فِنّيٍ نَشٍيٍ عِسَ مَلِقٍ
1نَ دَنفِ شَنبِ، عِسَ نَشَ سِفَ تَا بِرِن عِسَ رَ، عَ شُنفبٍ نُن عَ شُرِ، عَ نُ مِشِيٍ شَرَن، عَ نُ عٍ كَوَندِ عَلَ شَ مَنفّيَ نِينِ شَ شِبَارُ قَنيِ رَ. عَ قْشِرَبِرّ قُ نُن قِرِنيِيٍ نُ نَ عَ قْشْ رَ، 2عَ نُن فِنّ ندٍ نَشٍيٍ نُ بَرَ رَيَلَن حِننّيٍ نُن قُرٍ فبّتّيٍ مَ. عٍ شِلِيٍ نَن يَ؛ مَرِيَمَ، عَ نُ قَلَمَ نَشَن بّ مَفِدَلَكَ، عِسَ حِننّ سٌلٌقٍرٍ كٍرِ نَشَن قْشْ رَ، 3عَ نُن يٌهَننَ، نَشَن نُ دْشْشِ هٍرٌدٍ شَ وَلِكّيٍ شُنيِ كُسَ شْن، عَ نُن سُسَننَ، عَ نُن مِشِ فبّتّ وُيَشِ. عٍ نُ عِسَ نُن عَ قْشِرَبِرّيٍ مَلِمَ عٍ يّتّ هَرِفٍ رَ.
شّ رَوَلِ شَ تَالِ
مَتِيُ ١٣؛١ ٬ ٢٣، مَرَكِ ٤؛١ ٬ ٢٠
4حَمَ فبٍفبٍ تٌ مَلَن عِسَ يِرٍ كٍلِقٍ تَا وُيَشِ، عَ نَشَ يِ تَالِ وْيّنيِ مَسٍن عٍ بّ، 5«شّ رَوَلِ ندٍ نَن مِنِ سَنسِ شْرِ فَرَنسَندٍ. عَ تٌ نُ سَنسِ شْرِ فَرَنسَنمَ، عَ شْرِ ندٍيٍ نَشَ بِرَ سَنكِرَ شْن، مِشِيٍ نَشَ نٍيٍ مَبٌرٌن، شْنِيٍ مَن قَ عٍ دٌن فبِكِ. 6سَنسِ شْرِ ندٍ قَن نَشَ بِرَ فّمّ يِرٍ. عَ تٌ بُلَ، عَ نَشَ رَفَن بَرِ مَ يٍ مُ نُ نَ عَ بّ. 7سَنسِ شْرِ ندٍيٍ قَن نَشَ بِرَ تُنبٍ كُنسِيٍ تَفِ. تُنبٍ كُنسِيٍ نَشَ فبٌ، عٍ سَنسِيٍ عِشّتّن، عٍ عٍ كَنَ. 8سَنسِ شْرِ ندٍ قَن نَشَ بِرَ بّندّ قَنيِ مَ. نَ شْرِ كٍرٍن كٍرٍن بِرِن سَنسِيٍ تٌ تٍ، عٍ نَشَ عٍ تْنسْي رَ مِنِ، شْرِ كّمّ كّمّ.» عِسَ تٌ فّ نَ وْيّنيِ رَ، عَ نَشَ عَ شُي عِتٍ، عَ عَ قَلَ، «شَ وٌ تُلِ قٍ مّمَ، وٌ وٌ تُلِ مَتِ يِ مَسٍنيِ رَ.»
9عِسَ قْشِرَبِرّيٍ تٌ عَ مَشْرِن عَ شَ نَ تَالِ يَ عِبَ عٍ بّ، 10عَ نَشَ عٍ يَابِ، «عَلَ بَرَ قَهَامُي قِ وٌ مَ وٌ شَ عَ شَ مَنفّيَ نِينِ فُندٌ كٌلٌن، كْنْ مِشِ فبّتّيٍ تَن عَ مّمَ تَالِ وْيّنيِيٍ نَن نَ، عَلَكٌ
‹عٍ شَ قٍ تٌ، كْنْ عٍ نَشَ عَ عِفبّ.
