سْورِ شُنمَتِ شَ دَنشَنِيَ
مَتِيُ ٨؛٥ ٬ ١٣
1عِسَ تٌ فّ عَ شَ مَسٍنيِ بِرِن تِدٍ حَمَ بّ، عَ نَشَ سٌ كَثّرّنَمُ. 2سْورِ مِشِ كّمّ شُنمَتِ ندٍ نُ نَ نَا، نَشَن مَ كٌنيِ شّمّ ندٍ نُ قُرَشِ، عَ فبٍ مُ نُ لُشِ عَ شَ قَشَ. كٌنيِ نَن نُ عَ رَ نَشَن نُ رَقَن عَ مَرِفِ مَ كِ قَنيِ. 3سْورِ شُنمَتِ تٌ عِسَ شَ قٍ مّ، عَ نَشَ يُوِقِ كُنتِفِ ندٍيٍ شّي عِسَ شْن، عَ شَ قَ عَ شَ كٌنيِ رَيَلَن. 4يُوِقِ كُنتِفِيٍ تٌ عِسَ يِرٍ لِ، عٍ نَشَ عَ مَيَندِ كِ قَنيِ، عٍ عَ قَلَ، «مِشِ نَ عَ رَ، عَ لَن نّ عِ شَ يِ قٍ رَبَ عَ بّ، 5بَرِ مَ وٌن سِ رَقَن عَ مَ. عَ تَن نَن سَلِدٍ تِشِ مُشُ بّ.»
6عِسَ نَشَ بِرَ عٍ قْشْ رَ. عَ تٌ مَكْرّ بَنشِ رَ، نَ سْورِ مِشِ كّمّ شُنمَتِ نَشَ عَ بٌورٍ ندٍيٍ شّي عٍ شَ عَ قَلَ عَ بّ، «مَرِفِ، عِ نَشَ عِ يّتّ تْورْ، بَرِ مَ نَ بِنيّ مُ نَ ﭑ يِ رَ عِ تَن شَ سٌ ﭑ مَ بَنشِ كُي. 7نَ نَن عَ نِيَ، ﭑ حَن مُ تِن ﭑ يّتّ شَ قَ عِ شْن. عِ شَ يَامَرِ فبَنسَن نَن قِ، ﭑ مَ كٌنيِ شَ يَلَن. 8ﭑ عَ كٌلٌن بَرِ مَ ﭑ قَن نَ مَنفّ ندٍيٍ شَ يَامَرِ بُن مَ، سْورِ ندٍيٍ مَن نَ ﭑ يِ، نَشٍيٍ نَ ﭑ قَن مَ يَامَرِ بُن مَ. ﭑ نَ عَ قَلَ سْورِ ندٍ بّ، ‹سِفَ،› عَ سِفَمَ نّ. ﭑ نَ عَ قَلَ، ‹قَ،› عَ قَمَ نّ. ﭑ نَ ﭑ مَ كٌنيِ ندٍ يَمَرِ، ‹يِ قٍ رَبَ،› عَ عَ رَبَمَ نّ.»
9عِسَ تٌ عَ شَ وْيّنيِ مّ، عَ نَشَ كَابَ عَ شَ قٍ مَ. عَ نَشَ عَ يَ رَقِندِ حَمَ مَ نَشَن نُ بِرَشِ عَ قْشْ رَ، عَ عَ مَسٍن عٍ بّ، «ﭑ شَ عَ قَلَ وٌ بّ، ﭑ مُ يِ دَنشَنِيَ مْولِ تٌشِ هَلِ عِسِرَيِلَ بْشِ مَ.» 10شّيرَيٍ تٌ فبِلٍن سْورِ شُنمَتِ شْنيِ، عٍ نَشَ كٌنيِ لِ، عَ يَلَنشِ.
