عَننَبِ يَيَ كَوَندِ تِقٍ
مَتِيُ ٣؛١ ٬ ١٢، مَرَكِ ١؛٢ ٬ ١١
1رْ مَ مَنفّ شُنفبٍ تِبٍرِيٌ نُ نَ عَ شَ مَنفّيَ حّ قُ نُن سُولِ ندٍ كُي. ثٌنسِ ثِلَتِ نَن نُ قِندِشِ يُدَيَ فٌمِنَ رَ. هٍرٌدٍ نَن نُ قِندِشِ فَلِلٍ مَنفّ رَ، عَ تَارَ قِلِثُ قَن نُ قِندِشِ عِتُرٍيَ نُن تِرَكٌنِتِ بْشِيٍ مَنفّ رَ. لِسَنِيَ نَن نُ قِندِشِ عَبِلٍن مَنفّ رَ. 2عَنَنِ نُن كَيَقَ نَن نُ قِندِشِ سّرّشّدُبّ كُنتِفِيٍ رَ. نَ وَشَتِ، عَلَ شَ مَسٍنيِ نَشَ قَ سَكَرِ شَ دِ يَيَ مَ، عَ تٌ نُ نَ وُلَ عِ. 3نَ كُي، عَ نَشَ سِفَ كَوَندِ رَبَدٍ يُرُدّن شُرٍ لٌنفٌرِ بِرِن. عَ نُ كَوَندِ تِمَ مِشِيٍ بّ، عٍ شَ عٍ شُنشَ يٍ شْورَ تُوبِ رَ، عَلَكٌ عَلَ شَ عٍ شَ يُنُبِيٍ شَقَرِ. 4عَ سّبّشِ عَننَبِ عٍسَيِ شَ كِتَابُي كُي،
«مِشِ ندٍ عَ شُي عِتٍمَ فبٍنفبٍرٍنيِ مَ،
‹وٌ كِرَ يَءِلَن مَرِفِ بّ،
وٌ سَنكِرَيٍ مَتِنشِن عَ يَ رَ.
5قٌلٍ بِرِن نَقٍمَ نّ.
فٍيَ شُنفبٍ نُن عَ لَنمَ،
عَ بِرِن عِفٌرٌ مَ نّ.
كِرَ مَدَلِنشِ تِنشِنمَ نّ،
كِرَ حَاشِ يَءِلَنمَ نّ.
6عَدَ مَدِ بِرِن قَمَ نّ عَلَ شَ كِسِ تٌدٍ.›»
7نَ كُي، حَمَ تٌ نُ سِفَمَ يَيَ شْن مَ عَ شَ عٍ شُنشَ يٍ شْورَ، عَ نَشَ عَ قَلَ عٍ بّ، «وٌ تَن بْشِمَسٍ بْنسْي! ندٍ وٌ رَكٌلٌنشِ وٌ شَ وٌ فِ عَلَ شَ شْنّ مَ نَشَن نَ قَقٍ؟ 8وٌ كّحَ شَ وَلِ قَنيِ رَ مِنِ عَلْ وُرِ بِلِ قَنيِ بٌفِ قَنيِ رَ مِنِمَ كِ نَشّ، بٌفِ نَشَن عَ مَسٍنمَ عَ وٌ بَرَ تُوبِ. وٌ نَشَ عَ قَلَ وٌ يّتّ مَ، ‹عِبُرَهِمَ نَن نَ مُشُ بٍنبَ رَ،› بَرِ مَ قّيرّ نَ عَلَ يِ عَ شَ يِ فّمّيٍ مَقِندِ عِبُرَهِمَ شَ دِيٍ رَ. 9بٍيرَ حَن نَ وُرِيٍ سَنكٍيٍ رَ عَ شَ عٍ بِلِيٍ سّفّ. وُرِ نَشَن يٌ مُ بٌفِ قَنيِ رَ مِنِمَ، عَ قْنمَ نّ، عَ وٌلِ تّ عِ.»
