عَلَ نَن نَ عِسِرَيِلَ شَ مَلِ رَ
1«حَمَنّيٍ، وٌ وٌ سَبَرِ.
سِ يٍنسٍنشِيٍ، وٌ لِمَنِيَ، وٌ شَ وٌ مَسٌ ﭑ مَ كِيتِ يِرٍ رَ.»
2«ندٍ مِشِ تِشِ كِرَ شْن مَ كٍلِ سٌفٍتٍدٍ،
وٌ شَ كِيتِ سَمَ نَشَن شِلِ رَ؟
ندٍ حَمَنّيٍ سَشِ عَ سَفٌي، عَ مَنفّيٍ شَ قٍ عِفٌرٌ عَ بّ؟
عَ شَ سَنتِدّفّمَ عٍ شُن نَكَنَمَ نّ، عَ شَ شَلِ عٍ رَيٍنسٍن يّ.
3عَ عٍ كٍرِ مَ نّ سّنبّ رَ، عَ مَن سِفَ يِرٍ فبّتّ نَ رَبَدٍ.
4ندٍ نَ قٍيٍ رَفِرِشِ عَ شَ يَامَرِ رَ كَبِ دُنِحَ قْلّ؟
ﭑ تَن عَلَتَلَ، نَشَن نَ قٍ قْلّ نُن قٍ رَحْنيِ رَ،
ﭑ تَن بَرَ نَ مْولِ بِرِن نَفِرِ.»
5«حَمَنّيٍ فَاشُمَ نّ نَ بِرِن يَ رَ،
سِيٍ سّرّن فَاشُي رَ دُنِحَ بِرِن.
6عٍ لِمَنِيَ قِمَ عٍ بٌرٍ مَ، عَ قَلَقٍ رَ، ‹وٌ وٌ سّنبّ سٌ!›
7يِرَوَلِيٍ عٍ بٌرٍ مَلِمَ عَلَكٌ شّيمَ شَ سَ كُيٍ مَ.
عٍ نَشّ، ‹عَ قَن نَ كِ نّ.›
عٍ كُيٍ بَنبَنمَ لَنتُمَيٍ رَ عَلَكٌ عَ نَشَ قَ بِرَ.»
8«كْنْ وٌ تَن عِسِرَيِلَ قِندِشِ ﭑ مَ كٌنيِ نَن نَ.
ﭑ وٌ تَن يَشُبَ بْنسْي نَن سُفَندِشِ،
نَشَن قَتَنشِ ﭑ شَنُنتٍنيِ عِبُرَهِمَ بْنسْي.
9ﭑ وٌ تٌنفٌشِ دُنِحَ تُنشُنيِيٍ نَن نَ، عَ قَلَقٍ رَ،
‹ﭑ مَ كٌنيِ سُفَندِشِيٍ نَن وٌ رَ، ﭑ مُ مّمَ نَشٍيٍ رَ.›
10وٌ نَشَ فَاشُ، بَرِ مَ ﭑ نَ وٌ قْشْ رَ.
وٌ نَشَ كْنتْقِلِ، بَرِ مَ ﭑ تَن نَن نَ وٌ مَرِفِ عَلَ رَ.
ﭑ سّنبّ قِمَ وٌ مَ ﭑ بّلّشّ تِنشِنشِ نَن نَ.»
11«نَشٍيٍ بِرِن وٌ مَبٍرٍقٍ، عٍ قَمَ يَافِ نَن تُن سْتْدٍ.
نَشٍيٍ وٌ قٍنقٍ فٍرٍ رَ، عٍ هَلَكِمَ نّ، عٍ حْن.
12وٌ نَ وٌ يَشُييٍ قٍن، وٌ مُ قَمَ عٍ تٌدٍ، بَرِ مَ عٍ لْيمَ نّ.
نَشٍيٍ وٌ قٍنمَ فٍرٍ رَ، نٍيٍ حْنمَ نّ.
13نَ رَبَمَ نّ بَرِ مَ ﭑ تَن نَن نَ وٌ مَرِفِ عَلَتَلَ رَ،
نَشَن وٌ بّلّشّ رَ سُشُ،
عَ عَ قَلَ، ‹وٌ نَشَ فَاشُ، ﭑ قَقٍ وٌ مَلِدٍ.›
14يَشُبَ بْنسْي، وٌ نَشَ فَاشُ.
عِسِرَيِلَ، وٌ وٌ سّنبّ سٌ.
هَلِ وٌ قِندِشِ مِشِ شُنشُرِيٍ نَن نَ عَلْ كُلِ دِ،
ﭑ تَن نَشَن لَنشِ وٌ رَكِسِمَ مَ، نَشَن قِندِشِ وٌ شَ سّنِيّنتْي رَ،
ﭑ تَن يّتّ يَتِ قَمَ نّ وٌ مَلِدٍ.
ﭑ شُي نَن نَ كِ.»
15«ﭑ عَ نِيَمَ نّ وٌ شَ سّنبّ مَفَاشُشِ سْتْ وٌ يَشُييٍ يَ رَ.
وٌ لُمَ نّ عَلْ وُرٍ وَلِ سٍ نَشَن فٍيَيٍ رَبْو مَ، عَ عٍ قِندِ شُبٍ رَ.
