سَمَرِ فِنّ ندٍ نُن سَمَرِكَيٍ دَنشَنِيَقٍ عِسَ مَ
1عِسَ نَشَ عَ كٌلٌن عَ قَرِ سّنِيٍ بَرَ عَ مّ، عَ قْشِرَبِرّيٍ نَ وُيَقٍ، عَ مَن نَ مِشِيٍ شُنشَقٍ يٍ شْورَ دَنفِ يَيَ رَ. 2كْنْ عَ قَ لِ عِسَ يّتّ شَ مُ نُ مِشِيٍ شُنشَمَ يٍ شْورَ، عَ قْشِرَبِرّيٍ نَن نُ عَ رَبَمَ. 3عِسَ تٌ رَكٌلٌن نَ قٍ مَ، عَ نَشَ كٍلِ يُدَيَ، عَ فبِلٍن فَلِلٍ بْشِ مَ.
4نَ بِيَاسِ كُي، عَ نُ لَن عَ شَ سَمَرِ بْشِ عِفِرِ سِفَقٍ رَ فَلِلٍ. 5عَ نَشَ سَمَرِ تَا ندٍ لِ نَشَن شِلِ سُكَرُ، دّننَشّ مَكْرّ شّ رَ، يُوِقِيٍ بٍنبَ يَشُبَ نَشَن قِ عَ شَ دِ يُسُقُ مَ. 6يَشُبَ شَ كْلْنيِ نَ مّننِ نّ. عِسَ تٌ نُ بَرَ تَفَن عَ شَ بِيَاسِ كُي، عَ نَشَ عَ مَفٌرٌ نَ كْلْن دّ رَ. يَنيِ تَفِ نَن نُ عَ رَ.
7سَمَرِ فِنّ ندٍ تٌ قَ يٍ بَدٍ، عِسَ نَشَ عَ قَلَ عَ بّ، «ﭑ كِ يٍ، ﭑ شَ عَ مِن.» 8عَ عَ لِشِ عِسَ قْشِرَبِرّيٍ نُ بَرَ سِفَ دٌنسٍ سَرَدٍ تَا كُي. 9فِنّ نَشَ عَ قَلَ عِسَ بّ، «عِ تَن يُوِقِ، ﭑ تَن سَمَرِ فِنّ. عِ ﭑ مَشْرِنمَ يٍ مِن دَاشِ مَ مُنقٍ رَ؟» فِنّ نَ قَلَ نّ بَرِ مَ يُوِقِيٍ نُن سَمَرِكَيٍ مُ سٍسٍ مَسَرَ مَ عٍ بٌرٍ تَفِ. 10عِسَ نَشَ عَ قَلَ، «شَ عِ سَ عَ كٌلٌن نُ، عَلَ وَ مَ عِ كِقٍ نَشَن نَ، عِ تَن نَن عَ مَكُلَمَ كِسِ يٍ رَ نُ، عَ قَ نَ قِ عِ مَ. شَ عِ سَ عَ كٌلٌن نُ مِشِ نَشَن عَ قَلَقٍ عِ بّ يِ كِ، ‹ﭑ كِ يٍ رَ،› عِ تَن قَن عَ مَكُلَمَ نّ يٍ رَ نُ نَشَن عِ رَكِسِمَ.» 11فِنّ نَشَ عَ مَشْرِن، «ﭑ بَ، يٍ بَسٍ يٌ مُ عِ يِ رَ، يِ كْلْنيِ قَن تِلِن. عِ قَ نَ كِسِ يٍ سْتْمَ مِندٍن؟ 12كَ عِ تَن دَنفِ مُشُ بٍنبَ يَشُبَ رَ؟ عَ تَن نَن يِ كْلْنيِ قِ مُشُ مَ. عَ تَن يّتّ بَرَ عَ يٍ مِن، عَ نُن عَ شَ دِيٍ، عَ نُن عَ شَ فْورّ.» 13عِسَ نَشَ عَ يَابِ، «نَشَن يٌ يِ كْلْن يٍ مِن، يٍ شْلِ مَن فبِلٍنمَ عَ سُشُ رَ. 14كْنْ نَشَن يٍ مِنمَ ﭑ نَشَن قِمَ عَ مَ، يٍ شْلِ مُ عَ سُشُمَ سْنْن. نَ يٍ قِندِ مَ دُلٌنيِ نَن نَ عَ بْحّ مَ، عَ فبٌ عَ عِ، عَ قِندِ عَبَدَن كِسِ رَ.» 15فِنّ نَشَ عَ قَلَ عَ بّ، «ﭑ بَ، نَ يٍ قِ ﭑ مَ، عَلَكٌ يٍ شْلِ نَشَ ﭑ سُشُ، ﭑ نَشَ قَ يٍ بَدٍ سْنْن.»
