دَرِ سَلَمُ حَمَ شَ حَشَنكَتّ
1شّيمَ مُ يِلٍنمَ سْنْن، عَ مُ سّنِيّن.
فّمّ تٌقَنيِيٍ بَرَ رَلَنتَن يّ تَا تُنشُنيِيٍ بِرِن نَ.
2سِيٌن دِيٍ تِدٍ نُ فبٌ عَلْ شّيمَ،
كْنْ يَكْسِ عٍ تِدٍ بَرَ شُرُن
عَلْ قّحّيٍ نَشٍيٍ يَءِلَنشِ بّندّ رَ.
3هَلِ وُلَبَرٍ فِنّ شِحّ قِمَ عَ شَ دِيٍ مَ،
كْنْ ﭑ مَ حَمَ بَرَ لُ عَلْ دِنفّ نَشٍيٍ مُ مِشِحَ رَكَمَلِشِ.
عٍ كٌبِ عَلْ سّفّ.
4كَامّ بَرَ عَ نِيَ، دِيْرّ نّنيِ بَرَ كَنكَن عَ نَشَرٍ.
دِ مّيٍ تَامِ مَشْرِنمَ، كْنْ مِشِ يٌ مُ عٍ كِمَ.
5نَشٍيٍ نُ دٌنسٍ قَنيِ دٌنمَ، كَامّ بَرَ عٍ رَبِرَ تَا كُي.
نَشٍيٍ رَ مْشِ قٍ قَنيِ كُي،
عٍ قَ نَ حٌوفٍ نَن يٍفٍلٍنقٍ عٍ بّلّشّيٍ رَ.
6ﭑ مَ حَمَ شَ حَشَنكَتّ بَرَ فبٌ دَنفِقٍ سٌدٌ مَكَيٍ فبٍ رَ،
نَشٍيٍ هَلَكِ يَ مَفِرّ كٍرٍن كُي،
مِشِ كٍرٍن بّلّشّ مُ دِن عٍ رَ.
7عٍ شَ مَنفّدِيٍ نُ تٌقَن دَنفِ شّيمَ رَ،
عٍ نُ قِيشّ دَنفِ شِحّ رَ.
عٍ قَتٍ رَيَبُ عَلْ يٍ شْورَ سِنبٌنيِ،
عٍ يَتَفِ نُ لُشِ نّ عَلْ دِيَمَن.
8كْنْ يَكْسِ عٍ قَتٍ بَرَ قْورْ دَنفِ تِفٍ رَ،
عٍ مُ كٌلٌنمَ تَا كُي سْنْن.
عٍ كِرِ قَتُشِ عٍ شْرِيٍ مَ، عَ بَرَ شَرَ عَلْ بٌلٍ.
9نَشٍيٍ قَشَ سَنتِدّفّمَ رَ،
عٍ تَن نَن شُن نُ رَقَن دَنفِ مِشِ بِرِن نَ كَامّ نَشٍيٍ حَشَنكَتَقٍ.
كَامّتْييٍ بَرَ شْسِ، عٍ تَفَنشِ،
عٍ مُ دٌنسٍ يٌ سْتْمَ كْرّ.
10دِنفّيٍ، مَرَقَنيِ نُ نَ نَشٍيٍ بّ،
عٍ بَرَ عٍ يّتّ شَ دِيٍ حِن، عٍ عٍ دٌن،
عَلَكٌ عٍ شَ بَلٌ عَلِبَلَوِ كُي.
11عَلَتَلَ شَ شْنّ بَرَ كَمَلِ.
عَ بَرَ عَ رَلَنتَن يّ، عَ تّ شُرُ سِيٌن،
نَشَن بَرَ يِرٍ تِشِيٍ بِرِن فَن.
12بْشِ مَنفّيٍ مُ لَ عَ رَ،
دُنِحَ مِشِيٍ سٍسٍ قَن مُ لَ عَ رَ،
شَ يَشُييٍ نْمَ سٌدٍ دَرِ سَلَمُ نَادّيٍ رَ.
