يٍهٌرَ مِ شَ مَنفّيَ
عِسِرَيِلَ مَنفّيٍ عِِ ٨؛١٦ ٬ ٢٤
1يٍهٌسَقَتِ نَشَ لَاشِرَيَ، عٍ نَشَ عَ رَفَتَ عَ بَبَيٍ سّيتِ مَ دَوُدَ شَ تَا كُي. عَ شَ دِ يٌرَ مِ نَشَ تِ عَ حْشْي رَ. 2يٌرَ مِ شُنيَيٍ نَن يَ، عِسِرَيِلَ مَنفّ يٍهٌسَقَتِ شَ دِيٍ؛ عَسَرَيَ، يّشِيّلِ، سَكَرِ، عَسَرِيَهُ، مِكَيٍلِ، نُن سّقَتَيَ. 3عٍ بَبَ نُ بَرَ هَرِفٍ فبٍفبٍ قِ عٍ مَ، فبٍتِ، شّيمَ، نُن بْشِيٍ عَلْ تَا مَكَنتَشِيٍ يُدَيَ بْشِ مَ. كْنْ عَ نَشَ مَنفّيَ لُ يٌرَ مِ يِ، بَرِ مَ عَ تَن نَن نَ دِ سِنفٍ رَ.
4يٍهٌرَ مِ تٌ تِ عَ بَبَ حْشْي رَ، عَ قَ عَ شَ مَنفّيَ مَبَنبَن، عَ نَشَ عَ شُنيَيٍ بِرِن نُن عِسِرَيِلَ كُنتِفِ ندٍيٍ قَشَ سَنتِدّفّمَ رَ.
5يٍهٌرَ مِ مَنفّيَ سْتْ عَ شَ سِمَيَ حّ تٌنفٌ سَشَن نُن قِرِن نَن مَ، عَ قَ حّ سٌلٌمَسَشَن مَنفّيَ رَبَ دَرِ سَلَمُ. 6عَ نَشَ حّرّ عَلْ عِسِرَيِلَ مَنفّيٍ دَرِشِ عَ رَ كِ نَشّ. عَ نَشَ بِرَ عَشَبِ شَ مِسَالِ قْشْ رَ، بَرِ مَ عَ نُ بَرَ عَشَبِ شَ دِ فِنّ دْشْ. عَ نَشَ قٍيٍ رَبَ نَشٍيٍ مُ رَقَن عَلَتَلَ مَ. 7كْنْ عَلَتَلَ مُ تِن دَوُدَ بْنسْي بَدٍ مَنفّيَ رَ سَاتّ شَ قٍ رَ، عَ نَشَن تٌنفٌ دَوُدَ بّ، عَ قَلَقٍ رَ مَنفّيَ مُ بَمَ عَ تَن نُن عَ شَ دِيٍ يِ رَ عَبَدَن.
8عَ شَ مَنفّيَ كُي، عٍدٌن نَشَ يُدَيَ شَ مَنفّيَ مَتَندِ، عٍ قَ عٍ يّتّ شَ مَنفّ دْشْ. 9يٍهٌرَ مِ نُن عَ شَ سْورِ شُنيِيٍ نَشَ سِفَ سْورِ رَفِسٍيٍ كُي عٍدٌنكَيٍ فٍرٍدٍ. عٍدٌنكَيٍ نَشَ عٍ مَبِلِن كْي رَ، كْنْ يٌرَ مِ نُن عَ شَ سْورِ رَفِسٍيٍ شُنيِيٍ نَشَ نْ عٍ رَ. 10هَن تٌ عٍدٌن مُ تِنشِ لُدٍ يُدَيَ شَ يَامَرِ بُن مَ. لِبِنَ قَن نَشَ عَ شَ مَنفّيَ مَتَندِ. نَ بِرِن يٌرَ مِ لِشِ نّ بَرِ مَ عَ نُ بَرَ عَ بَبَيٍ مَرِفِ عَلَتَلَ رَبٌلٌ.
