عَلَ شَ مِشِ سُفَندِشِ شَ سّرّشّ
1سَاتّ سِنفٍ بُن مَ، يَامَرِ ندٍيٍ نُ نَ بَتُي شَ قٍ رَ، نُن عَلَ شَ هْرْ مْلِنفِرَ شَ قٍ رَ، نَشَن نُ نَ دُنِحَ. 2نَ هْرْ مْلِنفِرَ تٌ تِ، يِرٍ ندٍ نُ نَ نَشَن نُ شِلِ يِرٍ سّنِيّنشِ. لَنثُي نُ نَ عَ كُي، عَ نُن تٍيبِلِ سّرّشّ تَامِ نُ سَشِ نَشَن مَ. 3يِرٍ سّنِيّنشِ قِرِن ندٍ نُ نَ دُفِ فبَكُشِ شَنبِ رَ، نَشَن نُ سّنِيّن دَنفِقٍ بٌورٍ رَ. 4سُرَيِ فَنسٍ شّيمَ دَاشِ نُن سَاتّ كَنكِرَ نُ نَ نَ يِرٍ كُي. شّيمَ نُ سَشِ سَاتّ كَنكِرَ بِرِن مَ. تْنبِلِ شّيمَ دَاشِ مَنَ نُ رَفَتَشِ نَشَن كُي، هَرُنَ شَ شُلِ نَشَن قُفَ، عَ نُن وَلَشّيٍ، سَاتّ سّبّشِ نَشٍيٍ مَ، عٍ بِرِن نُ نَ نَ سَاتّ كَنكِرَ كُي. 5عَلَ شَ مَلٍكّ نْرْشِ مَسٌلِشِ قِرِنيِ نُ تِشِ سَاتّ كَنكِرَ قَرِ، عٍ يُنُبِ شَقَرِ يِرٍ مَكٌتٌ. عَ مُ لَنمَ وٌن شَ سٌ نَ وْيّنيِ بِرِن كُي يَكْسِ.
6نَ يِرٍ تٌ فّ يَءِلَندٍ نَ كِ، سّرّشّدُبّيٍ نُ لُمَ سٌ رَ نَ يِرٍ سّنِيّنشِ سِنفٍ نَن كُي، عٍ عٍ شَ وَلِ رَبَ نَا. 7كْنْ سّرّشّدُبّ كُنتِفِ نَن فبَنسَن نُ نْمَ سٌدٍ نَ يِرٍ سّنِيّنشِ قِرِن ندٍ كُي. حّ يٌ حّ عَ نُ سٌمَ نَا سَنمَيَ كٍرٍن، عَ وُلِ شَنِن عَ شَ يُنُبِيٍ نُن حَمَ شَ يُنُبِيٍ شَ قٍ رَ عٍ نَشَن نَبَ عَ كٌلٌنتَرٍيَ مَ. 8نَ كُي، عَلَ شَشِلِ سّنِيّنشِ نُ وَ مَ عَ مَسٍنقٍ نّ عَ يِرٍ نَشَن نُ سّنِيّن دَنفِقٍ يِرٍ بِرِن نَ، عَ مّننِ مُ نُ رَبِشِ مِشِيٍ بّ نَ هْرْ مْلِنفِرَ سِنفٍ شَ وَشَتِ. 9نَ بِرِن قِندِشِ مِسَالِ نَن نَ يِ وَشَتِ مِشِيٍ بّ. عَ عَ مَسٍنمَ عَ نَ سّرّشّ بِرِن مُ نْمَ بَتُلَيٍ شَشِلِ رَ سّنِيّندٍ. 10نَ يَامَرِ سِنفٍيٍ، دٌنسٍ، مِنسٍ، نُن سَلِ يٍ شَ قٍ رَ، عٍ نُ قِشِ مِشِيٍ مَ عٍ شَ يُنُبِيٍ نَن شَ قٍ رَ، هَن وَشَتِ نّينّ قَمَ تّمُي نَشّ.
11عَلَ شَ مِشِ سُفَندِشِ تٌ قِندِ وٌن مَ سّرّشّدُبّ كُنتِفِ رَ، عَ بَرَ قَ هّيرِ رَ، عَ نَشَن سْتْ وٌن بّ. عَ بَرَ سٌ عَلَ شَ هْرْ مْلِنفِرَ قَنيِ كُي، عَدَ مَدِ مُ نَشَن يَءِلَنشِ يِ بّندّ قُحِ قَرِ. 12كْنْ عَ مُ سٌ سِ كٌنتٌنيِ نُن نِنفٍ وُلِ شَ رَ، عَ سٌ نَ يِرٍ سّنِيّنشِ قِسَمَنتٍ كُي عَ يّتّ وُلِ نَن نَ. عَ سٌ نّ كٍرٍنيِ رَ، بَرِ مَ نَ نُ قِندِشِ شُنسَرٍ نَن نَ عَدَ مَدِ بّ نَشَن مُ حْنمَ عَبَدَن. 13شَ سِ كٌنتٌنيِ نُن تُرَ وُلِ، عَ نُن تّ شُبٍ نَشَن قَتَنشِ نِنفٍ سّرّشّ رَ عَ سَ مِشِ سّنِيّنتَرٍيٍ مَ، شَ نَ قٍ مْولِ نْمَ مِشِ رَ سّنِيّندٍ نُ، 14عَلَ شَ مِشِ سُفَندِشِ وُلِ مُ دَنفِمَ شّ نَ رَ؟ عَ نَشَ عَ يّتّ بَ سّرّشّ كَمَلِشِ رَ عَلَ بّ، عَلَ شَشِلِ سّنِيّنشِ شَ يَامَرِ بُن مَ، عَلَكٌ عَ شَ وٌن شَشِلِ رَ سّنِيّن وَلِ حَاشِيٍ مَ، نَشٍيٍ وٌن قَشَمَ. عَ نَ رَبَ نّ وٌن بّ عَلَكٌ وٌن شَ عَلَ حِحّ بَتُ.