عٍ شَ قٍ مّ، كْنْ عٍ نَشَ عَ قَهَامُ.›»
11«نَ تَالِ وْيّنيِ يَ عِبَمَ يِ كِ نّ. سَنسِ شْرِ مِسَالِشِ عَلَ شَ مَسٍنيِ نَن نَ. 12سَنسِ شْرِ نَشٍيٍ بِرَ كِرَ شْن، نٍيٍ مِسَالِشِ مِشِيٍ نَن نَ نَشٍيٍ بَرَ عَلَ شَ مَسٍنيِ مّ، كْنْ عِبُلِسَ نَن قَمَ قَ، عَ عَ بَ عٍ بْحّ مَ، عَلَكٌ عٍ نَشَ قَ دَنشَنِيَ، عٍ كِسِ. 13سَنسِ شْرِ نَشٍيٍ بِرَ فّمّ يِرٍ، نٍيٍ مِسَالِشِ مِشِ نَن نَ نَشٍيٍ عَلَ شَ مَسٍنيِ مّمَ، عٍ عَ سُشُ سّيوّ رَ. كْنْ سَنكٍ تٌ مُ نَ عٍ بّ، عٍ شَ دَنشَنِيَ مُ بُمَ. مَرَتَنتَنيِ وَشَتِ نَ عَ لِ، عٍ مُ شَنمَ. 14سَنسِ شْرِ نَشٍيٍ بِرَ تُنبٍ كُنسِيٍ تَفِ، نٍيٍ مِسَالِشِ مِشِيٍ نَن نَ نَشٍيٍ عَلَ شَ مَسٍنيِ مّمَ، كْنْ كْنتْقِلِ، بَننَيَ، نُن يّتّ رَقَن قٍيٍ نَن عَ نِيَمَ عٍ مُ فّ عٍ بٌفِ رَ مِنِدٍ عَلَ بّ. 15سَنسِ شْرِ نَشٍيٍ بِرَ بّندّ قَنيِ تَن مَ، نٍيٍ مِسَالِشِ مِشِيٍ نَن نَ نَشٍيٍ عَلَ شَ مَسٍنيِ مّمَ، عٍ عَ رَفَتَ عٍ بْحّ قَنيِ مَ تِنشِنيِ كُي، عٍ عٍ بٌفِ رَ مِنِ عَلَ بّ تُننَبّشِيَ كُي.»
لَنثُي شَ تَالِ
مَرَكِ ٤؛٢١ ٬ ٢٥
16«مِشِ يٌ مُ لَنثُي رَدّشّمَ، عَ مَن قَ قّحّ قٍلٍن عَ شُن نَ، شَ نَ مُ عَ رَ عَ عَ رَ سٌ سَدٍ بُنيِ. عَ عَ دْشْمَ لَنثُي دْشْسٍ نَن قَرِ عَلَكٌ نَشٍيٍ سٌمَ بَنشِ، عٍ شَ عَ تّ دّشّ تٌ. 17قٍ نْشُنشِ بِرِن قَمَ كٌلٌندٍ. فُندٌ بِرِن مَكّنّنمَ نّ. 18نَ نَ عَ رَ، وٌ لَن وٌ شَ وٌ تُلِ مَتِ عَ قَنيِ رَ. قَهَامُي كَنيِ شَ قَهَامُي شُن مَسَمَ، كْنْ قَهَامُتَرٍ، هَلِ عَ نَشَن دِ مَحْشُنشِ عَ فبٍ رَ، نَ قَمَ بَدٍ عَ يِ رَ.»
عِسَ نفَ نُن عَ شُنيَيٍ
مَتِيُ ١٢؛٤٦ ٬ ٥٠، مَرَكِ ٣؛٣١ ٬ ٣٥
19عِسَ نفَ نُن عَ شُنيَ شّمّمَيٍ نَشَ سِفَ عَ يِرٍ، كْنْ عٍ مُ نُ نْمَ مَكْرّدٍ عَ رَ حَمَ شَ قٍ رَ. 20مِشِ ندٍ نَشَ عَ قَلَ عِسَ بّ، «عِ نفَ نُن عِ شُنيَيٍ نَ تَندٍ، عٍ وَ مَ عِ تٌقٍ.» 21كْنْ عِسَ نَشَ عَ يَابِ، «مِشِ نَشٍيٍ عَلَ شَ مَسٍنيِ رَ مّمَ، عٍ عَ رَبَتُ، نٍيٍ نَن قِندِشِ ﭑ نفَ نُن ﭑ شُنيَيٍ رَ.»
