عِسِرَيِلَ شَ سّرّشّ كَنَشِيٍ عَ شَ يُنُبِيٍ شَ قٍ رَ
1مَسٍنيِ نَشٍيٍ فٌرٌ عَمٌسُ شَ دِ عٍسَيِ مَ، يُدَيَ نُن دَرِ سَلَمُ شَ قٍ رَ، يُدَيَ مَنفّيٍ عٌسِيَسِ، يٌتَمِ، عَشَسِ، نُن شٍسٍكِيَ شَ وَشَتِ.
2عَلَتَلَ نَن مَسٍنيِ تِقٍ،
كٌورٍ نُن بْشِ بِرِن شَ عٍ تُلِ مَتِ عَ رَ.
عَلَتَلَ نَشّ،
«ﭑ بَرَ دِيٍ شُرُ، ﭑ عٍ رَ مْ،
كْنْ عٍ بَرَ مُرُتَ ﭑ مَ.
3نِنفٍ يَتِ عَ كَنيِ كٌلٌن،
سٌقَلٍ قَن عَ كٌلٌن عَ كَنيِ دٌنسٍ سَمَ عَ بّ دّننَشّ.
كْنْ عِسِرَيِلَ تَن مُ سٍسٍ كٌلٌن،
ﭑ مَ حَمَ مُ سٍسٍ قَهَامُشِ.»
4حَشَنكَتّ نَ يِ حَمَ يُنُبِتْي بّ،
نَشَن يُنُبِ كٌتٍ شَنِنمَ،
نَشَن قِندِشِ قٍ حَاشِ رَبَيٍ رَ،
نَشَن قِندِشِ دِ مُرُتَشِيٍ رَ.
عٍ بَرَ مّ عَلَتَلَ رَ،
عٍ عِسِرَيِلَ شَ سّنِيّنتْي مَبٍرٍ،
عٍ عٍ كٌبٍ رَ سٌ عَ رَ.
5وٌ نَ حَشَنكَتّ قٍنقٍ مُنقٍ رَ؟
وٌ تٌندِشِ فبِلٍندٍ عَلَتَلَ مَ مُنسٍ مَ؟
وٌ بَرَ قُرَ وٌ شُنيِ مَ، وٌ تْورْشِ وٌ بْحّ مَ.
6كٍلِقٍ وٌ سَنيِ مَ هَن وٌ شُنيِ،
وٌ شَ قٍقٍ مُ لَنشِ.
وٌ شَ قِيٍ يَ مُ عِشَشِ، عٍ مُ مَشِرِشِ، تُرٍ يٌ مُ سَشِ عٍ مَ.
7وٌ شَ بْشِ بَرَ كَنَ، وٌ شَ تَايٍ بَرَ فَن.
سِ فبّتّيٍ نَ وٌ شَ دَشَمُي دٌنقٍ وٌ يَ شْرِ،
عٍ نَ عَ بِرِن تٌنفٌقٍ عٍ يّتّ بّ.
8سِيٌنِ تَا نَ عَ كٍرٍنيِ مَ عَلْ بَفٍ دِ شّ تَفِ،
عَلْ لٍيلٍ نَشَن تِشِ مّرّ مَ،
عَلْ تَا نَشَن نَبِلِنشِ يَشُييٍ رَ.
9شَ عَلَتَلَ سّنبّمَ مُ مِشِ ندٍيٍ رَكِسِ وٌن بّ نُ،
وٌن بَرَ لُ نُ عَلْ سٌدٌ مَ نُن فٌمٌرَ تَايٍ.
10وٌ وٌ تُلِ مَتِ عَلَتَلَ شَ مَسٍنيِ رَ،
وٌ تَن نَشٍيٍ مَنِيَشِ سٌدٌ مَ كُنتِفِيٍ رَ.
وٌ شَ وٌن مَرِفِ عَلَتَلَ شَ سّرِيّ رَ مّ،
وٌ تَن نَشٍيٍ لُشِ عَلْ فٌمٌرَ حَمَ.
11عَلَتَلَ نَشّ،
«ﭑ مُنسٍ رَبَمَ وٌ شَ سّرّشّ وُيَشِيٍ رَ؟
ﭑ بَرَ لُفَ يّشّ كٌنتٌنيِ سّرّشّيٍ رَ،
ﭑ بَرَ لُفَ شُرُ سٍ بْرّفّشِيٍ تُرٍ رَ.
تُورَيٍ، يّشّييٍ نُن سِ كٌنتٌنيِيٍ وُلِ مُ رَقَن ﭑ مَ.
12ندٍ وٌ شِلِشِ قَقٍ رَ ﭑ مَ هْرْ مْبَنشِ تّتّ كُي، تِقٍ رَ ﭑ يَ عِ؟
13وٌ بَ قَقٍ هَدِيَ قُقَقُ رَ.
سُرَيِ شِرِ مُ رَقَن ﭑ مَ قٍقٍ مَ.
وٌ شَ كِكٍ نّينّ سَلِيٍ، وٌ شَ مَلَبُي لْشْييٍ، وٌ شَ مَلَنيِيٍ، نُن وٌ شَ سَلِيٍ شُنفبٍيٍ،
عٍ سٍسٍ مُ رَقَنشِ ﭑ مَ.
14ﭑ وٌ شَ كِكٍ نّينّ سَلِيٍ شْنشِ،
وٌ شَ سَلِ بِرِن بَرَ ﭑ بْحّ رَحَاشُ ﭑ مَ.
