هْرْ مْبَنشِ شَ مِسَالِ
مَتِيُ ٢٤؛١ ٬ ٢، لُكِ ٢١؛٥ ٬ ٦
1عِسَ تٌ مِنِ هْرْ مْبَنشِ، عَ قْشِرَبِرّ كٍرٍن نَشَ عَ قَلَ عَ بّ، «كَرَ مْشْ، يِ بَنشِيٍ مَتٌ، عٍ تِشِ فّمّ شُنفبٍ نَشٍيٍ رَ، عٍ تِ كِ مَن تٌقَنشِ كِ نَشّ!» 2عِسَ نَشَ عَ يَابِ، «عِ يِ بَنشِ بٍلٍبٍلٍيٍ تٌشِ؟ يِ فّمّ كٍرٍن مُ لُمَ عَ بٌورٍ قَرِ بٍ، عَ بِرِن نَبِرَ مَ نّ.»
مَرَتَنتَنيِ، تْورّ، نُن حَشَنكَتّ
مَتِيُ ٢٤؛٣ ٬ ١٤، لُكِ ٢١؛٧ ٬ ١٩
3عِسَ تٌ نُ مَفٌرٌشِ عٌلِوِ فٍيَ قَرِ، عَ يَ رَقِندِشِ هْرْ مْبَنشِ مَ، ثِيّرِ، يَكِ، يَيَ، نُن عَندِرٍ نَشَ عَ مَشْرِن عٍ دٌرٌ مَ، 4«نَ قٍ سَ رَبَمَ مُن تّمُي؟ عَ مَن سَ كٌلٌنمَ تْنشُمَ مُندُن مَ عَ عَ قَقٍ رَبَدٍ؟»
5عِسَ نَشَ سٌ وْيّنقٍ عٍ بّ، «وٌ وٌ مّينِ. 6مِشِ وُيَشِ قَمَ ﭑ تَن شِلِ قَلَدٍ عٍ يّتّ شُن مَ عَ قَلَقٍ رَ، ‹ﭑ تَن نَن نَ عَلَ شَ مِشِ سُفَندِشِ رَ!› نَ كُي، عٍ قَمَ مِشِ فبٍفبٍ رَتَنتَندٍ. 7وٌ نَ فٍرٍ قٍ مّ، وٌ نَ فٍرٍ ندٍ شِلِ مّ، وٌ نَشَ كْنتْقِلِ، بَرِ مَ قٌ نَ قٍ مْولِيٍ شَ رَبَ. نَ شَ مُ قِندِ مَ دُنِحَ رَحْنيِ رَ سِندٍن. 8سِيٍ كٍلِمَ نّ عٍ بٌورٍ شِلِ مَ، حَمَنّيٍ عٍ بٌورٍ فٍرٍ. بْشِ قَمَ نّ سّرّندٍ يِرٍ وُيَشِ، كَامّ قَن سِن بْشِ مَ. نَ بِرِن قِندِ مَ مَنتْورْلِ قْلّ نَن نَ.»
9«وٌ شَ مّينِ وٌ يّتّ مَ، بَرِ مَ عٍ وٌ سٌمَ نّ كِيتِسَيٍ يِ رَ، عٍ وٌ بْنبْ سَلِدٍ بَنشِيٍ كُي. وٌ تِمَ نّ فٌمِنَيٍ نُن مَنفّيٍ يَ عِ ﭑ تَن مَ قٍ رَ، وٌ قِندِ مَ نّ ﭑ مَ سٍيدٍيٍ رَ عٍ تَن بّ. 10قٌ شِبَارُ قَنيِ شَ كَوَندِ سِ بِرِن بّ سِندٍن. 11عٍ نَ وٌ شَنِن وٌ مَكِيتِدٍ تّمُي نَشّ، وٌ نَشَ كْنتْقِلِ وٌ شَ مَسٍنيِ شَ قٍ رَ بٍينُن وٌ شَ عَ تِ. عَلَ نَ وْيّنيِ نَشَن يٌ قِ وٌ مَ نَ وَشَتِ مَ، وٌ شَ نَ نَن قَلَ، بَرِ مَ وٌ تَن شَ مُ وْيّنمَ، عَلَ شَشِلِ سّنِيّنشِ نَن قَمَ وْيّندٍ.»
