عَبِمٍلٍكِ قِندِقٍ مَنفّ رَ
1يٍرُبَالِ شَ دِ عَبِمٍلٍكِ نَشَ سِفَ سِكٍمِ عَ نفَ شُنيِيٍ يِرٍ. عَ نَشَ يِ مَسٍنيِ تِ عَ نفَ شَبِلّ بّ، 2«كَتَرَبِ سِكٍمِ كُنتِفِيٍ بِرِن مَ، ‹وٌ وَ مَ عَ شْن مَ يٍرُبَالِ شَ دِ تٌنفٌ سٌلٌقٍرٍ بِرِن شَ قِندِ وٌ شَ مَنفّيٍ رَ، كَ مِشِ كٍرٍن فبَنسَن شَ قِندِ وٌ شَ مَنفّ رَ؟ وٌ شَ وٌ رَتُ عَ مَ، وٌن قِندِشِ وُلِ كٍرٍن قَسّ كٍرٍن نَن نَ.›» 3عَ نفَ شُنيِيٍ نَشَ نَ مَسٍنيِ بِرِن تَفِ رَبَ سِكٍمِ كُنتِفِيٍ بّ. كُنتِفِيٍ نَشَ تِن بِرَقٍ عَبِمٍلٍكِ قْشْ رَ، بَرِ مَ عٍ نفَشَكٍرٍنيِ نَن نُ عَ رَ. 4عٍ نَشَ فبٍتِ كِلٌ سٌلٌمَسَشَن قِ عَ مَ، كٍلِقٍ بَلِ بٍرِتِ شَ سَلِدٍ كُي. عَبِمٍلٍكِ نَشَ كْبِرِ سٌ شّمّ رَبّحِنشِيٍ نُن كَلَبَنتٍيٍ يِ رَ، عَلَكٌ عٍ شَ بِرَ عَ قْشْ رَ.
5عَ نَشَ سِفَ عَ بَبَ شْنيِ عٌقَرَ، عَ عَ شُنيَيٍ بِرِن قَشَ. يٍرُبَالِ شَ دِ تٌنفٌ سٌلٌقٍرٍ بِرِن نَشَ قَشَ قَنيٍ كٍرٍن قَرِ، قٌ يٌتَمِ، يٍرُبَالِ شَ دِ دْنشْي، نَشَن نُ بَرَ عَ نْشُن عٍ مَ. 6سِكٍمِ كُنتِفِيٍ نُن بٍتِ مِلٌ حَمَ بِرِن نَشَ عٍ مَلَن سِكٍمِ، فّمّ بٍلٍبٍلٍ نُن وُرِ تٌقَنيِ تِشِ دّننَشّ. عٍ نَشَ عَبِمٍلٍكِ قِندِ مَنفّ رَ مّننِ.
7يٌتَمِ تٌ نَ قٍ مّ، عَ نَشَ سِفَ عَ سَ تِ فَرِ سِمِ فٍيَ قَرِ، عَ قَ عَ قَلَ عَ شُي عِتٍشِ رَ، «سِكٍمِ كُنتِفِيٍ، شَ وٌ وَ مَ نّ عَلَ شَ عَ تُلِ مَتِ وٌ رَ، وٌ شَ وٌ تُلِ مَتِ ﭑ تَن نَ. 8لْشْي ندٍ، وُرِ بِلِيٍ نَشَ عَ نَتّ عٍ شَ مَنفّ كٍرٍن سُفَندِ. عٍ نَشَ عَ قَلَ عٌلِوِ بِلِ بّ، ‹قِندِ مُشُ شَ مَنفّ رَ.› 9كْنْ عٌلِوِ بِلِ نَشَ عٍ يَابِ، ‹ﭑ تَن مُ فبِلٍنمَ ﭑ تُرٍ رَ مِنِقٍ قْشْ رَ، تُرٍ نَشَن قِندِ مَ بِنيَ سٍ رَ عَلَ نُن مِشِيٍ بّ، عَلَكٌ ﭑ شَ نُ سَ ﭑ عِيَن وُرِ بِلِيٍ شُن.›»
10«وُرِ بِلِيٍ نَشَ عَ قَلَ شْرّ بِلِ بّ، ‹عِ تَن شَ قَ بٍ، عِ شَ قِندِ مُشُ شَ مَنفّ رَ.› 11كْنْ شْرّ بِلِ نَشَ عَ قَلَ عٍ بّ، ‹ﭑ تَن مُ فبِلٍنمَ ﭑ بٌفِ حْشُنمّ قَنيِ رَ مِنِقٍ قْشْ رَ، عَلَكٌ كَنسَن ﭑ شَ نُ سَ ﭑ عِيَن وُرِ بِلِيٍ شُن.›»