10حَمَ نَشَ عَ مَشْرِن، «مُشُ شَ مُنسٍ رَبَ قَ؟» 11عَ نَشَ عٍ يَابِ، «دٌنمَ قِرِن نَ نَشَن يِ رَ، عَ كَنيِ شَ كٍرٍن قِ بٌورٍ مَ، سٍ مُ نَ نَشَن يِ. دٌنسٍ نَ نَشَن يِ رَ، عَ كَنيِ قَن شَ عَ رَبَ نَ كِ.» 12دُوتِ مَشِلِيٍ قَن نَشَ قَ عٍ شُنشَدٍ يٍ شْورَ، عٍ عَ مَشْرِن، «كَرَ مْشْ، عَ لَنمَ مُشُ شَ مُنسٍ رَبَ؟» 13عَ نَشَ عٍ يَابِ، «وٌ نَشَ دُوتِ شُن مَسَ دَنفِ يَامَرِ رَ.» 14سْورِ ندٍيٍ قَن نَشَ عَ مَشْرِن، «مُشُ تَن فٌ؟ عَ لَنمَ مُشُ قَن شَ مُنسٍ رَبَ؟» عَ نَشَ عٍ يَابِ، «وٌ نَشَ مِشِ يٌ مُحَ، وٌ نَشَ مِشِ يٌ تْوحّفّ. وٌ شَ وٌ وَ سَ سٌ وٌ وَلِ سَرٍ نَن نَ.»
15مِشِيٍ نَشَ عٍ شَشِلِ تِ يَيَ رَ، عٍ نُ عٍ مَحْشُن، عَ تّمُندٍ عَلَ شَ مِشِ سُفَندِشِ نَ عَ رَ. 16يَيَ نَشَ عَ قَلَ عٍ بِرِن بّ، «ﭑ تَن وٌ شُنشَمَ يٍ نَن شْورَ، كْنْ نَشَن قَمَ ﭑ شَنبِ رَ، نَ سّنبّ فبٌ ﭑ تَن بّ. نَ بِنيّ مُ نَ ﭑ تَن يِ رَ، ﭑ حَن شَ عَ شَ سَنكِرِ لُوتِ يَتِ قُلُن. عَ تَن نَن عَلَ شَشِلِ سّنِيّنشِ رَفٌرٌ مَ وٌ مَ، عَ تَن نَن وٌ شُنشَمَ تّ رَ. 17عَ شَ سٍفٍرٍ سُشُشِ عَ يِ رَ، عَ مَالٍ نُن عَ لَفِ يٍفٍتِمَ نَشَن نَ لْنيِ مَ. عَ مَالٍ رَ سٌمَ عَ شَ بِلِ كُي، كْنْ عَ لَفِ تَن فَنمَ تّ رَ نَشَن مُ شُبٍنمَ.» 18يَيَ مَن نُ مِشِيٍ رَ سِمَ عَ مْولِ وُيَشِ رَ، عَ نُ عٍ كَوَندِ شِبَارُ قَنيِ رَ.
19كْنْ يَيَ تٌ وْيّن مَنفّ هٍرٌدٍ مَ، عَ تَارَ شَ فِنّ هٍرٌدِيَسِ شَ قٍ رَ، عَ نُن عَ نُ بَرَ قٍ حَاشِ نَشَن بِرِن نَبَ، 20هٍرٌدٍ مَن نَشَ يِ قٍ كٌبِ كٍرٍن سَ نَ بِرِن شُن؛ عَ نَشَ يَيَ سَ فٍيلِ.
عِسَ شُنشَقٍ يٍ شْورَ
مَتِيُ ٣؛١٣ ٬ ١٧، مَرَكِ ١؛٩ ٬ ١١، يَيَ ١؛٣٢ ٬ ٣٤
21حَمَ بِرِن تٌ نُ بَرَ عٍ شُنشَ يٍ شْورَ، عِسَ قَن نَشَ عَ شُنشَ يٍ شْورَ. عَ تٌ نُ عَلَ مَشَندِقٍ، كٌورٍ نَشَ رَبِ، 22عَلَ شَشِلِ سّنِيّنشِ نَشَ فٌرٌ عَ مَ عَلْ فَنبّ. شُي ندٍ نَشَ كٍلِ كٌورٍ مَ، عَ عَ مَسٍن، «ﭑ مَ دِ مَشَنُشِ نَن نَ عِ رَ. عِ ﭑ كّنّنشِ كِ قَنيِ رَ.»