12«مِشِ قَمَ عَ نفَشَكٍرٍنيِ يَنقَدٍ، عَ عَ سَ مِشِيٍ بّلّشّ، عٍ شَ عَ قَشَ. بَبّ قَن نَ مْولِ نِيَمَ عَ شَ دِ رَ، دِيٍ قَن كٍلِمَ نّ عٍ بَرِ مَيٍ شِلِ مَ، عٍ شَ عٍ قَشَ. 13مِشِ بِرِن قَمَ وٌ شْندٍ ﭑ تَن مَ قٍ رَ، كْنْ نَشَن نَ عَ تُننَبّشِ هَن عَ رَحْنيِ، نَ كَنيِ كِسِمَ نّ.»
سٍ هَرَ مُشِ حَاشِ
مَتِيُ ٢٤؛١٥ ٬ ٢٨، لُكِ ٢١؛٢٠ ٬ ٢٤
14«وٌ تَن نَشٍيٍ نَ يِ شَرَنقٍ، وٌ وٌ تُلِ مَتِ دٍ! وٌ نَ سٍ هَرَ مُشِ حَاشِ تٌ كَسَرّ نَ نَشَن شَنبِ رَ، عَ تِشِ يِرٍ عَ مُ لَن عَ شَ تِ دّننَشّ، وٌ تَن نَشٍيٍ نَ يُدَيَ نَ تّمُي، وٌ شَ وٌ فِ فٍيَيٍ قَرِ. 15نَشَن نَ تَندٍ، عَ نَشَ سٌ سٍسٍ تٌنفٌدٍ عَ شَ بَنشِ كُي. 16نَشَن نَ شّ مَ، عَ نَشَ فبِلٍن عَ شَ شِنبٍلِ دٌنمَ تٌنفٌدٍ. 17نَ وَشَتِ قِندِ مَ فبَلٌي نَن نَ قُرُفِنّيٍ نُن دِنفّيٍ بّ! 18وٌ عَلَ مَشَندِ نَ نَشَ وٌ لِ حّمّ تّمُي! 19بَرِ مَ تْورّ عَ لِمَ نَ وَشَتِ مَ، نَشَن مَنِيّ سِنفٍ مُ نُ تٌ كَبِ عَلَ نَشَ دُنِحَ دَا، عَ مَن مُ فبِلٍنمَ تٌ رَ عَبَدَن. 20شَ مَرِفِ مُ عَ رَفِرِشِ نُ ندٍ شَ بَ نَ شِ كْنتِ رَ، عَدَ مَ يٌ مُ كِسِمَ نُ. كْنْ عَ ندٍ بَشِ عَ كْنتِ رَ مِشِ سُفَندِشِيٍ نَن شَ قٍ رَ.»
21«شَ مِشِ ندٍ سَ عَ قَلَ وٌ بّ، ‹عَ مَتٌ، عَلَ شَ مِشِ سُفَندِشِ نَ بٍ›، شَ نَ مُ عَ رَ، ‹عَلَ شَ مِشِ سُفَندِشِ نَ مّننِ،› وٌ نَشَ لَ عَ رَ. 22بَرِ مَ وُلٍ قَلّيٍ قَمَ عَلَ شَ مِشِ سُفَندِشِ شِلِ قَلَدٍ عٍ يّتّ شُن، شَ نَ مُ عٍ عٍ يّتّ قِندِ نَمِحْنمّيٍ رَ. عٍ قَمَ تْنشُمَ مَكَابَشِيٍ نُن كَابَنَكٌي رَبَدٍ عَلَكٌ عٍ شَ عَلَ شَ مِشِ سُفَندِشِيٍ رَتَنتَن، شَ عٍ سَ نْمَ. 23وٌ مّينِ وٌ يّتّ مَ. ﭑ بَرَ قٍ بِرِن مَسٍن وٌ بّ بٍينُن عَ وَشَتِ شَ عَ لِ.»
