حَشَنكَتّ نَ دَرِ سَلَمُ بّ
1حَشَنكَتّ نَ عَرِيّلِ تَا بّ،
مَنفّ دَوُدَ نُ سَبَتِشِ دّننَشّ.
وٌ شَ نُ وٌ شَ سَلِيٍ رَبَ رَ حّ يٌ حّ عَلْ وٌ دَرِشِ عَ رَ كِ نَشّ،
2كْنْ ﭑ قَمَ نّ عَرِيّلِ شَ تّتّ رَبِلِندٍ،
عَ قَ تْورْ فٍرٍ كُي، عَ شَ لُ عَلْ سّرّشّبَدٍ نَشَن دّشّشِ.
3ﭑ قَمَ نّ وٌ رَبِلِندٍ ﭑ مَ سْورِيٍ رَ،
مُشُ شَ وَلِ رَبَ وٌ شَ تّتّ كَنَدٍ.
4وٌ شَ قٍ قَمَ نّ مَفٌرٌدٍ هَن عَ لُ عَلْ وٌ شُي نَ مِنِقٍ بْشِ نَن بُن مَ.
وٌ شَ وْيّنيِ مَكْلِكْلِمَ نّ كٍلِقٍ فَبُرِ كُي.
5وٌ يَشُييٍ وُيَمَ نّ عَلْ شُبُتَنيِ،
عٍ شَ سْورِيٍ لُمَ نّ عَلْ مَالٍ لَفِ قٌيٍ مَ.
كْنْ نَ تّمُي يَ مَفِرّ كٍرٍن كُي،
6عَلَتَلَ سّنبّمَ قَمَ نّ سٍسَرِنيِ نُن فَلَنيِ رَ،
بْشِ سّرّنمَ نّ، تُرُننَادّ فٌرٌ مَ نّ، تّ مِنِمَ نّ.
7نَ تّمُي عَرِيّلِ يَشُييٍ لْيمَ نّ كٍرٍن نَ،
عٍ قَ لُ عَلْ شِيٍ حَاشِ مِشِ رَشُنُمَ تّمُي نَشّ.
نَ سْورِيٍ نُن عٍ شَ فٍرٍ سٌ وَلِ بِرِن حْنمَ نّ قٍوٌ.
8عَ لُمَ نّ عَلْ كَامّتْي نَشَن شِيٍ سَ عَ نَ عَ دّفٍقٍ،
كْنْ عَ قَ شُنُ كَامّ رَ عَ مَ.
عَ لُمَ نّ عَلْ مِشِ نَشَن شِيٍ سَ عَ نَ يٍ مِنقٍ،
كْنْ عَ قَ شُنُ يٍ شْلِ رَ عَ مَ.
عَ لُمَ نَ كِ نّ نَ سْورِ فَلِ شَ قٍ رَ نَشَن نَ سِيٌنِ مِشِيٍ فٍرٍقٍ.
9عَ شَ قِندِ وٌ بّ تّرّننَ رَ، وٌ دّ شَ عِشَرَ.
وٌ وٌ يَيٍ رَشِ، وٌ شَ قِندِ دْنشُييٍ رَ.
وٌ نَ دَفَلَنقٍ سِيسِ دَاشِ، كْنْ بٍيرٍ مُ عَ رَ.
10عَلَتَلَ نَن وٌ رَشِشِ،
عَ بَرَ وٌ شَ نَمِحْنمّيٍ يَيٍ بَلَن،
عَ بَرَ وٌ شَ سٍمَتٌي شُنيِ مَكٌتٌ.
11يِ لَامَتُنيِ لُشِ نّ عَلْ سّبّلِ مَتْنشُمَشِ. نَ سٌمَ مِشِ نَن يِ نَشَن قَتَ عَ شَرَندٍ عَلَكٌ عَ شَ عَ شَرَن، كْنْ عَ قَ عَ يَابِ، «ﭑ مُ نْمَ عَ شَرَندٍ وٌ بّ، بَرِ مَ عَ بَلَنشِ تْنشُمَ رَ.» 12شَ نَ مُ عَ رَ، عَ لُشِ عَلْ سّبّلِ نَشَن سٌمَ مِشِ شَرَنتَرٍ يِ رَ عَلَكٌ عَ شَ عَ شَرَن، كْنْ عَ قَ عَ يَابِ، «ﭑ تَن مُ قَتَ عَ شَرَندٍ.»