16عِسَ نَشَ عَ قَلَ عَ بّ، «سِفَ عِ سَ عِ شَ مْرِ شِلِ، وٌ قَ بٍ.» 17فِنّ نَشَ عَ يَابِ، «ﭑ مُ دْشْشِ شّمّ شْن.» عِسَ نَشَ عَ قَلَ، «عِ نْندِ نَن قَلَشِ، عَ عِ مُ دْشْشِ شّمّ شْن. 18عِ بَرَ دْشْ شّمّ سُولِ بِرِن شْن مَ، عِ مَن نُن شّمّ نَشَن عَ رَ يِ تّمُي، قُتِ مُ وٌ تَفِ. نَ تَن، عِ نْندِ نَن قَلَشِ.»
19فِنّ نَشَ عَ قَلَ عِسَ بّ، «عَوَ، ﭑ بَرَ عَ كٌلٌن قَ، عَ نَمِحْنمّ نَن نَ عِ رَ. 20مُشُ بٍنبَيٍ عَلَ بَتُ يِ فٍيَ نَن قَرِ، كْنْ وٌ تَن يُوِقِيٍ عَ قَلَمَ عَ قٌ عَلَ شَ بَتُ دَرِ سَلَمُ نّ.» 21عِسَ نَشَ عَ قَلَ عَ بّ، «ﭑ مَ دِ، عِ شَ لَ ﭑ نَ، وَشَتِ نَ قَقٍ بَبَ عَلَ مُ بَتُمَ يِ فٍيَ مَ، عَ مُ بَتُمَ دَرِ سَلَمُ قَن. 22وٌ تَن سَمَرِكَيٍ، وٌ سَلِمَ، كْنْ وٌ مُ عَلَ كٌلٌن. مُشُ تَن يُوِقِيٍ، مُشُ سَلِمَ، مُشُ مَن عَلَ كٌلٌن، بَرِ مَ عَلَ شَ كِسِ قَتَنمَ يُوِقِيٍ نَن نَ. 23كْنْ وَشَتِ نَ قَقٍ، عَ حَن بَرَ عَ لِ، بَبَ عَلَ بَتُلَيٍ عَ بَتُمَ عَ نْندِ كِ مَ عٍ شَشِلِ قِيشّ نَن نَ. بَبَ عَلَ وَ مَ نَ بَتُلَ مْولِيٍ نَن شْن مَ. 24عَلَ قِندِشِ شَشِلِ نَن نَ. عَ بَتُلَيٍ لَن نّ عٍ شَ عَ بَتُ عٍ شَشِلِ قِيشّ نَن نَ عَ نْندِ كِ مَ.»
25فِنّ نَشَ عَ قَلَ عَ بّ، «ﭑ عَ كٌلٌن عَ عَل مَسِيهُ قَقٍ، عَلَ شَ مِشِ سُفَندِشِ. عَ تَن نَ قَ، عَ قٍ بِرِن تَفِ رَبَمَ نّ وٌن بّ.» 26عِسَ نَشَ عَ قَلَ عَ بّ، «ﭑ تَن نَن نَ رَ، ﭑ تَن عَلَ شَ مِشِ سُفَندِشِ نَن وْيّنقٍ عِ بّ يِ كِ.»
