عَلَ عَ شَ حَمَ شُنسَرَقٍ
1عَلَ شَ مَسٍنيِ نَن يَ؛
«وٌ شَ ﭑ مَ حَمَ مَدُندُ عٍ شَ تْورّ كُي.
2وٌ شَ عَ قَلَ دَرِ سَلَمُ بّ عَ عَ شَ حَشَنكَتّ بَرَ حْن،
عَ شَ يُنُبِيٍ سَرٍ بَرَ فّ قِدٍ،
عَ عَلَتَلَ بَرَ نَ رَفبِلٍن عَ مَ هَن دْشْ قِرِن.»
3مِشِ ندٍ نَ عَ شُي رَ مِنِقٍ فبٍنفبٍرٍن يِرٍ عَ قَلَقٍ رَ،
«وٌ شَ كِرَ يَءِلَن عَلَتَلَ بّ،
وٌ سَنكِرَ مَتِنشِن وٌ مَرِفِ يَ رَ.
4فُلُنبَ شَ عِتٍ، فٍيَ شَ عِفٌرٌ،
كِرَ حَاشِ شَ يَءِلَن عَ قَنيِ رَ.
5عَلَتَلَ شَ نْرّ مَكّنّنمَ نّ دَالِ بِرِن يَ شْرِ.»
عَلَتَلَ شَ مَسٍنيِ يَتِ نَن نَ كِ.
6مِشِ ندٍ بَرَ عَ قَلَ ﭑ بّ، «عِ شُي رَتٍ.»
ﭑ بَرَ عَ يَابِ، «ﭑ شَ مُنسٍ قَلَ؟»
عَ نَشّ، «عَدَ مَ شَ نْرّ لُشِ نّ عَلْ سَنسِيٍ.
7عٍ لِسِمَ نّ، عَلَتَلَ شَ قٌيٍ عٍ قُفٍ كَنَ.
عَدَ مَدِيٍ مَنِيَشِ سَنسِيٍ نَن نَ.
8سَنسِيٍ شَرَ مَ نّ، عٍ قُفٍ كَنَ،
كْنْ عَلَتَلَ تَن شَ مَسٍنيِ مُ كَنَمَ عَبَدَن.»
9سِيٌنِ، عِ شَ تٍ فٍيَ عِتٍشِ ندٍ قَرِ.
دَرِ سَلَمُ، عِ شَ عِ شُي عِتٍ سّنبّ رَ لِمَنِيَ كُي.
عَ قَلَ يُدَيَ تَايٍ بّ، «وٌ مَرِفِ عَلَ نَ بٍ.»
10مَرِفِ عَلَتَلَ نَ قَقٍ سّنبّ رَ، نْي شَنشِ عَ بّلّشّ عِ.
شُننَكٍلِ نَ عَ بّ.
11عَ مّينِمَ نّ عَ شَ شُرُ سٍيٍ مَ،
عَ عَ شَ يّشّ يْرّيٍ تٌنفٌمَ نّ، عَ عٍ سَ عَ كَنكٍ مَ،
عَ عٍ نفَيٍ رَفبّنفبّن.
12ندٍ بَا يٍ مَنِيَشِ عَ بّلّشّ كُي؟
ندٍ كٌورٍ وَلَشّ مَنِيَشِ؟
ندٍ دُنِحَ بّندّ مَنِيَشِ؟
ندٍ فٍيَيٍ دْشْشِ سِكٍيلِ رَ؟
13ندٍ عَلَتَلَ شَشِلِ كٌلٌن؟
ندٍ نْمَ مَرَ سِ قِدٍ عَ مَ؟
14ندٍ عَ يَمَرِ مَ؟ ندٍ عَ مَتِنكَنمَ؟
ندٍ قٍ كٌلٌنيِ مَسٍنمَ عَ بّ؟
ندٍ عَ مَسٍنمَ عَ بّ سٍ يَءِلَنمَ كِ نَشّ؟
15حَمَنّيٍ لُشِ نّ عَ بّ عَلْ سٍ شُنشُرِيٍ.
عَ عٍ رَكٍلِمَ نّ عَ قَنيِ رَ.
16لِبَن سُبٍ بِرِن نَلَنشِ مُ سّرّشّ فَن دَاشِ لِمَ نَشَن دَشَ عَ بّ،
لِبَن قْتْنيِ بٍلٍبٍلٍ مُ يٍفٍ لِمَ عَ شَ سّرّشّ فَنقٍ رَ.
