دَوُدَ شَ يُنُبِ
عَلَ مَشَندِ
1دَوُدَ شَ بّيتِ بّيتِبَيٍ شَ مَنفّ بّ. 2عَننَبِ نَتَن وْيّنقٍ دَوُدَ بّ عَ يُنُبِ رَبَ بَتِسٍبَ رَ تّمُي نَشّ.
3عَلَ، هِننّ ﭑ نَ عَلْ عِ دَرِشِ عَ رَ كِ نَشّ.
دِحّ ﭑ مَ قٍ حَاشِ مَ عِ شَ بْحّ قَنيِ سَابُي رَ.
4عِ شَ ﭑ نَسّنِيّن ﭑ مَ قٍ كٌبِ بِرِن مَ.
عِ شَ ﭑ مَ يُنُبِ شَقَرِ.
5ﭑ بَرَ ﭑ مَ يُنُبِ كٌلٌن.
ﭑ مُ نْمَ نّيمُدٍ نَ مَ.
6ﭑ نَ قٍ حَاشِ رَبَشِ عِ كٍرٍن نَن نَ.
ﭑ نَشَن نَبَشِ عَ مُ رَقَن عِ مَ.
عِ نَ ﭑ مَكِيتِ،
نْندِ لُمَ نّ عِ بّ.
7ﭑ بَرِشِ يُنُبِ قٍ نَن كُي،
كَبِ نفَ قُرِ بَ نّينّ رَ.
8كْنْ نْندِ نَ لُ مِشِ بْحّ كُي،
نَ نَن نَقَن عِ مَ.
نَ لْننِ مَسٍن ﭑ بّ.
9ﭑ سّنِيّن هِسٌثِ بُرّشّ رَ،
عَلَكٌ ﭑ شَ قِيشّ.
ﭑ سّنِيّن،
عَلَكٌ ﭑ شَ قِيشّ قْين عَلْ شِحّ.
10حّلّشِنيِ نُن سّيوّ قِ ﭑ مَ،
عَلَكٌ ﭑ بْحّ شَ سَ.
11عِ كٌبٍ تِ ﭑ مَ يُنُبِ رَ،
عِ شَ ﭑ مَ قٍ كٌبِ بِرِن بَ ﭑ مَ.
12ﭑ مَرِفِ عَلَ، ﭑ بْحّ مَقِندِ بْحّ سّنِيّنشِ رَ،
شَشِلِ قَنيِ قِ ﭑ مَ.
13عِ نَشَ ﭑ مَكُيَ عِ يَ تٌدٍ رَ.
عِ نَشَ عِ شَشِلِ سّنِيّنشِ بَ ﭑ يِ رَ.
14كِسِ سّيوّ نُن لِمَنِيَ قِ ﭑ مَ
نَشَن ﭑ مَلِمَ.
15ﭑ عِ شَ كِرَ مَسٍنمَ نّ عِ مَتَندِلَيٍ بّ،
عَلَكٌ عٍ مَن شَ بِرَ عِ قْشْ رَ.
16ﭑ نَكِسِمَ عَلَ،
ﭑ بَرَ مِشِ قَشَ.
يَندِ، ﭑ شُنسَرَ،
عَلَكٌ ﭑ شَ عِ شَ قٍ قَنيِ مَسٍن.
17ﭑ مَرِفِ، نَ نِيَ ﭑ بّ،
ﭑ شَ عِ تَنتُ.
18سّرّشّ مُ رَقَن عِ مَ،
شَ نَ مُ عَ رَ ﭑ نَ بَمَ نّ عِ بّ نُ.
عِ مُ وَ مَ سّرّشّ فَن دَاشِ شْن.
19سّرّشّ قَنيِ قِندِشِ يّتّ مَفٌرٌي نَن نَ.
عَلَ وَ مَ يِ سّرّشّ مْولِ نَن شْن مَ.
20عِ شَ هِننّ سِيٌنِ رَ،
عِ شَ دَرِ سَلَمُ تّتّ رَكٍلِ.
21نَ تّمُي عِ حّلّشِنمَ نّ سّرّشّ تِنشِنشِ
نُن سّرّشّ فَن دَاشِ رَ.
نَ تّمُي تُورَيٍ نَن بَمَ سّرّشّ رَ عِ شَ سّرّشّبَدٍ.