AKS

مَتِي 11

عَننَبِ يَيَ شَ مَشْرِنيِ

لُكِ ٧‏؛١٨ ٬ ٣٥

1عِسَ تٌ فّ يِ يَامَرِيٍ قِدٍ عَ قْشِرَبِرّ قُ نُن قِرِنيِيٍ مَ، عَ نَشَ كٍلِ مّننِ، عَ سِفَ يُوِقِيٍ شَ تَايٍ عَلَكٌ عَ شَ مِشِيٍ شَرَن، عَ عٍ كَوَندِ.

2عَننَبِ يَيَ تٌ عِسَ عَلَ شَ مِشِ سُفَندِشِ شَ قٍ مّ فٍيلِ كُي، عَ نَشَ عَ قْشِرَبِرّ ندٍيٍ شّي عِسَ مَ. 3عٍ نَشَ عَ مَشْرِن، «عِ قِندِشِ عَلَ شَ مِشِ سُفَندِشِ نَن نَ نَشَن لَنمَ عَ شَ قَ، كَ مُشُ شَ مِشِ فبّتّ نَن مَمّ؟» 4عِسَ نَشَ عٍ يَابِ، «وٌ قٍ نَشَن مّشِ نُن وٌ قٍ نَشَن تٌشِ، وٌ سَ نَ دّنتّفّ سَ يَيَ بّ. 5دْنشُييٍ سٍ تٌمَ، نَمَتّيٍ حّرّ مَ، كُنّ كَنيِيٍ يَلَنمَ، تُلِشْرِيٍ قٍ مّمَ، قَشَمِشِيٍ كٍلِمَ، قُشَرِلَيٍ كَوَندِ مَ شِبَارُ قَنيِ رَ. 6سّيوّ نَ مِشِ بّ نَشَن مُ سِيكّمَ ﭑ مَ قٍ رَ.»

7عَننَبِ يَيَ قْشِرَبِرّيٍ تٌ سِفَ، عِسَ نَشَ حَمَ مَشْرِن يَيَ شَ قٍ مَ، «وٌ سِفَ مُنسٍ مَتٌدٍ وُلَ عِ؟ كَلٍ، قٌيٍ نَشَن نَمَشَمَ؟ 8شَ نَ مُ عَ رَ، وٌ سِفَ مُنسٍ مَتٌدٍ؟ دُفِ تٌقَنيِ كَنيِ؟ دُفِ تٌقَنيِ كَنيِيٍ تٌمَ مَنفّ بَنشِيٍ نَن كُي. 9وٌ قَ سِفَ مُنسٍ مَتٌدٍ؟ نَمِحْنمّ؟ عِيٌ، ﭑ شَ عَ قَلَ وٌ بّ، عَ حَن دَنفِ نَمِحْنمّ رَ. 10عَ تَن نَن شَ قٍ سّبّشِ كِتَابُي كُي، ‹ﭑ قَمَ ﭑ مَ شّيرَ رَ سَنبَدٍ عِ يَ رَ عَلَكٌ عَ شَ كِرَ يَءِلَن عِ بّ.› 11ﭑ شَ نْندِ قَلَ وٌ بّ، فِنّ يٌ مُ دِ بَرِ نَشَن دَنفِ يَيَ شُنشَ رَ. كْنْ ﭑ مَن شَ عَ قَلَ وٌ بّ، مِشِ نَشَن نَ عَلَ شَ مَنفّيَ نِينِ بُن مَ، عَ شُرُن كِيٌكِ، عَ قَن دَنفِ يَيَ رَ. 12كَبِ يَيَ شُنشَ شَ وَشَتِ هَن تٌ، عَلَ شَ مَنفّيَ سّنبّ نَن تُن سْتْمَ. سّنبّمَيٍ نَن لُمَ عَ نِينِ بُن مَ. 13نَمِحْنمّيٍ بِرِن نُن تَوُرٍتَ مُنسَ بَرَ عَلَ شَ مَنفّيَ نِينِ شَ قٍ قَلَ هَن عَننَبِ يَيَ وَشَتِ. 14شَ وٌ تِنمَ نْندِ رَ، وٌ شَ عَ كٌلٌن كِتَابُي تٌ عَ قَلَ عَ عَننَبِ عٍلِيَ فبِلٍنمَ قَ رَ، عَ نُ يَيَ نَن مَ قٍ قَلَقٍ. 15شَ وٌ تُلِ قٍ مّمَ، وٌ شَ وٌ تُلِ مَتِ يِ مَسٍنيِ رَ.»

16«ﭑ نْمَ تٌ مِشِيٍ مِسَالِدٍ مُنسٍ رَ؟ عٍ مَنِيَشِ دِ مّدِيٍ نَن نَ نَشٍيٍ دْشْشِ تَا كُي، عٍ نُ عَ قَلَ عٍ بٌورٍيٍ بّ،

17‹مُشُ بَرَ شُلٍ قٍ وٌ بّ،

كْنْ وٌ مُ قَرٍ بٌرٌنشِ.

