AKS

عَننَبِ يٍرٍ مِ 23

عَلَتَلَ شَ شّيرَ تِنشِنشِ

عَلَتَلَ شَ مَسٍنيِ

1عَلَتَلَ شَ مَسٍنيِ نَن يَ؛

«حَشَنكَتّ نَ ﭑ مَ حَمَ يَرٍرَتِيٍ بّ

نَشٍيٍ بَرَ ﭑ مَ حَمَ رَلْي، عٍ بَرَ عٍ رَيٍنسٍن.

2عِسِرَيِلَ مَرِفِ عَلَتَلَ بَرَ عَ مَسٍن عَ شَ حَمَ يَرٍرَتِيٍ شَ قٍ رَ،

وٌ بَرَ ﭑ مَ حَمَ رَيٍنسٍن نّ، وٌ بَرَ عٍ كٍرِ.

وٌ مُ مّينِشِ عٍ مَ.

ﭑ قَمَ وٌ حَشَنكَتَدٍ وٌ شَ كٌبِحَ نَن مَ.»

عَلَتَلَ شَ مَسٍنيِ نَن نَ كِ.

3«ﭑ قَمَ نّ ﭑ مَ حَمَ بِرِن نَ،

ﭑ نُ بَرَ نَشَن شَنِن حَمَنّ مَ.

ﭑ قَمَ نّ عٍ رَفبِلٍندٍ عٍ شْنيِ

عَلَكٌ عٍ مَن شَ وُيَ، عٍ شَ قٍ مَن شَ سْونّيَ.

4ﭑ يَرٍرَتِيٍ تِمَ نّ عٍ بّ نَشٍيٍ مّينِمَ عٍ مَ.

عٍ مُ فَاشُمَ سْنْن، عٍ مُ سّرّنمَ.

ﭑ عٍ هَيِ بِرِن قَنمَ نّ عٍ بّ.»

عَلَتَلَ بَرَ نَ مَسٍن.

5عَلَتَلَ شَ مَسٍنيِ نَن يَ؛

«لْشْي قَمَ نّ قَدٍ ﭑ دَوُدَ شَ دِ تِنشِنشِ رَكٍلِمَ لْشْي نَشّ.

عَ حَمَ يَمَرِ مَ نّ لْننِ، تِنشِنيِ، نُن سّرِيّ رَ بْشِ كُي.

6نَ وَشَتِ يُدَيَ كِسِمَ نّ،

عِسِرَيِلَ بْحّسَ سْتْ،

مِشِيٍ عَ قَلَ، ‹عَلَتَلَ قِندِشِ وٌن مَ تِنشِنيِ نَن نَ.›»

7عَلَتَلَ شَ مَسٍنيِ نَن يَ؛

«لْشْي قَمَ قَدٍ مِشِ مُ عَ قَلَمَ،

‹عَلَتَلَ حِحّ نَشَن عِسِرَيِلَكَيٍ رَ مِنِشِ مِسِرَ بْشِ رَ.›

8عٍ عَ قَلَمَ نّ، ‹وٌن بَرَ وٌن كَلِ عَلَتَلَ شِلِ رَ،

نَشَن عِسِرَيِلَ بْنسْي رَكٍلِشِ،

عَ عٍ رَ مِنِ حَمَنّ رَ نَشَن نَ كْولَ مَ

عَ نُن يِرٍ بِرِن عَ عٍ كٍرِشِ دّننَشّ.

عٍ مَن قَمَ نّ عٍ شَ بْشِ رَ سَبَتِدٍ.›»

عَننَبِ يٍرٍ مِ شَ مَسٍنيِ

9«مَسٍنيِيٍ نَن يَ نَمِحْنمّيٍ شَ قٍ رَ؛

ﭑ بْحّ بَرَ كِنِكِنِ.

ﭑ شْرِ بِرِن نَ سّرّنقٍ،

ﭑ لُشِ نّ عَلْ سِيسِلَ بَرِ مَ عَلَتَلَ شَ مَسٍنيِ سّنِيّنشِ شْرْشْ.»