عِسَ كَاحّ فِنّ شَ دِ رَكٍلِقٍ قَشّ مَ
11نَ دَنفِ شَنبِ، عِسَ نَشَ سِفَ تَا ندٍ، دّننَشّ شِلِ نَيِن، عَ قْشِرَبِرّيٍ نُن حَمَ فبٍفبٍ نُ نَ عَ قْشْ رَ. 12عَ تٌ مَكْرّ تَا سٌدٍ دّ رَ، عِسَ نَشَ عَ تٌ مِشِيٍ مِنِقٍ شّمّ ندٍ قُرٍ رَ. كَاحّ فِنّ ندٍ شَ دِ كٍرٍنيِ نَن نُ قَشَشِ، نَ تَا حَمَ فبٍفبٍ قَن نُ حّرّقٍ كَاحّ فِنّ قّ مَ. 13مَرِفِ تٌ كَاحّ فِنّ تٌ، عَ نَشَ كِنِكِنِ عَ مَ، عَ عَ قَلَ عَ بّ، «عِ نَشَ وَ.» 14عَ نَشَ عَ مَسٌ قُرٍ رَ، عَ عَ بّلّشّ سَ عَ شَنِنسٍ قَرِ، عَ شَنِنمَيٍ نَشَ تِ. عِسَ نَشَ عَ مَسٍن، «عِ تَن سّفّتَلَ، ﭑ نَشّ عِ بّ، كٍلِ!» 15قَشَمِشِ نَشَ كٍلِ، عَ سٌ وْيّنقٍ. عِسَ نَشَ عَ رَفبِلٍن عَ نفَ مَ. 16فَاشُي نَشَ عٍ بِرِن سُشُ، عٍ نُ عَلَ مَتْشْ، عٍ نُ عَ قَلَ، «عَلَ نَمِحْنمّ شُنفبٍ نَن نَكٍلِشِ وٌن تَفِ!» عٍ مَن نُ عَ قَلَ، «عَلَ بَرَ قَ عَ شَ مِشِيٍ شُنمَتٌدٍ!» 17عِسَ شَ شِبَارُ نَشَ سِفَ رَيٍنسٍن نَ يُدَيَ بْشِ بِرِن مَ عَ نُن نَا رَبِلِنيِ.
عَننَبِ يَيَ شَ مَشْرِنيِ
مَتِيُ ١١؛١ ٬ ٣٠
18يَيَ قْشِرَبِرّيٍ نَشَ يِ قٍ بِرِن قَلَ يَيَ بّ. 19عَ قَن نَشَ مِشِ قِرِن شِلِ عٍ يَ مَ، عَ عٍ شّي عِسَ مَشْرِندٍ، «عِ قِندِشِ عَلَ شَ مِشِ سُفَندِشِ نَن نَ نَشَن لَنمَ عَ شَ قَ، كَ مُشُ شَ مِشِ فبّتّ نَن مَمّ؟» 20عٍ تٌ عِسَ يِرٍ لِ عٍ نَشَ عَ مَشْرِن، «يَيَ شُنشَ نَن مُشُ شّيشِ عِ مَشْرِندٍ. عِ قِندِشِ عَلَ شَ مِشِ سُفَندِشِ نَن نَ نَشَن لَنمَ عَ شَ قَ، كَ مُشُ شَ مِشِ فبّتّ نَن مَمّ؟» 21نَ تّمُي يَتِ، عِسَ نُ قُرٍ مَيٍ، حِننّ كَنيِيٍ، نُن دْنشُي فبٍفبٍ رَيَلَنقٍ. 22نَ كُي، عَ نَشَ يَيَ شَ شّيرَيٍ يَابِ، «وٌ قٍ نَشَن مّشِ نُن وٌ قٍ نَشَن تٌشِ، وٌ سَ نَ دّنتّفّ يَيَ بّ. دْنشُييٍ سٍ تٌمَ، نَمَتّيٍ حّرّ مَ، كُنّ كَنيِيٍ يَلَنمَ، تُلِشْرِيٍ وْيّنيِ مّمَ، قَشَمِشِيٍ كٍلِمَ، قُشَرِلَيٍ كَوَندِ مَ شِبَارُ قَنيِ رَ. 23سّيوّ نَ مِشِ بّ نَشَن مُ سِيكّمَ ﭑ مَ قٍ رَ.»
