AKS

عَيُبَ شَ تَرُشُِ 38

عَلَ شَ مَسٍنيِ سِنفٍ عَيُبَ بّ

«عَيُبَ، ﭑ يَابِ شَ عِ نْمَ»

1عَلَ نَشَ عَيُبَ يَابِ تُرُننَادّ قٌيٍ كُي،

عَ نَشّ،

2«ندٍ نَ ﭑ مَ وَلِيٍ يَ عِسٌقٍ عَ شَ شَشِلِتَرٍ وْيّنيِيٍ رَ؟

3عِ عِ تَفِ عِشِرِ فبٍن عَلْ فبَنفبَلَنيِ،

ﭑ شَ مَشْرِنيِ ندٍيٍ تِ عِ مَ،

عِ شَ ﭑ يَابِ.

4عِ نُ نَ مِندٍن ﭑ تٌ نُ دُنِحَ دَامَ؟

نَ قَلَ بَ شَ لْننِ كَنيِ نَ عِ رَ.

5عِ عَ كٌلٌن ندٍ دُنِحَ مَنِيَشِ؟

ندٍ عَ مَنِيّ لُوتِيٍ عِتَلَشِ؟

6دُنِحَ بُنيِ نَ مِندٍن؟

ندٍ فّمّ تِشِ دُنِحَ نَ نَشَن قَرِ؟

7ندٍ نَ رَبَ تُنبُييٍ تٌ نُ عٍ سّيوّ شُي عِتٍمَ،

مَلٍكّ بّيتِبَيٍ قَن تٌ نُ ﭑ شِلِ مَتْشْمَ؟»

8«ندٍ بَا نَادّيٍ بَلَن،

ﭑ تٌ عَ رَ مِنِ بْشِ مَ؟

9ﭑ تَن نَن نُشُي رَفٌرٌ عَ مَ،

ﭑ دِ مِ دُ سُ عَ شُن نَ،

10ﭑ عَ نَانِنيِ سَ عَلَكٌ عَ نَشَ دَنفِ مّننِ رَ.

11ﭑ تَن نَن دَندٍ سَ مْرْنيِيٍ بّ،

عَلَكٌ عٍ نَشَ تٍ، عٍ عَ رَدَنفِ عَ عِ.»

12«عِ بَرَ يَامَرِ قِ لْشْي كٍرٍن عِ شَ سِمَيَ كُي سُبَشّ شَ مِنِ،

13عَ شَ مِشِ حَاشِيٍ رَتّرّننَ، عَ عٍ مَكّنّن؟

14دُنِحَ بِرِن مَكّنّنمَ نّ سُبَشّ نَءِيَلَنيِ كُي،

عَ لُ عَلْ بّندّ بُندَ تْنشُمَ سَشِ نَشَن مَ.

عَ يِرٍ بِرِن تٌمَ نّ عَلْ دُفِ مَحِنفِشِ.

15كْنْ مِشِ حَاشِيٍ تَن بَرَ كُمَ نَءِيَلَنيِ رَ،

عٍ سّنبّ بَرَ كَنَ.»

16«عِ بَا يٍ كٍلِدٍ كٌلٌن؟

عِ بَرَ بَا بُنيِ لِ؟

17عِ بَرَ عَلِفِيَمَ سٌدٍ دّ تٌ؟

عِ بَرَ سَيَ نَادّ عِفبّ؟

18عِ دُنِحَ عِفبٌحَ كٌلٌن؟

عَ قَلَ ﭑ بّ شَ عِ نَ قٍ بِرِن كٌلٌن.»

19«نَءِيَلَنيِ كٍلِمَ مِندٍن؟

دِ مِ شْنيِ نَ مِندٍن؟

20عِ نَ يِرٍيٍ كٌلٌن؟

عِ نَا سِفَ كِرَ كٌلٌن؟

21شَ عِ نَ بِرِن كٌلٌن، عَوَ عِ حَن نُ بَرَ بَرِ،

عِ شَ سِمَيَ فبٌ.

22عِ بَلَبَلَنيِ رَفَتَدٍ كٌلٌن؟

عِ بَرَ نَ يِرٍ تٌ؟

23ﭑ نَ بَلَبَلَنيِ رَفَتَشِ تْورّ تّمُي نَن يَ رَ،

فٍرٍ تِ لْشْي يَ رَ.

24سٍيَمَكْنيِ كٍلِمَ مِندٍن عَ يٍنسٍن يّ؟

قٌيٍ نَشَن كٍلِمَ سٌفٍتٍدٍ، نَ عَ حّرّ مَ دُنِحَ مَ دِ؟

25ندٍ تُنّ كِرَ رَبْو مَ،

عَ سٍيَمَكْنيِ نُن فَلَنيِ يَمَرِ عٍ شَ مِنِ؟

26ندٍ عَ نِيَشِ تُنّ شَ بِرَ بْشِ مَ

مِشِ مُ نَ دّننَشّ عَلْ فبٍنفبٍرٍن يِرٍ؟

27ندٍ عَ نِيَشِ حٌوفٍ شَ بُلَ وُلَ عِ؟

28ندٍ قِندِشِ تُنّ بَبَ رَ؟

ندٍ شِنِ رَ مِنِمَ؟

29ندٍ بَلَبَلَنيِ دَاشِ نَشَن كٍلِمَ كٌورٍ مَ؟

30ندٍ عَ نِيَمَ بَا يٍ شَ شِنبٍلِ عَ شْرْشْ،

عَ قِندِ بَلَبَلَنيِ رَ،

عَ دُ سُ بَا شُن نَ عَ شْرْشْ عَلْ فّمّيٍ؟»

31«عِ تَن نَن تُنبُييٍ سَ كٌورٍ مَ،

كَنكَن شَ لُ عَ يِرٍ عَ تٌقَن كِ مَ؟

32عِ تَن نَن تُنبُييٍ رَ مِنِشِ عٍ وَشَتِ

عَلَكٌ عَدَ مَدِيٍ شَ نْ سُبٍ تْنشُمَيٍ تٌدٍ عٍ يَ مَ؟

33عِ كٌورٍ يَمَرِ كِ كٌلٌن؟

عِ بَرَ سٌ بْشِ يَءِلَن كِ كُي؟»

34«عِ قَتَ نُشُييٍ يَمَرِدٍ عَلَكٌ يٍ شَ بَنبَرَن يّ؟

35عِ قَتَ سٍيَمَكْنيِ يَمَرِدٍ عَلَكٌ عٍ شَ عِ شَ وَلِ رَبَ؟

عٍ لُمَ عِ شَ يَامَرِ بُن مَ، عَ قَلَقٍ رَ، ‹مُشُ نَ بٍ؟›

36ندٍ لْننِ رَ سٌشِ عَدَ مَدِ بْحّ كُي،

عَ عَ شَشِلِ دَا؟

37شَشِلِمَ مُندُن نْمَ نُشُي بِرِن كْنتِدٍ؟

ندٍ نْمَ يٍ رَفٌرٌدٍ كٍلِ كٌورٍ مَ،

38عَلَكٌ بْشِ شَ بُندَ، شُبٍ شَ قِندِ بٌورَ رَ؟»

39«يّتّيٍ نّ سَشِ كَامّ رَ عٍ مَ،

40عِ تَن نَن سُبٍ قِمَ عٍ مَ عٍ شَ كَامّ بَ؟

41شَشَيٍ فٌ، عٍ شَ دِيٍ نّ وَ مَ كٌورٍ مَ،

عِ تَن نَن عٍ بَلٌمَ؟»