دِ سِنفٍ سّرِيّ
1عَلَتَلَ نَشَ عَ مَسٍن مُنسَ بّ، 2«وٌ شَ دِ سِنفٍ بِرِن قِ ﭑ مَ، عَ قِندِ مِشِ رَ، عَ قِندِ شُرُ سٍ رَ. ﭑ تَن نَن فبٍ نَ عِسِرَيِلَكَيٍ بِرِن شَ دِ سِنفٍيٍ رَ.»
3مُنسَ نَشَ عَ قَلَ حَمَ بّ، «وٌ شَ رَتُ تٌ لْشْي مَ سَلِ رَ، بَرِ مَ عَلَتَلَ سّنبّ نَن وٌ رَ مِنِشِ مِسِرَ بْشِ مَ كٌنيِيَ كُي. وٌ نَشَ لّبِنِ يٌ دٌن نَ لْشْي. 4وٌ مِنِشِ تٌ عَبِبِ كِكٍ نَن نَ. 5عَلَتَلَ نَ وٌ رَ سٌ بْشِ كُي، عَ نَشَن لَايِدِشِ وٌ بٍنبَيٍ بّ، كَنَانكَيٍ، شِتِكَيٍ، عَمٌرِكَيٍ، هِوِكَيٍ نُن يٍبُسُكَيٍ سَبَتِشِ دّننَشّ، شِحّ نُن كُمِ شّلّمَ بْشِ نَشَن مَ، وٌ شَ تَامِ لّبِنِتَرٍ سَلِ رَبَ نَ كِكٍ رَ. 6نَ سَلِ وَشَتِ وٌ شَ تَامِ لّبِنِتَرٍ فبَنسَن دٌن شِ سٌلٌقٍرٍ بُن مَ. نَ شِ سٌلٌقٍرٍ ندٍ، وٌ شَ سَلِ رَبَ عَلَتَلَ شَ بِنيّ بُن مَ. 7نَ شِ سٌلٌقٍرٍ بُن مَ تَامِ لّبِنِتَرٍ نَن دٌنمَ. لّبِنِ يٌ نَشَ لُ عِسِرَيِلَكَ ندٍ شْنيِ. 8نَ لْشْي وٌ شَ يِ سَلِ شَ قٍ قَتَنقَسِ وٌ شَ دِيٍ بّ، وٌ قَ عَ قَلَ، ‹ﭑ يِ سَلِ رَبَمَ نّ، بَرِ مَ عَلَتَلَ بَرَ ﭑ نَمِنِ مِسِرَ بْشِ رَ.› 9يِ سَلِ لُمَ نّ وٌ بّ عَلْ تْنشُمَ نَشَن سَشِ وٌ بّلّشّ مَ، شَ نَ مُ تْنشُمَ نَشَن سَشِ وٌ تِفِ مَ، عَلَكٌ وٌ نَشَ نّيمُ عَلَتَلَ شَ سّرِيّ مَ. 10وٌ شَ يِ سَلِ رَبَ عَ وَشَتِ حّ بِرِن نَ.»