12«وُرِ بِلِيٍ نَشَ عَ قَلَ وّنِ بِلِ بّ، ‹عِ تَن شَ قَ بٍ، عِ شَ قِندِ مُشُ شَ مَنفّ رَ.› 13كْنْ وّنِ بِلِ نَشَ عٍ يَابِ، ‹ﭑ تَن مُ فبِلٍنمَ ﭑ مَ وّنِ رَ مِنِقٍ قْشْ رَ نَشَن عَلَ نُن مِشِيٍ رَ سّيوَ مَ، عَلَكٌ كَنسَن ﭑ شَ نُ سَ ﭑ عِيَن وُرِ بِلِيٍ شُن.›»
14«نَ كُي وُرِ بِلِيٍ نَشَ عَ قَلَ تُنبٍ كُنسِ بّ، ‹عِ تَن شَ قَ بٍ، عِ شَ قِندِ مُشُ شَ مَنفّ رَ.› 15تُنبٍ كُنسِ نَشَ وُرِ بِلِيٍ يَابِ، ‹شَ وٌ وَشِ حَنِفٍ قَنيِ نَن نَبَقٍ ﭑ بّ عَلَكٌ ﭑ شَ قِندِ وٌ شَ مَنفّ رَ، وٌ قَ بٍ، وٌ شَ قَ لُ ﭑ نِينِ بُن مَ. شَ نَ مُ عَ رَ، تّ مِنِمَ نّ تُنبٍ كُنسِ كُي، عَ لِبَن وُرِ بِلِ قَنيِ بِرِن فَن.›»
16يٌتَمِ مَن نَشَ عَ مَسٍن عٍ بّ، «يَكْسِ، وٌ تَن عَبِمٍلٍكِ قِندِقٍ مَنفّ رَ، وٌ عَ رَبَشِ تِنشِنيِ نَن مَ؟ وٌ قٍ قَنيِ نَن نَبَشِ يٍرُبَالِ نُن عَ شَ دٍنبَيَ رَ نَ كِ؟ وٌ عَ شَ قٍ قَنيِ سَرٍ رَفبِلٍنشِ عَ مَ نَ كِ نّ؟ 17ﭑ بَبَ فٍرٍ سٌشِ نّ وٌ تَن بّ، عَ عَ نِي قِ فٍرٍ مَ، عَ وٌ رَتَنفَ مَدِيَنكَيٍ بّلّشّ عِ. 18كْنْ وٌ تَن، وٌ بَرَ كٍلِ ﭑ بَبَ شَ دٍنبَيَ شِلِ مَ تٌ لْشْي، وٌ بَرَ عَ شَ دِ شّمّ مِشِ تٌنفٌ سٌلٌقٍرٍ قَشَ قَنيٍ كٍرٍن قَرِ، وٌ قَ عَبِمٍلٍكِ قِندِ مَنفّ رَ كُنتِفِيٍ شُن مَ سِكٍمِ. وٌ بَرَ فٍدٍيٌن شَ كٌنيِ فِنّ شَ دِ قِندِ وٌ شَ مَنفّ رَ، بَرِ مَ وٌ نفَشَكٍرٍنيِ لَنشِ عَ تَن نَن مَ. 19شَ نَ بِرِن كٍلِشِ حَنِفٍ قَنيِ نُن تِنشِنيِ نَن مَ يٍرُبَالِ نُن عَ شَ دٍنبَيَ مَبِرِ، عَوَ وٌ تَن نُن عَبِمٍلٍكِ شَ رَقَن وٌ بٌورٍ مَ. 20شَ نَ مُ عَ رَ، تّ شَ مِنِ عَبِمٍلٍكِ، عَ شَ سِكٍمِ كُنتِفِيٍ نُن بٍتِ مِلٌ مِشِيٍ فَن. تّ شَ مِنِ عٍ قَن مَ، عَ شَ عَبِمٍلٍكِ فَن!» 21يٌتَمِ نَشَ كٍلِ نَا، عَ سَ عَ نْشُن بٍيرِ، دّننَشّ مَكُيَ عَ تَارَ عَبِمٍلٍكِ رَ.
