عِسِرَيِلَ مَنفّ هٌسٍيَ
1يُدَيَ مَنفّ عَشَسِ شَ مَنفّيَ حّ قُ نُن قِرِن ندٍ رَ، عٍلَ شَ دِ هٌسٍيَ نَشَ قِندِ عِسِرَيِلَ مَنفّ رَ سَمَرِ. عَ حّ سٌلٌمَنَانِ مَنفّيَ رَبَ. 2عَ نَشَ قٍ رَبَ نَشَن مُ رَقَن عَلَ مَ، كْنْ عَ مُ لُ عَلْ مَنفّ سِنفٍيٍ، نَشٍيٍ شَ يُنُبِيٍ دَنفِ عَ فبٍ بّ. 3عَسِرِيَ مَنفّ سَلَمَنٍسَرِ تٌ سَ هٌسٍيَ فٍرٍ، عَ عَ لُ عَ شَ نْي بُن مَ، هٌسٍيَ نَشَ تِن دُوتِ قِقٍ رَ عَ مَ. 4كْنْ عَسِرِيَ مَنفّ نَشَ عَ كٌلٌن قَ، عَ هٌسٍيَ نُ وَ مَ عَ مَتَندِقٍ. عَ تٌندِ دُوتِ رَ سَنبَدٍ عَ مَ، عَ مَن شّيرَيٍ شّي مِسِرَ مَنفّ سٌ شْن مَ، مَلِ قٍندٍ عَ رَ. نَ كُي عَسِرِيَ مَنفّ نَشَ هٌسٍيَ سُشُ، عَ عَ رَ سٌ فٍيلِ. 5نَ دَنفِ شَنبِ، عَ نَشَ دِن عِسِرَيِلَ بْشِ بِرِن نَ، عَ سَمَرِ رَبِلِن، حّ سَشَن بُن مَ نَا سُشُشِ عَ يِ رَ. 6هٌسٍيَ شَ مَنفّيَ حّ سٌلٌمَنَانِ ندٍ رَ، عَسِرِيَ مَنفّ نَشَ نْ سَمَرِ تَا رَ، عَ عِسِرَيِلَكَيٍ شَنِن عَسِرِيَ بْشِ مَ كٌنيِيَ كُي. عَ نَشَ عٍ رَ سَبَتِ شَلَ تَا كُي فٌسَن بْشِ مَ شَبٌرٌ شُرٍ دّ رَ، عَ نُن مٍدٍكَيٍ شَ تَايٍ كُي.
عِسِرَيِلَ شَ يُنُبِيٍ
7نَ قٍ بِرِن نَبَ نّ، بَرِ مَ عِسِرَيِلَكَيٍ نُ بَرَ يُنُبِ رَبَ عٍ مَرِفِ عَلَتَلَ رَ، نَشَن عٍ رَ مِنِ مِسِرَ بْشِ رَ قِرَوُنَ شَ نْي بُن مَ. عِسِرَيِلَ نُ بَرَ بِرَ عَلَ فبّتّيٍ قْشْ رَ، 8عٍ نُ عٍ بَتُ عَلْ سِ بٌورٍيٍ عَلَتَلَ نَشٍيٍ كٍرِشِ عٍ يَ رَ. عِسِرَيِلَكَيٍ نُ بَرَ عٍ تُلِ مَتِ عٍ شَ مَنفّيٍ رَ نَ قٍ كُي. 9عِسِرَيِلَكَيٍ نُ بَرَ قٍيٍ رَبَ فُندٌ رَ عٍ مَرِفِ عَلَتَلَ رَ، عٍ مُ لَن عٍ شَ نَشٍيٍ رَبَ. عٍ نُ بَرَ كُيٍ بَتُدٍيٍ يَءِلَن يِرٍ عِتٍشِيٍ عٍ شَ تَايٍ بِرِن كُي، كٍلِ يِرٍ مَكَنتَدٍيٍ مَ هَن تَا مَكَنتَشِيٍ كُي. 10عٍ نَشَ فّمّ مَسٌلِشِيٍ نُن عَسٍرَ كُيٍيٍ تِ فٍيَيٍ كْن نَ، وُرِيٍ بُن مَ. 