عَلَتَلَ شَ مَسٍنيِ

10«يِ بْشِ رَقٍشِ يّنّلَيٍ نَن نَ.

بْشِ يَتِ يَتِ نَ دَنكّ كُي نَ نَن مَ،

قِيلِ بَرَ شَرَ، حٌوفٍ بَرَ حْن.

مِشِ مَقُرَ تِنشِنتَرٍيَ رَبَدٍ.

عٍ سُو سَمَ نَ رَ عَ قَنيِ رَ.

11نَمِحْنمّ نُن سّرّشّدُبّ مُ تِنشِن.

ﭑ بَرَ كٌبِحَ تٌ ﭑ مَ بَنشِ كُي.»

عَلَتَلَ شَ مَسٍنيِ نَن نَ كِ.

12«نَ نَن عَ رَ عٍ شَ كِرَ شْرْشْ.

دِ مِ بَرَ سِن عٍ شُن مَ.

عٍ لُمَ نّ بِرَ رَ،

بَرِ مَ ﭑ بَرَ نَتّ تٌنفٌ ﭑ شَ عٍ حَشَنكَتَ.

نَ وَشَتِ نَ قَقٍ.»

عَلَتَلَ شَ مَسٍنيِ نَن نَ كِ.

13«ﭑ بَرَ قٍ حَاشِيٍ تٌ نَمِحْنمّ سَمَرِكَيٍ يَ مَ.

عٍ نَ مَسٍنيِ تِقٍ بَلِ شِلِ رَ،

عٍ بَرَ ﭑ مَ حَمَ عِسِرَيِلَ رَلْي.

14ﭑ مَن بَرَ قٍ رَتْنشِيٍ تٌ نَمِحْنمّ دَرِ سَلَمُكَيٍ يَ مَ.

عٍ قِندِشِ يّنّلَيٍ نَن نَ، عٍ حّرّ مَ وُلٍ رَ،

عٍ تِنشِنتَرٍيٍ مَلِمَ عَلَكٌ عٍ نَشَ فبِلٍن عٍ شَ وَلِ كٌبِ قْشْ رَ.

عٍ بَرَ لُ ﭑ بّ عَلْ سٌدٌ مَكَيٍ،

عٍ شَ مِشِيٍ مَنِيَشِ فٌمٌرَكَيٍ نَن نَ.»

15نَ نَن عَ رَ مَنفّ عَلَتَلَ عَ مَسٍنشِ نَمِحْنمّيٍ شَ قٍ رَ،

«ﭑ قٍ شْنّ سٌمَ نّ عِ يِ رَ بَلٌي رَ،

ﭑ يٍ حَاشِ سٌ عِ يِ رَ مِنسٍ رَ،

بَرِ مَ دَرِ سَلَمُ نَمِحْنمّيٍ بَرَ عَ نِيَ

ﭑ مَ بْشِ بِرِن شَ قِندِ بْشِ سّنِيّنتَرٍ رَ.»

16عَلَتَلَ بَرَ عَ مَسٍن،

«وٌ نَشَ وٌ تُلِ مَتِ نَمِحْنمّيٍ شَ مَسٍنيِ رَ.

عٍ نَشَن مَسٍنمَ وٌ بّ عَ قِندِشِ وُلٍ نَن نَ.

عٍ لَامَتُنيِيٍ شَ قٍ قَلَمَ وٌ بّ

نَشٍيٍ قَتَنشِ عٍ يّتّ شَشِلِ مَ.

عَلَتَلَ شَ مُ عَ مَسٍنشِ.