27عِسَ قْشِرَبِرّيٍ تٌ عِسَ لِ، عَ نَ وْيّنقٍ نَ فِنّ رَ، عٍ دّ نَشَ عِشَرَ، كْنْ عٍ مُ عَ مَشْرِن، «عِ وَ مَ مُنسٍ شْن» شَ نَ مُ عَ رَ «وٌ نَ مُنسٍ قَلَقٍ؟»
28فِنّ نَشَ عَ شَ قّحّ لُ نَا، عَ سِفَ تَا كُي، عَ سَ عَ قَلَ مِشِيٍ بّ، 29«وٌ قَ. وٌ شَ شّمّ ندٍ مَتٌ نَشَن بَرَ ﭑ مَ كّوَلِ بِرِن قَلَ ﭑ بّ، عَ مُ ﭑ كٌلٌن. عَلَ شَ مِشِ سُفَندِشِ نَ عَ رَ بَ، كَ؟» 30نَ كُي، تَاكَيٍ نَشَ مِنِ سِفَقٍ رَ عِسَ يِرٍ.
31نَ وَشَتِ بُن مَ، عِسَ قْشِرَبِرّيٍ نُ وْيّنقٍ عَ بّ، عٍ عَ قَلَ، «كَرَ مْشْ، عِ دّفٍ.» 32كْنْ عِسَ نَشَ عَ مَسٍن عٍ بّ، «بَلٌي نَ ﭑ تَن يِ رَ، وٌ تَن مُ نَشَن كٌلٌن.» 33عَ قْشِرَبِرّيٍ نَشَ عٍ بٌرٍ مَشْرِن، «ثٍ، مِشِ ندٍ نَن قَشِ دٌنسٍ رَ عَ شْن مَ بَ؟» 34عِسَ نَشَ عَ مَسٍن عٍ بّ، «ﭑ تَن مَ بَلٌي قِندِشِ ﭑ شّيمَ وَشْنقٍ رَبَقٍ نَن نَ، ﭑ شَ عَ شَ وَلِ رَكَمَلِ عَ بَرَ نَشَن سٌ ﭑ يِ. 35وٌ تَن مُ عَ قَلَمَ شّ، ‹كِكٍ نَانِ نَن لُشِ بٍينُن شّ شَبّ شَ عَ لِ›؟ ﭑ شَ عَ قَلَ وٌ بّ، وٌ وٌ يَ رَ سِفَ، وٌ شّيٍ مَتٌ، عٍ رَفبٍيلِشِ كِ نَشّ. شّ شَبَ تّمُي بَرَ عَ لِ. 36شّ شَبّ حَن بَرَ عَ شَ وَلِ سَرٍ سْتْ قْلْ. عَ شَ وَلِ عَ نِيَمَ نّ مِشِ شَ كِسِ سْتْ عَبَدَن. نَ كُي، نَشَن شّ بِمَ نُن نَشَن شّ شَبَمَ، عٍ بِرِن لُمَ سّيوّ كٍرٍن نّ. 37يِ مَسٍنيِ قِندِشِ نْندِ نَن نَ، ‹مِشِ ندٍ شّ فَرَنسَنمَ، فبّتّ عَ شَبَمَ.› 38ﭑ تَن وٌ شّيشِ شّ شَبَدٍ نّ، وٌ مُ نَشَن نَوَلِشِ. مِشِ فبّتّيٍ نَن وَلِشِ، كْنْ وٌ تَن نَن عٍ شَ وَلِ رَحْنيِ تٌمَ.»
39سَمَرِكَ نَشٍيٍ نُ سَبَتِشِ نَ تَا كُي، عٍ فبٍفبٍ نَشَ دَنشَنِيَ عِسَ مَ نَ فِنّ شَ سٍيدٍحْشْيَ شَ قٍ رَ، عَ تٌ عَ قَلَ، «ﭑ بَرَ كّوَلِ نَشَن بِرِن نَبَ، عَ بَرَ عَ بِرِن تَفِ رَبَ ﭑ بّ.» 40نَ كُي، سَمَرِكَيٍ تٌ قَ عِسَ يِرٍ، عٍ نَشَ عَ مَيَندِ عَ شَ لُ عٍ شْنيِ. عِسَ نَشَ شِ قِرِن نَبَ نَا. 41مِشِ فبٍفبٍ مَن نَشَ دَنشَنِيَ عَ شَ مَسٍنيِ سَابُي رَ. 42عٍ نَشَ عَ قَلَ نَ فِنّ بّ، «سِنفٍ مُشُ نُ دَنشَنِيَشِ عِ تَن نَن شَ وْيّنيِ شَ قٍ رَ، كْنْ يَكْسِ مُشُ تَن يّتّ بَرَ عَ شُي مّ. مُشُ بَرَ عَ كٌلٌن قَ، عَ يِ قِندِشِ دُنِحَ رَكِسِمَ نَن يَتِ رَ.»