11مّننِ، عٍ نَشَ سُرَيِ فَن سّرّشّ رَ نَ كُيٍيٍ بّ، عَلْ سِيٍ نُ عَ رَبَمَ كِ نَشّ، عَلَتَلَ نَشٍيٍ كٍرِ عٍ يَ رَ. عٍ نَشَ عَلَتَلَ مَتَندِ عٍ شَ نَ قٍ حَاشِيٍ رَ. 12عٍ نُ كُيٍيٍ بَتُمَ، هَلِ عَلَتَلَ تٌ بَرَ نُ تْنيِ دْشْ نَ قٍ مَ، عَ قَلَقٍ رَ، «وٌ نَشَ نَ مْولِ رَبَ.» 13عَلَتَلَ نُ بَرَ عِسِرَيِلَ نُن يُدَيَ رَكٌلٌن نَ بِرِن نَ عَ شَ نَمِحْنمّيٍ سَابُي رَ. عَ نُ بَرَ عَ قَلَ، «وٌ شَ فبِلٍن وٌ شَ وَلِ كٌبِيٍ قْشْ رَ. وٌ شَ بِرَ ﭑ مَ يَامَرِيٍ نُن ﭑ مَ تْنيِيٍ قْشْ رَ، عَلْ ﭑ مَ سّرِيّ عَ مَسٍنشِ كِ نَشّ، ﭑ نَشَن يَمَرِ وٌ بٍنبَيٍ رَ ﭑ مَ كٌنيِ نَمِحْنمّيٍ سَابُي رَ.»
14كْنْ عٍ مُ عٍ تُلِ مَتِ عَلَتَلَ رَ. عٍ نَشَ عٍ بْحّ رَشْرْشْ، عَلْ عٍ بٍنبَيٍ نَشٍيٍ مُ دَنشَنِيَ عٍ مَرِفِ عَلَتَلَ مَ. 15عٍ نَشَ عَلَتَلَ شَ يَامَرِيٍ مَتَندِ، عٍ عَ شَ سَاتّ كَنَ نَشَن نُ شِرِشِ عَلَ نُن عٍ بٍنبَيٍ تَفِ. عٍ نَشَ بِرَ قٍ قُقَقُ قْشْ رَ، عٍ عٍ يّتّ قِندِ قُيَنتٍيٍ رَ. عٍ نَشَ بِرَ سِيٍ شَ نَامُنيِيٍ قْشْ رَ، نَشٍيٍ عٍ رَبِلِنشِ، عَلَتَلَ تْنيِ دْشْ نَشٍيٍ مَ. 16عٍ نَشَ عٍ مَرِفِ عَلَتَلَ شَ يَامَرِيٍ بِرِن مَتَندِ. عٍ نَشَ نِنفٍ وُرٍ دَاشِ قِرِن يَءِلَن كُيٍيٍ رَ، عٍ نَشَ عَسٍرَ كُيٍ مَسٌلِ وُرِ رَ، عٍ نَشَ سُيِدِ تُنبُييٍ بّ، عٍ نَشَ بَلِ كُيٍ بَتُ. 17عٍ نَشَ عٍ شَ دِ شّمّيٍ نُن عٍ شَ دِ فِنّيٍ بَ سّرّشّ فَن دَاشِ رَ. عٍ نَشَ بِرَ دُورٍيَ نُن سٍمَتٌقٍ قْشْ رَ. عٍ نَشَ عٍ يّتّ قِ عَلَ فبّتّيٍ مَ، عٍ قٍ رَبَ نَشَن مُ رَقَن عَلَتَلَ مَ.
