AKS

وَشَيِ 7

عَلَ شَ حَمَ

1نَ دَنفِ شَنبِ، ﭑ نَشَ مَلٍكّ نَانِ تٌ، عٍ تِشِ دُنِحَ تُنشُي نَانِ رَ. عٍ نُ دُنِحَ قٌيٍ نَانِ رَتِمَ، عَلَكٌ قٌيٍ نَشَ مِنِ بْشِ مَ، بَا مَ، شَ نَ مُ سَنسِيٍ مَ. 2ﭑ نَشَ مَلٍكّ فبّتّ قَن تٌ عَ كٍلِقٍ سٌفٍتٍدٍ مَبِرِ، عَلَ حِحّ شَ تْنشُمَ سُشُشِ عَ يِ رَ. عَ نَشَ عَ مَسٍن عَ شُي عِتٍشِ رَ، نَ مَلٍكّ نَانِيٍ بّ، نَشٍيٍ نُ يَمَرِشِ قٍ شْنّ رَبَدٍ بْشِ نُن بَا رَ، 3«وٌ نَشَ وٌ بّلّشّ دِن بْشِ نُن بَا نُن وُرِ بِلِيٍ رَ سِندٍن، هَن مُشُ شَ فّ تْشُنمَ سَدٍ عَلَ شَ وَلِكّيٍ تِفِ مَ. 4ﭑ نَشَ نَ وَلِكّيٍ كْنتِ شَسَبِ مّ، عَلَ شَ تْنشُمَ سَشِ نَشٍيٍ مَ. عٍ قِندِ مِشِ وُلُ كّمّ وُلُ تٌنفٌ نَانِ نُن وُلُ نَانِ نَن نَ، كٍلِقٍ عِسِرَيِلَ بْنسْي بِرِن يَ مَ.

5مِشِ وُلُ قُ نُن قِرِن يُدَ بْنسْي يَ مَ نَشٍيٍ مَتْنشُمَشِ،

مِشِ وُلُ قُ نُن قِرِن رُبٍن بْنسْي يَ مَ،

مِشِ وُلُ قُ نُن قِرِن فَدِ بْنسْي يَ مَ،

6مِشِ وُلُ قُ نُن قِرِن عَسٍرِ بْنسْي يَ مَ،

مِشِ وُلُ قُ نُن قِرِن نَقَتَلِ بْنسْي يَ مَ،

مِشِ وُلُ قُ نُن قِرِن مَنَسِ بْنسْي يَ مَ،

7مِشِ وُلُ قُ نُن قِرِن سِمٍيْن بْنسْي يَ مَ،

مِشِ وُلُ قُ نُن قِرِن لٍوِ بْنسْي يَ مَ،

مِشِ وُلُ قُ نُن قِرِن عِسَكَرِ بْنسْي يَ مَ،

8مِشِ وُلُ قُ نُن قِرِن سَبُلٌن بْنسْي يَ مَ،

مِشِ وُلُ قُ نُن قِرِن يُسُقُ بْنسْي يَ مَ،

مِشِ وُلُ قُ نُن قِرِن بُنيَمِن بْنسْي يَ مَ نَشٍيٍ مَتْنشُمَشِ.»

9نَ دَنفِ شَنبِ، ﭑ نَشَ حَمَ فبٍفبٍ تٌ، نَشَن مُ نُ نْمَ كْنتِدٍ، كٍلِقٍ سِ بِرِن، بْنسْي بِرِن، شَبِلّ بِرِن، نُن شُي بِرِن. عٍ نُ تِشِ عَلَ شَ كِبَنيِ نُن يّشّييْرّ يَ عِ، دٌنمَ كُيٍ قِيشّ رَفٌرٌشِ عٍ مَ، تُفِ قّنسّ سُشُشِ عٍ يِ. 10عٍ نَشَ عَ مَسٍن عٍ شُي عِتٍشِ رَ، «كِسِ نَ مُشُ مَرِفِ عَلَ بّ نَشَن مَفٌرٌشِ كِبَنيِ كُي، نُن يّشّييْرّ بّ.» 11مَلٍكّيٍ نُ تِشِ كِبَنيِ، قٌرِيٍ نُن نِمَسٍ نَانِيٍ رَبِلِنيِ، عٍ نَشَ عٍ يَتَفِ رَقٍلٍن بْشِ مَ، عٍ عَلَ بَتُ 12يِ قٍ قَلّ رَ، «عَمِنَ. مَتْشْي، نْرّ، لْننِ، تَنتُي، بِنيّ، نْي قَنيِ، نُن سّنبّ نَ مُشُ مَرِفِ عَلَ نَن بّ عَبَدَن. عَمِنَ.»

13نَ تّمُي قٌرِ ندٍ نَشَ ﭑ مَشْرِن، «ندٍ نَ نَ مِشِيٍ رَ دٌنمَ قِيشّ رَفٌرٌشِ نَشٍيٍ مَ؟ عٍ كٍلِشِ مِندٍن؟» 14ﭑ نَشَ عَ يَابِ، «ﭑ مَرِفِ، عِ تَن نَن عَ كٌلٌن.» عَ نَشَ عَ مَسٍن ﭑ بّ، «مِشِيٍ نَن عٍ رَ، نَشٍيٍ كٍلِشِ نَ حَشَنكَتّ شُنفبٍ كُي. عٍ بَرَ عٍ شَ دٌنمَيٍ شَ يّشّييْرّ وُلِ رَ، نَ نَن عَ تٌشِ عٍ شَ دٌنمَيٍ قِيشّشِ. 15نَ نَن عَ تٌشِ عٍ تِشِ عَلَ شَ كِبَنيِ يَ عِ، عٍ قَ عَ بَتُ كْي نُن يَنيِ عَ شَ هْرْ مْلِنفِرَ كُي. عٍ نَ عَلَ شَ نِينِ بُن مَ، نَشَن مَفٌرٌشِ كِبَنيِ كُي. 16كَامّ نُن يٍ شْلِ مُ عٍ سُشُمَ سْنْن، سٌفٍ نُن كُيٍ قُرٍ مُ عٍ تْورْ مَ سْنْن، 17بَرِ مَ يّشّييْرّ نَشَن نَ كِبَنيِ سّيتِ مَ، نَ نَن قَمَ عٍ دّفٍدٍ، عَ عٍ شُن تِ كِسِ يٍ يِرٍ رَ. عَلَ قَمَ نّ عٍ يَيٍ بِرِن نَقُرُكُدٍ.»