24يَيَ شَ شّيرَيٍ تٌ سِفَ، عِسَ نَشَ حَمَ مَشْرِن يَيَ شَ قٍ مَ، «وٌ سِفَ مُنسٍ مَتٌدٍ وُلَ عِ؟ قٌيٍ كَلٍ نَشَن نَمَشَمَ؟ 25شَ نَ مُ عَ رَ، وٌ سِفَ مُنسٍ مَتٌدٍ؟ دُفِ تٌقَنيِ كَنيِ؟ نَشٍيٍ مَشِرِشِ عَ قَنيِ رَ، عٍ شَ دُنِحّ عِفِرِ بَننَيَ كُي، نٍيٍ تٌمَ مَنفّ بَنشِيٍ نَن كُي. 26وٌ قَ سِفَ مُنسٍ مَتٌدٍ؟ نَمِحْنمّ؟ عِيٌ، ﭑ شَ عَ قَلَ وٌ بّ، عَ حَن دَنفِ نَمِحْنمّ رَ. 27عَ تَن نَن شَ قٍ سّبّشِ كِتَابُي كُي، ‹ﭑ قَمَ ﭑ مَ شّيرَ رَ سَنبَدٍ عِ يَ رَ عَلَكٌ عَ شَ كِرَ يَءِلَن عِ بّ.› 28ﭑ شَ عَ قَلَ وٌ بّ، فِنّ يٌ مُ دِ بَرِ نَشَن دَنفِ يَيَ رَ. كْنْ ﭑ مَن شَ عَ قَلَ وٌ بّ، مِشِ نَشَن نَ عَلَ شَ مَنفّيَ نِينِ بُن مَ، عَ شُرُن كِيٌكِ، عَ قَن دَنفِ يَيَ رَ.»
29«حَمَ نُن دُوتِ مَشِلِيٍ تٌ عَ شُي مّ، عٍ لَ نّ عَلَ رَ، عٍ قَ لُ يَيَ شَ عٍ شُنشَ يٍ شْورَ. 30كْنْ قَرِ سّنِيٍ نُن سّرِيّ كَرَ مْشْيٍ تَن تٌندِ نّ عَلَ وَشْنقٍ رَ عٍ بّ بَرِ مَ عٍ تٌندِ نّ يَيَ شَ عٍ شُنشَ يٍ شْورَ.»
31«ﭑ نْمَ تٌ مِشِيٍ مِسَالِدٍ مُنسٍ رَ؟ عٍ مَنِيَشِ ندٍ رَ؟ 32عٍ مَنِيَشِ دِ مّدِيٍ نَن نَ نَشٍيٍ دْشْشِ تَا كُي، عٍ نُ عَ قَلَ عٍ بٌورٍيٍ بّ،
‹مُشُ بَرَ شُلٍ قٍ وٌ بّ،
كْنْ وٌ مُ قَرٍ بٌرٌنشِ.
مُشُ بَرَ حْن بّيتِ بَ،
كْنْ وٌ مُ وَ.›»
33«يَيَ شُنشَ تٌ بَرَ قَ، عَ مُ تَامِ دٌن، عَ مُ وّنِ مِن. وٌ بَرَ عَ قَلَ، ‹حِننّ نَ عَ قْشْ رَ.› 34عَدَ مَ شَ دِ تٌ قَ، عَ تَن مُ تٌندِ سِفَدٍ شُلُنيِ يِرٍ. نَ كُي، وٌ بَرَ عَ قَلَ، ‹قُرِ حَاشِ سِيسِلَ مَتٌ! عٍ نُن دُوتِ مَشِلِيٍ نُن يُنُبِتْييٍ نَن عَ رَ!› 35كْنْ شَشِلِمَيَ كٌلٌنمَ عَ كّوَلِ نَن مَ.»
فِنّ يُنُبِتْي ندٍ شَ يُنُبِيٍ شَقَرِقٍ
36قَرِ سّنِ ندٍ نَشَ عِسَ شِلِ عٍ شَ عٍ دّفٍ عَ شْنيِ. عِسَ نَشَ سٌ نَا، عَ عَ مَفٌرٌ. 37فِنّ يُنُبِتْي ندٍ نُ نَ تَا كُي، عَ نَشَ عَ مّ عَ عِسَ عَ دّفّقٍ نَ قَرِ سّنِ شْنيِ. نَ كُي، عَ نَشَ لَبُندّ تُرٍ سُشُ عَ يِ رَ، نَ سَشِ عَ بِتِرّ تٌقَنيِ كُي نَشَن نُ رَقَلَشِ عَلَبَتِرَ فّمّ رَ. 38عَ تٌ سٌ نَا، عَ نَشَ تِ عِسَ شَنبِ رَ عَ سَنيِ يِرٍ. عَ تٌ وَ قْلْ، عَ نَشَ عِسَ سَنيِيٍ بُندَ عَ يَيٍ رَ. عَ نَشَ عٍ مَقُرُكُ عَ شُنسّشّ رَ، عَ عٍ سُنبُ، عَ قَ لَبُندّ مَسٌ عٍ مَ.