عِسَ شّمّ ندٍ شَ دِ رَيَلَنقٍ
43نَ شِ قِرِن دَنفِ شَنبِ، عِسَ نَشَ كٍلِ نَا، عَ سِفَ فَلِلٍ، 44بَرِ مَ عَ تَن يَتِ عَ عَ مَسٍن نّ عَ نَمِحْنمّ سٍسٍ يٌ مُ بِنيَمَ عَ شْنيِ. 45عَ تٌ سٌ فَلِلٍ، نَاكَيٍ نَشَ عَ رَ سّنّ عَ قَنيِ رَ، بَرِ مَ عٍ قَن نُ بَرَ سَيَمَلٍكّ دَنفِ سَلِ رَبَ دَرِ سَلَمُ، عٍ عَ شَ كَابَنَكٌي تٌ، عَ نَشٍيٍ رَبَ نَا.
46نَ كُي، عِسَ مَن نَشَ سٌ كَانَ، فَلِلٍ بْشِ مَ، عَ يٍ مَقِندِ وّنِ رَ دّننَشّ. مَنفّ شَ وَلِكّ شُنفبٍ ندٍ نُ نَ نَا، نَشَن شَ دِ نُ قُرَشِ كَثّرّنَمُ. 47عَ تٌ عَ مّ عَ عِسَ بَرَ قَ فَلِلٍ كٍلِقٍ يُدَيَ، عَ نَشَ سِفَ عَ يِرٍ، عَ عَ مَشَندِ عَ شَ قَ عَ شَ دِ شّمّ رَيَلَن نَشَن نُ سَشِ سَيَ قُرٍ مَ. 48عِسَ نَشَ عَ قَلَ عَ بّ، «وٌ تَن مُ دَنشَنِيَمَ قٍوٌ، قٌ وٌ تْنشُمَيٍ نُن كَابَنَكٌي تٌ!» 49مَنفّ شَ وَلِكّ نَشَ عَ مَيَندِ، «مَرِفِ، تَلُ ﭑ شْنيِ بٍينُن ﭑ مَ دِ شَ قَشَ!» 50عِسَ نَشَ عَ يَابِ، «سِفَ، عِ شَ دِ بَرَ كِسِ.» نَ وَلِكّ نَشَ لَ عِسَ شَ مَسٍنيِ رَ، عَ نَشَ سِفَ. 51عَ نُ نَ فبِلٍنقٍ تّمُي نَشّ، عَ شَ كٌنيِيٍ نَشَ عَ رَلَن، عٍ عَ قَلَ عَ بّ، «عِ شَ دِ بَرَ كِسِ!» 52عَ قَن نَشَ عٍ مَشْرِن، «عَ قِسَ مُن تّمُي؟» عٍ نَشَ عَ يَابِ، «عَ قَتٍ شِنبٍلِشِ شٌرٌ يَنيِ تَفِ حْندْن.» 53نَ دِ بَبَ نَشَ عَ كٌلٌن عَ شَ دِ يَلَن قْلْ كَبِ عِسَ عَ قَلَ عَ بّ تّمُي نَشّ، «عِ شَ دِ بَرَ كِسِ.» نَ نَن عَ رَ، نَ شّمّ نُن عَ شَ دٍنبَيَ بِرِن نَشَ دَنشَنِيَ عِسَ مَ.
54نَ نَشَ قِندِ عِسَ شَ تْنشُمَ مَكَابَشِ قِرِن ندٍ رَ. عَ عَ رَبَ فَلِلٍ نّ، عَ تٌ فبِلٍن كٍلِقٍ يُدَيَ.