16وٌ يَشُييٍ رَيٍنسٍنمَ نّ
عَلْ شّ سَ نَشٍيٍ مَالٍ بْنبْ، قٌيٍ قَ مَالٍ لَفِ شَنِن.
وٌ سّيوَ مَ نّ عَلَتَلَ رَ،
وٌ عِسِرَيِلَ شَ سّنِيّنتْي تَنتُمَ نّ.»
17«مِسِكِينّيٍ نُن سٍتَرٍيٍ يٍ قٍنمَ، كْنْ عٍ مُ عَ تٌمَ.
عٍ نّنيِ شَرَ مَ يٍ شْلِ رَ.
كْنْ ﭑ تَن عَلَتَلَ، ﭑ عٍ شَ مَشَندِ تٌنفٌمَ نّ.
ﭑ تَن عِسِرَيِلَ مَرِفِ عَلَ، ﭑ مُ نّيمُمَ عٍ مَ.
18ﭑ شُرٍيٍ رَبْو مَ نّ فٍيَ مَشَرَشِيٍ مَ،
ﭑ دُلٌنيِ رَ مِنِمَ مَ فُلُنبَيٍ كُي.
ﭑ فبٍنفبٍرٍنيِ مَقِندِ مَ نّ يٍ يِرٍ رَ.
19ﭑ سّدِرِ، كَسِيَ، مِرِتِ، نُن عٌلِوِ وُرِ بِلِيٍ سِمَ نّ فبٍنفبٍرٍنيِ مَ.
ﭑ سِثِرّ، عٌرِ مِ، نُن بُيِسِ سَنسِ بِلِيٍ سِ وُلَ عِ،
20عَلَكٌ حَمَ شَ نَ تٌ، عٍ قَ قَهَامُي سْتْ،
عَ نَ بِرِن قِندِشِ عِسِرَيِلَ شَ سّنِيّنتْي عَلَتَلَ سّنبّ وَلِ نَن نَ.»
21عَلَتَلَ نَشّ، «وٌ قَ، وٌ وٌ شَ مَرَكْرْ سِ مَسٍن ﭑ بّ.
وٌ شَ نَ بِرِن تَفِ رَبَ عَ قَنيِ رَ يَشُبَ مَرِفِ بّ.
22وٌ شَ قَ وٌ شَ كُيٍيٍ رَ عَلَكٌ عٍ شَ عَ قَلَ مُشُ بّ قٍ نَشٍيٍ قَمَ رَبَدٍ.
قٍ نَشٍيٍ سِنفٍ رَبَشِ، عٍ شَ عٍ رَبَ كِ قَلَ مُشُ بّ،
عَلَكٌ مُشُ شَ شَشِلِ سْتْ نَ كُي.
عٍ شَ عَ قَلَ مُشُ بّ قٍ نَشَن قَمَ رَبَدٍ،
23عَلَكٌ مُشُ شَ عَ كٌلٌن عَ عٍ قِندِشِ عَلَيٍ نَن نَ.
عٍ شَ قٍ ندٍ رَبَ، عَ نَ قِندِ قٍقٍ يٌ رَ،
نَشَن نْمَ مُشُ دّ عِشَرَدٍ، مُشُ شَ فَاشُ عٍ يَ رَ.
24وٌ تَن كُيٍيٍ، ‹وٌ مُ نْمَ نَ سٍسٍ رَ، وٌ تِدٍ يٌ مُ نَ.
مِشِ نَشَن وٌ بَتُمَ، نَ مِشِ قِندِشِ مِشِ شْنشِ نَن نَ.›»
25«ﭑ بَرَ مِشِ ندٍ رَكٍلِ كْولَ مَبِرِ،
عَ قَمَ ﭑ شِلِ رَ كٍلِقٍ سٌفٍتٍدٍ مَبِرِ.
عَ مَنفّيٍ عِبٌرٌنمَ نّ عَلْ قّحّ رَقَلّ بّندّ عِبٌرٌنمَ كِ نَشّ.
26ندٍ نَ قٍ مَسٍنشِ كَبِ عَ قْلّ، عَلَكٌ مُشُ شَ نَ كٌلٌن بٍينُن عَ شَ رَبَ؟
ندٍ نَ قَلَشِ، عَلَكٌ مُشُ شَ عَ كٌلٌن نْندِ قَلّ نَن عَ رَ؟
كُيٍ يٌ مُ نَ قٍ مَسٍن.
كُيٍ يٌ مُ نَ شِبَارُي قِ.
كُيٍ يٌ مُ عٍ شُي عِتٍ.
27ﭑ تَن نَن نَ سِنفٍ مَسٍن سِيٌنِ بّ،
‹يِ نَن قَمَ رَبَدٍ.›
ﭑ تَن شّيرَ نَن شّي دَرِ سَلَمُ.
28ﭑ نَشَن تٌمَ يِ كُيٍيٍ تَفِ،
كٍرٍن مُ نَ نَشَن نْمَ مَسٍنيِ ندٍ تِدٍ،
نَشَن نْمَ ﭑ مَ مَشْرِنيِيٍ يَابِدٍ.
29وٌ شَ عٍ مَتٌ؛ كُيٍ قُقَقُ نَن عٍ رَ!
عٍ وَلِ قْشِ يٌ مُ نَ!
سٍسٍ مُ نَ يِ كُيٍيٍ رَ!»