AKS

عَننَبِ يٍرٍ مِ 38

عَننَبِ يٍرٍ مِ وٌلِقٍ كْلْنيِ كُي

1مَتَن شَ دِ سّقَتَيَ، ثَسُرَ شَ دِ فّدَلَيَ، سٍلٍمِيَ شَ دِ يٍهُكَلَ، مَلَكِيَ شَ دِ ثَسُرَ، عٍ نَشَ عَننَبِ يٍرٍ مِ شَ مَسٍنيِ مّ عَ نَشَن مَسٍنشِ حَمَ بّ عَ قَلَقٍ رَ، 2«عَلَتَلَ بَرَ عَ مَسٍن، مِشِ يٌ نَشَن لُمَ يِ تَا كُي، نَ كَنيِ قَشَمَ سَنتِدّفّمَ، كَامّ، شَ نَ مُ عَ رَ قُرٍ حَاشِ نَن نَ. كْنْ نَشَن عَ يّتّ دّنتّفّمَ كَلِدِكَيٍ بّ، نَ كَنيِ تَن كِسِمَ نّ. 3عَلَتَلَ بَرَ عَ مَسٍن، يِ تَا قَمَ نّ لُدٍ بَبِلْن مَنفّ شَ سْورِيٍ سَفٌي.»

4كُنتِفِيٍ نَشَ عَ قَلَ مَنفّ بّ، «عَ لَنمَ يِ مِشِ شَ قَشَ، بَرِ مَ عَ تَا فٍرٍ سٌي سّنبّ نَن بَمَ. عَ شَ مَسٍنيِ نَ لِمَنِيَ بَقٍ حَمَ مَ. عَ مُ وَ مَ تَا شَ شُننَقَنيِ شْن، عَ وَ مَ عَ شَ تْورّ نَن شْن.» 5مَنفّ سٍدٍكِيَ نَشَ عٍ يَابِ، «عَوَ يِرٍ، ﭑ بَرَ عَ لُ وٌ يِ رَ.» 6نَ كُي عٍ نَشَ عَننَبِ يٍرٍ مِ سُشُ، عٍ عَ رَفٌرٌ لُوتِ رَ مَنفّ شَ دِ مَلَكِيَ شَ كْلْنيِ كُي سْورِيٍ شَ تّتّ تَفِ. يٍ نُ بَرَ حْن نَا، كْنْ عَننَبِ يٍرٍ مِ نَشَ بِرِ بٌورَ كُي.

7مَنفّ بَتُلَ عٍبٍدِ مٍلٍكِ عٍتِيٌثِكَ نَشَ عَ مّ عٍ نُ بَرَ عَننَبِ يٍرٍ مِ رَفٌرٌ كْلْنيِ كُي. مَنفّ نُ دْشْشِ بُنيَمِن سٌدٍ دّ رَ. 8عٍبٍدِ مٍلٍكِ نَشَ مِنِ مَنفّ شَ بَنشِ، عَ سَ عَ قَلَ مَنفّ بّ، 9«ﭑ مَ مَنفّ، يِ مِشِيٍ بَرَ قٍ حَاشِ رَبَ عَننَبِ يٍرٍ مِ رَ، عٍ عَ رَفٌرٌشِ كْلْنيِ نَن كُي. عَ قَشَمَ نّ كَامّ رَ مّننِ، بَرِ مَ تَامِ بَرَ حْن تَا كُي.» 10مَنفّ نَشَ عٍبٍدِ مٍلٍكِ عٍتِيٌثِكَ يَمَرِ، «عِ شَ مِشِ تٌنفٌ سَشَن تٌنفٌ، وٌ سَ عَننَبِ يٍرٍ مِ رَتٍ كْلْنيِ كُي بٍينُ عَ شَ قَشَ.» 11عٍبٍدِ مٍلٍكِ نَشَ نَ مِشِيٍ تٌنفٌ، عٍ نَشَ سِفَ مَنفّ شَ بَنشِ كُي، نَاقُلِ رَفَتَ يِرٍ بُن مَ. عٍ تٌ دُفِ قٌرِ ندٍيٍ تٌنفٌ، عٍ نَشَ عٍ رَفٌرٌ عَننَبِ يٍرٍ مِ مَ كْلْنيِ كُي لُوتِ رَ. 12عٍبٍدِ مٍلٍكِ عٍتِيٌثِكَ نَشَ عَ قَلَ عَننَبِ يٍرٍ مِ بّ، «يِ دُفِ قٌرِ سَ لُوتِ قَرِ عِ بّلّشّيٍ بُن مَ.» عَننَبِ يٍرٍ مِ نَشَ نَ رَبَ. 13عٍ نَشَ عَننَبِ يٍرٍ مِ رَتٍ لُوتِ رَ، هَن عَ نَشَ تٍ نَا رَ. نَ تّمُي عَ نَشَ لُ سْورِيٍ شَ تّتّ كُي.