عِسَ قٌيٍ رَشَرَقٍ
مَتِيُ ٨؛٢٣ ٬ ٢٧، مَرَكِ ٤؛٣٥ ٬ ٤١
22لْشْ ندٍ، عِسَ نَشَ عَ قَلَ عَ قْشِرَبِرّيٍ بّ، «وٌن شّي بَا نَاكِرِ مَ.» عٍ بِرِن نَشَ بَكِ كُنكُي كُي، عٍ سِفَ. 23نَ حّرّ كُي، عِسَ نَشَ شِ. قٌيٍ بٍلٍبٍلٍ نَشَ كٍلِ بَا مَ، كُنكُي نَشَ رَقٍ قْلْ يٍ رَ. فبَلٌي نُ بَرَ مَكْرّ عٍ رَ. 24نَ كُي، عَ قْشِرَبِرّيٍ نَشَ قَ عِسَ رَشُنُ عٍ عَ قَلَ عَ بّ، «كَرَ مْشْ، كَرَ مْشْ، وٌن قَشَقٍ نّ يِ كِ!» عِسَ تٌ شُنُ، عَ نَشَ وْيّن قٌيٍ نُن مْرْنيِيٍ مَ، عَ عٍ يَامَرِ. قٌيٍ نُن مْرْنيِيٍ نَشَ عَ عِتِ، بَا نَشَ رَشَرَ. 25عِسَ نَشَ قَ عَ قْشِرَبِرّيٍ مَشْرِن، «وٌ شَ دَنشَنِيَ نَ مِندٍن؟» عٍ قَن نَشَ فَاشُ، عٍ كَابَ، عٍ نُ عَ قَلَ عٍ بٌرٍ بّ، «ندٍ لَنشِ يِ مَ؟ هَلِ قٌيٍ نُن بَا، عَ عٍ يَمَرِ مَ، عٍ عَ شُي رَبَتُ.»
عِسَ حِننّيٍ كٍرِقٍ فَدَرَ شّمّ ندٍ قْشْ رَ
مَتِيُ ٨؛٢٨ ٬ ٣٤، مَرَكِ ٥؛١ ٬ ٢٠
26عِسَ نُن عَ قْشِرَبِرّيٍ تٌ سٌ فَدَرَ بْشِ مَ، دّننَشّ نَ فَلِلٍ نَاكِرِ مَ، 27عِسَ تٌ فٌرٌ شَرٍ مَ، عَ نَشَ حِننّيٍ كَنيِ لِ نَا. سِنفٍ عَ نُ سَبَتِشِ تَا كُي، كْنْ كَبِ تّمُي شْنكُيٍ عَ سَبَتِشِ فَبُرِ يِرٍ عَ مَفٍلِ رَ. 28عَ تٌ عِسَ تٌ، عَ نَشَ فبٍلٍفبٍلٍ، عَ سَ بِرَ عَ بُن مَ، عَ عَ قَلَ عَ شُي عِتٍشِ رَ، «عِسَ، عِ تَن عَلَ شِلِ شُنفبٍ كَنيِ شَ دِ، عِ وَ مَ مُنسٍ شْن مَ ﭑ بّ؟ ﭑ بَرَ عِ مَيَندِ، عِ نَشَ ﭑ حَشَنكَتَ.» 29عَ نَ قَلَ نّ، بَرِ مَ عِسَ نُ بَرَ حِننّ يَمَرِ عَ شَ فبِلٍن نَ شّمّ قْشْ رَ. سَنمَيَ وُيَشِ، مِشِيٍ نُ بَرَ يْلْنشْنيِ سَ عَ سَنيِيٍ نُن عَ بّلّشّيٍ مَ، عَلَكٌ عَ نَشَ عَ مَشْنْ، كْنْ حِننّ نُ لُمَ يْلْنشْنيِيٍ بٌلٌن نَ، عَ قَ عَ رَكٌنكٌن وُلَ رَ.
30عِسَ نَشَ عَ مَشْرِن، «عِ شِلِ دِ؟» عَ نَشَ عَ يَابِ، «ﭑ شِلِ نّ فَلِ.» عَ نَ قَلَ نّ بَرِ مَ حِننّ فبٍفبٍ نَن نُ عَ قْشْ رَ. 31حِننّيٍ نَشَ عِسَ مَيَندِ عَلَكٌ عَ نَشَ عٍ رَ سَنبَ يَهَننَمَ.