15نَ كُي، عَ بَرَ قِندِ سَابُي رَ يِ سَاتّ نّينّ شَ قٍ رَ، مِشِ شِلِشِيٍ شَ كّ سْتْ نَشَن بُمَ عَبَدَن، عَلْ عَ لَايِدِشِ عٍ بّ كِ نَشّ. عَ قَشَ نَ نَن مَ، عَ قِندِ شُنسَرٍ رَ يُنُبِيٍ شَ قٍ رَ نَشٍيٍ رَبَشِ نَ سَاتّ قٌرِ شَ وَشَتِ بُن مَ. 16سَاتّ نَشَن قِندِ كّ قٍ رَ، نَ مُ كَمَلِمَ سِندٍن، قٌ سَاتّ تٌنفٌمَ قَشَ. 17كّ مُ نْمَ سْتْدٍ بٍينُن سَاتّتٌنفٌي شَ قَشَ. عَ مُ سْتْمَ سَاتّتٌنفٌي بَلٌشِ تّمُي نَشّ. 18نَ نَن عَ تٌشِ نَ سَاتّ سِنفٍ مُ تٌنفٌمَ وُلِ شَنبِ. 19عَننَبِ مُنسَ تٌ عَلَ شَ سّرِيّ مَسٍن حَمَ بّ، عَ نَشَ نِنفٍيٍ نُن سِ كٌنتٌنيِيٍ وُلِ تٌنفٌ، عَ نُن يٍ، عَ قَ نَ كَسَن كِتَابُي نُن حَمَ مَ سٍ ندٍ رَ نَشَن يَءِلَنشِ هِسٌثِ بُرّشّ نُن يّشّي شَبٍ فبٍيلِ رَ، عَ قَ عَ قَلَ، عَ نَشّ، 20«وُلِ نَن يَ نَشَن سَاتّ شِرِ مَ وٌ نُن عَلَ تَفِ.» 21عَننَبِ مُنسَ مَن نَشَ وُلِ كَسَن هْرْ مْلِنفِرَ مَ، عَ نُن هْرْ مْلِنفِرَ يِرَبَسٍ بِرِن مَ. 22عَ سّرِيّ كِ مَ، قَيِدَ سٍ بِرِن نَسّنِيّنمَ وُلِ نَن نَ. يُنُبِ مُ شَقَرِ مَ وُلِ عِقِلِ شَنبِ.
23عَ نُ لَنمَ سٍ نَشٍيٍ مِسَالِشِ قٍيٍ رَ عَرِيَننَ كُي، عٍ شَ رَ سّنِيّن سّرّشّيٍ رَ. عَرِيَننَ شَ مَرَ سّنِيّنيِ رَبَمَ سّرّشّيٍ نَن نَ نَشٍيٍ قَن بٌورٍيٍ بّ. 24عَلَ شَ مِشِ سُفَندِشِ مُ سٌشِ هْرْ مْلِنفِرَ شَ كُي عَدَ مَدِيٍ نَشَن يَءِلَنشِ، نَشَن مِسَالِشِ هْرْ مْلِنفِرَ رَ نَشَن نَ عَرِيَننَ. عَ سٌ عَرِيَننَ يَتِ نَن كُي، عَلَكٌ عَ شَ وٌن مَ دّنتّفّ سَ عَلَ بّ. 25عَ مُ سٌشِ نَا سَنيَ وُيَشِ، عَلْ سّرّشّدُبّ كُنتِفِ نَشَن سٌمَ عَلَ شَ هْرْ مْلِنفِرَ كُي حّ يٌ حّ وُلِ ندٍ رَ، نَشَن مُ قِندِشِ عَ فبٍ رَ. 26شَ عَ نُ نَ كِ نّ نُ، عَلَ شَ مِشِ سُفَندِشِ نُ لَنمَ نّ عَ شَ تْورْ سَنمَيَ وُيَشِ كَبِ دُنِحَ قْلّ رَ. كْنْ نَ مُ عَ رَ. يَكْسِ يِ وَشَتِ دْنشْي، عَ نَشَ مِنِ سَنمَيَ كٍرٍن، عَلَكٌ عَ شَ يُنُبِ شَ قٍ كَنَ عَ يّتّ سّرّشّ سَابُي رَ. 27عَدَ مَدِيٍ قَشَمَ نّ سَنيَ كٍرٍن، عٍ قَ مَكِيتِ. 28عَلَ شَ مِشِ سُفَندِشِ قَن بَرَ قَشَ سَنمَيَ كٍرٍن، عَلَكٌ عَ شَ يُنُبِ بَ مِشِ فبٍفبٍ مَ. عَ مَن قَمَ نّ عَ قِرِن ندٍ، كْنْ نَ وَشَتِ عَ مُ قَمَ يُنُبِيٍ شَ قٍ شَ رَ، عَ قَمَ مِشِيٍ نَن بّ نَشٍيٍ شَشِلِ تِشِ كِسِ رَ.