AKS

يّتّ سْتْي 32

نِنفٍ كُيٍ شّيمَ دَاشِ

1عِسِرَيِلَكَيٍ تٌ عَ تٌ، مُنسَ بَرَ بُ فٍيَ قَرِ، حَمَ نَشَ عٍ مَلَن هَرُنَ يِرٍ، عٍ قَ عَ قَلَ عَ بّ، «عِ شَ كُيٍ يَءِلَن نَشَن تِمَ مُشُ يَ رَ. مُنسَ نَشَن مُشُ رَ مِنِشِ مِسِرَ بْشِ رَ، مُشُ مُ عَ كٌلٌن قٍ نَشَن عَ سْتْشِ فٍيَ قَرِ.» 2هَرُنَ نَشَ عٍ يَابِ، «لَنفَ شّيمَ دَاشِ نَشَن بِرِن نَ وٌ شَ فِنّيٍ نُن وٌ شَ دِيٍ تُلِيٍ رَ، وٌ قَ عٍ بِرِن نَ ﭑ شْن مَ.» 3عِسِرَيِلَ حَمَ بِرِن نَشَ عٍ شَ لَنفَ شّيمَ دَاشِيٍ بَ عٍ تُلِيٍ رَ، عٍ قَ عٍ سٌ هَرُنَ يِ رَ. 4هَرُنَ نَشَ نَ شّيمَ رَشُنُ، عَ نِنفٍ كُيٍ دَاشِ يَءِلَن عَ رَ. عَ تٌ فّ نَ رَ، عٍ نَشَ عَ قَلَ عٍ شُي عِتٍشِ رَ، «عِسِرَيِلَكَيٍ، وٌن مَ عَلَ نَن يَ نَشَن وٌن نَمِنِشِ مِسِرَ بْشِ كُي.» 5هَرُنَ تٌ نَ تٌ، عَ نَشَ سّرّشّبَدٍ يَءِلَن نَ نِنفٍ كُيٍ دَاشِ يَ رَ، عَ قَ عَ قَلَ عَ شُي عِتٍشِ رَ، «تِنَ، شُلُنيِ تِمَ نّ عَلَتَلَ بّ.» 6نَ كُيٍ عِبَ، عٍ نَشَ كٍلِ سُبَشّ مَ، عٍ سّرّشّ فَن دَاشِ نُن شَنُنتٍيَ سّرّشّ بَ. مِشِيٍ نَشَ عٍ دّفٍ، عٍ مِنسٍيٍ مِن، عٍ قَ عٍ وَشْنقٍ رَبَ.

7نَ تّمُي عَلَتَلَ نَشَ عَ مَسٍن مُنسَ بّ، «عِ شَ فٌرٌ حَمَ يِرٍ، بَرِ مَ عِ نَشٍيٍ نَمِنِ مِسِرَ بْشِ كُي، عٍ بَرَ قٍ كَنَ عَ حَاشِ رَ. 8عٍ بَرَ ﭑ مَ كِرَ بّحِن يِ عِكْرّشِ رَ، عٍ بَرَ نِنفٍ كُيٍ دَاشِ يَءِلَن وُرٍ رَشُنُشِ رَ، عٍ نَ بَتُ، عٍ سّرّشّيٍ بَ عَ بّ، عٍ عَ قَلَ، ‹عِسِرَيِلَكَيٍ، وٌن مَ عَلَ نَن يَ نَشَن وٌن نَمِنِشِ مِسِرَ بْشِ كُي.› 9ﭑ تَن عَلَتَلَ ﭑ شَ عَ مَسٍن عِ بّ، يِ حَمَ، حَمَ شُرُتَرٍ نَ عَ رَ. 10وٌن نَشَن نَبَمَ، عَ لُ ﭑ شَ عٍ سْنتْ ﭑ مَ شْنّ كُي، كْنْ عِ تَن، عِ شَ مَكُيَ عٍ رَ، ﭑ شَ عِ قِندِ سِ شُنفبٍ رَ.»