22عَبِمٍلٍكِ نَشَ عِسِرَيِلَ يَمَرِ حّ سَشَن بُن مَ. 23نَ تّمُي، عَلَ نَشَ شَشِلِ كٌبِ رَ سٌ عَبِمٍلٍكِ نُن سِكٍمِ كُنتِفِيٍ تَفِ. سِكٍمِ كُنتِفِيٍ قَ عَبِمٍلٍكِ يَنقَ. 24نَ كُي عٍ بِرِن شَ عٍ شَ قٍ حَاشِ سَرٍ سْتْ. عَبِمٍلٍكِ نُ بَرَ عَ نفَشَكٍرٍنيِيٍ قَشَ، يٍرُبَالِ شَ دِ تٌنفٌ سٌلٌقٍرٍ. سِكٍمِكَيٍ نُ بَرَ عَبِمٍلٍكِ مَلِ نَ قَشّ تِقٍ رَ. 25سِكٍمِ كُنتِفِيٍ نَشَ مِشِيٍ تِ يَنقَنتٍيَ رَ عَبِمٍلٍكِ شِلِ مَ فٍيَيٍ شُن تَفِ، عٍ نُ مِشِيٍ قّتّنكّن نَشٍيٍ نُ دَنفِمَ كِرَ رَ عٍ يِرٍ. عَبِمٍلٍكِ نَشَ نَ قٍ مّ.
26لْشْي ندٍ عٍبٍدِ شَ دِ فَالِ نُن عَ شُنيَيٍ نَشَ قَ سِكٍمِ. تَا كُنتِفِيٍ نَشَ لَنلَنتٍيَ سَ عَ مَ. 27عٍ بِرِن نَشَ سِفَ وّنِ بِلِيٍ يِرٍ، عٍ شَ وّنِ بٌفِ بَ. عٍ نَشَ نَ بٌفِيٍ بُندُ، عٍ قَ شُلُنيِ تِ. عٍ نَشَ سٌ عٍ شَ عَلَ بَتُدٍ كُي، عٍ نَشَ عٍ دّفٍ، عٍ عٍ مِن، عٍ قَ عَبِمٍلٍكِ دَنكَ. 28عٍبٍدِ شَ دِ فَالِ نَشَ عَ قَلَ عٍ بّ، «وٌن تَن سِكٍمِكَيٍ لُشِ عَبِمٍلٍكِ شَ نْي بُن مَ مُنقٍ رَ؟ يٍرُبَالِ شَ دِ شَ مُ لَنشِ عَ مَ؟ عَبِمٍلٍكِ مُ سٍبُلُ شَ قِندِشِ تَا فٌمِنَ رَ؟ عَ لَنمَ وٌ شَ لُ هَمٌرِ شَ مِشِيٍ تَن شَ يَامَرِ بُن مَ، بَرِ مَ هَمٌرِ نَن سِكٍمِ بٍنبَ رَ. وٌن لُشِ عَبِمٍلٍكِ شَ مَنفّيَ بُن مَ مُنقٍ رَ؟ 29شَ سِكٍمِكَيٍ قَ بِرَ ﭑ تَن قْشْ رَ نُ، ﭑ عَبِمٍلٍكِ كٍرِ مَ نّ كٍرٍن نَ.» نَ مَسٍنيِ دَنفِ شَنبِ، فَالِ نَشَ عَ قَلَ عَبِمٍلٍكِ بّ، «عِ شَ سْورِيٍ رَ مِنِ، وٌن شَ فٍرٍ.»