عِسَ بٍنبَيٍ
مَتِيُ ١؛١ ٬ ١٧
23عِسَ تٌ حّ تٌنفٌ سَشَن حْندْن سْتْ، عَ نَشَ عَ شَ وَلِ قْلْ. مِشِيٍ نُ لَشِ عَ رَ يُسُقُ شَ دِ نَن عَ رَ.
يُسُقُ قِندِشِ هٍلِ شَ دِ نَن نَ،
24هٍلِ قِندِشِ مَتَهَتِ شَ دِ نَن نَ،
مَتَهَتِ قِندِشِ لٍوِ شَ دِ نَن نَ،
لٍوِ قِندِشِ مٍلِكِ شَ دِ نَن نَ،
مٍلِكِ قِندِشِ يَننَيِ شَ دِ نَن نَ،
يَننَيِ قِندِشِ يُسُقُ شَ دِ نَن نَ،
25يُسُقُ قِندِشِ مَتَهِسَ شَ دِ نَن نَ،
مَتَهِسَ قِندِشِ عَمٌسِ شَ دِ نَن نَ،
عَمٌسِ قِندِشِ نَشُمُ شَ دِ نَن نَ،
نَشُمُ قِندِشِ عٍسِلِ شَ دِ نَن نَ،
عٍسِلِ قِندِشِ نَفَيِ شَ دِ نَن نَ،
26نَفَيِ قِندِشِ مَاتِ شَ دِ نَن نَ،
مَاتِ قِندِشِ مَتَهِسَ شَ دِ نَن نَ،
مَتَهِسَ قِندِشِ سٍمٍيِن شَ دِ نَن نَ،
سٍمٍيِن قِندِشِ يٌسٍكٍ شَ دِ نَن نَ،
يٌسٍكٍ قِندِشِ يٌدَ شَ دِ نَن نَ،
27يٌدَ قِندِشِ يٌهَنَ شَ دِ نَن نَ،
يٌهَنَ قِندِشِ رٍ سَ شَ دِ نَن نَ،
رٍ سَ قِندِشِ سٌرٌبَبٍلِ شَ دِ نَن نَ،
سٌرٌبَبٍلِ قِندِشِ سَلَتِيٍلِ شَ دِ نَن نَ،
سَلَتِيٍلِ قِندِشِ نٍرِ شَ دِ نَن نَ،
28نٍرِ قِندِشِ مٍلِكِ شَ دِ نَن نَ،
مٍلِكِ قِندِشِ عَدِ شَ دِ نَن نَ،
عَدِ قِندِشِ كٌسَن شَ دِ نَن نَ،
كٌسَن قِندِشِ عٍلٍمَدَن شَ دِ نَن نَ،
عٍلٍمَدَن قِندِشِ عٍرُ شَ دِ نَن نَ،
29عٍرُ قِندِشِ يٌسُوٍ شَ دِ نَن نَ،
يٌسُوٍ قِندِشِ عٍلِيٍسٍرِ شَ دِ نَن نَ،
عٍلِيٍسٍرِ قِندِشِ يٌرِ مِ شَ دِ نَن نَ،
يٌرِ مِ قِندِشِ مَتَهَتِ شَ دِ نَن نَ،
مَتَهَتِ قِندِشِ لٍوِ شَ دِ نَن نَ،
30لٍوِ قِندِشِ سِمٍيْن شَ دِ نَن نَ،
سِمٍيْن قِندِشِ يُدَ شَ دِ نَن نَ،
يُدَ قِندِشِ يُسُقُ شَ دِ نَن نَ،
يُسُقُ قِندِشِ يٌنَن شَ دِ نَن نَ،
يٌنَن قِندِشِ عٍلِيَكِن شَ دِ نَن نَ،