عَدَ مَ شَ دِ فبِلٍنقٍ
مَتِيُ ٢٤؛٢٩ ٬ ٣١، لُكِ ٢١؛٢٥ ٬ ٢٨
24«نَ حَشَنكَتّ وَشَتِ دَنفِ شَنبِ،
‹سٌفٍ عِقْورْ مَ نّ،
كِكٍ يَنبّ بَمَ نّ،
25تُنبُييٍ بِرَ مَ نّ بْشِ،
سٍ نَشَن بِرِن نَ كٌورٍ مَ عَ سّرّنمَ نّ.›»
26«نَ تّمُي عَدَ مَ شَ دِ تٌمَ نّ قَ رَ نُشُي كُي، سّنبّ نُن نْرّ رَ. 27عَ عَ شَ مَلٍكّيٍ شّيمَ نّ دُنِحَ تُنشُن نَانِ بِرِن نَ، عٍ شَ سَ عَ شَ مِشِ سُفَندِشِيٍ مَلَن كٍلِ سّيتِ هَن سّيتِ.»
شْرّ بِلِ شَ مِسَالِ
مَتِيُ ٢٤؛٣٢ ٬ ٣٥، لُكِ ٢١؛٢٩ ٬ ٣٣
28«وٌ شْرّ بِلِ مَتٌ مِسَالِ رَ، وٌ شَ شَشِلِ سْتْ. عَ سَلٌنيِ نَ حِنفِ، عَ بُرّشّ نّينّ نَشَ مِنِ، وٌ عَ كٌلٌنمَ نّ حّمّ بَرَ مَكْرّ. 29عَدَ مَ شَ دِ قَقٍ قَن نَ نَ كِ نّ. وٌ نَ يِ قٍ بِرِن تٌ رَبَ رَ، وٌ شَ عَ كٌلٌن عَدَ مَ شَ دِ بَرَ مَكْرّ، عَ حَن تِشِ نَادّ رَ. 30ﭑ شَ نْندِ قَلَ وٌ بّ، تٌ مِشِيٍ مُ دَنفِمَ قٌ نَ قٍ بِرِن نَبَ. 31كٌورٍ نُن بْشِ دَنفِمَ نّ، كْنْ ﭑ مَ مَسٍنيِ تَن مُ دَنفِمَ عَبَدَن.»
دُنِحَ رَحْنيِ وَشَتِ كٌلٌنقٍ
مَتِيُ ٢٤؛٣٦ ٬ ٤٤
32«مِشِ يٌ مُ عَ كٌلٌن يِ قٍيٍ سَ رَبَمَ لْشْي نُن وَشَتِ يٌ مَ. هَلِ مَلٍكّ نَشٍيٍ نَ عَرِيَننَ، عٍ مُ عَ كٌلٌن، عَلَ شَ دِ قَن مُ عَ كٌلٌن، قٌ بَبَ عَلَ كٍرٍن ثٍتِ. 33وٌ مّينِ وٌ يّتّ مَ، وٌ نَشَ يَنقَ، بَرِ مَ وٌ قَن مُ عَ كٌلٌن يِ قٍيٍ سَ كَمَلِمَ تّمُي نَشّ.»
34«عَ مَنِيَشِ شّمّ نَن نَ، نَشَن نَ سِفَقٍ بِيَاسِ. عَ نَ كٍلِ عَ شَ قْشْي شُن، عَ نَ بِرِن تَشُمَ عَ شَ كٌنيِيٍ رَ، عَ كَنكَن تِ عَ شَ وَلِ دّ، عَ مَن عَ قَلَ نَادّ كَنتّ بّ، عَ عَ نَشَ يَنقَ. 35نَ كُي، وٌ نَشَ يَنقَ. شَ قْشْي كَنيِ فبِلٍنمَ نُنمَرٍ نَن نَ بَ، شَ نَ مُ كْي تَفِ، شَ نَ مُ كٌنكٌرٍ دّيَ سِنفٍ، شَ نَ مُ فّيسّفّ، وٌ مُ عَ وَشَتِ يٌ كٌلٌن. 36شَ عَ قَ وٌ تّرّننَ، عَ نَشَ عَ لِ دٍ وٌ شِقٍ! 37ﭑ نَشَن قَلَمَ وٌ بّ، ﭑ نَ نَن عَ قَلَمَ بِرِن بّ؛ وٌ نَشَ يَنقَ!»