AKS

عَننَبِ دَنِيّلِ 4

1«ﭑ تَن نٍبُكَدَنسَرِ، ﭑ نُ نَ ﭑ مَ مَنفّ بَنشِ كُي، ﭑ بْحّ سَشِ، ﭑ سّيوَشِ كِ قَنيِ. 2ﭑ نَشَ شِيٍ مَفَاشُشِ ندٍ سَ. ﭑ نَشَن مَحْشُنشِ، عَ نُن ﭑ لَامَتُنيِ نَشَن تٌشِ ﭑ مَ سَدٍ مَ، نٍيٍ بَرَ ﭑ نَفَاشُ كِ قَنيِ. 3ﭑ يَامَرِ قِ بَبِلْن لْننِلَيٍ مَ نَ نَن مَ عٍ شَ قَ ﭑ يِرٍ، عَلَكٌ عٍ شَ ﭑ مَ شِيٍ تَفِرَبَ ﭑ بّ.»

4«كَرَ مْشْييٍ، سٍمَتٌي، بَبِلْن سّرّشّدُبّيٍ، نُن مَندُرُلَيٍ نَشَ قَ. ﭑ نَشَ ﭑ مَ شِيٍ يَبَ عٍ بّ، كْنْ عٍ مُ نْ نَ تَفِرَبَدٍ. 5دَنِيّلِ نَشَ قَ ﭑ يِرٍ عَ دْنشْي رَ، ﭑ مَ كُيٍ بٍلٍتٍسَسَرِ شِلِ سَشِ نَشَن شُن مَ. عَلَ سّنِيّنشِيٍ شَشِلِ نَ عَ بّ. ﭑ نَشَ ﭑ مَ شِيٍ مَدْشْ عَ بّ.»

6«بٍلٍتٍسَسَرِ، كَرَ مْشْييٍ شُنيِ، ﭑ عَ كٌلٌن عَلَ سّنِيّنشِيٍ شَشِلِ نَ عِ بّ. فُندٌ مُ نَ نَشَن كٌلٌنقٍ شْرْشْمَ عِ بّ. عَوَ، عِ شَ ﭑ مَ لَامَتُنيِيٍ تَفِرَبَ ﭑ بّ، ﭑ نَشٍيٍ تٌشِ شِيٍ كُي. 7ﭑ نُ نَ ﭑ مَ سَدٍ مَ تّمُي نَشّ، ﭑ شَشِلِ نَشَ يِ لَامَتُنيِيٍ تٌ؛

وُرِ بِلِ عِتٍشِ نُ تِشِ بْشِ مَ،

8عَ بٍلٍبٍلٍ، عَ سّنبّ فبٌ.

عَ شُنيِ نُ نَ كٌورٍ مَ،

دُنِحَ مِشِ بِرِن نُ نْمَ عَ تٌدٍ.

9عَ بُرّشّ نُ تٌقَن،

عَ بٌفِ نُ وُيَ،

عَ نُ مِشِ بِرِن بَلٌمَ.

وُلَ سُبٍيٍ نُ عٍ مَلَبُمَ عَ نِينِ بُن مَ،

شْنِيٍ نُ عٍ تّي يَءِلَنمَ عَ سَلٌنيِيٍ مَ.

دَالِسٍ بِرِن نُ بَلٌي سْتْمَ عَ رَ.»

10«ﭑ نُ نَ ﭑ مَ سَدٍ مَ تّمُي نَشّ، ﭑ شَشِلِ نَشَ يِ لَامَتُنيِيٍ تٌ؛

سّنِيّنتْي ندٍ نَشَ كٍلِ كٌورٍ مَ،

11عَ قَ عَ قَلَ عَ شُي عِتٍشِ رَ،

‹وٌ يِ وُرِ رَبِرَ،

وٌ شَ عَ سَلٌنيِيٍ سّفّ،

وٌ شَ عَ بُرّشّ بَ عَ مَ،

وٌ شَ عَ بٌفِيٍ رَيٍنسٍن.

سُبٍ نَشٍيٍ نَ عَ بُن، عٍ شَ عٍ فِ،

شْنِ نَشٍيٍ نَ عَ سَلٌنيِيٍ مَ، عٍ شَ كٍلِ نَا.

12كْنْ وٌ شَ عَ بِلِ شُنتُنيِ نُن عَ سَنكٍيٍ لُ بْشِ،

عٍ شِرِشِ يْلْنشْنيِ وُرٍ دَاشِ نُن يْشُي دَاشِ رَ.

عَ شَ لُ شّ مَ حٌوفٍ شْورَ،

شِنِ شَ عَ بُندَ،

عَ شَ عَ بَلٌ حٌوفٍ رَ عَلْ سُبٍيٍ.

13عَدَ مَ شَشِلِ نَشَن نَ عَ بّ،

نَ مَسَرَ مَ نّ، سُبٍ شَشِلِ لُ عَ بّ.

عَ لُمَ نَ كِ نّ حّ سٌلٌقٍرٍ بُن مَ.

