AKS

لُكِ 14

عِسَ مِشِ رَيَلَنقٍ مَلَبُ لْشْي مَ

1مَلَبُ لْشْ ندٍ مَ، عِسَ تٌ نُ عَ دّفٍقٍ قَرِ سّنِ كُنتِفِ ندٍ شْنيِ، عٍ بِرِن نُ عِسَ رَبّنقٍ نّ. 2شّمّ ندٍ نُ نَ نَا نَشَن قَتٍ نُ مَقُنتُشِ. 3نَ كُي، عِسَ نَشَ قَرِ سّنِيٍ نُن سّرِيّ لْننِلَيٍ مَشْرِن، «عَ دَشَ كَ عَ مُ دَشَ قُرٍ مَ شَ رَيَلَن مَلَبُ لْشْي مَ؟» 4كْنْ عٍ مُ سٍسٍ قَلَ. عِسَ نَشَ عَ بّلّشّ سَ قُرٍ مَ مَ، عَ عَ رَيَلَن، عَ عَ رَفبِلٍن عَ شْنيِ.

5نَ شَنبِ، عِسَ مَن نَشَ عٍ مَشْرِن، «شَ عَ سَ لِ فٌ، وٌ شَ دِ، شَ نَ مُ وٌ شَ نِنفٍ بَرَ بِرَ فُلُنبَ رَ مَلَبُ لْشْي مَ، وٌ مُ عَ رَتٍمَ شّ كٍرٍن نَ؟» 6عٍ مُ نْ نَ يَابِ يٌ قِدٍ.

يّتّ مَفٌرٍ نُن يّتّ عِفبٌي

7عِسَ تٌ عَ رَكْرْ سِ شْحّيٍ نُ مَفٌرٌدٍ قَنيِيٍ نَن تٌنفٌمَ عٍ يّتّ بّ، عَ نَشَ يِ تَالِ وْيّنيِ قَلَ عٍ بّ، 8«مِشِ نَ عِ شِلِ عَ شَ شُلُنيِ، عِ نَشَ مَفٌرٌدٍ قَنيِ قٍن، بَرِ مَ شَ مِشِ قَ نَشَن تِدٍ فبٌ عِ بّ، 9عِ يَتِفِ عَ قَلَمَ نّ عِ بّ، ‹عِ شَ دْشْسٍ سٌ نَ مِشِ بِنيٍ يِ رَ.› نَ كُي، عِ كٍلِمَ نّ يَافِ رَ سِفَقٍ دْشْسٍ فبّتّ قٍندٍ، بِنيّ مُ نَ دّننَشّ. 10كْنْ مِشِ نَ عِ شِلِ عَ شَ شُلُنيِ، عِ شَ مَفٌرٌدٍ بِنيّتَرٍ نَن تٌنفٌ. نَ كُي، شَ عِ يَتِفِ بَرَ قَ، عَ عَ قَلَمَ نّ عِ بّ، ‹ﭑ بٌورٍ، سَ مَفٌرٌدٍ قَنيِ نَن تٌنفٌ يَرٍ.› نَ قِندِ مَ بِنيّ نَن نَ عِ بّ مِشِيٍ بِرِن يَ مَ وٌ نُن نَشٍيٍ دْشْشِ نَا. 11نَشَن يٌ نَ عَ يّتّ عِفبٌ، عَ قَمَ نّ عِفٌرٌدٍ. نَشَن يٌ نَ عَ يّتّ مَفٌرٌ، عَ شَ قٍ عِتٍمَ نّ.»

