سٍتَرٍ تِنشِنشِ
1سٍتَرٍ تِنشِنشِ قَن شَشِلِتَرٍ وُلٍ قَلّ بّ.
2فبَتَقٍ رَ عِ مُ نَشَن كٌلٌن، عَ مِشِ رَتَنتَنمَ نّ.
3عَدَ مَدِ عَ يّتّ شُن نَكَنَمَ نّ عَ شَ دَشُحَ رَ،
كْنْ عَ قَ عَ بْحّ رَتٍ عَلَتَلَ تَن مَ نَ شُننَكَنّ شَ قٍ رَ.
4بَننَيَ عَ نِيَمَ نّ مِشِ شَ بٌورٍ فبٍفبٍ سْتْ،
كْنْ سٍتَرٍحَ دّقَنبٌورٍحَ كَنَمَ نّ.
5تْوحّفّتِ قَمَ نّ حَشَنكَتّ سْتْدٍ،
وُلٍ قَلّ مُ كِسِمَ.
6مِشِ فبٍفبٍ كَتَمَ عٍ يّتّ رَقَندٍ كِنِكِنِنتٍيٍ مَ،
بِرِن بِرَ مَ نّ مِشِ قْشْ رَ نَشَن كِ تِمَ.
7سٍتَرٍ مُ رَقَن عَ نفَشَكٍرٍنيِيٍ يَتِ مَ،
عَ مُ رَقَن عَ بٌورٍيٍ قَن مَ.
عَ نَ عٍ مَشَندِ، عٍ مُ عٍ تُلِ مَتِمَ عَ رَ.
8مِشِ نَشَن شَشِلِ قٍنمَ، عَ قٍ قَنيِ رَبَمَ نّ عَ يّتّ بّ.
مِشِ نَشَن قَهَامُي قٍنمَ، عَ شَ قٍ سْونّيَمَ نّ.
9تْوحّفّتِ قَمَ نّ حَشَنكَتّ سْتْدٍ،
هَلَكِ بِرَ مَ نّ وُلٍ قَلّ قْشْ رَ.
10نَاقُلِ مُ لَن شَشِلِتَرٍ يِ رَ،
عَلْ عَ تٌ مُ لَن كٌنيِ قَن شَ كُنتِفِيٍ يَامَرِ.
11لْننِلَ بْحّ تٍ شْنْ، عَ مُ كٌنبِ رَفبِلٍنمَ.
نَ كُي عَ بِنيّ سْتْمَ نّ.
12مَنفّ شَ شْنّ مَنِيَ يّتّ شَاحّ رَ،
عَ شَ هِننّ قَن مَنِيَ شِنِ رَ بُرّشّ شِندٍ مَ.
13دِ شَشِلِتَرٍ كْنتْقِلِ نَن بّندُنمَ عَ بَبَ مَ،
فِنّ شَ سْنشْي شُنشُرِ لُشِ نّ عَلْ يٍ
نَشَن لُمَ مِنِ رَ قّحّ يَلٍ دِ كُي، عَ مُ عَ عِتِمَ.
14مِشِ بَنشِ نُن هَرِفٍ سْتْمَ عٍ بَبَ كّ رَ،
كْنْ عَلَ نَن فِنّ شَشِلِمَ قِمَ شّمّ مَ.
15تُننَشْنّ مِشِ لُمَ نّ شِشْلِ كُي،
عَ كَامّ نَن تُن سْتْمَ.
16مِشِ نَشَن عَلَ شَ سّرِيّ رَبَتُمَ،
عَ عَ يّتّ رَتَنفَمَ نّ قَشّ مَ،
كْنْ نَشَن مُ عَ حّنفِ سَمَ عَ حّرّ كِ شْن مَ،
عَ قَشَمَ نّ.
17سٍتَرٍ كِقٍ نَ مَنِيَشِ عَلَتَلَ دٌنِقٍ نَن نَ.
عَلَ قَمَ نّ نَ دٌنِ رَفبِلٍندٍ عَ مَ.
18عِ شَ قٍ بِرِن نَبَ عِ شَ دِ شُرُقٍ رَ عَلَكٌ عَ شَ كِسِ،
شَ نَ مُ عَ رَ، عَ قَشَمَ نّ.
19مِشِ نَشَن لُمَ شْنْ رَ، عَ نَ سَرٍ قِمَ نّ.
شَ عِ عَ مَلِ كٍرٍن، عَ مَن فبِلٍنمَ نّ نَ مَ.
20عِ شَ عِ تُلِ مَتِ مَرَ سِ رَ، عِ شَ تِن عٍ شَ عِ شَرَن،
عَلَكٌ عِ شَ قِندِ شَشِلِمَ رَ.
21مَحْشُن فبٍفبٍ نَ مِشِ بْحّ كُي،
كْنْ عَلَتَلَ وَشْنقٍ نَن كَمَلِمَ.
22عَدَ مَدِ وَ مَ عَ بٌورٍ شَ دُفُتّفّحَ عَ مَ.
سٍتَرٍ قِسَ وُلٍ قَلّ بّ.
23عَلَتَلَ شَ يَرَفَاشُي مِشِ رَكِسِمَ نّ.
نَ مِشِ نَ عَ سَ كْي رَ، عَ مُ هَنمّمَ تْورّ يٌ رَ.
24تُننَشْنّ عَ دٌنسٍ تٌنفٌمَ نّ عَ بّلّشّ،
كْنْ عَ مُ وَكِلِمَ عَ رَ سٌقٍ رَ عَ دّ عِ.
25مِشِ مَيٍلٍ بْنبْ، عَلَكٌ شَشِلِتَرٍ شَ شَشِلِ سْتْ.
شَشِلِمَ نَ رَ سِ، عَلَكٌ عَ شَشِلِ شُن شَ مَسَ.
26دِ نَشَن عَ بَبَ كَسَرَ مَ، عَ عَ نفَ كٍرِ،
مِشِ رَيَافِشِ نَ عَ رَ.
27ﭑ مَ دِ، شَ عِ مُ مَرَ سِ رَ مّمَ،
عِ بَرَ عِ يّتّ مَكُيَ قٍ كٌلٌنيِ رَ.
28سٍيدٍ وُلٍ قَلّ يٌمَ سّرِيّ نَن مَ،
تِنشِنتَرٍيَ نَن مِنِمَ مِشِ حَاشِ دّ عِ.
29مِشِ مَيٍلٍ حَشَنكَتَمَ نّ،
لْننِتَرٍ بْنبْمَ نّ.