31عٍلِيَكِن قِندِشِ مٍلٍيَ شَ دِ نَن نَ،
مٍلٍيَ قِندِشِ مٍنَ شَ دِ نَن نَ،
مٍنَ قِندِشِ مَتَتَ شَ دِ نَن نَ،
مَتَتَ قِندِشِ نَتَن شَ دِ نَن نَ،
نَتَن قِندِشِ دَوُدَ شَ دِ نَن نَ،
32دَوُدَ قِندِشِ يِسَيِ شَ دِ نَن نَ،
يِسَيِ قِندِشِ عٌبٍدٌ شَ دِ نَن نَ،
عٌبٍدٌ قِندِشِ بٌو سُ شَ دِ نَن نَ،
بٌو سُ قِندِشِ سَلِمٌن شَ دِ نَن نَ،
سَلِمٌن قِندِشِ نَشَسٌن شَ دِ نَن نَ،
33نَشَسٌن قِندِشِ عَمِنَدَبٌ شَ دِ نَن نَ،
عَمِنَدَبٌ قِندِشِ عَدِ مِن شَ دِ نَن نَ،
عَدِ مِن قِندِشِ عَرِنِ شَ دِ نَن نَ،
عَرِنِ قِندِشِ شٍسِرٌن شَ دِ نَن نَ،
شٍسِرٌن قِندِشِ ثٍرٍ سِ شَ دِ نَن نَ،
ثٍرٍ سِ قِندِشِ يُدَ شَ دِ نَن نَ،
34يُدَ قِندِشِ يَشُبَ شَ دِ نَن نَ،
يَشُبَ قِندِشِ عِسِيَفَ شَ دِ نَن نَ،
عِسِيَفَ قِندِشِ عِبُرَهِمَ شَ دِ نَن نَ،
عِبُرَهِمَ قِندِشِ تٍرَ شَ دِ نَن نَ،
تٍرَ قِندِشِ نَشٌرِ شَ دِ نَن نَ،
35نَشٌرِ قِندِشِ سٍرُفُ شَ دِ نَن نَ،
سٍرُفُ قِندِشِ رٍوُ شَ دِ نَن نَ،
رٍوُ قِندِشِ ثٍلٍفِ شَ دِ نَن نَ،
ثٍلٍفِ قِندِشِ عٍبٍرِ شَ دِ نَن نَ،
عٍبٍرِ قِندِشِ سٍلَهَ شَ دِ نَن نَ،
36سٍلَهَ قِندِشِ كَيِنَن شَ دِ نَن نَ،
كَيِنَن قِندِشِ عَرَقَشَدِ شَ دِ نَن نَ،
عَرَقَشَدِ قِندِشِ سٍمِ شَ دِ نَن نَ،
سٍمِ قِندِشِ نُهَ شَ دِ نَن نَ،
نُهَ قِندِشِ لٍمٍكِ شَ دِ نَن نَ،
37لٍمٍكِ قِندِشِ مٍتُسٍلَ شَ دِ نَن نَ،
مٍتُسٍلَ قِندِشِ عٍنٌكِ شَ دِ نَن نَ،
عٍنٌكِ قِندِشِ يٍرٍدِ شَ دِ نَن نَ،
يٍرٍدِ قِندِشِ مَهَلَلٍلِ شَ دِ نَن نَ،
مَهَلَلٍلِ قِندِشِ كٍنَن شَ دِ نَن نَ،
38كٍنَن قِندِشِ عٍنٌسِ شَ دِ نَن نَ،
عٍنٌسِ قِندِشِ سٍتِ شَ دِ نَن نَ،
سٍتِ قِندِشِ عَدَ مَ شَ دِ نَن نَ،
عَدَ مَ قِندِشِ عَلَ شَ دِ نَن نَ.