سُرَيِ سّرّشّبَدٍ، عِسِرَيِلَكَيٍ شُنسَرٍ،
هْرْ مْلِنفِرَ يٍ، تُرٍ، نُن لَبُندّ
1«عِ شَ سُرَيِ سّرّشّبَدٍ يَءِلَن كَسِيَ وُرِ رَ. 2عَ شَ كُيَ نْنفْن كٍرٍن، عَ عِفبٌ نْنفْن كٍرٍن، عَ عِتٍ نْنفْن قِرِن. قٍرِ نَانِ شَ لُ عَ تُشُييٍ رَ، عٍ نُن سّرّشّبَدٍ قِندِشِ سٍ كٍرٍن نَن نَ. 3عِ شَ نَ سّرّشّبَدٍ بِرِن مَسٌ شّيمَ شِندٍ رَ، عَ قَرِ، عَ سّيتِيٍ، عَ قٍرِيٍ، نُن عَ دّ كِرِ. 4عِ شَ سُشُسٍ دِفِلِنشِ قِرِن يَءِلَن شّيمَ رَ سّرّشّبَدٍ سّيتِ قِرِنيِيٍ مَ عَ دّ كِرِ لَبٍ رَ، وُرِ كُيٍيٍ سٌمَ نَشٍيٍ كُي عَ شَنِنقٍ رَ. 5عِ شَ نَ وُرِيٍ يَءِلَن كَسِيَ وُرِ رَ، عِ قَ شّيمَ مَسٌ عٍ مَ. 6نَ سُرَيِ سّرّشّبَدٍ شَ دْشْ دُفِ يَ رَ نَشَن نَ سَاتّ كَنكِرَ يَ رَ، يُنُبِ شُنسَرٍ يِرٍ دْشْشِ نَشَن قَرِ، ﭑ مِشِ لِمَ دّننَشّ. 7هَرُنَ شَ سُرَيِ شِرِ حْشُنمّ فَن مّننِ فّيسّفّ بِرِن، عَ قّنتّنمَ لَنثُييٍ مَ تّمُي نَشّ. 8عَ مَن شَ نَ مْولِ رَبَ كْي سٌ تّمُي. سُرَيِ نَن عَ رَ، نَشَن لَنمَ عَ شَ فَن وَشَتِ بِرِن عَلَتَلَ يَ شْرِ. سّرِيّ نَ عَ رَ وٌ بْنسْي بّ نَشَن مُ كَنَمَ عَبَدَن. 9وٌ نَشَ سٍسٍ بَ نَ سّرّشّبَدٍ قَرِ بَقٍ سُرَيِ سّنِيّنشِ رَ. وٌ نَشَ سُرَيِ سّنِيّنتَرٍ بَ، وٌ نَشَ سّرّشّ فَن دَاشِ بَ، وٌ نَشَ سَنسِ سّرّشّ بَ، وٌ نَشَ وّنِ شَ نَ مُ عَ رَ تُرٍ بَ مّننِ. 10حّ يٌ حّ هَرُنَ شَ يُنُبِ شَقَرِ سّرّشّ وُلِ ندٍ تٌنفٌ، عَ عَ مَسٌ سُرَيِ سّرّشّبَدٍ قٍرِيٍ مَ، عَلَكٌ عٍ قَن شَ سّنِيّن. سّرِيّ نَن عَ رَ عِ بْنسْي لَنمَ عَ شَ نَشَن نَبَ عَبَدَن. نَ سّرّشّبَدٍ قِندِشِ سٍ سّنِيّنشِ نَن نَ عَلَتَلَ بّ.»
11عَلَتَلَ نَشَ يِ مَسٍنيِ تِ مُنسَ بّ؛ 12«عِ نَ عِسِرَيِلَكَيٍ كْنتِ لْشْي نَشّ، بِرِن شَ عَ شُنسَرٍ قِ عَلَتَلَ مَ. نَ نَن عَ رَ، مَنكَنّ يٌ مُ عٍ لِمَ نَ كْنتِ تِقٍ شَ قٍ رَ. 13مِشِ نَشَن بِرِن كْنتِمَ، عٍ شَ فبٍتِ فِرَ مُ سٍننِ قِ عَلَتَلَ مَ. نَ شَ مَنِيَ هْرْ مْلِنفِرَ سّرِيّ كِ مَ. 14مِشِ نَشَن بِرِن سِمَيَ بَرَ حّ مْشْحّن لِ، عَ شَ عَ شُنسَرٍ قِ عَلَتَلَ مَ. 15بَننَ مُ سٍ سَمَ نَ فِرَ مُ سٍننِ شُن مَ، مِسِكِينّ قَن مُ ندٍ بَمَ نَ فِرَ مُ سٍننِ رَ. بِرِن شَ نَ قِ عَلَتَلَ مَ عٍ شُنسَرٍ رَ. 16عِسِرَيِلَكَيٍ نَ نَ فبٍتِ سٌ عِ يِ رَ، عِ شَ عَ رَوَلِ هْرْ مْلِنفِرَ يَءِلَنقٍ رَ، ﭑ عِ لِمَ دّننَشّ، عَلَكٌ ﭑ شَ رَتُ عَ مَ عِسِرَيِلَكَيٍ نَشَن قِشِ عٍ شُنسَرٍ رَ.»
