فِنّ، دِ مّدِ، نُن سُبٍ مَفَاشُشِ
1تْنشُمَ بٍلٍبٍلٍ نَشَ مِنِ كٌورٍ مَ. سٌفٍ نُ نَ نَ فِنّ ندٍ رَبِلِنيِ، كِكٍ نُ نَ عَ سَنيِ بُن مَ، تُنبُي قُ نُن قِرِن نُ نَ عَ شُن نَ عَلْ مَنفّ كَتَنيِ. 2عَ نُ نَ فبٍلٍفبٍلٍقٍ تْورّ كُي، بَرِ مَ عَ نُ نَ دِ بَرِقٍ عَ تّيفّشِ نَشَن مَ.
3تْنشُمَ فبّتّ قَن نَشَ مِنِ كٌورٍ مَ. سُبٍ مَفَاشُشِ شُنفبٍ ندٍ نُ نَ، عَ فبٍيلِشِ عَلْ تّ، شُنيِ سٌلٌقٍرٍ نُ نَ عَ بّ، عَ نُن قٍرِ قُ. مَنفّ كَتَنيِيٍ نُ نَ عَ شُنيِ سٌلٌقٍرٍ بِرِن قَرِ. 4تُنبُي عِتَشُنشِ سَشَن نَ، عَ شُلِ نَشَ دِن نَ دْشْدٍ سَشَن ندٍ رَ، عَ عٍ وٌلِ بْشِ مَ.
سُبٍ مَفَاشُشِ نَشَ كٍلِ، عَ قَ تِ فِنّ يَ عِ نَشَن نُ نَ دِ بَرِقٍ، عَلَكٌ عَ شَ نَ دِيْرّ دٌن. 5فِنّ نَشَ دِ شّمّ بَرِ، نَشَن قَمَ سِ بِرِن يَمَرِدٍ عَ شْرْشْي رَ. فِنّ تٌ دِ بَرِ، نَ دِ نَشَ تٍ عَلَ يِرٍ، عَ شَ مَنفّ كِبَنيِ نَ دّننَشّ. 6فِنّ نَشَ عَ فِ، عَ سِفَ يِرٍ ندٍ فبٍنفبٍرٍنيِ مَ عَلَ نُ بَرَ نَشَن يَءِلَن عَ بّ، عَلَكٌ عَ شَ بَلٌ مّننِ شِ وُلُ كٍرٍن شِ كّمّ قِرِن نُن تٌنفٌ سٍننِ بُن مَ.
7فٍرٍ نَشَ مِنِ كٌورٍ مَ. مِنكَيِلُ نُن عَ شَ مَلٍكّيٍ نَشَ نَ سُبٍ مَفَاشُشِ نُن عَ شَ مَلٍكّيٍ فٍرٍ، 8كْنْ نَ سُبٍ مُ نْ مِنكَيِلُ نُن عَ شَ مَلٍكّيٍ رَ. نَ كُي، سُبٍ مَفَاشُشِ نُن عَ شَ مَلٍكّيٍ مُ نْ سَبَتِدٍ كٌورٍ مَ سْنْن. 9عٍ نَشَ نَ سُبٍ مَفَاشُشِ شُنفبٍ وٌلِ بْشِ مَ، عَ نُن عَ شَ مَلٍكّيٍ. عَ تَن نَن قِندِشِ نَ بْشِمَسٍ قٌرِ رَ، نَشَن شِلِ عِبُلِسَ، شَ نَ مُ عَ رَ سٍنتَنّ. عَ بَرَ دُنِحَ بِرِن مَدَشُ.
10نَ تّمُي، ﭑ نَشَ شُي عِتٍشِ مّ كٌورٍ مَ، عَ عَ قَلَمَ،
«يَكْسِ، كِسِ تّمُي بَرَ عَ لِ،
مُشُ مَرِفِ عَلَ سّنبّ نُن عَ شَ مَنفّيَ،
نُن عَ شَ مِشِ سُفَندِشِ شَ مَنفّيَ بَرَ قَ،
بَرِ مَ نَشَن نُ مُشُ نفَشَكٍرٍنيِيٍ كَلَمُمَ
مُشُ مَرِفِ عَلَ يَ عِ كْي نُن يَنيِ رَ،
نَ بَرَ بِرَ.
11مُشُ نفَشَكٍرٍنيِيٍ شُتُ سْتْشِ عَ مَ
يّشّييْرّ وُلِ نُن عٍ شَ سٍيدٍحْشْيَ نَن سَابُي رَ.
عٍ مُ كَنكَن عٍ شَ سِمَيَ مَ،
عٍ مُ فَاشُ قَشّ يَ رَ.
12نَ كُي، كٌورٍ نُن نَشٍيٍ سَبَتِشِ نَا،
عٍ شَ حّلّشِن.
كْنْ حَشَنكَتّ بَرَ لُ بْشِ نُن بَا مَ،
بَرِ مَ عِبُلِسَ بَرَ بِرَ وٌ مَبِرِ.
عَ شْنْشِ بَرِ مَ عَ بَرَ عَ كٌلٌن
عَ تّمُي فبٍفبٍ مُ لُشِ عَ بّ كْرّ.»
13سُبٍ مَفَاشُشِ تٌ عَ كٌلٌن، عٍ بَرَ عَ وٌلِ بْشِ مَ، عَ نَشَ بِرَ نَ فِنّ قْشْ رَ، نَشَن نَ دِ شّمّ بَرِ. 14كْنْ شَرُ مَ فَبُتٍنيِ نَشَ لُ نَ فِنّ بّ، عَلَكٌ عَ شَ تُفَن سِفَقٍ رَ فبٍنفبٍرٍنيِ مَ، عَ لُمَ بَلٌ رَ دّننَشّ وَشَتِ سَشَن نُن عَ تَفِ بُن مَ. مّننِ عَ نُ بَرَ مَكُيَ نَ بْشِمَسٍ رَ. 15كْنْ بْشِمَسٍ نَشَ شُرٍ رَ مِنِ عَ دّ كُي، عَ شَ فِنّ مَدُلَ. 16نَ تّمُي بْشِ نَشَ نَ شُرٍ يٍ مِن، سُبٍ مَفَاشُشِ نُ بَرَ نَشَن نَمِنِ عَ دّ كُي، عَلَكٌ عَ شَ نَ فِنّ رَكِسِ. 17سُبٍ مَفَاشُشِ تٌ شْنْ نَ فِنّ مَ، عَ نَشَ سِفَ نَ فِنّ بْنسْي دْنشْييٍ فٍرٍدٍ، نَشٍيٍ عَلَ شَ سّرِيّ رَبَتُمَ، عٍ مَن لَ عِسَ شَ سٍيدٍحْشْيَ رَ. 18نَ سُبٍ مَفَاشُشِ نَشَ تِ بَا دّ رَ مّيّنيِ قَرِ.