AKS

مَرَكِ 11

عِسَ سٌقٍ دَرِ سَلَمُ

مَتِيُ ٢١‏؛١ ٬ ١١، لُكِ ١٩‏؛٢٨ ٬ ٤٤، يَيَ ١٢‏؛١٢ ٬ ١٦

1عٍ تٌ مَكْرّ دَرِ سَلَمُ رَ، عٍ نَ بٍتِقَفٍ نُن بٍتَنِ يِرٍ لِ، عٌلِوِ فٍيَ مَبِرِ، عِسَ نَشَ عَ قْشِرَبِرّ مِشِ قِرِن شّي، 2عَ عَ قَلَ عٍ بّ، «وٌ شَ سٌ تَا كُي نَشَن نَ يَرٍ. وٌ نّقّ سٌ نَا، وٌ سٌقَلٍ لَنمَ لِمَ عَ شِرِشِ نَ، مِشِ سِنفٍ مُ نُ دْشْ نَشَن قَرِ. وٌ شَ عَ قُلُن، وٌ قَ عَ رَ ﭑ شْن مَ. 3شَ مِشِ ندٍ قَ سَ وٌ مَشْرِن، ‹وٌ عَ قُلُنقٍ مُنقٍ رَ،› وٌ شَ عَ يَابِ، ‹مَرِفِ نَن هَيِ نَ عَ مَ. عَ عَ رَفبِلٍنمَ يَ.›»

4عٍ تٌ سِفَ، عٍ نَشَ عَ لِ سٌقَلٍ لَنمَ شِرِشِ نَادّ ندٍ سّيتِ مَ كِرَ دّ رَ. عٍ تٌ عَ قُلُن، 5مِشِ نَشٍيٍ نُ تِشِ نَا، عٍ نَشَ عٍ مَشْرِن، «وٌ مُنسٍ رَبَقٍ، وٌ تٌ يِ سٌقَلٍ لَنمَ قُلُنشِ؟» 6عٍ نَشَ عٍ يَابِ عَلْ عِسَ عَ مَسٍن عٍ بّ كِ نَشّ. نٍيٍ قَن نَشَ عٍ لُ عٍ شَ سِفَ. 7عٍ تٌ قَ سٌقَلٍ لَنمَ رَ عِسَ شْن، عٍ نَشَ عٍ شَ دٌنمَيٍ سَ عَ قَرِ، عِسَ قَ عَ مَفٌرٌ عَ مَ.

8مِشِ فبٍفبٍ نَشَ عٍ شَ دٌنمَيٍ عِتَلَ كِرَ شْن مَ، ندٍيٍ قَن نَشَ قّنسّ سّفّ، عٍ نٍيٍ قَن سَ كِرَ شْن مَ عِسَ بِنيَقٍ رَ. 9حَمَ نَشٍيٍ نُ حّرّقٍ عِسَ يَ رَ، عَ نُن نَشٍيٍ نُ حّرّقٍ عَ شَنبِ رَ، عٍ بِرِن نُ عٍ شُي عِتٍقٍ، عٍ عَ قَلَ،

«تَنتُي نَ وٌن نَكِسِمَ بّ!

بَرَكَ نَ عَ بّ نَشَن قَقٍ مَرِفِ شِلِ رَ!

10بَرَكَ نَ وٌن بَبَ دَوُدَ شَ مَنفّيَ بّ نَشَن نَ قَقٍ!

تَنتُي نَ وٌن نَكِسِمَ بّ نَشَن نَ كٌورٍ مَ!»

11عِسَ تٌ سٌ دَرِ سَلَمُ، عَ نَشَ سِفَ هْرْ مْبَنشِ كُي. عَ تٌ فّ نَا رَبِلِنيِ بِرِن مَتٌدٍ، عٍ نُن عَ قْشِرَبِرّ مِشِ قُ نُن قِرِنيِيٍ نَشَ سِفَ بٍتَنِ، بَرِ مَ كْي نُ بَرَ سٌ.