مُشُ بَرَ حْن بّيتِ بَ،

كْنْ وٌ مُ سُننُنشِ.›»

18«عَننَبِ يَيَ تٌ نُ سُنمَ، عٍ نَشَ عَ قَلَ عَ شَ قٍ رَ، ‹حِننّ نَ عَ قْشْ رَ.› 19عَدَ مَ شَ دِ تٌ قَ، عَ تَن مُ تٌندِ سِفَدٍ شُلُنيِ يِرٍ. نَ كُي، عٍ بَرَ عَ قَلَ، ‹قُرِ حَاشِ سِيسِلَ مَتٌ! عٍ نُن دُوتِ مَشِلِيٍ نُن يُنُبِتْييٍ نَن عَ رَ!› كْنْ شَشِلِمَيَ كٌلٌنمَ عَ كّوَلِ نَن مَ.»

تَا دَنشَنِيَتَرٍيٍ شَ فبَلٌي

مَتِيُ ١٠‏؛١٥، لُكِ ١٠‏؛١٢ ٬ ١٥

20نَ تّمُي عِسَ نَشَ شْنْ مِشِيٍ مَ نَشٍيٍ نُ سَبَتِشِ تَايٍ كُي عَ كَابَنَكٌ فبٍفبٍ رَبَشِ دّننَشّ، بَرِ مَ عٍ مُ تُوبِ. 21«فبَلٌي نَ وٌ بّ، كٌرَ سِنكَيٍ! فبَلٌي نَ وٌ قَن بّ، بٍتٍسَيِدَكَيٍ! كَابَنَكٌ نَشٍيٍ رَبَ وٌ تَفِ، شَ نٍيٍ سَ رَبَ تِرٍ نُن سِدْن نّ نُ، عَ عَ لِمَ عٍ تَن بَرَ تُوبِ نُ عَ رَكُيَ، عٍ سُننُن دٌنمَ رَفٌرٌ عٍ مَ، عٍ تّ شُبٍ مَسٌ عٍ مَ عٍ شَ تُوبِ تْنشُمَ رَ. 22نَ نَن عَ رَ ﭑ شَ عَ قَلَ وٌ بّ، كِيتِ سَ لْشْي شْرْشْمَ وٌ تَن مَ دَنفِ تِرٍكَيٍ نُن سِدْنكَيٍ رَ. 23عِ تَن كَثّرّنَمُ فٌ، عِ حْشْ عَ مَ عَ عِ تٍمَ هَن عَرِيَننَ كُي؟ عَدٍ، عِ رَفٌرٌ مَ نّ هَن يَهَننَمَ، بَرِ مَ كَابَنَكٌ نَشٍيٍ رَبَ عِ تَفِ، شَ نٍيٍ سَ رَبَ سٌدٌ مَ نّ نُ، عَ عَ لِمَ نَ تَا مُ سْنتْمَ نُ. 24نَ نَن عَ رَ، ﭑ شَ عَ قَلَ وٌ بّ، كِيتِسَ لْشْي شْرْشْمَ وٌ تَن مَ دَنفِ سٌدٌ مَكَيٍ رَ.»

قَقٍ عِسَ مَ

لُكِ ١٠‏؛٢١ ٬ ٢٢

25نَ تّمُي عِسَ نَشَ عَ قَلَ، «بَبَ عَلَ، كٌورٍ نُن بْشِ مَرِفِ، ﭑ بَرَ عِ تَنتُ عِ تٌ يِ قٍيٍ نْشُنشِ لْننِلَيٍ نُن شَشِلِمَيٍ مَ، عِ عٍ مَسٍن دِ مّدِيٍ بّ. 26عِيٌ، ﭑ بَبَ، ﭑ بَرَ عِ تَنتُ بَرِ مَ عِ كّنّن قٍ نَن يَ.»

27«ﭑ بَبَ بَرَ قٍ بِرِن تَشُ ﭑ نَ. مِشِ يٌ مُ عَلَ شَ دِ كٌلٌن، قٌ بَبَ عَلَ. مِشِ يٌ مُ بَبَ عَلَ كٌلٌن، قٌ عَلَ شَ دِ، عَ نُن دِ نُ تِن عَ مَسٍندٍ نَشَن بّ. 28وٌ قَ ﭑ مَ، وٌ تَن نَشٍيٍ تَفَنشِ، كٌتٍ بِنيٍ نَشٍيٍ شُن، ﭑ شَ مَلَبُي قِ وٌ مَ. 29وٌ شَ ﭑ مَ كَرَقٌي نَن نَفٌرٌ وٌ كْن مَ، وٌ شَ قِندِ ﭑ مَ تَالِبِيٍ رَ، بَرِ مَ ﭑ بْحّ بّيشِ، عَ مُ تٍمَ. نَ كُي، وٌ بْحّ مَلَبُي سْتْمَ نّ، 30بَرِ مَ ﭑ كَرَقٌي نَشَن نَفٌرٌ مَ وٌ كْن، عَ مُ شْرْشْ، ﭑ كٌتٍ نَشَن دْشْمَ وٌ شُن، عَ مُ بِنيَ.»