عِسَ نُن سَكّيّ
1عِسَ تٌ سٌ يٍرِكٌ، عَ نُ تَا عِحّرّقٍ. 2شّمّ ندٍ نُ نَ نَشَن نُ شِلِ سَكّيّ. دُوتِ مَشِلِيٍ كُنتِفِ نَن نُ عَ رَ، عَ بَننَشِ. 3عَ نُ كَتَقٍ نّ عَ شَ عِسَ كٌلٌن، كْنْ عَ مُ نُ نْمَ عَ تٌدٍ حَمَ شَ قٍ رَ، بَرِ مَ مِشِ دُنكٍ نَن نُ عَ رَ. 4نَ كُي، عَ نَشَ عَ فِ يَرٍ، عَ سَ تٍ وُرِ بِلِ كْن نَ عَلَكٌ عَ شَ عِسَ تٌ دَنفِ رَ.
5عِسَ تٌ عَ يِرٍ لِ، عَ نَشَ عَ يَ رَتٍ، عَ عَ قَلَ عَ بّ، «سَكّيّ، فٌرٌ مَقُرٍن، بَرِ مَ ﭑ سَ يِفِيَمَ عِ شْنيِ نّ تٌ.» 6سَكّيّ نَشَ عَ شُلُن فٌرٌدٍ، عَ عِسَ رَ سّنّ حّلّشِنيِ كُي. 7مِشِيٍ تٌ نَ تٌ، عٍ بِرِن نَشَ سٌ عِسَ مَقَلَقٍ، عٍ نُ عَ قَلَ، «عَ بَرَ سَ يِفِيَ يُنُبِتْي شْنيِ.» 8كْنْ سَكّيّ نَشَ تِ، عَ عَ قَلَ عِسَ بّ، «مَرِفِ، ﭑ بَرَ نَتّ تٌنفٌ، ﭑ شَ ﭑ سْتْسٍ تَفِ قِمَ نّ قُشَرِلَيٍ مَ. شَ عَ سَ لِ ﭑ بَرَ سٍ بَ نَشَن يِ قُنمَيَ رَ، ﭑ عَ رَفبِلٍنمَ نّ عَ كَنيِ مَ دْشْ نَانِ.» 9عِسَ قَن نَشَ عَ مَسٍن عَ شَ قٍ رَ، «يِ قْشْي بَرَ كِسِ سْتْ تٌ، بَرِ مَ عِبُرَهِمَ شَ دِ نَن نَ يِ شّمّ قَن نَ. 10عَدَ مَ شَ دِ بَرَ قَ عَ شَ مِشِ لْيشِيٍ قٍن، عَ شَ عٍ رَكِسِ.»
مَنفّ شَ كْبِرِ تَشُشِ شَ تَالِ
مَتِيُ ٢٥؛١٤ ٬ ٣٠
11عِسَ تٌ نُ بَرَ مَكْرّ دَرِ سَلَمُ رَ، حَمَ حْشْ نُ عَ مَ، عَ عَلَ شَ مَنفّيَ نِينِ قَقٍ مَكّنّندٍ نّ كٍرٍن نَ. نَ كُي، مِشِيٍ تٌ نُ عِسَ شُي رَ مّقٍ، عَ نَشَ يِ تَالِ وْيّنيِ مَسٍن عٍ بّ. 12«كُنتِفِ ندٍ نَشَ سَ بِيَاسِ يِرٍ مَكُيٍ، عَلَكٌ مَنفّ شُنفبٍ نَشَن نُ سَبَتِشِ نَا، عَ شَ عَ تَن كُنتِفِ شْنيِ مَنفّيَ سٌ عَ يِ، عَ مَن شَ فبِلٍن عَ شْنيِ. 13بٍينُن عَ شَ سِفَ، عَ نَشَ عَ شَ كٌنيِ مِشِ قُ شِلِ، عَ فبٍتِ كْبِرِ كٌلٍ كّمّ سٌ عٍ بِرِن يِ رَ، عَ قَ عَ قَلَ عٍ بّ، ‹وٌ يُلّيَ رَبَ يِ كْبِرِ رَ بٍينُن ﭑ قَ تّمُي.›»