15وٌ نَ وٌ بّلّشّيٍ عِتَلَ سَلِ كُي تّمُي نَشّ،
ﭑ نَ ﭑ يَ رَفَلِمَ نّ عَلَكٌ ﭑ نَشَ قَ عَ تٌ.
هَلِ وٌ مَشَندِيٍ بِرَ عٍ بٌورٍ قْشْ رَ،
ﭑ مُ عٍ رَ مّمَ، بَرِ مَ قَشّتِيٍ نَن وٌ رَ.
16وٌ لُ قٍ قِيشّ كُي، وٌ وٌ يّتّ رَ سّنِيّن،
وٌ بَ يُنُبِيٍ رَبَقٍ ﭑ يَ عِ.
17وٌ وٌ مَتِنكَن قٍ قَنيِ رَبَدٍ،
وٌ لُ تِنشِنيِ كُي،
وٌ مِشِ كٌبِيٍ مَكِيتِ،
وٌ كِرِدِيٍ نُن كَاحّ فِنّيٍ شُن مَقَلَ.»
18عَلَتَلَ نَشّ، «وٌ قَ، وٌن شَ وْيّن.
هَلِ وٌ شَ يُنُبِيٍ تٌ بَرَ وٌ مَنْشْ،
وٌ نْمَ قِيشّدٍ قْين.
هَلِ عٍ سَ شْسِ نّ عَلْ فَرّ فبٍيلِ،
عٍ نْمَ نّ قِيشّدٍ عَلْ شُرُ سٍ قِيشّ قَتٍ مَشَبٍ.
19شَ وٌ تِن وٌ تُلِ مَتِدٍ ﭑ نَ،
وٌ يِ بْشِ دَشَمُي دٌنمَ نّ،
20كْنْ شَ وٌ سَ تٌندِ ﭑ نَتِنمّدٍ،
سَنتِدّفّمَ نَن وٌ سْنتْمَ.»
عَلَتَلَ شُي نَن نَ كِ.
21يِ تَا لُشِ نّ عَلْ فِنّ نَشَن نُ دُفُتّفّشِ عَ شَ مْرِ مَ
عَ قَ مّ عَ رَ، عَ قِندِ لَنفٌي فِنّ رَ.
عَ سِنفٍ عَ نُ تِنشِن عَ قَنيِ رَ،
كْنْ يَكْسِ عَ بَرَ قِندِ قَشَتِ رَ؟
22عِ شَ فبٍتِ بَرَ قِندِ سٍ كَنَشِ رَ،
عِ شَ وّنِ بَرَ سُنبُ يٍ رَ.
23عِ شَ مَنفّيٍ بَرَ مُرُتَ، عٍ قِندِ مُحّتِيٍ رَ،
بُحَ تِنشِنتَرٍ رَقَن نَشٍيٍ مَ.
نَ كُي عٍ مُ كِرِدِيٍ مَلِمَ،
عٍ مُ كِيتِ قَنيِ سَمَ كَاحّ فِنّ شَ تْورّ شَ قٍ رَ.
24عَلَتَلَ سّنبّمَ شُي نَن يَ، نَ شَ قٍ رَ.
عِسِرَيِلَ مَرِفِ عَلَ سّنبّمَ نَشّ،
«ﭑ حَشَنكَتّ دْشْمَ نّ ﭑ فٍرٍقَيٍ مَ،
ﭑ نَ ﭑ فبٍ حْشْ ﭑ يَشُييٍ مَ.
25ﭑ فبِلٍنمَ نّ ﭑ يِ سَ رَ عِ مَ عَ شْرْشْي رَ،
ﭑ عِ رَ سّنِيّن عَلْ فبٍتِ فبِ بَمَ كِ نَشّ تّ رَ،
عَلَكٌ عِ شَ بَ تِنشِنتَرٍيَ مَ.
26ﭑ كِيتِسَ تِنشِنشِيٍ تِمَ نّ وٌ شُن عَلْ سِنفٍ،
ﭑ مَرَ سِمَ قَنيِيٍ لُمَ نّ وٌ تَفِ عَلْ تّمُي دَنفِشِ.
نَ دَنفِ شَنبِ، عِ شِلِ قَمَ نّ قَلَدٍ
‹تَا تِنشِنشِ نَشَن دُفُتّفّشِ.›»
27سِيٌنِ شُن سَرَ مَ نّ تِنشِنيِ رَ،
تُوبِ مِشِيٍ كِسِمَ نّ تِنشِنيِ سَابُي رَ.
28كْنْ فبَلٌي فٌرٌ مَ نّ مُرُتّلَيٍ نُن يُنُبِتْييٍ مَ،
هَلَكِ لُ مِشِيٍ قْشْ رَ، نَشٍيٍ عٍ كٌبٍ سٌمَ عَلَتَلَ رَ.
29وٌ قَمَ نّ يَافِدٍ قْتْنيِ رَ وٌ نُ كُيٍ بَتُمَ دّننَشّ.
وٌ يَافِ بٍلٍبٍلٍ سْتْمَ نّ نَ يِرٍيٍ شَ قٍ رَ.
30وٌ قَمَ نّ لُدٍ عَلْ وُرِ بِلِ لِسِشِ،
يٍ مُ نَ نَشَن مَ.
31سّنبّمَ سّنبّ حْنمَ نّ،
عَ تَن نُن عَ شَ وَلِ بِرِن فَن،
عَ رَكِسِمَ يٌ مُ لُ نَ.