32شْسّ فَلِ نُ نَ عٍ دّ مَدٌنقٍ فٍيَ ندٍ مَ. حِننّيٍ نَشَ عِسَ مَيَندِ عَ شَ تِن عٍ شَ سَ سٌ نَ شْسّيٍ. عِسَ تٌ تِن، 33حِننّيٍ نَشَ فبِلٍن نَ شّمّ قْشْ رَ، عٍ سَ سٌ شْسّيٍ. شْسّيٍ نَشَ فٌرٌ عٍ فِ رَ تٍنتٍنيِ رَ، عٍ سِن بَا مَ. عٍ بِرِن نَشَ مَدُلَ، عٍ قَشَ.
34شْسّ دّ مَدٌنيِيٍ تٌ نَ قٍ تٌ، عٍ نَشَ سِفَ عٍ فِ رَ، عٍ سَ عَ قَلَ تَاكَيٍ نُن دَاشَكَيٍ بّ، 35مِشِيٍ قَن نَشَ سِفَ عٍ شَ سَ عَ مَتٌ نَشَن نَبَشِ. عٍ تٌ عِسَ يِرٍ لِ، عٍ نَشَ شّمّ قَن لِ نَا، حِننّيٍ نُ بَرَ كٍرِ نَشَن قْشْ رَ، عَ دْشْشِ عِسَ بُن مَ، سٌسٍ رَفٌرٌشِ عَ مَ، عَ بَرَ يَلَن. نَ نَشَ عٍ رَفَاشُ. 36نَشٍيٍ نُ بَرَ عَ تٌ عِسَ حِننّيٍ كٍرِ شّمّ قْشْ رَ كِ نَشّ، عٍ نَشَ عَ تَفِ رَبَ بِرِن بّ.
37نَ تّمُي، فَدَرَكَيٍ بِرِن نَشَ عِسَ مَيَندِ عَ شَ كٍلِ عٍ شْنيِ، بَرِ مَ فَاشُي نُ بَرَ عٍ سُشُ كِ قَنيِ. نَ كُي، عِسَ نَشَ بَكِ كُنكُي كُي، عَ شَ فبِلٍن. 38حِننّ كٍرِشِ شّمّ نَشَن قْشْ رَ، عَ نَشَ عِسَ مَيَندِ عَ عٍ بِرِن شَ لُ عَ رَ. كْنْ عِسَ نَشَ عَ رَفبِلٍن، عَ عَ مَسٍن عَ بّ، 39«فبِلٍن عِ شْنيِ. عَلَ قٍ نَشَن بِرِن نَبَشِ عِ بّ، سَ نَ دّنتّفّ سَ.» شّمّ نَشَ سِفَ، عَ سَ نَ تَا بِرِن عِسَ. عِسَ نَشَن نَبَشِ عَ بّ، عَ نَشَ سَ نَ تَفِ رَبَ بِرِن بّ.
دِ فِنّ ندٍ رَكٍلِقٍ قَشّ مَ
نُن فِنّ فبّتّ رَيَلَنقٍ
مَتِيُ ٩؛١٨ ٬ ٢٦، مَرَكِ ٥؛٢١ ٬ ٤٣
40عِسَ تٌ فبِلٍن نَاكِرِ مَ، حَمَ بِرِن نُ عَ مَمّقٍ. عٍ نَشَ عَ رَلَن. 41سَلِدٍ يَرٍرَتِ ندٍ نَشَ قَ عَ شْن نَشَن نُ شِلِ يَيِرُ. عَ نَشَ قَ عَ سُيِدِ عِسَ بّ، عَ عَ مَيَندِ عَ شَ سِفَ عَ شْنيِ، 42بَرِ مَ عَ شَ دِ فِنّ كٍرٍنيِ نُ قَ نَ قَشَقٍ نّ. عَ حّ كْنتِ نُ بَرَ حّ قُ نُن قِرِن حْندْن لِ.
