakaraŋalanydja Godkalaŋuwalanydja miṯtjiwala dhiyalanydja nhokalaŋuwuy, nhaltjana nhe ŋuli djäka marrtjinya walalaŋgu. Buku-djulŋi, guŋga'yurra walalanha biyapul, ga wekaŋa walalaŋgu yulŋunydja ŋunhawalanydja-wala marrtjinyarawunydja, ŋunhi walala yurru djäma marrtji bala Godku. 7Liŋgu walala gonha'yurruna dhuwala walalaŋguway wäŋa yäkuyu Djesuwala, ga marrtji walala yukurra ḻakarama marŋgikumana Djesunhana wiripu-guḻku'wala yolŋu'-yulŋuwala, yurru yaka walala gombuŋala rrupiyanydja ŋula nhänydja ŋunhinhanydja walalanha ŋunhi walala yaka Garraywu yolŋu walala. 8Ga ŋilimurrunydja yurru Garraywalaŋumirriyunydja walalay yolŋu'-yulŋuyu guŋga'yun muka walalanha, märr yurru ŋilimurrunydja djämayi rrambaŋi walalaŋgala, birrŋ'maranharawu dhiyakuyi yuwalkŋuwu dhäwu'wu.
9Liŋgu muka ŋarra wukirrinydja djorrany'tja nhumalaŋgu miṯtjiwunydja dhipali ŋäthili, ga ŋayinydja Diyaratjpiyunydja yaka warray yurru märrama ŋanapurruŋguŋu dhäruk. Ŋayinydja ŋunhi ŋanyapinyay ŋayi nherraṉmina ŋunha ŋurrulili warray nhumalaŋgalanydja, liŋgu ŋayi ḏukṯuk buŋgawayinyarawu nhumalaŋgu. 10Ŋunhi ŋarra yurru marrtjinydja bunanydja dhiyaliyi, ŋarranydja yurru maḻŋ'marama warraŋulkumana bukmak nhä malanha yätj ŋunhi ŋayi yukurrana djäma, liŋgu bitjanna liŋgu ŋayi ŋuli yukurra yätj-ḻakarama ŋanapurrunhanydja, ga bothirrina ḻakarama ŋanapurrunha. Yakana ŋayipinydja yurru ŋunhi gumurr-ŋamathirri Garraywalaŋumirriwunydja yolŋu'-yulŋuwu ŋunhi walala yurru marrtji ga ḻakarama yuwalkŋu wal'ŋu dhäwu', ga bitjandhi liŋgu ŋayi ŋuli ḏaḏawmarama ŋunhinhanydja walalanha ŋunhi walala ŋuli ḏukṯukthirri ŋänharawu walalaŋgu, bala gukumana ŋayi ŋuli dhawaṯmaramana walalanha ŋuliŋuru waŋgany-manapanminyaŋurunydja ŋurrukŋuru.
11Marrkap ḻundu, yaka malthurra ga dhuḏakthurra marrtjiya ŋunhinhanydja walalanha ŋunhi walala ŋuli djäma yätj yukurra, yana dhuḏakthurranydja ŋunhinha walalanha ŋunhi walala yukurra djäma ŋamakurru' wal'ŋu. Liŋgu ŋunhinydja yolŋu ŋunhi ŋayi ŋuli djäma ŋamakurru' wal'ŋu, ŋayina ŋunhina nhanŋuwaynydja Godkunydja wal'ŋu yolŋu, ga ŋunhinydja ŋunhi ŋayi ŋuli djäma yätj wal'ŋu, yaka ŋayi marŋgi Godku.
12Bukmakthu warray ŋuli ḻatju'-ḻakarama Dimitirinhanydja, ŋunhi ŋayinydja ŋuli yukurra nhina yuwalkŋura warray romŋura, Godkala warray. Ga ŋanapurrunydja yukurra manymak ḻakaramayi ŋanya bitjandhiyi, ga nhumanydja marŋgi muka ŋunhi ŋarranydja yukurra ḻakarama yuwalk yana dhuwala.
13Guḻku' mirithirri dhuwala yulŋunydja ŋarra nhumalaŋgu bini ḻakaranhanydja, yurru yakana ŋarra yurru wukirrinydja dhipala djorra'lilinydja. 14Ŋarra yukurra gatjpu'yundja marrtjinyarawu dhipali nhumalaŋgala galkina, märr yurru ŋilimurru yukurra waŋganyŋurana waŋanharamirri dhiyakuyi malaŋuwu.
15Nhiniyanydja ŋayaŋu-yal'yurra yana. Bukmakthu nhokala ḻundu'mirriŋuyunydja walalay djuy'yurruna märr-ŋamathinyara nhuŋu. Ga wekaŋa ŋanapurruŋgalaŋuwu ḻundu'mirriŋuwunydja walalaŋgu dhiyaliyi waŋga'-waŋganygu yana märr-ŋamathinyaranydja ŋanapurruŋguŋu. Ga liŋguna.