12عِسَ نَشَ عَ قَلَ شُلُنيِ كَنيِ بّ، «شَ عَ لِ عِ شُلُنيِ تِمَ، عِ نَشَ عِ بٌورٍيٍ، عِ بَرِبٌورٍيٍ، عِ بَرٍنيِيٍ، نُن عِ دْشْبٌورٍ بَننَشِيٍ فبَنسَن شَ شِلِ، بَرِ مَ عٍ نْمَ نّ عِ شَ وَلِ قَنيِ بِرِن نَفبِلٍندٍ عِ مَ. 13دٌنسٍ قَنيِيٍ نَ رَقَلَ عِ شْنيِ، عَ لَنمَ عِ شَ سٍتَرٍيٍ، مَبّنيِيٍ، نَمَتّيٍ، نُن دْنشُييٍ نَن شِلِ عٍ شَ قَ عٍ دّفٍ. 14نَ كُي، عِ قِندِ مَ سّيوَتْي نَن نَ، بَرِ مَ قّيرّ مُ عٍ تَن بّ عٍ شَ عِ شَ نَ قٍ قَنيِ رَفبِلٍن عِ مَ، كْنْ عِ قَمَ نّ عَ سَرٍ سْتْدٍ مِشِ تِنشِنشِيٍ رَكٍلِمَ قَشّ مَ لْشْ نَشّ.»

دٌنيِ شُنفبٍ مَشِلِ شَ تَالِ

مَتِيُ ٢٢‏؛١ ٬ ١٤

15شّمّ ندٍ عِسَ نُن نَشَن نُ عَ دّفٍقٍ، عَ تٌ نَ قٍ مّ، عَ نَشَ عَ قَلَ عَ بّ، «سّيوّ نَ مِشِ بّ نَشَن قَمَ عَ دّفٍدٍ عَلَ شْنيِ عَرِيَننَ!» 16عِسَ قَن نَشَ عَ مَسٍن عَ بّ، «شّمّ ندٍ نَشَ مِشِ فبٍفبٍ رَكٌلٌن، عَ عٍ شَ قَ عَ شْنيِ، عٍ شَ عٍ دّفٍ عَ قَنيِ رَ. 17عَ تّمُي تٌ عَ لِ، عَ نَشَ عَ شَ كٌنيِ شّي مِشِيٍ شِلِدٍ، يِ قٍ بِنيّ نُ بَرَ رَفبِلٍن نَشٍيٍ مَ، عَ شَ عَ قَلَ، ‹وٌ قَ، قٍ بِرِن بَرَ فّ يَءِلَندٍ.› 18كْنْ عٍ بِرِن نَشَ عٍ يّتّ مَشَندِ. عَ سِنفٍ نَشّ، ‹ﭑ بَشِ شّ نَن سَرَدٍ، قٌ ﭑ شَ سَ عَ مَتٌ. دِحّ ﭑ بّ.› 19بٌورٍ قَن نَشّ، ‹ﭑ بَشِ نِنفٍ قِرِن دْشْ سُولِ نَن سَرَدٍ، قٌ ﭑ شَ سَ عٍ مَتٌ. دِحّ ﭑ بّ.› 20فبّتّ قَن نَشّ، ‹ﭑ بَشِ فِنّ نَن دْشْدٍ. ﭑ مُ نْمَ قَدٍ.›»

21«كٌنيِ تٌ فبِلٍن عَ مَرِفِ شْنيِ، عَ نَشَ نَ قٍيٍ دّنتّفّ سَ عَ بّ. نَ كُي، بَنشِ كَنيِ نَشَ شْنْ، عَ عَ قَلَ عَ شَ كٌنيِ بّ، ‹سِفَ مَقُرٍن، عِ سَ سٍتَرٍيٍ، مَبّنيِيٍ، دْنشُييٍ، نُن نَمَتّيٍ شِلِ نَشٍيٍ نَ تَا كُي يِرٍ بِرِن. عِ شَ قَ عٍ رَ ﭑ شْنيِ بٍ.›»

22«كٌنيِ مَن تٌ فبِلٍن عَ نَشَ عَ قَلَ، ‹مَرِفِ، ﭑ بَرَ عِ شَ يَامَرِ رَبَ، كْنْ هَن يَ دْشْدٍ لُشِ عِ شَ بَنشِ كُي.› 23بَنشِ كَنيِ نَشَ عَ قَلَ عَ شَ كٌنيِ بّ، ‹عِ مَن شَ مِنِ، عِ سَ تَا قَرِ يِرٍ بِرِن عِسَ. عِ شَ قٍ بِرِن نَبَ مِشِيٍ شَ قَ، ﭑ مَ بَنشِ شَ رَقٍ. 24ﭑ شَ عَ قَلَ عِ بّ، مِشِ نَشٍيٍ سِنفٍ شِلِشِ، عٍ تَن سٍسٍ مُ عٍ دّفٍمَ ﭑ شْنيِ قٍوٌ!›»