18نَ نَن عَ نِيَ عَلَتَلَ نَشَ شْنْ عِسِرَيِلَ بْنسْي مَ، عَ قَ عٍ مَكُيَ عَ يَ تٌدٍ رَ. يُدَ بْنسْي كٍرٍن نَن لُ قَ. 19هَلِ يُدَ بْنسْي، عٍ مُ نُ بِرَ مَ عٍ مَرِفِ عَلَتَلَ شَ يَامَرِيٍ قْشْ رَ عَ رَبَ كِ مَ. عٍ قَن نَشَ بِرَ عِسِرَيِلَ شَ مِسَالِ قْشْ رَ. 20عَلَتَلَ نَشَ مّي عِسِرَيِلَ بْنسْي بِرِن نَ، عَ نَشَ عٍ حَشَنكَتَ، عَ عٍ رَبٌلٌ عَ شُننَكَنَمَيٍ بّلّشّ عِ، عَ عٍ كٍرِ عَ يَ تٌدٍ رَ. 21عَ تٌ عِسِرَيِلَ بَ دَوُدَ بْنسْي رَ، عَ نَشَ عٍ لُ نٍبَتِ شَ دِ يٍرٌبٌوَ مِ شَ مَنفّيَ بُن مَ، نَشَن بَرَ عٍ رَفبِلٍن عَلَتَلَ قْشْ رَ عَ شَ يُنُبِ شُنفبٍ سَابُي رَ. 22عِسِرَيِلَكَيٍ نَشَ بِرَ يٍرٌبٌوَ مِ شَ يُنُبِيٍ بِرِن قْشْ رَ. عٍ مُ عٍ مَكُيَ نٍيٍ رَ، 23هَن عَلَتَلَ نَشَ عِسِرَيِلَ مَكُيَ عَ يَ تٌدٍ رَ، عَلْ عَ عَ مَسٍن عَ شَ كٌنيِ نَمِحْنمّيٍ بّ كِ نَشّ. نَ كُي عِسِرَيِلَكَيٍ نَشَ مَكُيَ عٍ شَ بْشِ رَ، عٍ سَ لُ عَسِرِيَ بْشِ مَ هَن تٌ.
سَمَرِكَيٍ
24عَسِرِيَ مَنفّ نَشَ قَ مِشِيٍ رَ كٍلِ بَبِلْن، كُتَ، عَوِ، شَمَتَ، نُن سٍقَرَوَيِمِ، عَ قَ نٍيٍ لُ سَمَرِ تَايٍ كُي عِسِرَيِلَكَيٍ حْشْي رَ. نَ كُي عٍ نَشَ سَمَرِ قِندِ عٍ فبٍ رَ، عٍ سَبَتِ نَا. 25نٍيٍ تٌ مُ نُ فَاشُمَ عَلَتَلَ يَ رَ، عَلَتَلَ نَشَ يّتّيٍ رَدِن عٍ مَ، عٍ نُ عٍ قَشَ. 26عٍ نَشَ عَ قَلَ عَسِرِيَ مَنفّ بّ، «عِ مِشِ نَشٍيٍ شَنِنشِ عٍ شَ سَبَتِ سَمَرِ بْشِ مَ، نٍيٍ مُ مّننِ عَلَيٍ بَتُ كِ كٌلٌن. نَا عَلَيٍ بَرَ يّتّيٍ رَدِن عٍ مَ عٍ عٍ قَشَ عَ كٌلٌنتَرٍيَ مَ.» 27عَسِرِيَ مَنفّ نَشَ يِ يَامَرِ قِ، «سّرّشّدُبّ ندٍ شَ سَبَتِ نَ بْشِ مَ، عَ شَ عٍ شَرَن نَ بْشِ عَلَيٍ بَتُ كِ رَ.» 28سّرّشّدُبّ كٍرٍن، نَشَن نُ بَرَ شَنِن عَسِرِيَ بْشِ مَ، نَ نَشَ سِفَ بٍتٍلِ تَا كُي سَمَرِ بْشِ مَ، عَ مّننِكَيٍ شَرَن عَلَتَلَ يَرَفَاشُي رَ.
