AKS

عٍبُرُ 4

مَلَبُي دَنشَنِيَتْييٍ بّ

1عَلَ شَ لَايِدِ، عَ نَشَن تٌنفٌ وٌن بّ سٌقٍ عَ شَ مَلَبُدٍ، نَ مُ كَنَشِ. وٌ شَ قٍ بِرِن نَبَ عَلَكٌ سٌقٍ نَ مَلَبُدٍ كُي عَ نَشَ كَنَ وٌ بّ. 2وٌن بَرَ نَ شِبَارُ قَنيِ مّ عَلْ بٌورٍيٍ عَ مّشِ كِ نَشّ، كْنْ عَ مُ سٍسٍ قَنشِ عٍ مَ عٍ شَ دَنشَنِيَتَرٍحَ شَ قٍ رَ. 3كْنْ وٌن تَن نَشٍيٍ بَرَ لَ عَ رَ، وٌن قَمَ نّ سٌدٍ نَ مَلَبُدٍ كُي. عَ سّبّشِ نَ شَ قٍ رَ،

«ﭑ تٌ شْنْ عٍ مَ، ﭑ نَشَ ﭑ كَلِ،

عٍ مُ سٌمَ ﭑ مَ مَلَبُدٍ.»

كْنْ عَلَ شَ وَلِ بَرَ حْن كَبِ دُنِحَ قْلّ، 4بَرِ مَ عَ سّبّشِ كِتَابُي كُي نَ لْشْي سٌلٌقٍرٍ ندٍ شَ قٍ رَ،

«لْشْي سٌلٌقٍرٍ ندٍ عَلَ شَ وَلِ نَشَ كَمَلِ. عَ نَشَ عَ مَلَبُ.»

5عَ مَن سّبّشِ كِتَابُي كُي، «عٍ مُ سٌمَ ﭑ مَ مَلَبُدٍ.»

6عَلَ نُ بَرَ عَ حَنِفٍ مِشِ ندٍيٍ شَ سٌ عَ شَ مَلَبُدٍ كُي، كْنْ نَ مِشِ سِنفٍ نَشٍيٍ نَ شِبَارُ مّشِ، عٍ مُ سٌ عٍ شَ دَنشَنِيَتَرٍحَ شَ قٍ رَ. 7نَ نَن عَ تٌشِ عَلَ بَرَ لْشْي فبّتّ سُفَندِ نَشَن قِندِشِ تٌ رَ. نَ قٍ سِنفٍ تٌ بَرَ دَنفِ عَ شْننَكُيٍ رَ، عَلَ مَن نَشَ عَ مَسٍن دَوُدَ سَابُي رَ،

«شَ وٌ بَرَ عَ شُي رَ مّ تٌ،

وٌ نَشَ وٌ كٌبٍ رَ سٌ عَ رَ.»

8شَ عَ سَ لِ يٌسُوٍ نُ بَرَ مَلَبُي قِ عٍ مَ نُ، عَلَ مَن مُ نُ لْشْي فبّتّ شَ قٍ قَلَمَ نُ. 9هَن يَ مَلَبُي لُشِ عَلَ شَ حَمَ بّ عٍ مُ نَشَن سْتْشِ سِندٍن. 10نَشَن سٌمَ عَلَ شَ مَلَبُي كُي، عَ عَ مَلَبُمَ نّ عَ شَ وَلِ بِرِن مَ، عَلْ عَلَ مَلَبُشِ عَ شَ وَلِ كُي كِ نَشّ.

11وٌن شَ قٍ بِرِن نَبَ سٌقٍ رَ نَ مَلَبُي كُي، عَلَكٌ مِشِ يٌ نَشَ بِرَ تَنتَنيِ كُي عَلْ عِسِرَيِلَكَيٍ عَ رَبَشِ كِ نَشّ. 12عَلَ شَ مَسٍنيِ سّنبّ فبٌ، عَ وَلِمَ مِشِ بْحّ مَ. عَ شَاحّن دَنفِقٍ سَنتِدّفّمَ دّ قِرِنيِ رَ. عَ سٌمَ وٌن بْحّ نُن وٌن سٌندٌنيِ نَن كُي، عَ سٌ وٌن سْورَ نُن وٌن نَدْشْدٍيٍ شْن. عَ وٌن سٌندٌنيِ وَشْنقٍ نُن مَحْشُنيِ بِرِن مَكِيتِ. 13نِمَسٍ يٌ مُ نْمَ عَ نْشُندٍ عَلَ مَ. عَلَ قٍ بِرِن تٌمَ نّ، قٍ بِرِن دّنتّفّ قَمَ سَدٍ عَ تَن نَن بّ.

14عِسَ، وٌن مَ سّرّشّدُبّ كُنتِفِ شُنفبٍ، عَلَ شَ مِشِ سُفَندِشِ، عَ تٌ سٌ عَرِيَننَ كُي، وٌن قَن شَ بِرَ وٌن مَ دَنشَنِيَ قْشْ رَ وٌن بَرَ نَشَن مَكّنّن. 15وٌن مَ سّرّشّدُبّ كُنتِفِ وٌن مَ سّنبّتَرٍيَ كٌلٌن، عَ كِنِكِنِشِ وٌن مَ نَ نَن مَ. سٍنتَنّ نَشَ كَتَ عَ رَتَنتَندٍ مْولِ بِرِن نَ عَلْ وٌن تَن، كْنْ عَ مُ عَ نْ. 16نَ نَ عَ رَ، وٌن شَ وٌن مَسٌ عَ شَ هِننّ كِبَنيِ رَ لَنلَنتٍيَ رَ، عَلَكٌ وٌن شَ كِنِكِنِ نُن هِننّ سْتْ عَ تّمُي.