14«كْنْ عَ تٌ مُ نُ رَقَنشِ عَ شْنيِ مِشِ ندٍيٍ مَ، عٍ قَن نَشَ شّيرَيٍ شّي مَنفّ شُنفبٍ مَ، عٍ شَ عَ قَلَ، ‹مُشُ مُ وَ مَ عَ شْن يِ شّمّ شَ قِندِ مَنفّ رَ مُشُ شُن مَ.›»
15«نَ شّمّ تٌ مَنفّيَ سْتْ، عَ نَشَ فبِلٍن عَ شْنيِ. عَ نَشَ يَامَرِ قِ نَ كٌنيِيٍ شَ شِلِ، عَ نُ بَرَ كْبِرِ سٌ نَشٍيٍ يِ، عَلَكٌ عَ شَ عَ كٌلٌن عٍ فٍينِ نَشَن سْتْشِ يُلّيَ كُي. 16كٌنيِ سِنفٍ نَشَ قَ، عَ دّنتّفّ سَ، عَ نَشّ، ‹ﭑ مَرِفِ، عِ عِ شَ فبٍتِ كْبِرِ كٌلٍ كّمّ نَشَن سٌ نّ ﭑ يِ، عَ حْشْي دْشْ قُ بَرَ سَ عَ شُن فٍينِ رَ.› 17مَنفّ نَشَ عَ قَلَ عَ بّ، ‹عِ نُوَلِ! كٌنيِ قَنيِ نَن عِ رَ! عِ تٌ مُ لَنلَنتٍيَ كَنَ قٍ شُرِ كُي، ﭑ بَرَ مَنفّيَ سٌ عِ يِ تَا قُ شُن مَ.›»
18«كٌنيِ قِرِن ندٍ نَشَ قَ، عَ دّنتّفّ سَ، عَ نَشّ، ‹ﭑ مَرِفِ، عِ عِ شَ فبٍتِ كْبِرِ كٌلٍ كّمّ نَشَن سٌ نّ ﭑ يِ، عَ حْشْي دْشْ سُولِ بَرَ سَ عَ شُن فٍينِ رَ.› 19مَنفّ نَشَ عَ قَلَ نَ قَن بّ، ‹ﭑ بَرَ مَنفّيَ سٌ عِ قَن يِ تَا سُولِ شُن مَ!›»
20«كٌنيِ فبّتّ قَن نَشَ قَ، عَ دّنتّفّ سَ، عَ نَشّ، ‹ﭑ مَرِفِ، عَ مَتٌ، عِ شَ فبٍتِ كْبِرِ كٌلٍ كّمّ نَن يَ. ﭑ سَ عَ رَفَتَ دُنكٌبِ نَن كُي، 21بَرِ مَ ﭑ فَاشُ نّ عِ يَ رَ. شّمّ نَن عِ رَ، عِ شَ قٍ مَشْرْشْ. عِ سٍ تٌنفٌمَ عِ فبٍ مُ نَشَن نَ. عِ شّ شَبَمَ عِ مُ نَشَن فَرَنسَن.› 22مَنفّ نَشَ عَ يَابِ، ‹عِ تَن كٌنيِ كٌبِ، ﭑ عِ مَكِيتِمَ عِ يّتّ كَن شُي نَن يَتِ مَ! عَ دِ، عِ مُ عَ قَلَ عَ عِ نُ عَ كٌلٌن عَ ﭑ مَ قٍ مَشْرْشْ؟ عِ نَشّ، عَ ﭑ سٍ تٌنفٌمَ ﭑ فبٍ مُ نَشَن نَ، ﭑ شّ شَبَمَ ﭑ مُ نَشَن فَرَنسَن. 23مُنقٍ عَ تٌ عِ مُ ﭑ مَ كْبِرِ سٌ كْبِرِ رَوَلِيٍ يِ رَ، عَلَكٌ ﭑ نَ قَ، عِ عَ رَفبِلٍن ﭑ مَ فٍينِ سَشِ عَ شُن؟