14مَنفّ سٍدٍكِيَ نَشَ شّيرَ تِ عَننَبِ يٍرٍ مِ مَ، عٍ شَ نَرَلَن عَلَتَلَ شَ هْرْ مْلِنفِرَ نَادّ سَشَن ندٍ. مَنفّ نَشَ عَ قَلَ عَننَبِ يٍرٍ مِ بّ، «ﭑ وَ مَ عِ مَشْرِنقٍ قٍ ندٍ مَ، كْنْ عِ نَشَ سٍسٍ نْشُن ﭑ مَ.» 15عَننَبِ يٍرٍ مِ نَشَ سٍدٍكِيَ يَابِ، «شَ ﭑ سَ عِ يَابِ نْندِ رَ، عِ مُ ﭑ قَشَمَ شّ؟ عِ تٌندِ مَ نّ ﭑ مَ مَرَ سِ سُشُدٍ.» 16نَ تّمُي سٍدٍكِيَ نَشَ عَ كَلِ فُندٌ رَ عَننَبِ يٍرٍ مِ بّ، «ﭑ بَرَ ﭑ كَلِ عَلَتَلَ حِحّ رَ نَشَن وٌن نَكِسِمَ، ﭑ مُ عِ قَشَمَ، ﭑ مَن مُ عِ سٌمَ مِشِيٍ يِ رَ نَشٍيٍ وَ مَ عِ قَشَقٍ.»

17نَ كُي عَننَبِ يٍرٍ مِ نَشَ عَ قَلَ سٍدٍكِيَ بّ، «عِسِرَيِلَ مَرِفِ عَلَتَلَ بَرَ عَ مَسٍن، شَ عِ يّتّ دّنتّفّ بَبِلْن مَنفّ شَ كُنتِفِيٍ بّ، عِ تَن نُن عِ شَ دٍنبَيَ كِسِمَ نّ، يِ تَا قَن مُ فَنمَ تّ رَ سْنْن. 18كْنْ شَ عِ تٌندِ عِ يّتّ دّنتّفّدٍ بَبِلْن مَنفّ شَ كُنتِفِيٍ بّ، يِ تَا قَمَ نّ لُدٍ كَلِدِكَيٍ سَفٌي، عٍ قَ عَ فَن تّ رَ، عِ قَن لُ عٍ يِ رَ.»

19مَنفّ سٍدٍكِيَ نَشَ عَ قَلَ عَننَبِ يٍرٍ مِ بّ، «ﭑ فَاشُشِ يُوِقِيٍ نَن يَ رَ نَشٍيٍ نَ كَلِدِكَيٍ يِ رَ، بَرِ مَ شَ عٍ سَ ﭑ سٌ نٍيٍ يِ رَ، عٍ ﭑ تْورْ مَ نّ عَ حَاشِ رَ.» 20عَننَبِ يٍرٍ مِ نَشَ عَ يَابِ، «عٍ مُ نَ رَبَمَ. عَ لَنمَ عِ شَ عَلَتَلَ شَ يَامَرِ سُشُ ﭑ نَشَن قَلَشِ عِ بّ. نَ كُي قٍ بِرِن سْونّيَمَ نّ عِ بّ، عِ كِسِمَ نّ. 21كْنْ شَ عِ تٌندِ عِ يّتّ سٌدٍ عٍ يِ رَ، عِ قَمَ نّ يِ حَشَنكَتّ سْتْدٍ عَلَتَلَ نَشَن مَسٍنشِ ﭑ بّ. 22فِنّ نَشٍيٍ نَ يُدَيَ مَنفّ شَ بَنشِ كُي، عٍ شَنِنمَ نّ بَبِلْن مَنفّ شَ كُنتِفِيٍ يِرٍ. نَ فِنّيٍ قَمَ نّ عَ قَلَدٍ،

‹وٌ شَنُنتٍنيِيٍ بَرَ وٌ مَدَشُ،

وٌ بَرَ بِرِ بٌورَ كُي،

وٌ دّقَنبٌورٍ بَرَ وٌ يَنقَ.›

23عِ شَ فِنّيٍ نُن عِ شَ دِ بِرِن قَمَ نّ شَنِندٍ كَلِدِكَيٍ شْن مَ. وٌ مُ رَتَنفَمَ عٍ مَ. بَبِلْن مَنفّ قَمَ نّ وٌ سُشُدٍ، عَ يِ تَا فَن تّ رَ.» 24سٍدٍكِيَ نَشَ عَ قَلَ عَننَبِ يٍرٍ مِ بّ، «وٌن مَ دّ مَسَرّ شَ قِندِ فُندٌ رَ، عَلَكٌ عِ نَشَ قَشَ. 25شَ عَ سَ لِ كُنتِفِيٍ نَشَ عَ كٌلٌن وٌن بَرَ دّ مَسَرَ، عٍ قَ عِ مَشْرِن، ‹وٌ نُن مَنفّ مُنسٍ قَلَشِ وٌ بٌورٍ بّ؟ نَ قٍ بِرِن قَلَ مُشُ بّ عَلَكٌ عِ نَشَ قَشَ،› 26عِ شَ عٍ يَابِ، ‹ﭑ نُ بَرَ مَنفّ مَيَندِ عَ شَ ﭑ نَمِنِ يٌنَتَن شَ بَنشِ كُي، عَلَكٌ ﭑ نَشَ قَشَ.›»

27كُنتِفِيٍ نَشَ قَ عَننَبِ يٍرٍ مِ يِرٍ، عٍ نَشَ مَشْرِنيِ ندٍيٍ تِ عَ مَ. عَننَبِ يٍرٍ مِ نَشَ عٍ يَابِ عَلْ مَنفّ عَ يَمَرِشِ كِ نَشّ. عٍ نَشَ فبِلٍن دُندُي كُي. 28عَننَبِ يٍرٍ مِ نَشَ لُ سْورِيٍ شَ تّتّ كُي هَن دَرِ سَلَمُ سُشُ تّمُي نَشّ.