11نَ كُي مُنسَ نَشَ عَلَتَلَ مَشَندِ، «عَلَتَلَ، مُنقٍ رَ عِ وَ مَ شْنْقٍ عِ شَ حَمَ مَ، عِ سّنبّ نَشَن نَمِنِشِ مِسِرَ بْشِ رَ؟ 12شَ عِ نَ رَبَ، مِسِرَكَيٍ قَمَ عَ قَلَدٍ عَ عِ يِ حَمَ رَ مِنِشِ مِسِرَ بْشِ كُي نّ عَلَكٌ عِ شَ عٍ قَشَ فٍيَيٍ قَرِ، عٍ شَ قٍ شَ حْن دُنِحَ. ﭑ بَرَ عِ مَشَندِ، عِ بْحّ مَفٌرٌ، ﭑ مَرِفِ. عِ نَشَ يِ حَمَ سْنتْ. 13عِ رَتُ عِ شَ كٌنيِيٍ عِبُرَهِمَ، عِسِيَفَ، نُن عِسِرَيِلَ مَ، عِ كَلِشِ نَشٍيٍ رَ، عَ قَلَقٍ رَ، ‹ﭑ وٌ بْنسْي رَوُيَمَ نّ عَلْ تُنبُي نَشٍيٍ نَ كٌورٍ مَ. ﭑ بْشِ قِمَ وٌ بْنسْي مَ كّ رَ نَشَن مُ بَمَ وٌ يِ رَ عَبَدَن.›» 14نَ تّمُي عَلَتَلَ بْحّ نَشَ فٌرٌ، عَ مُ عَ شَ حَمَ سْنتْ سْنْن.

15مُنسَ نَشَ فٌرٌ فٍيَ قَرِ نَ سٍيدٍ وَلَشّ قِرِنيِيٍ سُشُشِ عَ يِ رَ، سّبّلِ تِشِ نٍيٍ سّيتِ قِرِنيِ مَ. 16عَلَ نَن نَ وَلَشّيٍ يَءِلَن، عَ سّبّلِ مَسٌلِ عٍ مَ.

17يٌسُوٍ تٌ حَمَ شُي عِتٍشِ مّ، عَ نَشَ عَ قَلَ مُنسَ بّ، «ﭑ شُي ندٍ مّمَ حَمَ يِرٍ نَشَن لُشِ عَلْ فٍرٍ سٌ شُي.» 18مُنسَ نَشَ عَ يَابِ، «فٍرٍ فٍينِقٍ شُي مُ يَ، فٍرٍ لْو سِقٍ شُي قَن مُ عَ رَ. ﭑ شُلُنيِ شُي نَن مّمَ.»

19عٍ تٌ مَكْرّ حَمَ رَ، مُنسَ نَشَ مِشِيٍ تٌ قَرٍ بٌرٌن نَ كُيٍ يِرٍ. عَ بْحّ نَشَ تٍ هَن عَ قَ وَلَشّيٍ وٌلِ بْشِ مَ فٍيَ سَنبُنيِ، عٍ نَشَ كَنَ. 20عَ نَشَ عٍ شَ نِنفٍ كُيٍ دَاشِ وٌلِ تّ شْورَ، عَ فَن هَن عَ قِندِ شُبٍ رَ. عَ نَشَ نَ تّ شُبٍ سَ يٍ شْورَ، عَ نَ قِ عِسِرَيِلَكَيٍ مَ، عٍ شَ عَ مِن. 21عَ نَشَ قَ هَرُنَ مَشْرِن، «يِ حَمَ مُنسٍ رَبَشِ عِ رَ، نَشَن عَ نِيَشِ عِ شَ عٍ تِ يِ يُنُبِ شُنفبٍ رَ؟» 22هَرُنَ نَشَ عَ يَابِ، «ﭑ مَرِفِ، عِ نَشَ شْنْ ﭑ مَ! عِ عَ كٌلٌن يِ حَمَ بِرَ مَ قٍ كٌبِ قْشْ رَ كِ نَشّ. 23عٍ تَن نَن عَ قَلَشِ ﭑ بّ، ‹عِ شَ كُيٍ يَءِلَن نَشَن تِمَ مُشُ يَ رَ. مُنسَ نَشَن مُشُ رَ مِنِشِ مِسِرَ بْشِ رَ، مُشُ مُ عَ كٌلٌن قٍ نَشَن عَ سْتْشِ فٍيَ قَرِ.› 24ﭑ نَشَ عَ قَلَ عٍ بّ، ‹وٌ شَ قَ وٌ شَ شّيمَ رَ.› عٍ تٌ قَ نَ شّيمَ رَ، ﭑ نَشَ عَ وٌلِ تّ شْورَ، يِ نِنفٍ كُيٍ دَاشِ قَ مِنِ.»