30سٍبُلُ، تَا فٌمِنَ تٌ عٍبٍدِ شَ دِ فَالِ شَ مَسٍنيِ مّ، عَ بْحّ نَشَ تٍ. 31عَ نَشَ شّيرَيٍ شّي فُندٌحْشْحَ رَ عَبِمٍلٍكِ شْن، عٍ شَ عَ قَلَ عَ بّ، «عٍبٍدِ شَ دِ فَالِ نُن عَ شُنيَيٍ بَرَ قَ سِكٍمِ، عٍ نَ تَا مِشِيٍ بْحّ رَتٍقٍ عِ شِلِ مَ. 32كٍلِ، عِ شَ قَ تٌ كْي رَ، عِ تَن نُن حَمَ نَشَن بِرِن بِرَشِ عِ قْشْ رَ، وٌ شَ تَا مّلّن. 33سُبَشّ، عِ شَ كٍلِ، عِ قَ تَا سُشُ. فَالِ نُن عَ شَ مِشِيٍ نَ تِ وٌ يَ رَ، وٌ شَ وٌ سّنبّ مَسٍن عٍ بّ.»
34عَبِمٍلٍكِ نُن عَ شَ سْورِ شُندّ نَانِ نَشَ كٍلِ كْي رَ، عٍ سَ سِكٍمِ مّلّن. 35عٍبٍدِ شَ دِ فَالِ تٌ كٍلِ فّيسّفّ، عَ سَ تِ تَا سٌدٍ دّ رَ، عَبِمٍلٍكِ نُن عَ شَ سْورِيٍ نَشَ مِنِ كّنّ مَ. 36فَالِ تٌ سْورِيٍ تٌ، عَ نَشَ عَ قَلَ سٍبُلُ بّ، «حَمَ ندٍ نَن نَ فٌرٌقٍ فٍيَ قَرِ يِ كِ.» سٍبُلُ نَشَ عَ يَابِ، «عِ فٍيَ نِينِ نَن قِندِشِ مِشِيٍ رَ نَ كِ.» 37فَالِ مَن نَشَ عَ قَلَ، «حَمَ يَتِ نَن نَ فٌرٌقٍ تَا كُي يِ كِ. حَمَ فبّتّ قَن نَ قَقٍ سٍمَتٌي شَ وُرِ بِلِ كِرَ شْن.» 38سٍبُلُ نَشَ عَ يَابِ، «عِ شَ وْيّن شُنفبٍ نَ مِندٍن، عِ تَن نَشَن نُ عَ قَلَمَ، ‹سِكٍمِ لُشِ عَبِمٍلٍكِ شَ يَامَرِ بُن مَ مُنقٍ رَ؟› عِ مُ نُ يِ مِشِيٍ كٌنبِ شّ؟ سِفَ، عِ سَ عٍ فٍرٍ.»
39فَالِ نَشَ تِ سِكٍمِ كُنتِفِيٍ يَ رَ، عٍ نَشَ عَبِمٍلٍكِ فٍرٍ. 40مِشِ فبٍفبٍ نَشَ قَشَ تَا سٌدٍ دّ رَ. عَبِمٍلٍكِ نَشَ فَالِ كٍرِ 41هَن عَرُ مَ. سٍبُلُ نَشَ فَالِ نفَشَكٍرٍنيِيٍ كٍرِ سِكٍمِ كُي، هَلِ كٍرٍن، عَ مُ لُ نَا.
42نَ كُيٍ عِبَ، حَمَ نَشَ سِفَ دَاشَ. عَبِمٍلٍكِ تٌ نَ قٍ كٌلٌن، 43عَ نَشَ سْورِيٍ تٌنفٌ، عَ عٍ عِتَشُن شُندّ سَشَن نَ. عٍ نَشَ عٍ نْشُن دَاشَ هَن حَمَ بِرِن نَشَ مِنِ، عٍ قَ كٍلِ عٍ شِلِ مَ، عٍ عٍ بْنبْ. 44عَبِمٍلٍكِ شَ شُندّ نَشَ سَ تِ تَا سٌدٍ دّ رَ. بٌورٍ شُندّ قِرِنيِ نَشَ سِن نَ مِشِيٍ مَ، نَشٍيٍ نُ نَ دَاشَ، عٍ نَشَ عٍ بِرِن سْنتْ. 45عَبِمٍلٍكِ نَشَ فٍرٍ سٌ نَ تَا مَ يَنيِ بِرِن، هَن عَ نَشَ نْ عَ رَ، عَ مّننِكَيٍ بِرِن قَشَ. عَ مَن نَشَ نَ تَا رَبِرَ، عَ قْشّ سَ نَ مَ.