17عٍ بَرَ سُو سَ عَ قَلَدٍ ﭑ مَتَندِلَيٍ بّ،

‹عَلَتَلَ نَشّ وٌ بْحّسَ سْتْمَ نّ.›

عٍ مَن نُ عَ قَلَ مِشِيٍ بّ،

نَشٍيٍ بِرَ مَ عٍ يّتّ وَشْنقٍ قْشْ رَ،

‹قٍ حَاشِ يٌ مُ وٌ سْتْمَ.›

18ندٍ بَرَ تِ عَلَتَلَ سّيتِ مَ، عَ شَ عَ شَ مَسٍنيِ رَ مّ؟

ندٍ بَرَ عَ تُلِ مَتِ عَ شَ مَسٍنيِ رَ؟

ندٍ بَرَ نَ مّ؟

19عَلَتَلَ بَرَ شْنْ مِشِ حَاشِ مَ.

نَ لُشِ نّ عَلْ قٌيٍ شُنفبٍ نَشَن دَنفِمَ عٍ شُن مَ.

20عَلَتَلَ شَ شْنّ مُ فبِلٍنمَ،

قٌ عَ شَ كَمَلِ،

قٌ عَ شَ نَتّ بِرِن شَ رَبَ.

نَ بِرِن نَ حْن، وٌ شَشِلِ سْتْمَ نّ.

21ﭑ تَن شَ مُ يِ نَمِحْنمّيٍ شّيشِ، عٍ عٍ يّتّ شَشِلِ نَن نَوَلِقٍ.

ﭑ مُ مَسٍنيِ تِشِ عٍ بّ، عٍ مَسٍنيِ تِشِ عٍ يّتّ نَن نَ.

22شَ عَ سَ عَ لِ عٍ نُ نَ ﭑ تَن نَن سّيتِ مَ،

عٍ ﭑ مَ مَسٍنيِ نَن مَسٍنمَ ﭑ مَ حَمَ بّ،

عَلَكٌ عٍ شَ فبِلٍن عٍ شَ كِرَ حَاشِ قْشْ رَ،

عٍ شَ كٌبِحَ لُ نَ.»

23عَلَتَلَ شَ مَسٍنيِ نَن يَ؛

«عَلَ نَن ﭑ نَ نَشَن مَكْرّ وٌ رَ،

ﭑ مُ نَ يِرٍ مَكُيٍ.

24عَدَ مَدِ نْمَ عَ نْشُندٍ ﭑ مَ؟»

عَلَتَلَ شَ مَسٍنيِ نَن نَ كِ.

«ﭑ مُ نَ كٌورٍ نُن بْشِ بِرِن مَ شّ؟»

عَلَتَلَ شَ مَسٍنيِ نَن نَ كِ.

25«ﭑ بَرَ نَ نَمِحْنمّيٍ شُي مّ.

عٍ وُلٍ نَن قَلَمَ،

عٍ نَشّ، ‹ﭑ بَرَ لَامَتُنيِ تٌ، ﭑ بَرَ لَامَتُنيِ تٌ.›»

26«نَمِحْنمّيٍ لُمَ وُلٍ قَلَ رَ هَن مُن تّمُي؟

عٍ عٍ يّتّ مَدَشُمَ هَن مُن تّمُي؟

27عٍ مَحْشُنشِ نّ عَ حَمَ نْمَ نّيمُدٍ ﭑ شِلِ رَ

عٍ شَ لَامَتُنيِيٍ سَابُي رَ، عٍ نَشَن قَلَمَ عٍ بٌورٍ بّ،

عَلْ عٍ بَبَيٍ نّيمُشِ ﭑ شِلِ مَ كِ نَشّ عٍ قَ بَلِ بَتُ.

28نَشَن بَرَ شِيٍ سَ، عَ شَ نَ نَن قَلَ.

نَشَن بَرَ ﭑ مَ مَسٍنيِ سْتْ، عَ شَ نَ قَلَ نْندِ رَ.

مُنسٍ نَ مَالٍ شْرِ نُن مَالٍ لَفِ تَفِ؟»

عَلَتَلَ شَ مَسٍنيِ نَن نَ كِ.

29«ﭑ مَ مَسٍنيِ مُ لُشِ شّ عَلْ تّ؟»

عَلَتَلَ شَ مَسٍنيِ نَن نَ كِ.