عِسَ تٌ نُ سِفَقٍ يَيِرُ شْنيِ، حَمَ فبٍفبٍ نُ نَ عَ شّتّنقٍ. 43فِنّ ندٍ نُ نَ عٍ يَ مَ نَشَن شَ كِكٍ وَلِ مُ نُ عَ عِتِمَ حّ قُ نُن قِرِن بُن مَ، مِشِ يٌ مُ نْ عَ دَندَندٍ. 44نَ فِنّ نَشَ قَ عِسَ شَنبِ رَ، عَ عَ بّلّشّ دِن عَ شَ دٌنمَ سَنبُنيِ رَ. كٍرٍن نَ، عَ شَ كِكٍ وَلِ نَشَ دَن. 45عِسَ نَشَ مَشْرِنيِ تِ، «ندٍ دِنشِ ﭑ نَ؟» بِرِن تٌ عَ قَلَ عَ عٍ تَن مُ عَ رَ، ثِيّرِ نَشَ عَ قَلَ عِسَ بّ، «كَرَ مْشْ، حَمَ عِ رَبِلِنشِ، بِرِن نَن عِ شّتّنقٍ!» 46كْنْ عِسَ نَشَ عَ مَسٍن، «مِشِ ندٍ بَرَ دِن ﭑ نَ، بَرِ مَ ﭑ عَ كٌلٌن سّنبّ ندٍ بَرَ مِنِ ﭑ قَتٍ.» 47فِنّ تٌ عَ كٌلٌن عَ عَ مُ نُ نْمَ عَ نْشُندٍ، عَ نَشَ قَ عَ سّرّنمَ، عَ سُيِدِ عِسَ بّ. عَ عَ بّلّشّ دِنشِ عَ رَ قٍ نَشَن مَ، عَ مَن يَلَنشِ عَ عِكْرّشِ رَ كِ نَشّ، عَ نَشَ نَ بِرِن تَفِ رَبَ حَمَ يَ شْرِ. 48عِسَ نَشَ عَ مَسٍن عَ بّ، «ﭑ مَ دِ فِنّ، عِ شَ دَنشَنِيَ بَرَ عِ رَيَلَن. سِفَ بْحّسَ كُي.»
49عِسَ تٌ نُ وْيّنقٍ، مِشِ ندٍ نَشَ قَ كٍلِقٍ سَلِدٍ يَرٍرَتِ شْنيِ، عَ عَ قَلَ عَ تَن يَيِرُ بّ، «عِ شَ دِ فِنّ بَرَ قَشَ. عِ نَشَ كَرَ مْشْ تْورْ سْنْن.» 50عِسَ تٌ عَ مّ، عَ نَشَ عَ مَسٍن يَيِرُ بّ، «عِ نَشَ فَاشُ. عِ شَ دَنشَنِيَ تُن. عِ شَ دِ كِسِمَ نّ.»
51عِسَ تٌ يَيِرُ شْنيِ لِ، عَ مُ تِن مِشِ يٌ شَ سٌ بَنشِ كُي قٌ ثِيّرِ، يَيَ، يَكِ، دِ فِنّ بَبَ نُن عَ نفَ. 52عِسَ تٌ عَ تٌ بِرِن نُ وَقٍ دِ فِنّ شَ قٍ رَ سُننُنيِ كُي، عَ نَشَ عَ مَسٍن عٍ بّ، «وٌ نَشَ وَ. يِ دِ فِنّ مُ قَشَشِ شّ، عَ نَ شِقٍ نّ.» 53حَمَ نَشَ يٌ عِسَ مَ، عٍ عَ مَيٍلٍ، بَرِ مَ عٍ نُ عَ كٌلٌن عَ تّمّدِ بَرَ قَشَ. 54كْنْ عِسَ نَشَ تّمّدِ بّلّشّ سُشُ، عَ عَ قَلَ عَ بّ عَ شُي عِتٍشِ رَ، «ﭑ مَ دِ، كٍلِ!» 55عَ نِي نَشَ فبِلٍن عَ عِ، عَ كٍلِ كٍرٍن نَ. عِسَ نَشَ عَ قَلَ عٍ بّ عٍ شَ دٌنسٍ قِ عَ مَ. 56تّمّدِ بَرِ مَيٍ دّ نُ عِشَرَشِ، كْنْ عِسَ نَشَ عَ مَتِنتِن عٍ رَ قَ عَ قَلَ، عَ قٍ نَشَن نَبَشِ، عٍ نَشَ عَ قَلَ مِشِ يٌ بّ.