39قَرِ سّنِ نَشَن عِسَ شِلِ عَ دّفٍدٍ عَ شْنيِ، عَ تٌ نَ قٍ تٌ، عَ نَشَ عَ قَلَ عَ يّتّ مَ، «شَ يِ شّمّ قِندِشِ نَمِحْنمّ نَن نَ نُ، عَ يِ فِنّ شَ قٍ كٌلٌنمَ نّ نُ، عَ عَ كٌلٌنمَ نّ نُ عَ يُنُبِتْي نَن دِنقٍ عَ رَ يِ كِ.» 40عِسَ نَشَ عَ قَلَ عَ بّ، «سِمْن، ﭑ شَ قٍ ندٍ مَسٍن عِ بّ.» نَ نَشَ عَ يَابِ، «كَرَ مْشْ، عَ مَسٍن ﭑ بّ.» 41عِسَ نَشَ يِ تَالِ سَ عَ بّ، «كْبِرِ كَنيِ ندٍ نُ بَرَ مِشِ قِرِن دٌنِ. عَ سِنفٍ شَ دٌنِ قِندِشِ فبٍتِ كْبِرِ كٌلٍ كّمّ سُولِ نَن نَ، عَ قِرِن ندٍ، فبٍتِ كْبِرِ كٌلٍ تٌنفٌ سُولِ. 42قّيرّ تٌ مُ نُ نَ عٍ سٍسٍ يِ رَ، كْبِرِ كَنيِ نَشَ دِحّ عٍ قِرِن بِرِن شَ دٌنِ مَ. نَ مِشِ قِرِنيِ تَفِ، كْبِرِ كَنيِ رَقَنمَ ندٍ مَ دَنفِ بٌورٍ رَ؟» 43سِمْن نَشَ عَ يَابِ، «ﭑ لَشِ عَ رَ، نَشَن شَ دٌنِ نُ فبٌ بٌورٍ بّ.» عِسَ نَشَ عَ قَلَ عَ بّ، «عِ نْندِ.»
44نَ تّمُي عَ نَشَ عَ يَ رَقِندِ فِنّ مَ، عَ قَ عَ مَسٍن سِمْن بّ، «عِ يِ فِنّ تٌ؟ ﭑ سٌ نّ عِ شْنيِ، عِ مُ يٍ قِ ﭑ مَ ﭑ شَ ﭑ سَنيِيٍ مَشَ، كْنْ عَ تَن ﭑ سَنيِيٍ مَشَشِ عَ يَيٍ نَن نَ، عَ عٍ مَقُرُكُ عَ شُنسّشّ رَ. 45عِ تَن مُ ﭑ سُنبُ، كْنْ عَ تَن، كَبِ ﭑ سٌشِ عِ شْنيِ، عَ مُ بَشِ ﭑ سَنيِيٍ مَسُنبُقٍ. 46عِ تَن مُ تُرٍ مَسٌ ﭑ شُنيِ مَ، كْنْ عَ تَن لَبُندّ تُرٍ نَن مَسٌشِ ﭑ سَنيِيٍ مَ. 47نَ نَ عَ رَ، ﭑ شَ عَ قَلَ عِ بّ، عَ شَ يُنُبِيٍ نَشٍيٍ فبٌشِ نَ كِ، عٍ بَرَ شَقَرِ عَ بّ، بَرِ مَ عَ شَ شَنُنتٍيَ قَن فبٌ. كْنْ نَشَن شَ يُنُبِ شَقَرِشِيٍ شُرُن، نَ كَنيِ شَ شَنُنتٍيَ قَن شُرُن.»
48عِسَ نَشَ قَ عَ مَسٍن فِنّ بّ، «عِ شَ يُنُبِيٍ بَرَ شَقَرِ.» 49نَشٍيٍ نُ مَفٌرٌشِ عٍ دّفٍدٍ، نٍيٍ قَن نَشَ سٌ عَ قَلَقٍ عٍ يّتّ مَ، «ندٍ يِ رَ عَ تٌ يُنُبِ شَقَرِ مَ؟» 50عِسَ مَن نَشَ عَ مَسٍن فِنّ بّ، «عِ شَ دَنشَنِيَ بَرَ عِ رَكِسِ. سِفَ بْحّسَ كُي.»