› 24عَ نَشَ عَ قَلَ مِشِيٍ بّ نَشٍيٍ نُ تِشِ نَ، ‹وٌ نَ فبٍتِ كْبِرِ كٌلٍ كّمّ رَ سُشُ عَ يِ، وٌ عَ سٌ بٌورٍ يِ نَشَن فبٍتِ كْبِرِ كٌلٍ وُلُ كٍرٍن سْتْشِ.› 25عٍ نَشَ عَ قَلَ مَنفّ بّ، ‹مَرِفِ، فبٍتِ كْبِرِ كٌلٍ وُلُ كٍرٍن حَن نَ عَ يِ!› 26عَ نَشَ عٍ يَابِ، ‹ﭑ شَ عَ قَلَ وٌ بّ، عَ نَ نَشَن يٌ يِ رَ، عَ فبٍ شُن مَسَمَ نّ. كْنْ عَ مُ نَ نَشَن يِ رَ، هَلِ نَشَن دِ نَ عَ يِ، نَ يَتِ بَمَ نّ عَ يِ رَ. 27كْنْ ﭑ يَشُييٍ تَن، نَشٍيٍ مُ نُ وَ مَ ﭑ شَ قِندِ مَنفّ رَ عٍ شُن مَ، وٌ قَ عٍ رَ بٍ، وٌ عٍ قَشَ ﭑ يَ شْرِ.›»
عِسَ سٌقٍ دَرِ سَلَمُ
مَتِيُ ٢١؛١ ٬ ١١، مَرَكِ ١١؛١ ٬ ١٠
28عِسَ تٌ فّ نَ مَسٍنيِ رَ، عَ نَشَ سِفَ يَرٍ، سِفَقٍ رَ دَرِ سَلَمُ. 29عَ تٌ مَكْرّ بٍتِقَفٍ نُن بٍتَنِ تَايٍ رَ، عٌلِوِ فٍيَ قّ مَ، عَ نَشَ عَ قْشِرَبِرّيٍ مِشِ قِرِن شّي، 30عَ عَ قَلَ عٍ بّ، «وٌ شَ سٌ تَا كُي نَشَن نَ يَرٍ. وٌ نّقّ سٌ نَا، وٌ سٌقَلٍ لَنمَ لِمَ عَ شِرِشِ نَا، مِشِ مُ نُ دْشْ نَشَن قَرِ. وٌ شَ عَ قُلُن، وٌ قَ عَ رَ بٍ. 31شَ مِشِ ندٍ قَ وٌ مَشْرِن، ‹وٌ عَ قُلُنقٍ مُنقٍ رَ› وٌ شَ عَ يَابِ، ‹مَرِفِ نَن هَيِ نَ عَ مَ.›»
32عٍ تٌ سِفَ شّيرَيَ رَبَدٍ، عٍ نَشَ قٍ بِرِن لِ عَلْ عِسَ عَ قَلَ عٍ بّ كِ نَشّ. 33عٍ نُ نَ سٌقَلٍ لَنمَ قُلُنقٍ تّمُي نَشّ، عَ كَنيِيٍ نَشَ عٍ مَشْرِن، «وٌ يِ سٌقَلٍ قُلُنقٍ مُنقٍ رَ؟» 34عٍ نَشَ عَ مَسٍن، «مَرِفِ نَن هَيِ نَ عَ مَ.» 35عٍ تٌ سٌقَلٍ شَنِن عِسَ شْن، عٍ نَشَ عٍ شَ دٌنمَيٍ سَ عَ قَرِ، عٍ قَ عِسَ مَلِ عَ شَ عَ مَفٌرٌ عَ مَ. 36عَ تٌ نُ سِفَمَ، مِشِيٍ نُ عٍ شَ دٌنمَيٍ عِتَلَمَ كِرَ شْن مَ، عِسَ بِنيَقٍ رَ.