14سّنِيّنتْي نَشٍيٍ مِشِ كَنتَمَ،

نٍيٍ نَن يِ نَتّ مَسٍنشِ،

عَلَكٌ عَدَ مَ بِرِن شَ عَ كٌلٌن

عَ عَلَ شُنفبٍ نَن مَنفّيَيٍ يَمَرِ مَ.

عَ مَنفّيَ سٌمَ مِشِ يِ رَ عَ وَ مَ نَشَن شْن مَ،

هَلِ نَ مِشِ شُرُن بِرِن بّ.›»

15«ﭑ تَن، مَنفّ نٍبُكَدَنسَرِ، ﭑ مَ شِيٍ نَن يَ. عِ تَن بٍلٍتٍسَسَرِ، عِ شَ نَ تَفِرَبَ ﭑ بّ، بَرِ مَ لْننِلَ يٌ مُ نَ ﭑ مَ بْشِ مَ نَشَن نْمَ نَ رَبَدٍ. عِ تَن نَن فبَنسَن نْمَ نَ رَبَدٍ، بَرِ مَ عَلَ سّنِيّنشِيٍ شَشِلِ نَ عِ بّ.»

16نَ تّمُي دَنِيّلِ، نَشَن شِلِ بٍلٍتٍسَسَرِ، عَ نَشَ كَابَ، عَ مَن نَشَ فَاشُ. مَنفّ نَشَ عَ قَلَ عَ بّ، «بٍلٍتٍسَسَرِ، هَلِ عِ مُ فَاشُ يِ شِيٍ نُن عَ كُي عِقٍ يَ رَ.» بٍلٍتٍسَسَرِ نَشَ عَ يَابِ، «ﭑ مَرِفِ، هَلِ يِ شِيٍ نُن عَ كُي عِقٍ قِندِ عِ يَشُييٍ فبٍ رَ نُ! 17نَ وُرِ بِلِ عِ نَشَن تٌشِ، نَشَن شُنفبٌ، عَ سّنبّ فبٌ، عَ شُنيِ كٌورٍ لِمَ، عَ تٌمَ دُنِحَ يِرٍ بِرِن مَ، 18عَ بُرّشّيٍ تٌقَن، عَ بٌفِيٍ وُيَ، عَ بِرِن رَبَلٌمَ، سُبٍيٍ نَ نَشَن بُن مَ، شْنِيٍ نَ نَشَن سَلٌنيِيٍ كْن نَ، 19عِ تَن نَن مِسَالِشِ نَ وُرِ رَ. عِ بَرَ سّنبّ فبٍفبٍ سْتْ، عِ شَ نْي بَرَ فبٌ هَن عَ بَرَ كٌورٍ لِ، عِ شَ مَنفّيَ قَن بَرَ دُنِحَ يِرٍ بِرِن لِ. 20عِ تَن مَنفّ، عِ بَرَ سّنِيّنتْي تٌ، عَ كٍلِمَ كٌورٍ مَ، عَ عَ قَلَمَ، ‹وٌ يِ وُرِ رَبِرَ، وٌ شَ عَ كَنَ، كْنْ وٌ عَ بِلِ شُنتُنيِ نُن عَ سَنكٍيٍ لُ بْشِ. وٌ عَ شِرِ يْلْنشْنيِ وُرٍ دَاشِ نُن يْشُي دَاشِ رَ. عَ شَ لُ شّ مَ حٌوفٍ شْورَ. شِنِ شَ عَ بُندَ. عَ شَ حٌوفٍ دٌن عَلْ سُبٍيٍ حّ سٌلٌقٍرٍ بُن مَ.›»

21«مَنفّ، ﭑ شَ نَ تَفِرَبَ عِ بّ. عَلَ شُنفبٍ بَرَ يِ نَتّ تٌنفٌ عِ شَ قٍ رَ. 22عِ كٍرِ مَ نّ عَدَ مَدِيٍ تَفِ، عِ سَ لُ وُلَءِ سُبٍيٍ يَ مَ. عِ حٌوفٍ مَشِن عَلْ نِنفٍيٍ، شِنِ عِ بُندَ. عِ لُمَ نَ كِ نّ حّ سٌلٌقٍرٍ بُن مَ، هَن عِ شَ عَ كٌلٌن عَ عَلَ شُنفبٍ نَن عَدَ مَدِيٍ شَ مَنفّيَيٍ يَمَرِ مَ. عَ مَنفّيَ قِمَ عَ كّنّن مِشِ نَن مَ. 23وُرِ بِلِ شُنتُنيِ نُن عَ سَنكٍيٍ لُقٍ بْشِ مَ، نَ عَ مَسٍنشِ نّ عِ بّ، عَ عِ شَ مَنفّيَ رَفبِلٍنمَ نّ عِ مَ. كْنْ نَ مُ رَبَمَ هَن عِ عَ كٌلٌن عَ كٌورٍ كَنيِ نَن قٍ بِرِن يَمَرِ مَ. 24نَ نَن عَ رَ مَنفّ، عِ شَ تِن ﭑ مَ مَرَ سِ رَ. عِ شَ بَ يُنُبِ رَبَقٍ. عِ شَ تِنشِن. عِ شَ كِنِكِنِ مِسِكِينّيٍ مَ، عَلَكٌ عِ شَ بُ بْحّسَ كُي.»