29كْنْ نَ سِيٍ، كَنكَن نُ عَ فبٍ عَلَيٍ تِمَ نَ كُيٍ بَنشِيٍ كُي، سَمَرِكَيٍ نُ بَرَ نَشٍيٍ تِ عٍ شَ تَايٍ كُي نُن يِرٍ عِتٍشِيٍ قَرِ. 30بَبِلْنكَيٍ نَشَ سُكْتِ بّنْتِ كُيٍ تِ. كُتَكَيٍ نَشَ نٍرِفَلِ كُيٍ تِ. شَمَتَكَيٍ نَشَ عَسِمَ كُيٍ تِ. 31عَوِكَيٍ نَشَ نِبَهَسِ نُن تَرِتَكِ كُيٍ تِ. سٍقَرَوَيِمِكَيٍ تَن نُ لُمَ عٍ شَ دِيٍ نَن بَ رَ سّرّشّ فَن دَاشِ رَ عٍ شَ كُيٍيٍ، عَدَرَ مٍلٍكِ نُن عَنَمٍلٍكِ بّ. 32نَ سِيٍ تٌ نُ فَاشُمَ عَلَتَلَ قَن يَ رَ، عٍ نُ مِشِ مْولِ نَن بِرِن تِمَ عَلَتَلَ شَ سّرّشّدُبّيٍ رَ، نٍيٍ شَ نُ سّرّشّيٍ بَ عٍ بّ نَ يِرٍ عِتٍشِيٍ قَرِ. 33نَ كُي، عٍ نُ عَلَتَلَ بَتُمَ، كْنْ عٍ مَن نُ عٍ فبٍ كُيٍ قَن بَتُمَ عٍ فبٍ كِ مَ.
34هَن تٌ عٍ بِرَ مَ نَ نَامُن قٌرِيٍ قْشْ رَ، عٍ مُ فَاشُمَ عَلَتَلَ يَ رَ. عٍ مُ نُ عٍ يّتّ شَ نَامُنيِيٍ رَكَمَلِمَ، عٍ مَن مُ نُ عَلَتَلَ شَ سّرِيّ قَن نَكَمَلِمَ، عَ نَشَن سٌ يَشُبَ بْنسْي يِ رَ، عَ نَشَن شِلِ سَ عِسِرَيِلَ. 35عَلَتَلَ نُ بَرَ يِ سَاتّ تٌنفٌ عٍ بّ، عَ عٍ يَمَرِ يِ رَ، «وٌ نَشَ فَاشُ عَلَ فبّتّيٍ يَ رَ، وٌ نَشَ سُيِدِ عٍ بّ، وٌ نَشَ عٍ بَتُ، وٌ نَشَ سّرّشّ يٌ بَ عٍ بّ. 36عَ لَنمَ وٌ شَ فَاشُ عَلَتَلَ نَن كٍرٍن يَ رَ، نَشَن وٌ رَ مِنِشِ مِسِرَ بْشِ مَ عَ سّنبّ شُنفبٍ رَ. وٌ شَ سُيِدِ عَ تَن نَن بّ، وٌ مَن شَ سّرّشّ بَ عَ كٍرٍن نَن بّ. 37وٌ شَ وٌ حْشْ سَ عَ شَ كِرَيَ، عَ شَ سّرِيّ نُن عَ شَ يَامَرِيٍ شْن مَ لْشْي بِرِن، عَ نَشٍيٍ سّبّشِ وٌ بّ. وٌ نَشَ فَاشُ عَلَ فبّتّيٍ يَ رَ. 38وٌ نَشَ نّيمُ ﭑ مَ سَاتّ مَ، وٌ نَشَ فَاشُ عَلَ فبّتّيٍ يَ رَ. 39عَ لَنمَ وٌ شَ فَاشُ وٌ مَرِفِ عَلَتَلَ نَن يَ رَ، بَرِ مَ عَ تَن نَن وٌ بَشِ وٌ يَشُييٍ بِرِن بّلّشّ عِ.»
40كْنْ عٍ مُ عٍ تُلِ مَتِ عَلَتَلَ شُي رَ، عٍ نَشَ بِرَ عٍ شَ نَامُنيِ قٌرِيٍ قْشْ رَ. 41يِ سِيٍ نُ عَلَتَلَ بَتُمَ، عٍ مَن نُ عٍ شَ كُيٍ مَسٌلِشِيٍ قَن بَتُمَ. عٍ شَ دِيٍ نُن نٍيٍ قَن مَ دِيٍ نَ عٍ بٍنبَيٍ شَ كِرَ نَن شْن مَ هَن تٌ.