بِرَقٍ عِسَ قْشْ رَ

مَتِيُ ١٠‏؛٣٧ ٬ ٣٩، ٥‏؛١٣، مَرَكِ ٩‏؛٥٠

25عِسَ مَن تٌ نُ كِرَ رَ، حَمَ فبٍفبٍ نُ عَ قْشْ رَ. عَ نَشَ عَ يَ رَقِندِ عٍ مَ، عَ عَ مَسٍن عٍ بّ، 26«شَ مِشِ وَ بِرَقٍ ﭑ قْشْ رَ، قٌ عَ شَ ﭑ شَنُ نّ دَنفِ عَ بَبَ رَ، عَ نفَ رَ، عَ تَارَ رَ، عَ شُنيَ رَ، عَ شَ فِنّ رَ، عَ شَ دِيٍ رَ، نُن عَ يّتّ يَتِ قَن نَ. شَ نَ مُ عَ رَ، عَ كَنيِ مُ نْمَ قِندِدٍ ﭑ قْشِرَبِرّ رَ. 27شَ مِشِ مُ عَ يّتّ وَشْنقٍ فٍرٍ، عَ قَ تِن ﭑ وَشْنقٍ رَ، عَ مُ نْمَ قِندِدٍ ﭑ قْشِرَبِرّ رَ.»

28«شَ مِشِ ندٍ سَ وَ كٌورٍ بَنشِ شُنفبٍ تِقٍ وٌ يَ مَ، قٌ عَ شَ دْشْ نّ سِندٍن، عَ عَ مَتٌ كْبِرِ شَسَبِ نَشَن نْمَ نَ بَنشِ تِدٍ، عَلَكٌ عَ شَ عَ كٌلٌن شَ عَ شَ قّيرّ نْمَ نَ وَلِ رَحْندٍ. 29شَ نَ مُ عَ رَ، عَ كَنيِ نَ بَنشِ كْورِن عَ مُ قَ نْ عَ رَحْندٍ، مِشِيٍ نُ نَ تٌ، عٍ عَ مَيٍلٍمَ نّ، 30عٍ عَ قَلَ، ‹يِ شّمّ بَرَ بَنشِ تِ قْلْ، كْنْ عَ مُ نْشِ عَ رَحْندٍ.›»

31«شَ مَنفّ ندٍ وَ مِنِقٍ عٍ نُن مَنفّ فبّتّ شَ فٍرٍ، قٌ عَ شَ دْشْ نّ سِندٍن، عَ عَ مَحْشُن شَ عَ شَ سْورِ مِشِ وُلُ قُ نْمَ تِدٍ مَنفّ بٌورٍ شَ سْورِ مِشِ وُلُ مْشْحّن كَنكٍ. 32شَ عَ بَرَ عَ كٌلٌن عَ عٍ مُ نْمَ، بٍيمَنُن مَنفّ بٌورٍ نُن عَ شَ سْورِيٍ شَ مَكْرّ، عَ شّيرَ نَن نَسِفَمَ عَ مَ عَلَكٌ لَنيِ نَن شَ شِرِ عٍ تَفِ. 33نَ كُي، شَ مِشِ يٌ نَ وٌ يَ مَ نَشَن مُ نْمَ مّيدٍ قٍ بِرِن نَ ﭑ تَن مَ قٍ رَ، عَ كَنيِ مُ نْمَ قِندِدٍ ﭑ قْشِرَبِرّ رَ.»

34«قْشّ قَن، كْنْ شَ قْشّ مّشّمّشّنيِ بَرَ بَ، عَ قَ مّشّمّشّنمَ دِ؟ 35عَ مُ قَن شّ بّ، عَ مُ قَن حَحّ رَ. عَ وْلّمَ نّ تُن. شَ نَشَن تُلِ قٍ مّمَ، عَ شَ عَ تُلِ مَتِ يِ مَسٍنيِ رَ.»