11«عَلَتَلَ نَ وٌ رَ سٌ كَنَانكَيٍ شَ بْشِ مَ، عَ عَ قِ وٌ مَ عَلْ عَ لَايِدِشِ وٌ تَن نُن وٌ بٍنبَيٍ بّ كِ نَشّ، 12وٌ شَ وٌ شَ دِ شّمّ سِنفٍ بِرِن قِ عَلَتَلَ مَ، عَ نُن وٌ شَ شُرُ سٍيٍ شَ دِ شّمّ سِنفٍ. وٌ شَ دِ شّمّمَ سِنفٍ بِرِن قِندِشِ عَلَتَلَ نَن فبٍ رَ. 13وٌ نْمَ يّشّي شَ نَ مُ عَ رَ سِ قِدٍ وٌ شَ سٌقَلٍ شَ دِ سِنفٍ حْشْي رَ، شَ نَ مُ عَ رَ وٌ شَ عَ كٌبٍ فِرَ، عَ شَ قَشَ. وٌ شَ وٌ شَ دِ سِنفٍ قَن شُن سَرَ يّشّي رَ. 14شَ عَ سَ لِ وٌ شَ دِ ندٍ وٌ مَشْرِنمَ عَ وٌ يِ قٍ رَبَمَ قٍ نَشَن مَ، وٌ شَ عَ يَابِ، ‹عَلَتَلَ سّنبّ نَن وٌن نَمِنِشِ كٌنيِيَ كُي مِسِرَكَيٍ يِ رَ. 15قِرَوُنَ تٌ تٌندِ مُشُ بّحِندٍ مُشُ شَ سِفَ، عَلَتَلَ نَشَ مِسِرَ دِ سِنفٍ بِرِن قَشَ مِشِيٍ نُن شُرُ سٍيٍ يَ مَ. نَ نَن عَ رَ وٌن شُرُ سٍيٍ شَ دِ سِنفٍ بِرِن قِمَ عَلَتَلَ مَ سّرّشّ رَ، عَ نُن وٌن مَ دِ شّمّ سِنفٍ بِرِن شُن سَرَ مَ نّ يّشّي رَ.› 16نَ لُمَ نّ وٌ بّ عَلْ تْنشُمَ نَشَن سَشِ وٌ بّلّشّ مَ، شَ نَ مُ تْنشُمَ نَشَن سَشِ وٌ تِفِ مَ، بَرِ مَ عَلَتَلَ سّنبّ نَن وٌ رَ مِنِشِ مِسِرَ بْشِ مَ كٌنيِيَ كُي.»
كٍلِقٍ مِسِرَ
17قِرَوُنَ تٌ عِسِرَيِلَ حَمَ بّحِن، عَلَتَلَ مُ عٍ شُن تِ قِلِسِتَ بْشِ كِرَ رَ، هَلِ نَ كِرَ نَن تٌ سْونّيَ، بَرِ مَ عَ عَ قَلَ نّ، «شَ حَمَ فٍرٍ لِمَ كِرَ شْن مَ، عٍ نَتّ مَسَرَ مَ نّ، عٍ قَ فبِلٍن مِسِرَ.» 18نَ كُي عَلَتَلَ نَشَ حَمَ يَ رَقِندِ فبٍنفبٍرٍنيِ كِرَ مَ شُلُنيُمِ بَا مَبِرِ. عِسِرَيِلَكَيٍ نَشَ مِنِ مِسِرَ عٍ شَ فٍرٍ سٌسٍيٍ رَ عٍ يِ رَ. 19مُنسَ نَشَ يُسُقُ شْرِيٍ قَن شَنِن، بَرِ مَ يُسُقُ نُ بَرَ عِسِرَيِلَ شَ دِيٍ رَكَلِ نَ قٍ مَ، عَ قَلَقٍ رَ، «ﭑ عَ كٌلٌن، عَلَتَلَ قَمَ نّ وٌ مَلِدٍ. نَ تّمُي وٌ شَ ﭑ شْرِيٍ شَنِن وٌ شُن مَ يِرٍ فبّتّ.»
20عِسِرَيِلَكَيٍ نَشَ كٍلِ سُكْتِ، عٍ سَ يٌنكِن عٍتَمَ فبٍنفبٍرٍنيِ قْلْشِ دّننَشّ. 21عَلَتَلَ نَن نُ تِشِ عٍ يَ رَ. يَنيِ رَ عَ نَشَ عٍ رَحّرّ نُشُي رَ، كْي رَ عَ نَشَ عٍ رَحّرّ تّ دّشّ رَ كٌورٍ مَ، نَشَن نُ كُيٍ عِيَلَنمَ عٍ بّ. نَ كِ عٍ نُ نْمَ حّرّدٍ كْي نُن يَنيِ رَ. 22لْشْ يٌ لْشْ نَ نُشُي نُ تِشِ عٍ يَ رَ يَنيِ رَ، نَ تّ قَن نُ تِشِ عٍ يَ رَ كْي رَ.