عَلَتَلَ شَ وْيّنيِ شْرْشْي
1عَلَتَلَ شَ وْيّنيِ شْرْشْي عِسِرَيِلَكَيٍ بّ عَننَبِ مَلَكِ سَابُي رَ؛ 2عَلَتَلَ شَ مَسٍنيِ نَن يَ، «ﭑ بَرَ وٌ شَنُ، كْنْ وٌ مَشْرِنيِ تِمَ ﭑ مَ، ‹عَلَ، مُشُ شَ مَرَقَنيِ نَ مِندٍن؟›» عَلَ نَشّ، «يَشُبَ تَارَ شَ مُ لَنشِ عٍسَيُ مَ؟ يَشُبَ تَن عَ رَقَن ﭑ تَن عَلَ مَ، 3كْنْ ﭑ بَرَ عٍسَيُ تَن نَحَاشُ. ﭑ بَرَ عَ شَ بْشِ فٍيَ يِرٍ مَقِندِ فبٍنفبٍرٍن يِرٍ رَ. ﭑ بَرَ عَ كّ سٌ وُلَءِ بَرٍيٍ يِ رَ نَشٍيٍ نَ فبٍنفبٍرٍنيِ مَ. 4شَ عٍدٌنكَيٍ، نَشٍيٍ كٍلِشِ عٍسَيُ بْنسْي، عَ قَلَ، ‹وٌن بَرَ فبَلٌي سْتْ، كْنْ وٌن نَ يَءِلَنمَ،› مَنفّ عَلَتَلَ عٍ يَابِمَ نّ، ‹شَ وٌ بَنشِ تِ، ﭑ نَ رَبِرَ مَ نّ.› عٍ شِلِ قَمَ نّ قَلَدٍ، ‹حَاشُحَ بْشِ.› عٍ عَ قَلَمَ نّ حَمَ نَ عَ رَ عَلَتَلَ شْنْشِ نَشَن مَ تّمُي بِرِن. 5وٌ يَيٍ قَمَ نّ عَ تٌدٍ. وٌ يّتّ يَتِ عَ قَلَمَ نّ، ‹عَلَتَلَ شَ مَنفّيَ سّنبّ فبٌ دُنِحَ بِرِن، هَلِ عِسِرَيِلَ بْشِ قَرِ مَ.›»
مَرِفِ بَتُي نَشَن شْنشِ
6«دِ تَن عَ بَبَ بِنيَمَ نّ، كٌنيِ قَن عَ مَرِفِ بِنيَ. شَ ﭑ تَن نَن نَ وٌ بَبَ رَ، ﭑ مَ بِنيّ نَ مِندٍن؟ شَ ﭑ تَن نَن نَ وٌ مَرِفِ رَ، ﭑ مَ بِنيّ نَ مِندٍن؟ ﭑ تَن وٌ شَ مَنفّ عَلَتَلَ، ﭑ شَ عَ قَلَ وٌ بّ، وٌ نَ ﭑ شِلِ يٍلٍبُقٍ. كْنْ وٌ ﭑ مَشْرِنقٍ، ‹مُشُ عِ شِلِ يٍلٍبُشِ دِ؟› 7وٌ نَ ﭑ شِلِ يٍلٍبُقٍ وٌ شَ سّرّشّ سّنِيّنتَرٍيٍ نَن نَ وٌ نَشٍيٍ سَمَ ﭑ مَ سّرّشّبَدٍ قَرِ. وٌ مَن ﭑ مَشْرِنمَ، ‹مُشُ قَشِ سّرّشّ سّنِيّنتَرٍ مُندُن نَ؟› ﭑ شَ عَ قَلَ وٌ بّ، وٌ بَرَ ﭑ مَ سّرّشّبَدٍ شَ قٍ يٍلٍبُ. 8وٌ نَ شُرُ سٍ دْنشُي بَ سّرّشّ رَ، نَ قَن؟ وٌ نَ قَ شُرُ سٍ مَبّنشِ رَ، شَ نَ مُ شُرُ سٍ قُرَشِ رَ، نَ قَن؟ شَ وٌ بَرَ نَ سّرّشّ مْولِ سٌ وٌ شَ مَنفّ يِ رَ، عَ حّلّشِنمَ نّ وٌ رَ؟ عَ وٌ رَ سّنّمَ نّ عَ قَنيِ رَ؟ مَنفّ عَلَتَلَ شَ مَسٍنيِ نَن نَ كِ.»
9«شَ وٌ عَلَ مَكُلَ نَ سّرّشّ مْولِ رَ، عَ هِننّمَ وٌ رَ، عَ وٌ رَ سّنّمَ عَ قَنيِ رَ؟ مَنفّ عَلَتَلَ شَ مَسٍنيِ نَن نَ كِ.»
10«عَ لَنمَ مِشِ ندٍ وٌ يَ مَ عَ شَ ﭑ مَ هْرْ مْبَنشِ نَادّ بَلَن، عَلَكٌ وٌ نَشَ تّ رَدّشّ ﭑ مَ سّرّشّبَدٍ قَرِ قُقَقُ. وٌ شَ قٍ مُ رَقَن ﭑ مَ. ﭑ تَن مَنفّ عَلَتَلَ، ﭑ شَ عَ قَلَ وٌ بّ عَ ﭑ مُ وَ مَ وٌ شَ سّرّشّ شْن، ﭑ مُ عَ تٌنفٌمَ! مَنفّ عَلَتَلَ شَ مَسٍنيِ نَن نَ كِ.»
11«كٍلِقٍ سٌفٍتٍدٍ، سِفَقٍ هَن سٌفٍفٌرٌدٍ ﭑ شِلِ شُنفبٌ سِ بِرِن تَفِ. يِرٍ بِرِن، عٍ قَمَ نّ سُرَيِ فَندٍ ﭑ شِلِ رَ، عٍ قَ سّرّشّ سّنِيّنشِ رَ ﭑ مَ بِنيّ شَ قٍ رَ. مَنفّ عَلَتَلَ شَ مَسٍنيِ نَن نَ كِ.»
12«كْنْ وٌ تَن ﭑ شِلِ يٍلٍبُمَ. وٌ نُ قَ عَ قَلَ، ‹مَرِفِ شَ سّرّشّبَدٍ مُ سّنِيّنشِ، سّرّشّ نَشَن بَمَ مّننِ عَ مُ قَن.› 13وٌ وٌ شُنيِ سُشُمَ، وٌ نُ قَ سْنشْ، ‹تَفَنيِ مُندُن يِ كِ!› ﭑ تَن مَنفّ عَلَتَلَ، ﭑ شَ عَ قَلَ وٌ بّ، ﭑ مُ قَمَ وٌ شَ شُرُ سٍ مَشْنْشِ، وٌ شَ شُرُ سٍ مَبّنشِ، نُن وٌ شَ شُرُ سٍ قُرَشِ تٌنفٌدٍ ﭑ مَ سّرّشّبَدٍ سْنْن. مَنفّ عَلَتَلَ شَ مَسٍنيِ نَن نَ كِ.»
14«دَنكّ نَ مِشِ كٌرِنتٍشِ بّ يّشّي كٌنتٌنيِ نَ نَشَن شَ فْورّ يَ مَ، كْنْ عَ قَ شُرُ سٍ مَشْنْشِ تَن بَ سّرّشّ رَ عَ شَ مَرَكَلِ رَكَمَلِقٍ رَ. مَنفّ شُنفبٍ نَ ﭑ نَ، نَشَن شِلِ مَفَاشُ سِ بِرِن تَفِ. مَنفّ عَلَتَلَ شَ مَسٍنيِ نَن نَ كِ.»