هْرْ مْلِنفِرَ وَلِكّيٍ
نُن مَلَبُي لْشْي بِنيَقٍ
1عَلَتَلَ نَشَ عَ مَسٍن مُنسَ بّ، 2«عِ شَ عَ كٌلٌن ﭑ بَرَ عُرِ شَ دِ بٍسَلٍلِ سُفَندِ، شُرُ شَ مَمَدِ، نَشَن قَتَنشِ يُدَ بْنسْي رَ. 3ﭑ بَرَ شَشِلِ قَنيِ قِ عَ مَ نَشَن قَتَنشِ ﭑ تَن نَ، عَلَكٌ عَ شَ وَلِ بِرِن نَبَ كِ كٌلٌن لْننِ قَنيِ رَ، 4عَ شَ نْ وَلِ تٌدٍ عَ شَشِلِ كُي بٍينُن عَ شَ رَبَ، عَ شَ نْ شّيمَ، فبٍتِ، نُن وُرٍ فبٍيلِ رَوَلِدٍ، 5عَ شَ نْ فّمّ قَنيِ مَسٌلِدٍ عَ قَ عَ رَبِلِنيِ يَءِلَن، عَ شَ نْ كَمُدّرِحَ نُن وَلِ فبّتّيٍ رَبَدٍ.»
6«ﭑ بَرَ عٌهٌلِيَبُ عَشِسَمَكِ شَ دِ سٌ عَ يِ رَ، نَشَن قَتَنشِ دَنَ بْنسْي رَ، عَ شَ عَ مَلِ. ﭑ بَرَ شَشِلِ قَنيِ قِ مِشِيٍ مَ، نَشٍيٍ قَتَ وَلِدٍ، عَلَكٌ عٍ شَ نْ ﭑ مَ يَامَرِ بِرِن نَبَدٍ، 7عَلْ هْرْ مْلِنفِرَ ﭑ عَدَ مَدِ لِمَ دّننَشّ، سَاتّ كَنكِرَ، عَ دّرَكٌتٍ نَشَن قِندِشِ شُنسَرٍ يِرٍ رَ، نُن هْرْ مْلِنفِرَ يِرَبَسٍ بِرِن، 8تٍيبِلِ، تٍيبِلِ يِرَبَسٍيٍ، لَنثُي دْشْسٍ شّيمَ دَاشِ، لَنثُي يِرَبَسٍيٍ، سُرَيِ سّرّشّبَدٍ، 9سّرّشّبَدٍ شُنفبٍ نُن عَ شَ يِرَبَسٍيٍ، يٍ سَسٍ شُنفبٍ نُن عَ دْشْسٍ، 10سّرّشّدُبّ سٌسٍ سّنِيّنشِيٍ هَرُنَ نُن عَ شَ دِيٍ بّ، 11تُرٍ سّنِيّنشِ، نُن سُرَيِ نَشَن فَنمَ هْرْ مْلِنفِرَ كُي. عٍ شَ عَ بِرِن يَءِلَن ﭑ مَ يَامَرِ كِ مَ.»
12عَلَتَلَ نَشَ عَ مَسٍن مُنسَ بّ، 13«عَ قَلَ عِسِرَيِلَكَيٍ بّ عَ عٍ شَ عٍ حّنفِ سَ ﭑ مَ مَلَبُي لْشْييٍ شْن مَ، بَرِ مَ نٍيٍ قِندِ مَ تْنشُمَ رَ وٌن تَفِ عَبَدَن، عَلَكٌ وٌ شَ عَ كٌلٌن عَ ﭑ تَن نَن نَ عَلَتَلَ رَ نَشَن وٌ رَ سّنِيّنمَ. 14وٌ شَ وٌ حّنفِ سَ مَلَبُي لْشْي شْن مَ، بَرِ مَ عَ سّنِيّن وٌ تَن بّ. شَ نَشَن مُ عَ بِنيَ، عَ لَن نّ نَ كَنيِ شَ قَشَ. مِشِ نَشَن وَلِمَ مَلَبُي لْشْي، نَ كَنيِ شَ كٍرِ ﭑ مَ حَمَ يَ مَ. 15شِ سٍننِ نَ وٌ يِ رَ وَلِقٍ رَ، كْنْ عَ شِ سٌلٌقٍرٍ ندٍ قِندِ مَ مَلَبُي لْشْي نَن نَ، نَشَن قِمَ عَلَتَلَ مَ. مِشِ نَشَن وَلِمَ نَ لْشْي، نَ كَنيِ شَ قَشَ. 16عِسِرَيِلَكَيٍ شَ عٍ حّنفِ سَ مَلَبُي لْشْي شْن مَ، عٍ عَ رَبَتُ وَشَتِ بِرِن. سَاتّ نَ عَ رَ نَشَن مُ كَنَمَ عَبَدَن. 17عَ قِندِ مَ تْنشُمَ نَن نَ، ﭑ تَن نُن عِسِرَيِلَكَيٍ تَفِ تّمُي بِرِن، بَرِ مَ ﭑ تَن عَلَتَلَ، ﭑ كٌورٍ نُن بْشِ دَاشِ شِ سٍننِ نَن بُن مَ، كْنْ عَ شِ سٌلٌقٍرٍ ندٍ، ﭑ نَشَ وَلِ دَن، ﭑ نَن ﭑ مَلَبُ.»
18عَلَتَلَ تٌ فّ مَسٍنيِ تِدٍ مُنسَ بّ تُرُ سِنِنَ فٍيَ قَرِ، عَ نَشَ فّمّ وَلَشّ قِرِن سٌ عَ يِ رَ سٍيدٍ رَ، عَ شَ يَامَرِيٍ نُ سّبّشِ نَشٍيٍ مَ عَ بّلّشّ سٌلٍ رَ.