46سِكٍمِكَيٍ نَشٍيٍ لُشِ، عٍ تٌ نَ قٍ مّ، عٍ نَشَ سٌ عٍلِ بٍرِتِ كُيٍ شَ سَلِدٍ كُي. 47عٍ نَشَ سَ عَ قَلَ عَبِمٍلٍكِ بّ، عَ سِكٍمِ تَا كُنتِفِيٍ بَرَ مَلَن سَلِدٍ كُي. 48نَ كُي عَبِمٍلٍكِ نَشَ تٍ سَلَمٌن فٍيَ قَرِ نُن حَمَ نَشَن نُ بِرَشِ عَ قْشْ رَ. عَبِمٍلٍكِ نَشَ بٍيرَ سُشُ عَ بّلّشّ. عَ نَشَ وُرِ سَلٌنيِ ندٍ سّفّ، عَ عَ سَ عَ كْن مَ. نَ شَنبِ، عَ نَشَ عَ قَلَ حَمَ بّ نَشَن نُ بِرَشِ عَ قْشْ رَ، «وٌ بَرَ عَ تٌ ﭑ نَشَن نَبَشِ؟ وٌ قَن شَ نَ مْولِ رَبَ مَقُرٍن مَقُرٍن.» 49حَمَ بِرِن نَشَ وُرِ سَلٌنيِ كٍرٍن كٍرٍن سّفّ، عٍ قَ بِرَ عَبِمٍلٍكِ قْشْ رَ. عٍ نَشَ نَ وُرِيٍ تِ نَ سَلِدٍ سٌدٍ دّ رَ، عٍ قَ تّ سٌ، عٍ مِشِ بِرِن فَن. سِكٍمِكَ وُلُ كٍرٍن، فِنّيٍ نُن شّمّيٍ، نَشَ سْنتْ نَ كِ.
50نَ دَنفِ شَنبِ، عَبِمٍلٍكِ نَشَ سِفَ تٍبٍتِ، عَ شَ مّننِكَيٍ فٍرٍ. عَ تٌ يٌنكِندٍ يَءِلَن مّننِ، عَ نَشَ نْ تٍبٍتِ رَ. 51مَكَنتَدٍ عِتٍشِ ندٍ نُ نَ تَا تَفِ، شّمّيٍ نُن فِنّيٍ نَشَ سَ عٍ نْشُن مّننِ، عَ نُن تَا كُنتِفِيٍ. عٍ نَشَ نَ بَلَن عٍ شُن مَ، عٍ تِشِ نَ قَرِ.
52عَبِمٍلٍكِ تٌ مّننِ لِ، عَ نَشَ مَكْرّ عَ نَادّ رَ عَلَكٌ عَ شَ تّ سَ نَ مَ. 53نَ نَن لَن فِنّ ندٍ نَشَ مّنفِ دِن سٍ فّمّ دَاشِ سِن عَبِمٍلٍكِ شُنيِ، عَ شُنيِ نَشَ بْو. 54عَبِمٍلٍكِ نَشَ عَ قَلَ عَ شَ قٌنِكٍ بّ، نَشَن نُ عَ شَ فٍرٍ سٌسٍ شَنِنمَ، عَ نَشّ، «عِ شَ سَنتِدّفّمَ بَ عَ تّي عِ، عِ شَ ﭑ نَحْن، عَلَكٌ مِشِ نَشَ عَ قَلَ فِنّ نَن ﭑ قَشَشِ.» نَ كُي نَ قٌنِكٍ نَشَ عَ سْشْ سَنتِدّفّمَ رَ، عَ عَ قَشَ. 55عِسِرَيِلَ شّمّيٍ تٌ عَ تٌ عَبِمٍلٍكِ بَرَ قَشَ، عٍ بِرِن نَشَ فبِلٍن عٍ شْنيِ.
56نَ كُي عَلَ عَبِمٍلٍكِ شَ وَلِ كٌبِ رَفبِلٍن نّ عَ مَ، عَ نَشَن نَبَ عَ بَبَ رَ، عَ شُنيَ تٌنفٌ سٌلٌقٍرٍ قَشَقٍ رَ. 57عَلَ نَ تْورّ بِرِن نَفبِلٍن نّ سِكٍمِكَيٍ مَ عٍ شَ كٌبِحَ سَرٍ رَ. يٍرُبَالِ شَ دِ شّمّ يٌتَمِ شَ دَنكّ نَشَ عٍ بِرِن نَيَرَبِ.