25نَ قٍ بِرِن نَشَ كَمَلِ مَنفّ نٍبُكَدَنسَرِ بّ. 26كِكٍ قُ نُن قِرِن تٌ دَنفِ، مَنفّ نُ نَ عَ مَحّرّقٍ عَ شَ بَنشِ كُي بَبِلْن، 27عَ نَشَ عَ قَلَ، «بَبِلْن سّنبّ فبٌ دٍ! ﭑ تَن نَن عَ تِشِ مَنفّ يِفِيَدٍ رَ ﭑ يّتّ سّنبّ شُنفبٍ رَ، عَلَكٌ ﭑ مَ بِنيّ نُن ﭑ مَ نْرّ شَ فبٌ.» 28عَ قّقّ نَ وْيّنيِ قَلَ، شُي ندٍ نَشَ كٍلِ كٌورٍ، «مَنفّ نٍبُكَدَنسَرِ، ﭑ شَ عَ قَلَ عِ بّ، تٌ ﭑ بَرَ عِ شَ مَنفّيَ بَ عِ يِ رَ. 29عِ كٍرِ مَ نّ مِشِيٍ تَفِ، عِ سَ لُ وُلَءِ سُبٍيٍ يَ مَ. عِ قَمَ حٌوفٍ نَن دٌندٍ عَلْ نِنفٍيٍ حّ سٌلٌقٍرٍ بُن مَ هَن عِ عَ كٌلٌن عَ عَلَ شُنفبٍ نَن عَدَ مَدِيٍ شَ مَنفّيَيٍ يَمَرِ مَ. عَ مَنفّيَ سٌمَ مِشِيٍ نَن يِ رَ عَ وَ مَ نَشٍيٍ شْن.»

30نَ وْيّنيِ نَشَ كَمَلِ مَنفّ نٍبُكَدَنسَرِ مَ كٍرٍن نَ. عَ نَشَ كٍرِ مِشِيٍ يَ مَ، عَ حٌوفٍ دٌن عَلْ نِنفٍيٍ. شِنِ نَشَ عَ قَتٍ بُندَ، عَ شُنسّشّ نَشَ كُيَ عَلْ سّفّ شَبٍيٍ، عَ سَنشَلٍيٍ قَن نَشَ كُيَ عَلْ شْنِ سَنشَلٍيٍ.

31«نَ وَشَتِ تٌ حْن، ﭑ تَن نٍبُكَدَنسَرِ، ﭑ نَشَ ﭑ يَ رَتٍ كٌورٍ مَ، ﭑ شَشِلِ نَشَ فبِلٍن ﭑ مَ. ﭑ نَشَ تَنتُي رَ سِفَ عَلَ شُنفبٍ مَ، ﭑ نَشَ عَ مَتْشْ، ﭑ نَشَ عَ بِنيَ، بَرِ مَ عَلَ نَ نَ تّمُي بِرِن، عَ شَ مَنفّيَ مُ حْنمَ عَبَدَن، عَ شَ يَامَرِ بُمَ نّ وَشَتِ بِرِن. 32عَلَ عَ يّتّ وَشْنقٍ رَبَمَ نّ دُنِحَ مَ هَلِ عَدَ مَ مُ تِن نَ رَ. عَ وَ مَ نَشَن شْن، عَ نَ نَن نَبَمَ عَدَ مَ نُن مَلٍكّيٍ رَ. مِشِ يٌ مُ نْمَ عَ مَتَندِدٍ، عَ قَ عَ قَلَ، ‹عِ نَ مُنسٍ رَبَقٍ؟› 33ﭑ شَشِلِ تٌ فبِلٍن ﭑ مَ، ﭑ مَ مَنفّيَ بِنيّ نُن نْرّ قَن نَشَ فبِلٍن ﭑ مَ. ﭑ نَسِمَيٍ نُن ﭑ مَ مِشِ شُنفبٍيٍ نَشَ ﭑ شِلِ، عٍ ﭑ دْشْ ﭑ مَ مَنفّ كِبَنيِ كُي. ﭑ سّنبّ نَشَ فبٌ دَنفِ عَ سِنفٍ رَ. 34يَكْسِ، ﭑ تَن نٍبُكَدَنسَرِ، ﭑ كٌورٍ مَنفّ تَنتُمَ نّ، ﭑ عَ مَتْشْ، ﭑ عَ بِنيَ. عَ شَ كّوَلِ بِرِن تِنشِن، عَ شَ كِرَيٍ بِرِن قِندِشِ نْندِ نَن نَ. عَ تَن نَن مِشِ شَ قٍ مَفٌرٌ مَ، نَشَن عَ يّتّ عِفبٌمَ.»