17سٍسٍ مُ حَمَنّيٍ رَ عَ يَ عِ، عٍ قِندِشِ عَ بّ قٍ قُقَقُ نَن نَ.
18وٌ وَ مَ عَلَ مَنِيَقٍ ندٍ رَ؟
وٌ عَ مِسَالِمَ مُنسٍ رَ؟
19يِرَوَلِ كُيٍ نَن مَسٌلِمَ،
شَبُي شّيمَ رَدِن عَ مَ،
عَ قَ فبٍتِ يْلْنشْنيِيٍ يَءِلَن عَ كُيٍ فبَكُمَ نَشَن نَ.
20سٍتَرٍيٍ وُرِ ندٍ نَن قٍنمَ نَشَن مُ كَنَمَ مَقُرٍن مَقُرٍن،
عَ مِشِ قٍن نَشَن قَتَ عَ مَسٌلِدٍ عَلَكٌ عَ نَشَ بِرَ.
21وٌ مُ عَ كٌلٌن؟ وٌ مُ نَ قٍ مّشِ كَبِ تّمُي شْنكُيٍ؟
وٌ مُ نَ قَهَامُشِ كَبِ دُنِحَ دَا تّمُي؟
22عَ تَن نَن سَبَتِشِ دُنِحَ بِرِن شُن مَ.
دُنِحَ مِشِيٍ لُشِ نّ عَ بّ عَلْ كَتٌييٍ.
عَ تَن كٌورٍ وَلَشّ عِتَلَشِ نّ عَلْ دُفِ نَشَن سَمَ لٍيلٍ مَ.
23عَ تَن نَن مَنفّيٍ شُن نَكَنَمَ، عَ مِشِ شُنفبٍيٍ شَ قٍ مَفٌرٌ.
24عٍ لُشِ نّ عَلْ سَنسِ نَشَن سِ تٌ،
كْنْ بٍينُ عٍ شَ مْ، عَ قَ وُيٍنيِ رَدِن عٍ مَ نَشَن عٍ شَرَ مَ فبٍن.
نَ تّمُي قٌيٍ شُنفبٍ عٍ شَنِنمَ نّ عَلْ سّشّ شَرٍ.
25عَلَ سّنِيّنتْي شَ مَسٍنيِ نَن يَ؛
«وٌ ﭑ تَن عَلَ مَنِيَمَ ندٍ رَ؟
ﭑ مِسَالِشِ ندٍ بّ؟
26وٌ وٌ يَيٍ رَكٍلِ كٌورٍ مَ.
ندٍ نَ سٍ يَنبَشِيٍ دَاشِ؟
عَلَ نَن عٍ يَمَرِ مَ، عَ عٍ شِلِيٍ كٌلٌن.
عَ سّنبّ شَ سَابُي رَ، سٍسٍ مُ لُشِ عٍ مَ.»
27«نَ كُي، وٌ تَن ﭑ مَ حَمَ،
نَشَن قَتَنشِ يَشُبَ رَ، نَشَن قِندِشِ عِسِرَيِلَ رَ،
مُنقٍ رَ وٌ عَ قَلَمَ،
‹عَلَتَلَ مُ قٍ تٌشِ نَشَن دْشْشِ مُشُ مَ.
مُشُ مَرِفِ عَلَتَلَ مُ وَ مَ مُشُ فبٍ حْشْقٍ.›
28وٌ مُ عَ كٌلٌن؟ وٌ مُ نَ قٍ مّشِ؟
عَلَتَلَ قِندِشِ عَلَ نَن نَ كَبِ عَبَدَن،
عَ دُنِحَ يَتِ نَن دَاشِ عَ قْلّ رَ.
عَ مُ تَفَنمَ، دَنيِ مُ نَ عَ شَشِلِ مَ.
29عَ سّنبّ قِمَ نّ مِشِ تَفَنشِ مَ،
عَ لِمَنِيَ قِ سّنبّتَرٍيٍ مَ.
30هَلِ دِ مّدِيٍ عٍ تَفَنمَ، سّفّتَلَيٍ بِرَ مَ،
31كْنْ نَشٍيٍ عٍ شَشِلِ تِمَ عَلَتَلَ رَ،
نٍيٍ سّنبّ نّينّ سْتْمَ نّ، عٍ قَ تُفَن عَلْ سّفّيٍ.
عٍ عٍ حّرّ، عٍ عٍ فِ، عٍ مُ تَفَنمَ قٍقٍ مَ.»