13يِ فبَلٌي كٍلِشِ عَ شَ نَمِحْنمّيٍ شَ يُنُبِيٍ نَن مَ،
عَ نُن عَ شَ سّرّشّدُبّيٍ شَ قٍ كٌبِ رَبَشِيٍ مَ،
عٍ تَن نَشٍيٍ تِنشِنتْييٍ نِي بَشِ.
14كْنْ يَكْسِ عٍ حّرّ مَ تَا كُي عَلْ دْنشُييٍ،
مِشِ يٌ مُ عَ بّلّشّ دِنمَ عٍ رَ
بَرِ مَ وُلِ نَشَن فٌرٌ مَ عٍ مَ،
عَ بَرَ عٍ قِندِ سّنِيّنتَرٍيٍ رَ.
15مِشِيٍ لُمَ فبٍلٍفبٍلٍ رَ،
«وٌ كٍلِ بٍ! وٌ تَن مِشِ سّنِيّنتَرٍيٍ!
وٌ كٍلِ بٍ، وٌ كٍلِ بٍ! وٌ وٌ مَكُيَ مُشُ رَ!»
نَ كُي عٍ نَشَ عٍ فِ سِفَقٍ رَ حَمَنّيٍ مَ.
نَاكَيٍ قَن بَرَ عَ قَلَ،
«عٍ مُ لُمَ مُشُ شْنيِ كْرّ!»
16عَلَتَلَ يّتّ يَتِ نَن عٍ رَيٍنسٍن يّ،
عَ مُ قَ عَ حْشْ سَشِ عٍ شْن مَ سْنْن.
عَ بَرَ بِنيّ بَ سّرّشّدُبّيٍ يِ،
شُننَكٍلِ مُ نَ قٌرِيٍ بّ سْنْن.
17مُشُ بَرَ مَلِ ندٍ مَمّ،
كْنْ مِشِ يٌ مُ قَ.
مُشُ بَرَ مُشُ يَ تِ كِرَ رَ هَن مُشُ يَ بَرَ رَقْورْ،
كْنْ سِ يٌ مُ قَ مُشُ رَتَنفَدٍ.
18مُشُ يَشُييٍ نُ مُشُ حّرّ كِ بِرِن تٌشِ،
عَلَكٌ مُشُ نَشَ قَ مِنِ تَا كُي.
مُشُ شَ قٍ دَنيِ نُ بَرَ مَكْرّ،
لْشْي فبٍفبٍ مُ نُ لُشِ مُشُ بّ سْنْن،
بَرِ مَ مُشُ شَ قٍ دَنيِ نُ بَرَ فّ عَ لِدٍ.
19مُشُ كٍرِ مَيٍ نُ شُلُن دَنفِ سّفّيٍ رَ،
نَشٍيٍ نَ كٌورٍ مَ.
عٍ نَشَ مُشُ كٍرِ هَن فٍيَيٍ قَرِ،
عٍ عٍ نْشُن مُشُ يَ رَ، عٍ مُشُ مَمّ بُرُنيِ.
20عٍ نَشَ مُشُ رَكِسِمَ قَن سُشُ، عَلَ شَ مِشِ سُفَندِشِ.
وٌن نُ بَرَ عَ قَلَ عَ شَ قٍ رَ،
«مُشُ يِرِوَ مَ نّ عَ نِينِ بُن مَ حَمَنّيٍ تَفِ.»
21عِ تَن عٍدٌن حَمَ نَشَن سَبَتِشِ عُسُ بْشِ مَ حّلّشِن يِرٍ،
يَكْسِ عِ نَ سّيوّ كُي،
كْنْ عِ قَن شَ كِيتِ وَشَتِ نَ قَقٍ.
عِ قَمَ نّ حَشَنكَتّ نُن يَافِ سْتْدٍ.
22سِيٌن حَمَ، عَ فبٍ مُ لُشِ عِ شَ حَشَنكَتّ شَ دَن.
عَلَ مُ عِ شَ كٌنيِيَ رَبُمَ،
كْنْ عِ تَن عٍدٌن حَمَ،
عَلَتَلَ قَمَ نّ عِ مَكِيتِدٍ عِ شَ يُنُبِيٍ مَ،
عَ شَ عِ حَشَنكَتَ نٍيٍ شَ قٍ رَ.