عِبُرَ مَ نُن لٌتِ
1نَ تّمُي عِبُرَ مَ نَشَ كٍلِ مِسِرَ، عَ سِفَ نٍفٍوِ فبٍنفبٍرٍن يِرٍ مَبِرِ. عَ نَشَ عَ شَ فِنّ نُن عَ هَرِفٍ بِرِن شَنِن عَ شُن مَ. عَ شُنيَ شَ دِ لٌتِ قَن نَشَ عَ مَتِ نَا. 2عِبُرَ مَ نُ بَرَ قِندِ بَننَ رَ. شُرُ سٍيٍ، فبٍتِ، نُن شّيمَ نُ نَ عَ يِ رَ. 3عَ نَشَ كٍلِ نٍفٍوِ، عَ نُ عَ شَ حّرّ تَفِ عِسُشُ، سِفَقٍ رَ 4يِرٍ ندٍ بٍتٍلِ نُن عَيِ تَفِ، عَ نُ بَرَ سّرّشّبَدٍ تِ دّننَشّ. مّننِ عِبُرَ مَ نَشَ عَلَتَلَ مَشَندِ عَ شِلِ رَ.
5لٌتِ، نَشَن نُ نَ عِبُرَ مَ قْشْ رَ، عَ قَن قِندِشِ شُرُ سٍيٍ نُن كِرِ بَنشِيٍ كَنيِ نَن نَ. 6عِبُرَ مَ شَ شُرُ سٍ فْورّ نُن لٌتِ شَ شُرُ سٍ فْورّ نُ فبٌ نَ بْشِ بّ. عٍ مُ نُ نْمَ لُدٍ يِرٍ كٍرٍن سْنْن. 7سْنشْي نَشَ مِنِ عِبُرَ مَ شَ شُرُ سٍ دّ مَدٌنيِيٍ عَ نُن لٌتِ شَ شُرُ سٍ دّ مَدٌنيِيٍ تَفِ. كَنَانكَيٍ نُن ثٍرِ سِكَيٍ قَن نُ نَ مّننِ نَ وَشَتِ.
8عِبُرَ مَ نَشَ عَ قَلَ لٌتِ بّ، «وٌن نَشَ كْنحّ، وٌن مَ شُرُ سٍ دّ مَدٌنيِيٍ قَن مُ لَن عٍ شَ كْنحّ، بَرِ مَ وٌن تَن نفَشَكٍرٍنمَ نَن وٌن نَ. 9يِ بْشِ بِرِن نَن عِ يَ عِ يِ كِ. وٌن نَشَن نَبَمَ، وٌن شَ قَتَن. شَ عِ سِفَ كْولَ مَ، ﭑ تَن سِفَمَ يِرٍقَنيِ نَن مَ. شَ عِ سِفَ يِرٍقَنيِ مَ، ﭑ تَن سِفَ كْولَ مَ.»
10لٌتِ نَشَ عَ يَ رَ سِفَ، عَ نَشَ سَ يُرُدّن مّرّ تٌ. يٍ نُ نَ نَ عَ قَنيِ رَ. بٍينُ عَلَتَلَ شَ سٌدٌ مَ نُن فٌمٌرَ كَنَ، نَ بْشِيٍ نُ قَن هَن سٌوَرِ بِرِ. نَ نُ لُشِ عَلْ مِسِرَ بْشِ، عَلْ عَلَتَلَ شَ يِرٍ يَءِلَنشِ. 11نَ كُي لٌتِ نَشَ يُرُدّن مّرّ سُفَندِ عَ يّتّ بّ. عَ نَشَ سِفَ سٌفٍتٍدٍ مَبِرِ. عِبُرَ مَ نُن لٌتِ قَتَن نَ كِ نّ. 12عِبُرَ مَ نَشَ لُ كَنَان بْشِ مَ، لٌتِ نَشَ لُ يُرُدّن مّرّ تَايٍ تَفِ. لٌتِ نَشَ عَ شَ كِرِ بَنشِيٍ تِ سٌدٌ مَ قّ مَ. 13سٌدٌ مَكَيٍ نُ بَرَ كٌبِ عَ فبٍ رَ، عٍ نُ بَرَ قِندِ يُنُبِتْي بٍلٍبٍلٍ رَ عَلَتَلَ بّ.
14عِبُرَ مَ نُن لٌتِ تٌ قَتَن، عَلَتَلَ نَشَ عَ مَسٍن عِبُرَ مَ بّ، «عِ يَ تِ سٌفٍتٍدٍ رَ، سٌفٍفٌرٌدٍ، يِرٍقَنيِ، نُن كْولَ. 15عِ بْشِ نَشَن بِرِن تٌشِ، ﭑ عَ قِمَ عِ تَن نُن عِ بْنسْي مَ عَبَدَن. 16ﭑ عِ بْنسْي رَوُيَمَ نّ عَلْ شُبٍ نَشَن نَ بْشِ مَ. شَ مِشِ ندٍ نْمَ شُبٍ كْنتِدٍ، عَ نْمَ نّ عِ بْنسْي كْنتِ قَن كٌلٌندٍ. 17كٍلِ، عِ بْشِ عِحّرّ، عَ كُيّيَ نُن عَ فبٌيَ، عِ شَ عَ بِرِن مَتٌ بَرِ مَ ﭑ عَ قِمَ عِ تَن نَن مَ.» 18نَ تّمُي عِبُرَ مَ نَشَ كِرِ بَنشِ يِرٍ مَسَرَ. عَ نَشَ سَبَتِ وُرِ بٍلٍبٍلٍ ندٍيٍ مَبِرِ نَشَن نَ مَمِرٍ نُن هٍبِرٌن قّ مَ. عَ نَشَ سّرّشّبَدٍ يَءِلَن نَا عَلَتَلَ بّ.