AKS

يٌسُوٍ 1

عِسِرَيِلَ يَرٍرَتِ يٌسُوٍ

1عَننَبِ مُنسَ، عَلَتَلَ شَ كٌنيِ تٌ لَاشِرَ، عَلَتَلَ نَشَ عَ مَسٍن نُنُ شَ دِ شّمّ يٌسُوٍ بّ، عَننَبِ مُنسَ مَلِمَ، 2«ﭑ مَ كٌنيِ مُنسَ بَرَ لَاشِرَ. يَكْسِ، كٍلِ عِ شَ يُرُدّن عِفِرِ نُن يِ حَمَ بِرِن نَ. وٌ شَ سِفَ بْشِ مَ ﭑ دّننَشّ سٌقٍ عِسِرَيِلَكَيٍ يِ رَ. 3وٌ نَ وٌ سَنيِ تِ دّننَشّ بِرِن مَ، ﭑ نَا قِمَ نّ وٌ مَ، عَلْ ﭑ عَ مَسٍن عَننَبِ مُنسَ بّ كِ نَشّ. 4وٌ شَ نَانِنيِيٍ كٍلِمَ فبٍنفبٍرٍن يِرٍ نّ، عَ سَ دْشْ لِبَن فٍيَيٍ رَ، هَن عٍقِرَتِ شُرٍ بٍلٍبٍلٍ رَ، شِتِكَيٍ شَ بْشِ بِرِن سَ دْشْ بَا شُنفبٍ رَ سٌفٍفٌرٌدٍ. 5مِشِ يٌ مُ نْمَ عِ رَ عِ شَ سِمَيَ كُي. وٌن بِرِن نَ عَ رَ، عَلْ مُشُ نُن مُنسَ نُ عَ رَ كِ نَشّ. ﭑ مُ عِ رَبّحِنمَ، ﭑ مُ عِ رَبٌلٌمَ.»

6«عِ عِ سّنبّ سٌ، عِ شَ لِمَنِيَ، بَرِ مَ عِ تَن نَن قِندِ مَ سَابُي رَ يِ حَمَ بّ، عٍ شَ نْ كّ تٌنفٌدٍ، ﭑ نَن ﭑ كَلِ بْشِ نَشَن شَ قٍ رَ عٍ بَبَيٍ بّ قِقٍ رَ عٍ مَ. 7عِ لَن نّ عِ شَ عِ سّنبّ سٌ، لِمَنِيَ شَ لُ عِ بّ كِ قَنيِ رَ. عِ شَ عِ حّنفِ سَ يِ سّرِيّ بِرِن شْن مَ، عِ شَ عَ رَبَتُ عَلْ ﭑ مَ كٌنيِ عَننَبِ مُنسَ عِ يَمَرِشِ عَ رَ كِ نَشّ. عِ نَشَ بِنيَ يِرٍقَنيِ مَ، عِ نَشَ بِنيَ كْولَ مَ، عَلَكٌ عِ شَ شُتُ سْتْ يِرٍ مَ عِ نَ سِفَ دّننَشّ. 8يِ سّرِيّ كِتَابُي قَلّ مُ لَن عَ شَ مَكُيَ عِ دّ رَ. عِ شَ عِ حّنفِ سَ عَ شْن مَ كْي نُن يَنيِ، عَلَكٌ عِ شَ عَ بِرِن نَبَتُ. نَشَن بِرِن سّبّشِ عِ شَ عَ رَوَلِ، بَرِ مَ نَ نَن عَ نِيَمَ عِ نَ سٌ قٍ نَشَن بِرِن يَ مَ، عِ شُتُ سْتْمَ عَ مَ، عِ قِندِ مَ عَ رَ نَ كِ نّ. 9ﭑ نَشَن قَلَشِ عِ بّ، عِ نَشَ نّيمُ. عِ عِ سّنبّ سٌ، عِ شَ لِمَنِيَ. عِ نَشَ فَاشُ، عِ نَشَ هَنمّ، بَرِ مَ عِ نَ سِفَ دّدّ، عِ نُن ﭑ تَن عِ مَرِفِ عَلَتَلَ بِرِن نَ عَ رَ.»

10يٌسُوٍ نَشَ يِ يَامَرِ سٌ حَمَ شُنيِيٍ يِ رَ؛ 11«وٌ وٌ حّرّ حَمَ تَفِ، وٌ عٍ يَامَرِ يِ رَ، ‹وٌ وٌ شَ دٌنسٍيٍ شُنلَن، بَرِ مَ وٌن قَمَ يُرُدّن عِفِرِدٍ بٍينُن شِ سَشَن، عَلَكٌ وٌ شَ بْشِ مَسْتْ وٌن مَرِفِ عَلَتَلَ نَشَن سٌقٍ وٌ يِ.›»

12يٌسُوٍ نَشَ عَ قَلَ رُبٍن بْنسْي، فَدِ بْنسْي، نُن مَنَسِ بْنسْي سّيتِ بّ، 13«وٌ رَتُ عَلَتَلَ شَ كٌنيِ مُنسَ شَ يَامَرِ مَ. عَ تٌ عَ قَلَ، ‹وٌ مَرِفِ عَلَتَلَ بَرَ مَلَبُي قِ وٌ مَ. عَ بَرَ يِ بْشِ سٌ وٌ يِ.› 14وٌ شَ فِنّيٍ، وٌ شَ دِيٍ، نُن وٌ شَ شُرُ سٍيٍ نْمَ لُدٍ بْشِ مَ عَننَبِ مُنسَ نَشَن سٌشِ وٌ يِ رَ يُرُدّن كِرِ مَ. كْنْ وٌ تَن تِمَ عَ فٍرٍ سٌ كِ نَن مَ وٌ نفَشَكٍرٍنيِيٍ يَ رَ. وٌ شَ عٍ مَلِ، 15هَن بٍينُن عَلَتَلَ مَلَبُي قِمَ عٍ مَ تّمُي نَشّ عَلْ وٌ تَن، هَن عٍ قَن شَ بْشِ مَسْتْ وٌ مَرِفِ عَلَتَلَ نَشَن قِقٍ عٍ مَ. نَ شَنبِ، وٌ مَن قَ فبِلٍن وٌ شَ بْشِ مَ، عَلَتَلَ شَ كٌنيِ مُنسَ نَشَن قِشِ وٌ مَ يُرُدّن كِرِ مَ، سٌفٍتٍدٍ بِرِ.»

16عٍ نَشَ يٌسُوٍ يَابِ، «عِ مُشُ يَمَرِشِ قٍ نَشَن بِرِن نَ، مُشُ عَ رَبَمَ نّ. عِ نَ مُشُ شّي دّننَشّ قَن، مُشُ سِفَمَ نّ. 17مُشُ عِ شُي رَبَتُمَ نّ قٍ بِرِن مَ، عَلْ مُشُ عَننَبِ مُنسَ شُي رَبَتُ كِ نَشّ. عِ مَرِفِ عَلَتَلَ شَ بِرَ عِ قْشْ رَ عَلْ عٍ نُن مُنسَ نُ عَ رَ كِ نَشّ. 18مِشِ يٌ كَلَبَنتٍ عِ شُي مَ، عَ مُ بِرَ عِ وْيّن شُي قْشْ رَ، عِ قٍ نَشَن بِرِن قَلَمَ عَ بّ، عَ مُ نَ مّ، نَ كَنيِ قَشَمَ نّ. عِ شَ عِ سّنبّ سٌ، عِ مَن شَ لِمَنِيَ.»