عِسَ شْرّ بِلِ دَنكَقٍ

مَتِيُ ٢١‏؛١٨ ٬ ٢٢

12نَ كُيٍ عِبَ، عٍ تٌ نُ كٍلِقٍ بٍتَنِ، كَامّ نَشَ عِسَ سُشُ. 13عَ تٌ شْرّ بِلِ ندٍ تٌ، عَ ندٍدِ مَكُيَشِ عٍ رَ، عَ بُرّشّ نَ عَ كْن نَ، عَ نَشَ سَ نَ مَتٌ، شَ عَ نْمَ عَ بٌفِ ندٍ مَسْتْدٍ. كْنْ عَ تٌ مَكْرّ شْرّ بِلِ رَ، عَ مُ سٍسٍ لِ عَ كْن نَ قٌ عَ بُرّشّ، بَرِ مَ شْرّ بٌفِ تّمُي مُ نُ عَ لِشِ. 14عِسَ نَشَ عَ قَلَ شْرّ بِلِ بّ، «مِشِ يٌ نَشَ عِ تَن بٌفِ دٌن سْنْن!» عَ قْشِرَبِرّيٍ قَن نَشَ عَ شُي مّ.

عِسَ سَرٍ مَتِيٍ كٍرِقٍ هْرْ مْبَنشِ كُي

مَتِيُ ٢١‏؛١٢ ٬ ١٧، لُكِ ١٩‏؛٤٥ ٬ ٤٨، يَيَ ٢‏؛١٣ ٬ ١٦

15عٍ تٌ سِفَ دَرِ سَلَمُ، عِسَ نَشَ سٌ هْرْ مْبَنشِ كُي، عَ سَرٍ مَتِيٍ نُن سَرٍ سٌي كٍرِ قْلْ، نَشٍيٍ نُ نَ نَا. عَ نَشَ كْبِرِ مَسَرّيٍ شَ تٍيبِلِيٍ نُن فَنبّ مَتِيٍ شَ دْشْسٍيٍ رَبِرَ. 16عَ مَن مُ تِن مِشِ يٌ شَ دَنفِ هْرْ مْبَنشِ سَنسَنيِ كُي، عٍ نَ قِندِ عٍ شَ كٌتٍ مَشَنِن كِرَ رَ. 17عَ نَشَ عٍ كَوَندِ، عَ عَ مَسٍن، «عَ مُ سّبّشِ شّ، ‹ﭑ مَ بَنشِ شِلِ قَلَمَ نّ، سِ بِرِن مَ سَلِدٍ بَنشِ›؟ كْنْ وٌ تَن بَرَ عَ قِندِ مُحّتِيٍ دْشْدٍ رَ.» 18سّرّشّدُبّ كُنتِفِيٍ نُن سّرِيّ كَرَ مْشْيٍ تٌ يِ قٍ مّ، عٍ نَشَ قّيرّ قٍن قْلْ عٍ نْمَ عِسَ قَشَدٍ كِ نَشّ. عٍ نُ فَاشُشِ عَ يَ رَ، بَرِ مَ عَ نُ حَمَ بِرِن دّ عِشَرَ مَ عَ شَ كَوَندِ رَ. 19نُنمَرٍ تٌ سٌ، عِسَ نُن عَ قْشِرَبِرّيٍ مَن نَشَ كٍلِ تَا كُي.

شْرّ بِلِ شَرٍ نُن عَلَ مَشَندِقٍ

مَتِيُ ٢١‏؛٢٠ ٬ ٢٢

20نَ كُيٍ عِبَ، عٍ تٌ نُ دَنفِقٍ، عَ قْشِرَبِرّيٍ نَشَ شْرّ بِلِ تٌ عَ بَرَ شَرَ هَن عَ سَنكٍ. 21ثِيّرِ تٌ رَتُ، عَ نَشَ عَ قَلَ عِسَ بّ، «كَرَ مْشْ، عَ مَتٌ، عِ شْرّ بِلِ نَشَن دَنكَ، عَ بَرَ شَرَ فبٍن.»