25مُنسَ نَشَ عَ كٌلٌن هَرُنَ حَمَ لُشِ نّ عٍ شَ عٍ وَشْنقٍ رَبَ. نَ نُ وَ مَ قِندِقٍ يَافِ رَ عِسِرَيِلَكَيٍ بّ عٍ يَشُييٍ مَبِرِ. 26مُنسَ نَشَ سَ تِ عٍ شَ يٌنكِندٍ سٌدٍ دّ رَ، عَ قَ عَ قَلَ عَ شُي عِتٍشِ رَ، «نَشٍيٍ نَ عَلَتَلَ بّ، وٌ شَ قَ ﭑ يِرٍ.» لٍوِ بْنسْي بِرِن نَشَ عٍ مَلَن مُنسَ شَنبِ رَ. 27عَ نَشَ عَ قَلَ عٍ بّ، «عِسِرَيِلَ مَرِفِ عَلَتَلَ بَرَ وٌ يَمَرِ وٌ بِرِن شَ وٌ شَ سَنتِدّفّمَ تٌنفٌ، وٌ قَ وٌ نفَشَكٍرٍنيِ بِرِن قَشَ، عَ نُن وٌ بٌورٍيٍ نُن وٌ دْشْبٌورٍيٍ نَشٍيٍ بَرَ لُ يِ قٍ كُي.» 28نَ لْشْي لٍوِ بْنسْي نَشَ مُنسَ شَ يَامَرِ سُشُ، عٍ قَ عِسِرَيِلَكَ مِشِ وُلُ سَشَن قَشَ. 29مُنسَ نَشَ عَ قَلَ عٍ بّ، «تٌ وٌ بَرَ عَلَتَلَ وَشْنقٍ رَبَ وٌ نفَشَكٍرٍنيِيٍ قَشَقٍ. عَلَ شَ بَرَكَ سَ وٌ شَ قٍ مَ.»

30نَ كُيٍ عِبَ، مُنسَ نَشَ عَ قَلَ حَمَ بّ، «وٌ بَرَ يُنُبِ شُنفبٍ رَبَ. ﭑ شَ فبِلٍن عَلَتَلَ يِرٍ فٍيَ قَرِ، عَلَكٌ ﭑ شَ عَ مَيَندِ وٌ شَ يُنُبِ شَقَرِقٍ رَ.» 31مُنسَ نَشَ سِفَ عَلَتَلَ يِرٍ، عَ عَ قَلَ عَ بّ، «عَلَتَلَ، ﭑ بَرَ عِ مَشَندِ يِ حَمَ بّ. عٍ بَرَ يُنُبِ شُنفبٍ رَبَ كُيٍ يَءِلَنقٍ شّيمَ رَ. 32ﭑ بَرَ عِ مَشَندِ، عِ شَ دِحّ عٍ مَ. يَندِ، شَ نَ مُ عَ رَ، عِ شَ ﭑ شِلِ بَ عٍ حْشْي رَ كِسِ كِتَابُي كُي، عِ نَشَن سّبّشِ.» 33عَلَتَلَ نَشَ عَ يَابِ، «عَدٍ، ﭑ مِشِيٍ نَن شِلِ بَمَ ﭑ مَ كِسِ كِتَابُي كُي نَشٍيٍ يُنُبِ رَبَشِ ﭑ نَ. 34يَكْسِ، سِفَ، عِ شَ حَمَ شَنِن ﭑ دّننَشّ مَسٍنشِ عِ بّ. ﭑ مَ مَلٍكّ تِمَ عِ يَ رَ سِندٍن، كْنْ كِيتِ لْشْي نَ قَ، عٍ عٍ شَ يُنُبِيٍ سَرٍ قِمَ نّ.» 35عَلَتَلَ عِسِرَيِلَكَيٍ رَتْن نّ، بَرِ مَ عٍ عَ قَلَ نّ هَرُنَ بّ، عَ شَ نِنفٍ كُيٍ دَاشِ يَءِلَن عٍ بّ شّيمَ رَ.