13عَلَتَلَ شَ مَسٍنيِ نَن يَ؛
«يِ حَمَ بَرَ قَ، عٍ شَ ﭑ مَتْشْ عٍ دّ رَ،
كْنْ عٍ بْحّ تَن مَكُيَ ﭑ نَ.
عٍ شَ بَتُي قِندِشِ عَدَ مَدِيٍ شَ يَامَرِ رَتِنمّقٍ نَن تُن نَ.
14نَ نَن عَ تٌشِ ﭑ مَن يِ حَمَ دّ عِشَرَ مَ نّ كَابَنَكٌي رَ.
لْننِلَيٍ شَ لْننِ مُ فّمَ نَ كٌلٌندٍ،
قٍ كٌلٌنيِيٍ مُ سٌمَ نَ قٍ كُي.
15حَشَنكَتّ نَ مِشِيٍ بّ نَشٍيٍ عٍ نْشُنمَ عَلَتَلَ مَ نَتّ كٌبِ رَبَقٍ رَ.
عٍ تٌ عٍ شَ وَلِيٍ رَبَمَ دِ مِ نَن كُي،
عٍ مَحْشُن، ‹ندٍ مُشُ تٌشِ؟ ندٍ عَ كٌلٌن مُشُ نَشَن نَبَمَ؟›
16وٌ شَ دَشُحَ سّنبّ فبٌ.
بّندّ نْمَ لُدٍ عَلْ عَ يَءِلَنمَ؟
سٍ يَءِلَنشِ نْمَ عَ قَلَدٍ عَ يَءِلَنمَ بّ، عَ مُ ﭑ يَءِلَنشِ؟
قّحّ نْمَ عَ قَلَدٍ عَ يَءِلَنمَ بّ، عَ شَشِلِ مُ قَن؟»
17عَ فبٍ مُ لُشِ لِبَن وٌندِ شَ مَسَرَ شّ رَ،
شّ قَن شَ مَسَرَ وٌندِ رَ.
18نَ لْشْي، تُلِ شْرِيٍ كِتَابُي شَرَنمَيٍ شُي مّمَ نّ،
دْنشُييٍ قَن مِنِمَ نّ دِ مِ شْورَ، عٍ سٍ تٌ.
19يّتّ مَفٌرٌي سّيوَ مَ نّ عَلَتَلَ رَ،
مِسِكِينّيٍ سّيوَ مَ نّ عِسِرَيِلَ شَ سّنِيّنتْي رَ.
20قُنمَلَ مُ لُمَ نَا سْنْن،
مِشِ مَيٍلٍ لْيمَ نّ.
قٍ كٌبِ رَبَيٍ لْيمَ نّ.
21عٍ مِشِ تْوحّفّمَ وُلٍ رَ، عٍ فَنتَنيِ عِتَلَمَ تِنشِنتْييٍ بّ.
22يَشُبَ بْنسْي مَرِفِ شَ مَسٍنيِ نَن يَ نَشَن عِبُرَهِمَ شُن سَرَشِ؛
«تٌ دَنفِ شَنبِ، يَشُبَ بْنسْي مُ يَافِمَ سْنْن،
عَ بْحّ مُ رَحَاشُمَ عَ مَ.
23عَ شَ دِيٍ نَ ﭑ مَ وَلِيٍ تٌ عٍ تَفِ،
عٍ ﭑ شِلِ بِنيَمَ نّ،
عٍ عٍ مَفٌرٌ مَ نّ يَشُبَ شَ سّنِيّنتْي بّ،
عٍ فَاشُمَ نّ عِسِرَيِلَ مَرِفِ عَلَ يَ رَ.
24مِشِ عِقُشِ قَهَامُي سْتْمَ نّ،
سْنشْي رَتٍيٍ تِنمَ نّ لْننِ رَ.»