11يٌرَ مِ نَشَ كُيٍ بَتُدٍيٍ يَءِلَن يُدَيَ فٍيَيٍ قَرِ. عَ نَشَ دَرِ سَلَمُكَيٍ نُن يُدَيَكَيٍ رَتَنتَن نَ يَنقَنتٍيَ رَ. 12عَننَبِ عٍلِ نَشَ كّيدِ رَ سَنبَ عَ مَ نَشَن عَ قَلَشِ، «عِ بَبَ دَوُدَ مَرِفِ عَلَتَلَ شَ مَسٍنيِ نَن يَ؛ عِ تٌ مُ عِ حّرّشِ عِ بَبَ يٍهٌسَقَتِ نُن يُدَيَ مَنفّ عَسَ شَ كِرَ شْن مَ، 13عِ عِ حّرّشِ عِسِرَيِلَ مَنفّيٍ نَن مَ كِرَ شْن، عِ يُدَيَكَيٍ نُن دَرِ سَلَمُكَيٍ رَتَنتَن عَلَ رَبٌلٌقٍ رَ عَلْ عَشَبِ بْنسْي عَ رَبَشِ كِ نَشّ، عِ حَن مَن قَ عِ شُنيَ قَقَشَكٍرٍنيِيٍ قَشَ نَشٍيٍ نُ قِسَ عِ تَن بّ، 14عَلَتَلَ قَمَ نّ قُرٍ حَاشِ رَ عِ شَ حَمَ مَ، عَ نُن عِ شَ دِيٍ، عِ شَ فِنّيٍ، عِ شَ شُرُ سٍيٍ، 15عَ نُن عِ تَن مَ. نَ قُرٍ حَاشِ شُنمَسَمَ نّ لْشْ يٌ لْشْ عِ قُرِ كُي هَن عَ بُلَ.»
16قِلِسِتَكَيٍ نُن عَرَبُيٍ نَشٍيٍ نُ سَبَتِشِ كُسِكَيٍ قّ مَ، عَلَتَلَ نَشَ نٍيٍ رَكٍلِ يٍهٌرَ مِ فٍرٍ شِلِ مَ. 17عٍ نَشَ سِفَ يُدَيَ، عٍ قَ مَنفّ هَرِفٍ بِرِن تٌنفٌ، عَ شَ دِيٍ نُن عَ شَ فِنّيٍ. عٍ نَشَ عَ شَ دِ لَنمَ يٍهٌوَشَسِ فبَنسَن لُ نَ.
18نَ فٍرٍ دَنفِ شَنبِ، عَلَتَلَ نَشَ يٌرَ مِ قُرَ عَ قُرِ مَ، قُرٍ رَ، نَشَن مُ يَلَنمَ. 19نَ تْورّ شُن نُ قَ مَسَ لْشْ يٌ لْشْ حّ قِرِن بُن مَ، هَن يٌرَ مِ قُرِ نَشَ بُلَ، عَ قَشَ تْورّ حَاشِ كُي. عَ شَ حَمَ مُ سُرَيِ فَن عَ بّ بِنيّ دَاشِ رَ عَلْ عٍ عَ رَبَشِ عَ بَبَيٍ بّ كِ نَشّ.
20عَ مَنفّيَ سْتْ عَ حّ تٌنفٌ سَشَن نُن قِرِن نَن مَ، عَ قَ حّ سٌلٌمَسَشَن مَنفّيَ رَبَ دَرِ سَلَمُ. عَ تٌ قَشَ، مِشِ يٌ مُ كِنِكِنِ عَ مَ. عٍ نَشَ عَ رَفَتَ دَوُدَ شَ تَا كُي، كْنْ عٍ مُ تِن عَ سَدٍ مَنفّيٍ شَ فَبُرِيٍ يِرٍ.