37عَ تٌ نُ مَكْرّقٍ دَرِ سَلَمُ رَ، عَ فٌرٌقٍ عٌلِوِ فٍيَ رَ، عَ قْشِرَبِرّ فَلِ بِرِن نَشَ سّيوَ، عٍ سٌ عَلَ مَتْشْقٍ عٍ شُي عِتٍشِ رَ كَابَنَكٌ بِرِن شَ قٍ رَ عٍ نُ بَرَ نَشٍيٍ تٌ. 38عٍ نُ عَ قَلَقٍ نّ،
«بَرَكَ نَ مَنفّ بّ نَشَن قَقٍ مَرِفِ شِلِ رَ!
بْحّسَ نَ عَرِيَننَ،
مَتْشْي نَ عَلَ بّ هَن كٌورٍ مَ!»
39قَرِ سّنِ ندٍ نَشٍيٍ نُ نَ حَمَ تَفِ، عٍ نَشَ عَ قَلَ عِسَ بّ، «كَرَ مْشْ، وْيّن عِ قْشِرَبِرّيٍ بّ!» 40عِسَ نَشَ عٍ يَابِ، «ﭑ شَ عَ قَلَ وٌ بّ، شَ عٍ تَن عٍ سَبَرِ، فّمّيٍ يَتِ قَمَ نّ عٍ شُي رَ مِنِدٍ.»
41عِسَ تٌ مَكْرّ دَرِ سَلَمُ رَ، عَ نَشَ نَ تَا تٌ، عَ نَشَ وَ قْلْ نَا شَ قٍ رَ، 42عَ عَ مَسٍن، «عِ تَن دَرِ سَلَمُ، تٌ تَن، هَلِ عِ قَن عَ كٌلٌن نّ نُ قٍيٍ نَشٍيٍ بْحّسَ قِمَ! كْنْ نَ بَرَ نْشُن عِ مَ. 43تّمُي قَمَ عَ لِدٍ، وٌ يَشُييٍ بّندّ مَلَنمَ نّ تَا تّتّ قَرِ مَ عَلَكٌ عٍ شَ نْ سٌدٍ تَا كُي. عٍ قَمَ وٌ رَبِلِندٍ مَرَشّتّنيِ رَ. 44عٍ قَمَ عِ تَن دَرِ سَلَمُ رَبِرَدٍ، عٍ عِ شَ دِيٍ سْنتْ. عِ شَ بَنشِيٍ تِشِ فّمّيٍ نَشٍيٍ رَ، كٍرٍن مُ لُمَ عَ بٌورٍ قَرِ. يِ بِرِن قَمَ عِ تَن دَرِ سَلَمُ لِدٍ بَرِ مَ عَلَ تٌ قَشِ كِسِ رَ عِ شْن، عِ مُ عَ كٌلٌنشِ.»
سَرٍ مَتِيٍ كٍرِقٍ هْرْ مْبَنشِ كُي
مَتِيُ ٢١؛١٢ ٬ ١٧، مَرَكِ ١١؛١٥ ٬ ١٩
45عِسَ تٌ سٌ هْرْ مْبَنشِ كُي، عَ نَشَ سَرٍ مَتِيٍ كٍرِ قْلْ، 46عَ عَ قَلَ عٍ بّ، «عَ سّبّشِ، ‹ﭑ مَ بَنشِ شِلِ قَلَمَ نّ، سَلِدٍ بَنشِ،› كْنْ وٌ تَن بَرَ عَ قِندِ مُحّتِيٍ دْشْدٍ رَ.»
47لْشْ يٌ لْشْ عِسَ نُ مِشِيٍ كَوَندِ مَ هْرْ مْبَنشِ كُي. سّرّشّدُبّ كُنتِفِيٍ، سّرِيّ كَرَ مْشْيٍ، نُن حَمَ يَرٍرَتِيٍ نُ نَ قّيرّ قٍنقٍ عٍ نْمَ عِسَ قَشَدٍ كِ نَشّ. 48كْنْ عٍ مُ نُ قّيرّ يٌ كٌلٌن بَرِ مَ حَمَ بِرِن نُ عَ تُلِ مَتِشِ عَ رَ.