عَلَ شَ نَتّيٍ مِشِ حَاشِيٍ شَ قٍ رَ
عَننَبِ يٍرٍ مِ شَ مَسٍنيِ عَلَتَلَ بّ
1«عَلَتَلَ، عِ تِنشِن،
كْنْ ﭑ وَ مَ عِ مَشْرِنقٍ عِ شَ نَتّ ندٍ شَ قٍ رَ.
مُنقٍ رَ مِشِ حَاشِيٍ شَ قٍ لُمَ سْونّيَ رَ؟
مُنقٍ رَ بْحّسَ نَ يَنقَنتٍيٍ بّ؟
2عِ تَن نَن عٍ دَاشِ، عِ تَن نَن عٍ بَلٌشِ.
عٍ سِفَمَ يَرٍ، عٍ قٍ رَبَمَ عٍ شَ دُنِحّءِفِرِ كُي.
عٍ عِ شِلِ قَلَمَ عٍ دّ رَ،
كْنْ عِ شَ قٍ مُ نَ عٍ بْحّ كُي.
3عَلَتَلَ، عِ ﭑ سٌندٌنيِ مَ قٍ كٌلٌن.
عِ شَ نَتّ تٌنفٌ مِشِ حَاشِيٍ قَشَقٍ رَ،
عَلْ يّشّي نَشٍيٍ شَنِنمَ عٍ كْن نَشَبَ يِرٍ.
4بْشِ لُمَ سُننُنيِ كُي هَن مُن لْشْي؟
تُنّ تٌندِ مَ قَدٍ هَن مُن تّمُي؟
سُبٍيٍ نُن شْنِيٍ نَ قَشَقٍ مِشِ شَ حَاشُحَ سَابُي رَ،
بَرِ مَ عٍ نَشّ، ‹عَلَ مُ مُشُ تٌمَ.›»
عَلَتَلَ شَ مَسٍنيِ عَننَبِ يٍرٍ مِ بّ
5«شَ عِ تَفَن عِ فِدٍ عَدَ مَدِيٍ يَ مَ،
عِ قَ عِ فِمَ دِ سٌي يَ مَ؟
شَ عِ بِرَ تَا كُي، عِ حّرّ مَ يُرُدّن وُلَ كُي دِ؟
6عِ نفَشَكٍرٍنيِ نَشٍيٍ كٍلِشِ عِ بَبَ شْنيِ،
عٍ قَمَ نّ عِ يَنقَدٍ، عٍ سْنشْي رَتٍ عِ مَ.
عِ نَشَ لَ عٍ شَ وْيّن حْشُنمّ رَ.
7ﭑ نَن ﭑ مَ بَنشِ بّحِنمَ نّ،
ﭑ نَن ﭑ مَ حَمَ رَبٌلٌمَ نّ،
ﭑ شَنُنتٍنيِيٍ قِ عٍ يَشُييٍ مَ.
8ﭑ نَ رَبَمَ نّ بَرِ مَ ﭑ مَ حَمَ بَرَ لُ
عَلْ يّتّ شَاحّ وُلَءِ.
ﭑ بَرَ عٍ شْن.
9ﭑ مَ حَمَ بَرَ لُ
عَلْ شْنِ مَشْنْشِ سّفّيٍ بِرَ مَ نَشَن قْشْ رَ.
‹وُلَءِ سُبٍيٍ، وٌ شَ قَ ﭑ مَ حَمَ سْنتْدٍ.›
10شُرُ سٍ دّ مَدٌنيِيٍ بَرَ ﭑ مَ لَاكْي كَنَ،
عٍ ﭑ مَ شّ قَنيِ مَبٌرٌن، عَ قِندِ يِرٍ شَرَشِ رَ.
11ﭑ مَ بْشِ بَرَ قِندِ فبَلٌي يِرٍ رَ.
عَ نَ سُننُنيِ كُي ﭑ يَ شْرِ،
سٍسٍ مُ قَنمَ مّننِ، مِشِ يٌ مُ كِنِكِنِمَ عَ مَ.
12سْورِ حَاشِيٍ نَ قَقٍ كٍلِقٍ فبٍنفبٍرٍن يِرٍ،
بَرِ مَ عَلَتَلَ بَرَ عَ رَفِرِ سَنتِدّفّمَ شَ بْشِ بِرِن لِ،
مِشِ يٌ نَشَ لُ بْحّسَ كُي.
13عٍ بَرَ سَنسِ شْرِ سِ،
كْنْ عٍ تُنبٍ فبَنسَن نَن سْتْمَ.
عٍ عٍ يّتّ رَتَفَنمَ نّ قُقَقُ.
عَلَتَلَ بَرَ شْنْ وٌ مَ،
نَ بِرِن شَ قِندِ يَافِ رَ وٌ بّ.»
عَلَتَلَ شَ مَسٍنيِ عِسِرَيِلَ يَشُييٍ بّ
14عَلَتَلَ بَرَ عَ مَسٍن،
«سِ نَشٍيٍ سَبَتِشِ عِسِرَيِلَ رَبِلِنيِ،
سِ نَشٍيٍ ﭑ مَ عِسِرَيِلَ حَمَ شَ بْشِ شُن نَكَنَمَ،
ﭑ نَشَن قِشِ عٍ مَ،
وٌ شَ عَ كٌلٌن ﭑ قَمَ نّ وٌ قَن كٍرِدٍ وٌ شْنيِ،
ﭑ قَ ﭑ مَ حَمَ بَ وٌ يِ رَ.
15ﭑ نَ فّ عٍ بَدٍ وٌ يِ رَ،
ﭑ مَن كِنِكِنِمَ نّ عٍ مَ،
ﭑ قَ عٍ رَفبِلٍن عٍ شَ بْشِ مَ نَشَن قِندِشِ عٍ كّ رَ.
16شَ نَ سِيٍ ﭑ مَ حَمَ شَ سّرِيّ مَتِنكَن،
عٍ قَ عٍ رَكَلِ ﭑ شِلِ رَ، ‹عَلَتَلَ حِحّ،›
ﭑ عٍ رَ سٌمَ نّ ﭑ مَ حَمَ يَ مَ.
عٍ نُ بَرَ ﭑ مَ حَمَ مَتِنكَن عٍ كَلِدٍ بَلِ شِلِ رَ،
ﭑ مَ حَمَ قَن نْمَ نّ عٍ مَتِنكَندٍ كَلِ رَ ﭑ شِلِ رَ.
17كْنْ شَ عَ سَ لِ نَ سِيٍ مُ عٍ تُلِ مَتِ ﭑ مَ مَسٍنيِ رَ،
ﭑ عٍ شُن نَكَنَمَ نّ، ﭑ قَ عٍ سْنتْ.»
عَلَتَلَ شَ مَسٍنيِ نَن نَ كِ.