17نَ دَنفِ شَنبِ عَلَتَلَ نَشَ يِ مَسٍنيِ تِ مُنسَ بّ. 18«عِ شَ هْرْ مْلِنفِرَ يٍ سَسٍ شُنفبٍ يَءِلَن وُرٍ فبٍيلِ رَ، عَ نُن عَ دْشْسٍ. عِ شَ نَ دْشْ هْرْ مْلِنفِرَ نُن سّرّشّبَدٍ تَفِ، عِ قَ مَرَ سّنِيّن يٍ سَ عَ كُي، 19هَرُنَ نُن عَ شَ دِيٍ نَشَن نَوَلِمَ عٍ بّلّشّيٍ نُن عٍ سَنيِيٍ مَشَقٍ رَ. 20بٍينُن عٍ شَ سٌ هْرْ مْلِنفِرَ كُي، ﭑ وٌ لِمَ دّننَشّ، عَ لَنمَ عٍ شَ عٍ بّلّشّيٍ نُن عٍ سَنيِيٍ مَشَ نَ يٍ رَ، عَلَكٌ عٍ نَشَ قَشَ. بٍينُن عٍ شَ عٍ مَكْرّ سّرّشّبَدٍ رَ سّرّشّ فَن دَاشِ بَقٍ عَلَتَلَ بّ، 21عَ لَنمَ عٍ شَ عٍ بّلّشّيٍ نُن عٍ سَنيِيٍ مَشَ نَ يٍ رَ، عَلَكٌ عٍ نَشَ قَشَ. سّرِيّ نَن نَ رَ عٍ بْنسْي بِرِن بّ نَشَن مُ كَنَمَ عَبَدَن.»
22عَلَتَلَ نَشَ عَ مَسٍن مُنسَ بّ، 23«عِ شَ سٍ شِرِ حْشُنمّ قَنيِيٍ تٌنفٌ، عَلْ وُرِ وَ يٍ نَشَن شِلِ مِرِ كِلٌ سُولِ، وُرِ قُحِ نَشَن شِلِ سِنَمٌن كِلٌ قِرِن نُن عَ تَفِ، كَلٍ ندٍ كِلٌ قِرِن نُن عَ تَفِ نَشَن شِرِ حْشُن، 24كَسِيَ وُرِ قُحِ كِلٌ سُولِ، نُن عٌلِوِ تُرٍ لِتِرِ سٍننِ. 25عِ شَ نَ بِرِن يَءِلَن تُرٍ سّنِيّنشِ رَ نَشَن نَوَلِمَ سّرّشّدُبّ تِقٍ رَ. نَ وَلِ شَ رَبَ عَ قَنيِ رَ عَ رَبَ كِ مَ.»
26«عِ مَن شَ نَ تُرٍ رَوَلِ هْرْ مْلِنفِرَ نُن سَاتّ كَنكِرَ رَ سّنِيّنقٍ رَ، ﭑ وٌ لِمَ دّننَشّ، 27عَ نُن هْرْ مْلِنفِرَ تٍيبِلِ، عَ يِرَبَسٍيٍ، لَنثُي دْشْسٍ، عَ يِرَبَسٍيٍ، سُرَيِ سّرّشّبَدٍ، 28سّرّشّبَدٍ شُنفبٍ، عَ يِرَبَسٍيٍ، هْرْ مْلِنفِرَ يٍ سَسٍ شُنفبٍ، نُن عَ دْشْسٍ. 29عِ شَ نَ تُرٍ سّنِيّنشِ رَوَلِ نَ بِرِن نَسّنِيّنقٍ رَ. مِشِ نَشٍيٍ دِنمَ نٍيٍ رَ، عٍ سّنِيّنمَ نّ. 30عِ شَ نَ تُرٍ سّنِيّنشِ رَوَلِ هَرُنَ نُن عَ شَ دِيٍ تِقٍ ﭑ مَ سّرّشّدُبّيٍ رَ.»
31«عِ شَ عَ قَلَ عِسِرَيِلَكَيٍ بّ عَ نَ تُرٍ قِندِشِ تُرٍ سّنِيّنشِ نَن نَ وٌ بْنسْي بّ عَبَدَن. 32وٌ نَشَ عَ سَ مِشِ قَتٍ مَ، وٌ نَشَ نَ تُرٍ مْولِ يَءِلَن وَلِ فبّتّ شَ قٍ رَ. تُرٍ سّنِيّنشِ نَن عَ رَ وٌ بّ. 33مِشِ يٌ نَشَن نَ نَ تُرٍ مْولِ رَقَلَ، عَ عَ سَ مِشِ سّنِيّنتَرٍ مَ، نَ كَنيِ بَمَ نّ حَمَ يَ مَ.»
34عَلَتَلَ نَشَ عَ مَسٍن مُنسَ بّ، «عِ شَ سٍ شِرِ حْشُنمّيٍ تٌنفٌ، عَلْ سِتَكِتٍ، عٌنِشِ، نُن فَلِبَنٌن. عِ شَ عٍ مَسُنبُ سُرَيِ قَنيِ رَ، عٍ شَسَبِ بِرِن شَ لَن. 35نَ قِندِ مَ سُرَيِ رَ نَشَن شِرِ حْشُن كِ قَنيِ رَ. قْشّ دِ شَ سَ عَ مَ. سُرَيِ سّنِيّنشِ نَن عَ رَ. 36عِ شَ نَ سُرَيِ قِندِ قُحِ رَ عِ نَشَن سَمَ سَاتّ كَنكِرَ يَ رَ هْرْ مْلِنفِرَ كُي ﭑ عِ لِمَ دّننَشّ. سٍ سّنِيّنشِ نَ عَ رَ وٌ بّ. 37وٌ نَشَ يِ سُرَيِ مْولِ رَقَلَ وٌ يّتّ بّ. سٍ سّنِيّنشِ نَ عَ رَ، وٌ نَشَن نَوَلِمَ عَلَتَلَ فبَنسَن بّ. 38مِشِ يٌ نَشَن نَ نَ مْولِ رَقَلَمَ عَ يّتّ بّ عَ شَ نَ شِرِ رَ مّ، نَ كَنيِ كٍرِ مَ نّ عَ شَ حَمَ يَ مَ.»