«ﭑ مَ مَسٍنيِ مُ لُشِ شّ عَلْ دّرّ مَ نَشَن فّمّ عِبْو مَ؟»

30عَلَتَلَ شَ مَسٍنيِ نَن يَ؛

«يِ نَمِحْنمّيٍ مُ رَقَنشِ ﭑ مَ.

عٍ مَسٍنيِ مُحَمَ عٍ بٌورٍ مَ،

عٍ قَ عَ قَلَ عَلَ شَ مَسٍنيِ نَ عَ رَ.»

31عَلَتَلَ شَ مَسٍنيِ نَن يَ؛

«يِ نَمِحْنمّيٍ مُ رَقَنشِ ﭑ مَ.

عٍ عَ قَلَمَ، ‹عَلَ شَ مَسٍنيِ نَن يَ،›

كْنْ عٍ دّ نَن تُن وُيَشِ.»

32عَلَتَلَ شَ مَسٍنيِ نَن يَ؛

«يِ نَمِحْنمّيٍ مُ رَقَنشِ ﭑ مَ،

نَشٍيٍ لَامَتُنيِ وُلٍ قَلَمَ،

نَشٍيٍ ﭑ مَ حَمَ رَلْيمَ عٍ شَ وُلٍ قُقَقُيٍ رَ.

ﭑ مُ عٍ شّيشِ، ﭑ مُ يَامَرِ يٌ قِشِ عٍ مَ،

حَمَ هَيِ مُ نَ عٍ مَ قٍوٌ.»

عَلَتَلَ شَ مَسٍنيِ نَن نَ كِ.

33«شَ حَمَ عِ مَشْرِن،

شَ نَ مُ عَ رَ نَمِحْنمّ، شَ نَ مُ عَ رَ سّرّشّدُبّ،

‹مُنسٍ قِندِشِ عَلَتَلَ شَ نَتّ رَ،›

عِ شَ يِ نَتّ قَلَ عٍ بّ،

‹عَلَتَلَ بَرَ وٌ رَبّحِن.›

34شَ نَمِحْنمّ، شَ نَ مُ عَ رَ سّرّشّدُبّ،

شَ نَ مُ عَ رَ مِشِ ندٍ عَ قَلَ حَمَ بّ،

‹عَلَتَلَ شَ مَسٍنيِ نَن يَ،›

ﭑ قَمَ نّ نَ كَنيِ نُن عَ بْنسْي حَشَنكَتَدٍ.

35وٌ وٌ بٌورٍ مَشْرِنمَ،

‹عَلَتَلَ مُنسٍ يَابِشِ؟ عَلَتَلَ مُنسٍ مَسٍنشِ؟›

36كْنْ عَ مُ لَنمَ وٌ شَ عَ قَلَ،

‹عَلَتَلَ شَ مَسٍنيِ نَن يَ،›

بَرِ مَ نَ قِندِشِ وٌ يّتّ شَ مَسٍنيِ نَن نَ.

وٌ وَ مَ مَنفّ عَلَتَلَ شَ مَسٍنيِ نَن مَسَرَقٍ.

37وٌ نَمِحْنمّ مَشْرِنمَ،

‹عَلَتَلَ مُنسٍ يَابِشِ؟ عَلَتَلَ مُنسٍ مَسٍنشِ؟›

38شَ وٌ مَن عَ قَلَمَ،

‹عَلَتَلَ شَ مَسٍنيِ نَن يَ،›

ﭑ تٌ عَ قَلَ وٌ بّ عَ وٌ نَشَ نَ مْولِ قَلَ،

39ﭑ وٌ رَبّحِنمَ نّ كٍرٍنيِ رَ،

ﭑ وٌ مَكُيَ ﭑ نَ،

وٌ تَن نُن وٌ شَ تَا ﭑ نَشَن قِشِ وٌ نُن وٌ بَبَيٍ مَ.

40ﭑ وٌ رَيَافِمَ نّ عَبَدَن.

نَ يَافِ مُ بَمَ وٌ مَ، مِشِ مُ نّيمُمَ عَ رَ.»