22عِسَ نَشَ عَ مَسٍن عٍ بّ، «وٌ شَ دَنشَنِيَ عَلَ مَ. 23ﭑ شَ نْندِ قَلَ وٌ بّ، شَ وٌ عَ قَلَ يِ فٍيَ بّ، ‹كٍلِ بٍ، عِ سَ سِن بَا مَ،› شَ نَ كَنيِ مُ سِيكّ عَ بْحّ مَ، عَ لَ عَ رَ، عَ نَشَن قَلَشِ عَ رَبَمَ نّ، نَ قٍ رَبَمَ نّ نَ كَنيِ بّ. 24نَ نَن عَ رَ، ﭑ شَ عَ قَلَ وٌ بّ، وٌ نَ عَلَ مَشَندِ قٍقٍ رَ، شَ وٌ لَ عَ رَ عَ وٌ بَرَ عَ سْتْ، وٌ عَ سْتْمَ نّ. 25‏-26وٌ نَ تِ عَلَ مَشَندِدٍ تّمُي نَشّ، شَ قٍ ندٍ نَ وٌ نُن مِشِ ندٍ تَفِ، وٌ شَ دِحّ عَ مَ، عَلَكٌ وٌ بَبَ نَشَن نَ عَرِيَننَ، عَ قَن شَ دِحّ وٌ شَ يُنُبِيٍ مَ.»

عِسَ وَلِمَ ندٍ شَ يَامَرِ مَ؟

مَتِيُ ٢١‏؛٢٣ ٬ ٢٧، لُكِ ٢٠‏؛١ ٬ ٨

27عٍ مَن نَشَ سٌ دَرِ سَلَمُ. عِسَ تٌ نُ عَ حّرّقٍ هْرْ مْبَنشِ كُي، سّرّشّدُبّ كُنتِفِيٍ، سّرِيّ كَرَ مْشْيٍ، نُن يُوِقِيٍ شَ قٌرِيٍ نَشَ قَ عَ يِرٍ، 28عٍ عَ مَشْرِن، «عِ يِ قٍيٍ رَبَمَ ندٍ شَ يَامَرِ مَ؟ ندٍ يِ سّنبّ قِشِ عِ مَ، عِ شَ يِ قٍيٍ رَبَ؟» 29عِسَ نَشَ عٍ يَابِ، «ﭑ قَن شَ وٌ مَشْرِن قٍ كٍرٍن مَ. شَ وٌ ﭑ يَابِ، ﭑ عَ قَلَمَ نّ وٌ بّ ﭑ يِ قٍيٍ رَبَمَ نَشَن مَ يَامَرِ مَ. 30يَيَ تٌ نُ مِشِيٍ شُنشَمَ يٍ شْورَ، عَلَ نَن عَ شّيشِ بَ، كَ عَدَ مَ؟ وٌ ﭑ يَابِ.»

31نَ كُي عٍ نَشَ سٌ وْيّنقٍ عٍ بٌرٍ تَفِ، «شَ وٌن نَ عَ يَابِ، وٌن نَشّ، ‹عَلَ،› عَ عَ قَلَمَ نّ وٌن بّ، ‹مُنقٍ رَ وٌ مُ قَ لَ عَ رَ؟› 32كْنْ وٌن نَ عَ يَابِ، ‹عَدَ مَ،› نَ قَن قِندِ مَ قٍ نَن نَ وٌن بّ.» عٍ نُ فَاشُشِ حَمَ نَن يَ رَ، بَرِ مَ بِرِن يَيَ مَحْشُنشِ نَمِحْنمّ يَتِ نَن نَ. 33نَ كُي، عٍ نَشَ عِسَ يَابِ، «مُشُ مُ عَ كٌلٌن.» عِسَ قَن نَشَ عَ مَسٍن عٍ بّ، «ﭑ قَن مُ عَ قَلَمَ وٌ بّ ﭑ يِ قٍيٍ رَبَمَ نَشَن مَ يَامَرِ مَ.»